LONGO DIA 30
Landula Gukudisa Guzumba Guaye
“Tukudisenu guzumba mu ndaga jiagasue.”—EF. 4:15.
LUNGIMBO 2 Jina Diaye Yehowa
NDAGA JIDI MU LONGO EDIa
1. Ndaga jitshi walongugile tangua wasendesele gulonguga Biblia?
WANA wunguluga luko ndaga jiagasue walongugile tangua wasendesele gulonguga Biblia? Yajiya gukhala egi wadihudile ha gujiya egi Nzambi wana khala nu jina. Yajiya nji gukhala egi wasuangulugile tangua wajiyile egi Nzambi gana hana ndo athu lamba mu zanga dia tshuya. Wasuangulugile nji ha gujiya egi mbawumona luko athu wakhalele muzumba anyi afile nu mbawujinga nawo hamoshi mu phaladiso.
2. Ndaga tshi jiko walongugile ha gukudisa ujiyi waye wa Biblia? (Efeso 5:1, 2)
2 Ndaga jiavula walongugile mu Mbimbi ya Nzambi, jiagutumile ha guzumba Yehowa muavula. Guzumba guene guagutumine ha gukalegela ndaga walongugile. Wazudile badesizio abonga adi gudivua nu malongo a Biblia. Watshitshile ngolo ha gutangigiza nu gutshita ndaga jiabonga handaga wana tshigina gusuanguluisa Nzambi. Walanduile gifezegeselo gia Tata waye wa mu dilu, gifua luholo mona wana landula gifezegeselo gia sh’enji.—Tanga Efeso 5:1, 2.
3. Mihu tshi tuajiya gudihula?
3 Tuajiya gudihula egi: ‘Mangino ngana zumba Yehowa muavula gifua luholo ngakhalele gumuzumba thomo tangua ngabuile Muklisto ba? Sendese tangua ngabatijiwe, ndaga ngana tangiza nu jinyi ngana kalagala jiana monesa egi ngana landula gifezegeselo gia Yehowa mu ndaga yatadila guzumba aphangi a mala nu a akhetu ba?’ Gula ushigo luko nu “guzumba gunu wakhalele nago thomo,” ulebigo muila. Ndaga yene yabuidile nji Aklisto a mu siekle ya thomo, uvi Yesu gaatunyilego, mbagashigo nji gututuna. (Gumo. 2:4, 7) Yesu wana jiya egi tuajiya luko gukudisa guzumba tuakhalele nago thomo tangua tuabuile Aklisto.
4. Itshi tuza mumona mu longo edi?
4 Longo edi diza gutukuatesa ha gujiya luholo tuajiya gukudisa guzumba guetu mukunda nu Yehowa nu athu ako. Tuza nji mumona ndaga jiabonga mbatuheta gula tudi muzumba Yehowa nu athu ako.
KUDISA GUZUMBA GUAYE MUKUNDA NU YEHOWA
5-6. Malamba atshi mupostolo Phaula watagenele nawo mu mudimo wenji wa gulongesa? Uvi itshi yamukuatesele ha gulandula gukombelela Yehowa?
5 Mupostolo Phaula wakhalele musuanguluga gutshitshila Yehowa mudimo, uvi watagenele nji nu malamba avula. Mbala jiavula, Phaula wawendele mu njila jialeha, uvi mu sungi yenji guwenda mu njila jialeha guakhalelego ndaga yaleba. Wakhalele mutagana nu ingonza “mu mita,” nu “nzangi” mu njila jiakhalele muya muene. Matangua ako, mbalagaji jienji jiamubetele. (2 Kol. 11:23-27) Aklisto ako akhalelego musuanguluga nga hazonda nu ndaga jiakhalele mukalagala Phaula ha guakuatesa.—2 Kol. 10:10; Fili. 4:15.
6 Itshi yakuatesele Phaula ha gulandula gukalegela Yehowa mudimo? Walongugile ndaga jiavula jiatadila makalegelo a Yehowa mu Mbimbi ya Nzambi, nu mu ndaga jiamubuidile mu monyo wenji. Phaula wakhalele mujiya diago egi Yehowa wakhalele gumuzumba. (Roma 8:38, 39; Ef. 2:4, 5) Muene nji wakudishile guzumba guenji mukunda nu Yehowa. Phaula wamonesele egi wakhalele muzumba Yehowa ‘luholo luakalegele muene athu a gijila mudimo nu lualanduile muene guakalegela.’—Heb. 6:10.
7. Luholo lutshi tuajiya gulandula gukudisa guzumba guetu mukunda nu Yehowa?
7 Tuajiya gukudisa guzumba guetu mukunda nu Yehowa gula tudi mulonguga muabonga Mbimbi yenji. Tangua udi mutanga Biblia, kamba gukotelesa ndaga verse jiagasue udi mutanga jidi gugulongesa mukunda nu Yehowa. Dihule egi: ‘Luholo lutshi ndaga ngudi mutanga jidi mumonesa egi Yehowa wana gunguzumba? Mu luholo lutshi ndaga jiene jidi gungutuma ha guzumba Yehowa?’
8. Luholo lutshi gisambu giajiya gutukuatesa ha gukudisa guzumba guetu mukunda nu Nzambi?
8 Luholo luko tuajiya gukudisa guzumba guetu mukunda nu Nzambi ludi gutshita gisambu lusugu nu lusugu, nu gumuwambela luholo tudi gudivua. (Ngi. 25:4, 5) Yehowa mbawuhana mvutu gu isambu yetu. (1 Yone 3:21, 22) Phangi’etu wa mukhetu Khanh gu Asie udi muzuela egi: “Thomo ngakhalele muzumba Yehowa handaga angulongesele egi wana khala guene, uvi tangua ngamonele luholo luakhalele muene muhana mvutu gu isambu yami, ngamuzumbile luko muavula gubalega. Yangutumile ha gukalagala ndaga jiana gumusuanguluisa.”b
KUDISA GUZUMBA GUAYE MUKUNDA NU ATHU AKO
9. Luholo lutshi Timote wamonesele egi udi mukudisa guzumba mukunda nu athu ako?
9 Tangua Phaula wabuile Muklisto, gungima dia ivo yazonda watagenele nu muvuala mumoshi, jina dienji Timote. Timote wakhalele muzumba Yehowa, wakhalele nji muzumba athu ako. Phaula wasonegele Aklisto a gu Filiphi egi: “Ngushigo nu muthu muko udi nu khadilo gifua [Timote] nu wana gudisagesa muavula mukunda nu enue.” (Fili. 2:20) Mu verse eyi Phaula gashigo muzuelela ndunge jia Timote nga luholo luenji lua gulongesa muabonga, uvi udi gumushimana mukunda nu guzumba guenji mukunda nu aphangi a mala nu a akhetu. Idi naye gukhala egi, aphangi a mu mahungu anyi akhalele muene mutala, akhalele musuanguluga egi Timote aye a atale.—1 Kol. 4:17.
10. Luholo lutshi Anna nu mulumi’enji amonesele egi akhalele muzumba aphangi a mala nu a akhetu?
10 Esue nji tuana kamba maluholo a gukuatesa aphangi’etu a mala nu a akhetu mu hungu. (Heb. 13:16) Tuzuelelenu gifezegeselo gia Anna, munu tuazuelela mu longo diabalega. Gungima dia funji yakola, muene nu mulumi’enji ayile mutala fami imoshi ya Matemue a Yehowa. Tangua ahetele guene, amonele luholo funji yamuangele yangi dia inzo ya aphangi ene. Enya fami yene akhalele nu milele ya mvindu. Anna udi muzuela egi: “Tuawevele milele yawo, tuayingomele, tuayibugile, gungima tuaahanele nayo. Yakhalelego lamba ha guawevela milele yene, uvi luholo tuayiwevele, tuabuile mafuta akola uu nu mangino.” Anna nu mulumi’enji ana zumba aphangi muavula, hene ana guakuatesa.—1 Yone 3:17, 18.
11. (a) Luholo tshi athu ana gudivua tangua tuana monesa egi tuana guazumba? (b) Ha gutadila Ishima 19:17, itshi Yehowa wana tshita tangua tuana monesela athu ako guzumba?
11 Gula tudi mumonesela athu ako gisemo nu tudi guazumba, ana mona egi tuana landula makalegelo a Yehowa. Ana suanguluga muavula luholo tuana guamonesela gisemo. Phangi Khanh tuazuelela gu thunda, wana suanguluga muavula hana wunguluga muene luholo aphangi amukuatesele. Udi muzuela egi: “Ngudi muhana mersi yavula gudi aphangi agasue a akhetu anyi angukuatesele. Akhalele muza ha gunguzula tuye nawo anguhanyi ima ya gudia, akhalele nji mutshita yagasue hagula nguvutuge muabonga gumbo diami. Mangino ngakotelesa egi yakhalelego ndaga yaleba ha gungukuatesa. Uvi ayikalegele handaga akhalele gunguzumba.” Uvi, tudi naye gujiya egi, athu agasue mbaashigo muheta luholo lua gutuhana mersi mukunda nu ndaga tuana guakalegela. Phangi Khanh udi muzuela mukunda nu athu anyi amukuatesele egi: “Ngana tshigina guafuta mukunda nu ndaga jiagasue jiabonga angukalegele, uvi ngushigo mujiya mafundo aphangi ene agasue ana khala. Yehowa wana jiya mafundo ana khala ene, ngana gumukombelela hagula a afute ha fundo diami.” Ndaga yazuela phangi Khanh idi diago ngenyi. Yehowa wana mona ndaga jiagasue jiabonga tuana tshita mukunda nu athu ako, ngatshima jidi jiazonda. Wana zula ndaga jiene nu ndando, mbawutufuta nji mukunda nu ndaga jiene.—Tanga Ishima 19:17.
Gula muthu udi mukula mu nyuma, wana kamba maluholo a gukuatesa athu ako (Tala paragrafe 12)
12. Luholo lutshi aphangi a mala ana monesa egi ana zumba aphangi mu hungu? (Tala nji ifuanesa.)
12 Gula udi phangi wa yala, luholo lutshi wajiya gumonesa egi wana zumba aphangi a mu hungu nu udi mutshigina guakuatesa? Muvuala mumoshi wa yala jina dienji Jordan, wahudile mukulu mumoshi ndaga yajiya muene gukalagala ha gukuatesa aphangi mu hungu muavula. Mukulu muene washimanele Jordan mukunda nu ndaga jiana tshita gale muene, gungima wamuhanele malongo ajiya gumukuatesa ha gutshita muavula mu hungu. Ha gufezegesa, wamuwambelele ha guza gutuama mu gudibungisa gua mu hungu ha gumenega aphangi, nu ha guhana ba komantere, gulongesa muavula nu hunji dienji dia mudimo wa gulongesa, nu gukamba maluholo a gukuatesa aphangi. Tangua Jordan wakalegele ndaga eji jiagasue, wabuile nu makalegelo avula abonga, wakudishile nji guzumba guenji mukunda nu aphangi. Jordan wakotelesele egi gula phangi wabua mukuateshi wa mudimo, ishigo mukotelesa egi wasendesa giwa gukuatesa athu ako; uvi, udi mulandula guakuatesa.—1 Tim. 3:8-10, 13.
13. Luholo lutshi guzumba guakuatesele phangi Christian ha gubua luko mukulu?
13 Itshi wajiya gutshita gula mu masugu abalega wakhalele mukulu nga mukuateshi wa mudimo? Yehowa wana wunguluga mudimo wakalegele, nu guzumba guagutumile ha gutshita mudimo wene. (1 Kol. 15:58) Wana mona nji guzumba guaye mukunda nu aphangi. Phangi Christian wavile gikenene tangua amuwambelele egi gashigo luko mukulu. Uvi udi muzuela egi: “Ngazudile desizio ha gutshita yagasue ngajiya gutshita ha gukombelela Yehowa ikhale ngudi mukulu nga ndo.” Gungima, phangi Christian wabuile luko mukulu. Udi muzuela egi: “Ngakhalelego diago musuanguluga ha gubua luko mukulu. Uvi ngatangijile egi gula Yehowa mu khenda jienji watshigina egi ngubue luko mukulu, ngudi naye gutshigina handaga ngana gumuzumba nu ngana zumba nji aphangi’ami a mala nu a akhetu.”
14. Longo tshi wazula mu ndaga jiazuelele phangi mumoshi wa mukhetu wa gu Géorgie?
14 Akombeledi a Yehowa ana zumba nji athu ako. (Mat. 22:37-39) Ha gufezegesa, phangi Elena gu Géorgie, udi muzuela egi: “Thomo, ngakhalele mulongesa lukuma luabonga phamba handaga ngana zumba Yehowa. Uvi tangua ngakudishile luko guzumba guami mukunda nu muene, ngasendesele nji guzumba athu ako muavula. Ngasendesele gutangiza ndaga jiakhalele guasagesa, nu maga a Biblia ngajiya guawambela ha gukuata mitshima yawo. Luholo ngakhalele guatangiza muavula, yangutumile nji ha guakuatesa.”—Roma 10:13-15.
YEHOWA MBAWUTUFUTA GULA TUDI MUZUMBA ATHU AKO
Gula tuamonesela muthu mumoshi guzumba, yajiya gubatela athu avula gubonga (Tala paragrafe 15-16)
15-16. Gifua luholo ifuanesa idi guyimonesa, gubonga gutshi tuana heta gula tudi muzumba athu ako?
15 Tangua tuana zumba aphangi’etu, ishigo phamba ene ana heta gubonga. Tangua misongo ya coronavirus yasendesele, phangi Paolo nu mukaji’enji akuatesele aphangi avula a akhetu a gukola ha gujiya gukalegela telefone jiawo hagula ajiya gulongesa lukuma luabonga. Thomo, phangi mumoshi wa mukhetu gakhalelego mujiya gukalegela telefone, uvi gungima wajiyile guyikalegela muabonga. Yamukuatesele ha gutamega enya fami yenji ha gulandula gudibungisa gua Guwunguluga Gufua gua Yesu. Enya fami yenji 60 alanduile gudibungisa guene mu njila ya telefone! Phangi muene wa mukhetu nu enya fami yenji alanduile programe ya gudibungisa guene handaga Paolo nu mukaji’enji a akuatesele. Gungima, phangi muene wa mukhetu wasonegele Paolo mukanda egi: “Mersi avula luholo wazudile desizio dia gutukuatesa esue aphangi a gukola. Mbangushigo mujimbila nga hazonda luholo Yehowa wana gudisagesa mukunda nu esue, nu ndaga wakalegele ha gutukuatesa.”
16 Ndaga eyi yahanele phangi Paolo malongo a ndando. Yamukuatesele ha gujiya egi guzumba gudi nu ndando yavula gubalega ujiyi nga ndunge. Udi muzuela egi: “Ngudi mutadi muwendji. Mangino ngakotelesa egi, alongeshi ajiya gubuita mutshima gu badiskur ngakalegele, uvi ajiyilego gujimbila nga hazonda ndaga jiabonga ngakalegele ha guakuatesa.”
17. Athu tshi ako ana heta gubonga gula tuamonesela athu ako guzumba?
17 Tangua tuana monesela athu ako guzumba, esue hakhetu tuana heta nji gubonga guavula. Phangi Jonathan gu Nouvelle-Zélande udi mutshiginyisa ndaga yene. Lusugu lumoshi mu phoso mu ngueze, wamonele muvundji wa njila mulongesa hakhenji mu njila. Phangi Jonathan wazudile desizio dia gulongesa nu muvundji wa njila muene mu lusugu luagasue lua phoso mu ngueze. Gakhalelego mujiya egi desizio diene mbadimubatela gubonga. Udi muzuela egi: “Mu tangua diene, ngakhalelego mutshigina mudimo wa gulongesa. Uvi tangua ngatalele luholo lua gulongesa lua muvundji wa njila muene, nu luholo athu akhalele musuanguluga nu lukuma luabonga, ngasendesele diago guzumba mudimo wene muavula. Ngahetele futa diabonga wangukuatesele ha gukula mu nyuma, ha gusuanguluga nu mudimo wa gulongesa nu ha gukolesa ufuta wami nu Yehowa.”
18. Yehowa wana tshigina egi tutshite itshi?
18 Yehowa wana tshigina egi mukut’etu agasue tukudise guzumba guetu mukunda nu muene nu mukunda nu athu ako. Gifua luholo tuayimonyi, tuajiya gukudisa guzumba guetu mukunda nu Yehowa gula tudi mutanga Biblia, tudi mutangigiza gu ndaga tudi mutanga, nu tudi mutshita gisambu tangua diagasue. Tuajiya gukudisa guzumba guetu mukunda nu aphangi gula tudi guakuatesa tangua adi mutagana nu malamba. Gula tuatshita ngenyi, mbatukhala nu ufuta wakola nu Yehowa nu aphangi’etu a mala nu a akhetu. Mbatukhala mafut’awo ivo nu ivo!
LUNGIMBO 109 Zumba Diago nu Mutshima Umoshi
a Ikhale tudi athu ahe-ahe mu giamatshidia, nga tuana kombelela gale Yehowa sendese mualeha, mukut’etu agasue tudi naye gulandula gukula mu nyuma. Longo edi diza gutukuatesa ha gujiya luholo tuajiya gukudisa guzumba guetu mukunda nu Yehowa nu aphangi. Tangua tuza mutadila ndaga yene, tangiza ndaga wakalegele gale nu jinyi wajiya gukalagala luko ha gulandula gukula mu nyuma.
b Mu longo edi, majina ako asombegesewe.