Mavuala, Landulenu Gukula mu Nyuma Gungima dia Gubatijiwa

1. Ndaga jitshi jiabonga mavuala avula akalegele gale?

GIVO nu givo, mavuala avula ana batijiwa. Aye nji wabatijiwe gale ba? Gula idi ngenyi, aphangi a mala nu a akhetu adi nu gusuanguluga guavula mukunda nu aye. Yehowa nji wana suanguluga nu aye. (Ish. 27:11) Tangiza gale ndaga jiavula jinyi wakalegele gale. Ha gufezegesa, watshitshile ngolo ha gulonguga Biblia, yajiya gukhala egi yazudile ivo yavula. Ulongugi waye wa Biblia wagukuatesele ha gutshigina egi Biblia idi Mbimbi ya Nzambi. Ndaga yabalega ndando idi egi, yagukuatesele ha gujiya nu guzumba Nzambi. Guzumba guaye mukunda nu Yehowa guakudile, guagutumile ha gudihana nu ha gubatijiwa. Wazudile diago desizio diabonga!

2. Itshi tuza muzuelela mu longo edi?

² Gutuama egi ubatijiwe, yajiya gukhala egi watagenele nu ndaga jiatshitshile egi ikhale lamba ha gusala ya gujinginyina gudi Yehowa. Uvi luholo udi mukula, mbawutagana nu malamba ako. Satana mbawutshita yagasue hagula ubembe guzumba Yehowa nu ubembe gumukombelela. (Ef. 4:14) Ushigo naye gubemba egi ndaga yene ikalegewe. Itshi yajiya gugukuatesa ha gusala ya gujinginyina gudi Yehowa nu gutagenesa ndaga wamulayele ha gumukombelela? Udi naye gulandula gutshita ngolo ha “gubua” Muklisto wagukula mu nyuma. (Heb. 6:1) Luholo lutshi wajiya guyitshita?

ITSHI WAJIYA GUTSHITA HA GUKULA MU NYUMA?

3. Itshi Aklisto agasue adi naye gutshita gungima dia gubatijiwa?

³ Mukut’etu agasue gungima dia gubatijiwa, tudi naye gutshita ngolo ha gulandula malongo Phaula wahanele aphangi a gu Efeso. Waakolesele ha “gubua athu a gukula”. (Ef. 4:13) Idi mukotelesa egi akhalele naye gutshita ngolo ha ‘gulandula gukula mu nyuma.’ Phaula wafuanesele gukula mu nyuma nu luholo mona wana kula. Mvuaji jiana zumba mun’awo wazonda nu ana khala nu gusuanguluga mukunda nu mona muene. Uvi mona muene gajiyilego gusala khuta mona wazonda. Wana kula nu wana bemba “makalegelo a ana azonda.” (1 Kol. 13:11) Idi nji luholo lumoshi nu Aklisto. Gungima dia gubatijiwa, tudi naye gulandula gukula mu nyuma. Henyaha, tuzuelelenu ndaga jiajiya gutukuatesa ha gutshita ngenyi.

4. Ha gutadila Filiphi 1:9, khadilo ditshi diajiya gugukuatesa ha gukula mu nyuma? Kotelesa.

⁴ Kudisa guzumba guaye mukunda nu Yehowa. Wana zumba gale Yehowa muavula. Uvi wajiya nji gumuzumba muavula gubalega. Luholo lutshi? Mupostolo Phaula wamonesele ndaga yene mu Filiphi 1:9. (Tanga.) Phaula wakombelele hagula aphangi a gu Filiphi akhale nu “guzumba guavula diago.” Hene, tuajiya gukudisa guzumba guetu mukunda nu Yehowa. Tuajiya gutshita ngenyi gula tuaheta “ujiyi wa giamatshidia nu ukoteleshi watagana.” Gula tudi mukamba gujiya Yehowa muabonga, mbayitukuatesa ha gumuzumba muavula, mbatusuanguluga nji nu makalegelo enji nu luholo luenji lua gukalagala ndaga. Luholo tuana tshita ngolo ha gumusuanguluisa, tuana tuna gutshita ndaga yajiya gumusagesa. Tuana tshita yagasue ha gukotelesa gutshigina guenji nu luholo tuajiya gukalagala ndaga jiana gututoga muene.

5-6. Luholo lutshi tuajiya gukudisa guzumba guetu mukunda nu Yehowa? Kotelesa.

⁵ Yesu walanduile diago muabonga makalegelo a Yehowa. Hene gula tudi mutshita yagasue ha gujiya Yesu muabonga, mbayitukuatesa ha guzumba Yehowa muavula. (Heb. 1:3) Ha gujiya Yesu muabonga, tudi naye gulonguga mene jidi mu ba Evanjile nguana. Gula wana khalago nu khadilo dia gutanga Biblia lusugu nu lusugu, henyaha wajiya guzula desizio dia gutanga mene jiana zuelela Yesu. Tangua udi mutanga mene jiene, kamba gujiya muabonga makalegelo enji. Athu akhalele mutshigina gukhala nu Yesu nu guta n’enji maga. Wakhalele muzangula ana azonda ha mago enji. (Mako 10:13-16) Yesu wakhalele nu ufuta wabonga nu alandudi enji, hene akhalelego muvua woma ha gumuwambela ndaga akhalele mutangiza. (Mat. 16:22) Ndaga eji jidi mumonesa egi Yesu walanduile diago gifezegeselo gia Sh’enji wa mu dilu. Idi gutukuatesa ha gujiya egi tuajiya gusuena hehi nu Yehowa nu guta n’enji maga mu gisambu. Tangua tudi mukombelela tuajiya gumuwambela ndaga jiagasue tudi najio mu mutshima. Tudi musha mutshima egi muene mbagashigo gutuvila khabu. Yehowa wana gutuzumba nu wana gudisagesa mukunda nu esue.—1 Phet. 5:7.

⁶ Yesu wakhalele muvila athu khenda. Mupostolo Matayo wasonegele egi: “Tangua diamonele muene athu avula, waavidile khenda handaga ene akhalele mumona lamba nu guwungagana gifua imeme ishigo nu mubambi.” (Mat. 9:36) Yehowa wana gudivua gikuatshi mu ndaga jia luholo elu? Yesu wazuelele egi: “Tata wami udi mu dilu ganago gutshigina egi mona mungoshi mukatshi dia ana awa azonda afue.” (Mat. 18:14) Mbimbi eji jidi diago gutuhana gikhesa! Gula tudi mukamba gujiya Yesu muabonga, mbayitukuatesa ha gukhala nu guzumba guakola mukunda nu Yehowa.

7. Luholo lutshi gubalegesa tangua hamoshi nu aphangi a gukula mu nyuma guajiya gugukuatesa?

⁷ Gula udi mubalegesa tangua hamoshi nu aphangi a gukula mu nyuma, mbaagukuatesa ha gukudisa guzumba guaye nu ha gubua Muklisto wa gukula mu nyuma. Mbawukotelesa egi phangi ene ana khala diago nu gusuanguluga. Anago gudibela mukunda nu desizio azudile dia gukalegela Yehowa. Khala guatoga ha guguwambela ba eksperianse ahetele gale mu mudimo wa Yehowa. Atoge malongo tangua udi nu funu ya guzula desizio dimoshi dia ndando. Jiya egi: ‘Ndaga jianayila muabonga gula ahanyi a malongo adi avula.’—Ish. 11:14.

8. Itshi wajiya gukalagala gula udi nu ba dute mukunda nu ndaga Biblia yana longesa?

⁸ Gutuna gukhala nu ba dute. Gifua luholo tuayimonyi mu paragrafe ya mbadi, Satana mbawutshita yagasue ha gugukanga njila ha gukula mu nyuma. Wajiya gutshita yagasue hagula ukhale nu ba dute mu malongo a Biblia. Ha gufezegesa, athu ako ajiya gukamba gugutshiginyisa egi ishigo Nzambi wafugile ima yagasue, uvi yadizogele yene hakhayo. Yajiya gukhala egi tangua wakhalele mona wazonda wakhalelego mutangiza ndaga yene, uvi henyaha wakula mbala jiko gu khalasa ana gumilongesa ndaga jiene. Ndaga jiana longesa alongeshi enu gukhalasa mukunda nu longo dia évolution, jiajiya gumonega gifua jidi jia giamatshidia. Uvi yajiya gukhala egi ene ana kamba ndo gujiya ndaga jidi mumonesa egi Nzambi wafugile ima yagasue. Ujimbilago longo didi mu Ishima 18:17 idi muzuela egi: “Muthu wana diangela gusamba milonga wana muenega gifua udi mu njila hadi mbalagaji wenji khenji gahudiwa gale ndo.” Ha fundo diagulaba gutshigina ndaga jiagasue wana longuga gukhalasa, kamba gujiya muabonga ndaga Biblia yana zuela. Khala mutshita ba recherche mu mikanda yetu. Wajiya guta maga nu aphangi akhalele mutshigina thomo longo dia évolution. Wajiya guahula ha gujiya ndaga jiaakuatesele ha gutshigina egi Mufugi wakhala guene. Gutshita ngenyi guajiya gutukuatesa ha gujiya ndaga jidi mumonesa egi Nzambi wafugile ima yagasue.

9. Longo ditshi wazula mu eksperianse ya phangi Melissa?

⁹ Phangi Melissa watshitshile ba recherche mu ndaga yatadila ima yafugiwe, yamukuatesele ha gutuna gukhala nu ba dute.b Udi muzuela egi: “Gu khalasa, tangua alongeshi akhalele mulongesa longo dia évolution, yakhalele mumonega gifua ndaga jiene jidi diago jia giamatshidia. Thomo, ngakhalelego mutshigina gutshita ba recherche handaga ngakhalele muvua woma egi ngajiya gumona ndaga jidi mumonesa egi longo dia évolution didi dia giamatshidia. Uvi ngawungulugile egi Yehowa wana tshigina egi tukhale nu ndaga jiabonga jidi gututuma ha gumukombelela. Hene ngasendesele gutshita ba recherche. Ngatangele mukanda, Y a-t-il un Créateur qui se soucie de vous ? nu gamukanda, La vie a-t-elle été créée ? nu Cinq questions à se poser sur l’origine de la vie. Yene ndaga ngakhalele diago naye funu. Ngudi nu gusuanguluga luholo ngatshitshile ba recherche ene muphushi.”

10-11. Itshi yajiya gugukuatesa ha gulandula gukhala nu matangi abonga? (1 Tesalonike 4:3, 4)

¹⁰ Tuna makalegelo abola. Mu sungi ya ulenge nzala jia gubungisa muila jiana khala jiakola, hene matangua ako athu ako ajiya gugushinjiga ha gutshita uthambi. Satana wana tshigina egi utshite ndaga jia luholo elu. Itshi yajiya gugukuatesa ha gutuna gubua mu muheto wene? (Tanga 1 Tesalonike 4:3, 4.) Tangua udi musamba, wambela Yehowa luholo udi gudivua nu mutoge aguhane gikhesa. (Mat. 6:13) Ushigo naye gujimbila egi Yehowa wana tshigina gugukuatesa uvi ndo guguvila khabu. (Ngi. 103:13, 14) Biblia nji yajiya gugukuatesa. Phangi Melissa tuazuelela gu thunda wakhalele mutshita ngolo ha gubemba matangi abola. Udi muzuela egi: “Gutanga Biblia lusugu nu lusugu guangukuatesele ha gubemba matangi abola. Ngawungulugile egi ngadihanele gale gudi Yehowa nu ngudi naye gumukalegela mu monyo wami.”—Ngi. 119:9.

¹¹ Ukambigo gumanesela ndaga udi mutagana najio hakhaye. Wambela mvuaji jiaye ndaga jiene. Yana khala lamba ha guwambela athu ndaga jidi gugusagesa, uvi idi nu ndando ha gutshita ngenyi. Phangi Melissa udi muzuela egi: “Ngakombelele Yehowa ha gunguhana gikhesa, ngawambelele nji tata ndaga yakhalele gungusagesa. Gungima ngadivile diago muabonga. Ngajiyile egi Yehowa wasuangulugile diago nu ame.”

12. Itshi yajiya gugukuatesa ha guzula ba desizio abonga?

¹² Khala mulandula malongo a Biblia. Luholo udi mukula, mvuaji jiaye mbajiguhana njila ha guzula ba desizio aye hakhaye. Uvi jiye egi ushigo nu eksperianse yavula. Itshi yajiya gugukuatesa ha gutuna gukalagala ndaga yajiya gubolesa ufuta waye nu Yehowa? (Ish. 22:3) Phangi wa mukhetu Kari udi mumonesa ndaga jiamukuatesele ha guzula ba desizio abonga. Wakotelesele egi Aklisto a gukula mu nyuma ana khalago nu funu ya mikhuala mu ndaga jiagasue. Udi muzuela egi: “Ngakhalele nu funu ya gukotelesa muabonga malongo a Biblia ha fundo dia gujiya phamba mikhuala.” Tangua udi mutanga Biblia dihule egi: ‘Verse eyi idi gungulongesa itshi mukunda nu Yehowa? Idi nu malongo ajiya gungukuatesa ha gukalagala ndaga jiabonga? Gula idi ngenyi, gubonga gutshi mbanguheta gula ngakalegela malongo ene?’ (Ngi. 19:7; Yesh. 48:17, 18) Gutanga Biblia nu gutangingiza ndaga udi mulonguga mbayigukuatesa ha guzula ba desizio ana suanguluisa Yehowa. Luholo udi mulandula gukula, mbawujiya egi ushigo nu funu ya mikhuala mu ndaga jiagasue handaga mbawukotelesa gutshigina gua Yehowa mu ndaga jiavula.

13. Ha gutadila Ishima 13:20 luholo lutshi mafuta abonga ajiya gugukuatesa?

¹³ Kuata ufuta nu athu ana zumba Yehowa. Gifua luholo tuayimonyi, mafut’etu ajiya gutukuatesa ha gubua Aklisto a gukula mu nyuma nga ndo. (Tanga Ishima 13:20.) Phangi Sara mudimo wenji wafuile. Gungima ndaga imoshi yamukuatesele ha gukhala luko nu gusuanguluga guavula. Udi muzuela egi: “Ngahetele mafuta abonga mu tangua diatagana. Phoso nu phoso ame nu phangi mumoshi wa mukhetu tuakhalele mulondega Inzo Yaleha ya Mutaledi. Futa diami muko wangukuatesele ha gusendesa guhana komantere mu gudibungisa gua mu hungu. Luholo mafut’ami angukuatesele, ngasendesele guzula tangua diavula ha gukalagala ulongugi wa Biblia hakhami nu gusamba Yehowa. Ngasendesele gukolesa ufuta wami nu Yehowa, ngahetele luko gusuanguluga guavula.”

14. Itshi yakuatesele phangi Julien ha gukuata mafuta abonga?

¹⁴ Luholo lutshi wajiya gukuata mafuta abonga anyi ajiya gugukuatesa? Phangi Julien udi mukulu udi muzuela egi: “Tangua ngakhalele muvuala, ngakhalele mukuata mafuta abonga mu mudimo wa gulongesa. Aphangi ene akhalele diago mulongesa nu gikhesa, angukuatesele ha gusuanguluga nu mudimo wa gulongesa. Ngasendesele gusuanguluga nu mudimo wa tangua diagasue. Ngakotelesele egi ngakhalelego nu mafuta avula abonga handaga ngakhalele mukuata mafuta phamba nu athu a gindongo giami. Gungima ngahetele nji mafuta abonga gu Betele fundo ngana tshita. Gifezegeselo giawo giangukuatesele ha gutomba muabonga saga ngudi naye gukalagala nu ha gukolesa ufuta wami nu Yehowa.”

15. Ha gutadila 2 Timote 2:20-22 ndaga itshi Phaula wawambelele Timote mukunda nu mafuta?

¹⁵ Itshi wajiya gutshita gula wakotelesa egi phangi mumoshi mu hungu gashigo futa diabonga mukunda nu aye? Phaula wakhalele mujiya egi mu hungu dia Uklisto dia mu siekle ya thomo athu ako akhalele nu makalegelo abola, hene watemesele Timote hagutuna gukuata ufuta nu athu ene. (Tanga 2 Timote 2:20-22.) Ufuta wetu nu Yehowa udi diago nu ndando yavula. Tuatshitshile gale ngolo ha gukolesa ufuta wetu nu Yehowa, hene tushigo naye gubemba egi nga muthu mumoshi abolese ufuta wene.—Ngi. 26:4.

GUDISHILA MAFELELA GUAJIYA GUGUKUATESA HA GUKULA MU NYUMA

16. Mafelela atshi wajiya gudishila?

¹⁶ Khala gudishila mafelela abonga. Wajiya gutshita ndaga jiajiya gugukuatesa ha gukolesa gutshigina guaye nu ha gukula mu nyuma. (Ef. 3:16) Ha gufezegesa, wajiya guzula desizio dia gulonguga Biblia hakhaye nu guyitanga lusugu nu lusugu. (Ngi. 1:2, 3) Wajiya nji guzula desizio dia gutshita gisambu muavula nu gulondega muabonga ndaga udi naye guzuela mu isambu yaye. Wajiya nji gutadila muabonga saga wana tomba nu luholo wajiya gukalegela tangua diaye muabonga. (Ef. 5:15, 16) Gula udi mutshita ngolo ha gukula mu nyuma, Yehowa mbawusuanguluga nu aye.

17. Gubonga gutshi mbawuheta gula udi mukuatesa athu ako?

¹⁷ Gula udi mukuatesa athu ako mbawubua Muklisto wa gukula mu nyuma. Yesu wazuelele egi: “Muthu udi muhana wana khala nu gusuanguluga guavula gubalega muthu udi muzula.” (Makal. 20:35) Mbawuheta gusuanguluga guavula gula udi mukalegela tangua diaye nu ngolo jiaye ha gukuatesa athu ako. Wajiya guzula desizio dia gukuatesa athu agukola nu anyi adi nu ukhashi mu hungu dienu. Ha gufezegesa, wajiya guakuatesa ha gukalegela ba apareyi nga mu midimo iko. Gula udi phangi wa yala, wajiya gudishila felela dia gubua mukuateshi wa mudimo, ngenyi mbawukuatesa muavula aphangi a mala nu a akhetu. (Fili. 2:4) Wajiya nji gumonesa guzumba guaye gudi athu anyi ashigo Matemue a Yehowa gula udi gualongesa lukuma luabonga lua Ufumu. (Mat. 9:36, 37) Gula luholo ludi guene, wajiya gudishila felela dia gutshita mudimo wa tangua diagasue.

18. Luholo lutshi gukalagala mudimo wa tangua diagasue guajiya gugukuatesa ha gukula mu nyuma?

¹⁸ Mudimo wa tangua diagasue wajiya gugukuatesa ha gukula mu nyuma. Gutshita mudimo wa muvundji wa njila wa tangua diagasue, wajiya gugukuatesa ha gungina mu Khalasa dia Alongeshi a Ufumu. Wajiya nji gugukuatesa ha guya gu Betele nga ha guhana mago mu mudimo wa gutunga Jinzo jia Ufumu. Phangi wa mukhetu Kaitlyn udi muvundji wa njila udi muzuela egi: “Gukalagala mudimo wa gulongesa hamoshi nu aphangi a mala nu a akhetu anyi akhalele nu eksperianse yavula, guangukuatesele ha gukula mu nyuma gungima dia gubatijiwa guami. Gifezegeselo giawo giangukuatesele ha gulonguga luko Biblia muabonga nu gukudisa luholo luami lua gulongesa.”

19. Gubonga gutshi mbawuheta gula udi mulandula gukula mu nyuma?

¹⁹ Gula udi mulandula gukula mu nyuma, mbawuheta gubonga guavula. Mbawushigo mukalegela ngolo jiaye mu ndaga jishigo nu ndando yavula. (1 Yone 2:17) Mbawushigo nji mutagana nu malamba ana buila athu gula azula ba desizio abola. Uvi mbawuheta gusuanguluga guavula nu mbawubinga mu ndaga jiagasue udi mutshita. (Ish. 16:3) Gifezegeselo giaye giabonga mbagihana aphangi agasue gikhesa giavula. (1 Tim. 4:12) Ndaga yabalega ndando idi egi mbawuheta guhuima nu gusuanguluga guavula handaga udi musuanguluisa Yehowa nu udi nu ufuta wakola n’enji.—Ish. 23:15, 16.