“Khalenu Tenyi, Dijigamesenu”

1-2. Mu luholo lutshi Muklisto wajiya gukhala gifua inzo yaleha? (1 Kolinto 15:58)

MU GIVO 1978, antungile inzo imoshi yaleha mu dimbo dia Tokyo, gu Japon. Athu akhalele gudihula gula inzo yene mbayimushipha, handaga mavu akhalele mudigita muavula mu dimbo diene. Itshi yakhalele mukuatesa inzo yene hagula ibuigo tangua mavu akhalele mudigita? Inzo yene yakhalelego mumuangana, handaga ayitungile nu ima yinyi yakhalele guyikuatesa ha gunyigana gula mavu adigita. Aklisto adi nji gifua inzo yene yaleha. Mu luholo lutshi?

² Muklisto udi naye gutadila ndaga muabonga ha gujiya gula idi mutoga egi amagane tenyi nga ndo. Udi naye gukhala tenyi nu yagudijigamesa mu ndaga yatadila gutumagela mikhuala ya Yehowa. (Tanga 1 Kolinto 15:58.) Muklisto muene wana khala “hehi ha gutumaga,” ganago gushiya mikhuala ya Yehowa. Uvi udi naye gumonesa mu ndaga jiko egi gashigo muenya ndaga jiakola. (Yak. 3:17) Gula Muklisto udi mujiya gusha ndaga yagasue ha fundo dienji, mbagashigo mukhala muenya ndaga jiakola-kola nga gutshita ndaga jiko jidi mushiya mikhuala ya Yehowa. Mu longo edi tuza mumona luholo tuajiya gukhala yagudijigamesa. Tuza muzuelela nji maluholo thano Satana wana kalegela ha gutulebesa, nu ndaga tuajiya gukalaga ha gutuna gubua mu miheto yenji.

LUHOLO LUTSHI TUAJIYA GUKHALA TENYI?

3. Mikhuala itshi ya Yehowa idi mu Makalegelo 15:28, 29?

³ Yehowa muene udi watagana ha guhaga mikhuala. Wana lebesa mikhuala yene hagula athu enji ayikotelese. (Yesh. 33:22) Ha gufezegesa, hunji dia akulu atuameji dia mu siekle ya thomo diamonesele maluholo thathu Aklisto adi naye gusala ya gujinginyina gudi Yehowa. Ya thomo, gutuna isongo nu gukombelela phamba Yehowa. Ya mbadi, gutumagela mukhuala wa Yehowa mu ndaga yatadila mahatshi. Ya thathu, gutumagela malongo a Biblia mu ndaga yatadila gubungisa muila. (Tanga Makalegelo 15:28, 29.) Mangino luholo lutshi Aklisto ajiya gumonesa egi adi yagujinginyina gudi Yehowa mu ndaga eji thathu?

4. Mu luholo lutshi tuana monesa egi tuana kombelela phamba Yehowa? (Gumonesa 4:11)

⁴ Tuana tuna isongo ha gukombelela phamba Yehowa. Yehowa wawambelele enya Isalele ha gumukombelela phamba muene. (Mikh. 5:6-10) Tangua Diabulu walolele Yesu, Yesu wamuwambelele egi tudi naye gukombelela phamba Yehowa. (Mat. 4:8-10) Hene, tuanago gukombelela isongo, tuanago nji gukombelela athu. Ha gufezegesa, tuanago nji gukalegela athu ndaga gifua adi jinzambi ikhale mafumu a ikombelelo, mafumu a politike, nu athu ako adi nu lukuma luavula ha mavu awa. Tuana khala gukhanda ya Yehowa, tuana gumukombelela phamba muene, handaga muene “wafugile ima yagasue.”​—Tanga Gumonesa 4:11.

5. Mukunda natshi tuana tumagela mukhuala wa Yehowa mu ndaga yatadila mahatshi?

⁵ Tuana tumagela mukhuala wa Yehowa mu ndaga yatadila mahatshi. Mukunda natshi? Handaga Yehowa wazuelele egi mahatshi adi monyo. Monyo udi kado ya ndando yatuhanele muene. (Levi 17:14) Tangua Yehowa wahanele athu njila ya gudia shitu, waatunyishile ha gudia mahatshi. (Gis. 9:4) Wazuelele luko ndaga yene tangua diakhalele muhana muene enya Isalele Mikhuala. (Levi 17:10) Watuamezele aphangi a gu hunji dia akulu atuameji a mu siekle ya thomo ha guzula desizio egi, Aklisto agasue adi naye “gutuna . . . mahatshi.” (Makal. 15:28, 29) Tuana tumagela mukhuala owu tangua tuana zula desizio mu ndaga yatadila luholo tudi naye gusagewa.b

6. Itshi tuana tshita ha gutumagela mukhuala wa Yehowa mu ndaga yatadila gubungisa muila?

⁶ Tuana tumagela mukhuala wa Yehowa mu ndaga yatadila gubungisa muila. (Heb. 13:4) Mupostolo Phaula wakalegele mbimbi jia gifuanesa, ha gumonesa egi tudi naye gushiya itshinyi ya muila wetu. Yakotelesa egi tudi naye gutuna nzala jiagasue jiabola. Tuana tuna gutala nga gutshita ndaga imoshi yajiya gututuma ha gubua mu uthambi. (Kol. 3:5; Yobo 31:1) Gula tualolewa ha gutshita ndaga imoshi yabola, tuana tuna gutshita ndaga yagasue yajiya gubolesa ufuta wetu nu Nzambi.

7. Desizio ditshi tudi naye guzula? Mukunda natshi?

⁷ Yehowa wana tshigina egi ‘tumutumagele nu mutshima umoshi.’ (Roma 6:17) Ndaga jiana gutuwambela muene jiana khala tangua diagasue jiabonga, mikhuala yenji yajiyilego gusombegesa. (Yesh. 48:17, 18; 1 Kol. 6:9, 10) Tuana tshita ngolo ha gusuanguluisa Yehowa nu gumonesa khadilo gifua dia muyimbi wa ngimbo wazuelele egi: ‘Ngazudile desizio dia gunemesa mikhuala yaye tangua diagasue uu nu gugisugishilo.’ (Ngi. 119:112) Uvi, Satana wana tshita yagasue ha gutulebesa. Bametode atshi ana kalegela muene?

LUHOLO LUTSHI SATANA WANA KAMBA GUTULEBESA?

8. Luholo lutshi Satana wana kalegela usageshi ha gutulebesa?

⁸ Usageshi. Diabulu wana tuma athu ha gutusagesa nu gutumonesa lamba, hagula tulebe muila. Wana tshigina ‘gutudia’ hagula tubolese ufuta wetu nu Yehowa. (1 Phet. 5:8) Aklisto a mu siekle ya thomo amonesewe lamba, abetewe nu ashiyiwe handaga azudile desizio dia gusala ya gujinginyina gudi Yesu. (Makal. 5:27, 28, 40; 7:54-60) Mangino, Satana wana kalegela nji usageshi. Tuana mona ndaga yene mangino luholo aphangi etu a gu Russie nu a mu ifutshi iko ana sagesewa; mbalagaji jietu jiana sagesa aphangi’etu mu maluholo a gudisha.

9. Hana gifezegeselo gidi mumonesa mukunda natshi idi nu ndando ha gujiya usageshi unu wanago gumonega haphelo.

⁹ Usageshi unu wanago gumonega diago haphelo. Satana wana kalegela nji “miheto” ha gutusagesa. (Ef. 6:11) Tuzuelelenu gifezegeselo gia phangi Bob; wayile gu opitale hagula aphandewe. Wawambelele minganga egi gajiyilego gutshigina nga hazonda egi ambiwe mahatshi. Munganga wakhalele naye gumuphanda watshiginyile desizio dienji. Uvi, mu phipha gutuama egi amuphande, munganga muko wajile gumutala; mu tangua diene, enya fami yenji akhalele ayi gale. Munganga muene wamuwambelele egi ashigo gugumba mahatshi, uvi ajiya guasha hehi, handaga yajiya gutoga egi amumbe nawo. Yajiya gukhala egi munganga muene watangijile egi luholo enya fami ya Bob ashigo hene, wajiya gutshigina egi ambiwe mahatshi. Uvi Bob watunyile egi gajiyilego gumbiwa mahatshi nga yabua gutshi.

10. Mukunda natshi matangi a athu ajiya gukhala muheto mukunda nu esue? (1 Kolinto 3:19, 20)

¹⁰ Matangi a athu. Gula tuasendesa gutangiza gifua luholo athu a ha mavu awa ana tangiza, tuajiya gutuna Yehowa nu mikhuala yenji. (Tanga 1 Kolinto 3:19, 20.) Handaga mbala jiavula, “ndunge jia ha mavu awa” jiana tuma athu ha gutuna gutumagela Nzambi. Aklisto ako a gu Phelegame nu a gu Tiyatile alanduile makalegelo a athu a mu sungi yawo akhalele mutshita ndaga jia musonyi nu gukombelela isongo. Yesu wabalediele Aklisto a mu mahungu ene mbadi handaga akhalele mubemba athu akhalele mukalagala uthambi. (Gumo. 2:14, 20) Mangino nji, athu tuana jinga nawo ana tshigina egi tulandule makalegelo awo abola. Enya fami yetu nu mafuta etu ajiya gututuma ha gutangiza egi tudi enya ndaga jiakola, nu ishigo nu ndando ha gutumagela mikhuala ya Yehowa. Ha gufezegesa, ajiya gutuwambela egi ishigo diago ndaga yabola ha gukalagala uthambi; ajiya nji gutuwambela egi mikhuala ya Yehowa yana khalago luko nu ndando.

11. Gula tudi mutshigina gusala ya gujinginyina gudi Nzambi, itshi tudi naye gutuna?

¹¹ Matangua ako, tuajiya gutangiza egi utuameji wana gutuhana Yehowa ushigo watagana. Yajiya nji gukhala lamba ha gutshita “phamba ndaga jidi jia gusonega mu mukanda wa Nzambi.” (1 Kol. 4:6) Mafumu a ikombelelo a mu tangua dia Yesu akhalelego mutshita phamba ndaga jiakhalele jiagusonega mu mukhuala. Akhalele mulezela mikhuala yawo mu Mukhuala wa Moize, hene yakhalele lamba gudi athu ha gutumagela mikhuala yene. (Mat. 23:4) Yehowa wana gutuhana utuameji wabonga mu njila ya Mbimbi yenji nu mu njila ya ulondegi wenji. Tushigo naye gulezela ndaga jiko mu malongo ana gutuhana muene. (Ish. 3:5-7) Hene tudi naye gutshita phamba ndaga jidi jia gusonega mu Biblia, tushigo naye gulezela aphangi etu Aklisto mikhuala mu ndaga jinyi Biblia yazuelelego.

12. Luholo lutshi Satana wana sunzula “malongo a mambo”?

¹² Mambo. Satana wana kalegela “malongo a mambo” nu “ndaga jia githuhu jia ha mavu awa” ha guhuiga nu gukaphumuna athu. (Kol. 2:8) Mu siekle ya thomo, malongo nu ndaga jiene jia githuhu jiakhalele mukatuga mu filozofi jiakhalele gudivua nu kutime jia athu, mu malongo a enya Yuda akhalelego gudivua nu malongo a Bibila, nu malongo akhalele mumonesa egi Aklisto adi naye gutumagela ndaga jiagasue jiakhalele mu Mukhuala wa Moize. Ndaga jiene jiakhalele jia mambo handaga jiakhalele muwunganesa matangi a athu ha gulandula ndunge jia giamatshidia jiana katuga gudi Yehowa. Mangino Satana wana kalegela televizio nu Internet ha gumuanga ndaga jia mambo jiana zuela mafumu a politike. Tuavuile ndaga jia mambo jia luholo elu muavula gubelega mu sungi ya coronavirus.c Matemue a Yehowa anyi alanduile utuameji wa ulondegi wenji, akhalelego gudisagesa muavula gifua athu anyi akhalele mutegelela ndaga jia mambo jiakhalele muzuelewa.​—Mat. 24:45.

13. Mukunda natshi tudi naye gumonesa gutema hagula Satana awunganesago matangi etu?

¹³ Ndaga jiana balegesa tangua. Tudi naye gulandula guhaga matangi etu mu “ndaga jiabalega ndando.” (Fili. 1:9, 10) Ndaga jiana balegesa tangua jiajiya gutuzula tangua diavula nu ngolo jinyi tuajiya gukalegela ndaga jiabalega ndando. Ndaga tuana tshita lusugu nu lusugu gifua gudia, gunua, gudikenesa nu gutshita mudimo jiajiya gutuzula tangua diavula gula tudi gujizula nu ndando yavula gubalega. (Luka 21:34, 35) Lusugu nu lusugu tuana guvua, tuana tegelela nji mene jiana monesa luholo athu ana gulumbugila mafumu a politike, nu luholo ene hakhawo ana gudiluisa. Tudi naye gutshita ngolo ha gutuna gubemba egi ndaga jia politike jituwunganese. Gula ndo, tuajiya gusendesa gudinginyisa mu ndaga jiene mu matangi nga mu mutshima wetu. Satana wana kalegela ndaga jiagasue tuakatuga guzuelela ha gutulebesa hagula tulandulago gukalagala ndaga jiabonga. Tutadilenu ndaga tuajiya gukalagala ha gutuna gubua mu miheto yenji nu ha gusala yagujinginyina.

LUHOLO LUTSHI TUAJIYA GUSALA YAGUJINGINYINA?

14. Itshi yajiya gutukuatesa ha gusala tenyi gukhanda Yehowa?

¹⁴ Khala mutangiza ndaga yagutumine ha gudihana gudi Yehowa nu gubatijiwa. Wazudile desizio diene handaga wakhalele mutshigina gukhala gu khanda ya Yehowa. Tangiza luko ndaga yagukuatesele ha gutshigina egi wahetele giamatshidia. Wajiyile Yehowa nu wasendesele gumuzumba nu gumunemesa gifua Tata waye wa mu dilu. Wakudishile gutshigina guaye mukunda nu muene nu wabalumuine mutshima. Wabembele gukalagala ndaga jiabola, wasendesele nji gukalagala ndaga jiana gusuanguluisa Nzambi. Wadivuile muabonga tangua wajiyile egi Nzambi wagutotesele gubola guaye. (Ngi. 32:1, 2) Wasendesele guya mu gudibungisa nu gulongesa athu ako ndaga jiabonga wakhalele mulonguga. Mangino udi Muklisto wadihanele gudi Nzambi nu wabatijiwe, wana wenda mu njila ya monyo nu wana tshita yagasue ha gusala mu njila yene.​—Mat. 7:13, 14.

15. Mukunda natshi gulonguga Biblia nu guyitangigiza gudi nu ndando?

¹⁵ Khala mulonguga Mbimbi ya Nzambi nu giyitangigiza. Gifua luholo mutshi wana magana muabonga gula miji yenji idi ya gudijigamesa muabonga, esue nji tuajiya gukhala yagudijigamesa gula tudi musha gutshina gudi Yehowa. Tangua mutshi udi mukula, miji yenji yana gudijigamesa diago mu mavu. Tangua tuana longuga Biblia nu guyitangigiza, tuana kolesa gutshigina guetu egi njila jia Yehowa jidi jiabalega gubonga. (Kol. 2:6, 7) Khala mutangigiza luholo Yehowa wakuatesele akombeledi enji a mu tangua dikulu, luholo luahanele muene malongo nu utuameji nu luholo akhalele guabamba. Ha gufezegesa, Ezekiele watalele muabonga tangua muanjelo wakhalele muthesa tempelo yamonele muene mu vizio. Vizio yene yakolesele gutshigina gua Ezekiele, idi nji gutuhana malongo abonga ajiya gutukuatesa ha gunemesa mikhuala ya Yehowa mu gikombelelo gia giamatshidia.d (Ezek. 40:1-4; 43:10-12) Esue nji tuajiya guheta gubonga gula tudi muzula tangua dia gutanga nu gutangigiza ndaga jidi mu Mbimbi ya Nzambi.

16. Luholo lutshi gukhala tenyi guakuatesele phangi Bob? (Ngimbo 112:7)

¹⁶ Khala mukolesa mutshima waye. Fumu Davidi wazuelele egi mbagabembigo nga hazonda guzumba Yehowa, ha yimbile muene egi: ‘Nzambi mutshima wami udi ula tenyi.’ (Ngi. 57:7) Esue nji tuajiya gukhala nu mutshima ula tenyi, nu gushila diago Yehowa mutshima. (Tanga Ngimbo 112:7.) Tutadilenu luholo ndaga yene yakuatesele phangi Bob tuazuelela gu thunda. Tangua minganga yamuwambelele egi ajiya guhaga mahatshi hehi hagula ajiya gumuvutula nawo, waawambelele mbala imoshi egi gula iza mutoga mahatshi ha gumuphanda, udi naye gukatuga gu opitale wene. Gungima phangi Bob wazuelele egi: “Ngaahanele mvutu mbala imoshi, ngadisageselego mukunda nu ndaga yajiya gungubuila gungima.”

17. Malongo atshi tuajiya guzula mu gifezegeselo gia phangi Bob? (Tala nji gifuanesa.)

¹⁷ Gima giakuatesele phangi Bob ha gusala tenyi idi handaga wadiangele guzula desizio gutuama dia guya gu opitale. Thomo, wakhalele mutshigina gusuanguluisa Yehowa. Ya mbadi, phangi muene walongugile muabonga Biblia nu mikanda yetu, wakotelesele egi monyo nu mahatshi idi ima yagijila. Ya thathu, wakhalele mujiya egi gulandula utuameji wa Yehowa mbagumubatela gubonga gua mayilago. Esue nji, tuajiya gukolesa mutshima wetu ngatshima tudi mutagana nu malamba akola.

18. Luholo lutshi gifezegeselo gia Balaka gidi gutukuatesa ha gushila Yehowa mutshima? (Tala gifuanesa holu dia gizula.)

¹⁸ Khala mushila Yehowa mutshima. Tutadilenu luholo gushila utuameji wa Yehowa mutshima guakuatesele Balaka ha gubinga. Mu gifutshi giagasue gia Isalele muakhalelego nu mata nga mifula ya guluila ita, uvi Yehowa wawambelele Balaka ha guya muluisa Sisera fumu wa masuta a enya Kanana. Fumu muene wakhalele nu masuta akhalele mujiya gulua ita nu akhalele nu mata avula. (Manz. 5:8) Profete Debora wawambelele Balaka ha gubulumuguga gu mulundu ha guya mutagana nu Sisera nu phusu-phusu jienji 900 mu baba. Ikhale yakhalele lamba gudi enya Isalele ha gulua mu baba nu athu akhalele nu phusu-phusu uvi Balaka watumagele Yehowa. Tangua masuta akhalele mu bulumuga Mulundu wa Tabola, Yehowa wanogesele mvula yakola. Phusu-phusu jia Sisera jia sendesele gukuatagana mu ithotho, Yehowa wakuatesele Balaka ha gubinga. (Manz. 4:1-7, 10, 13-16) Esue nji Yehowa mbawutukuatesa ha gubinga gula tudi gumushila mutshima nu tudi mulandula utuameji wana gutuhana ulondegi wenji.​—Mikh. 31:6.

ZULA DESIZIO DIA GUKOLESA MUTSHIMA WAYE

19. Mukunda natshi udi naye gukolesa mutshima waye?

¹⁹ Luholo tudi mujinga ha mavu awa abola, mbatulandula gutshita ngolo ha gukolesa mutshima wetu. (1 Tim. 6:11, 12; 2 Phet. 3:17) Tubembigo nga hazonda egi, usageshi unu wanago gumonega diago haphelo, mambo nu ndaga jiana balegesa tangua jitulebese muila. (Ef. 4:14) Uvi tulandulenu gukhala tenyi nu ya gudijigamesa gudi Yehowa nu guzumba guagasue nu gutumagela mikhuala yenji. Uvi tushigo mutshigina gukhala enya ndaga jiakola-kola. Mu longo dia landula mbatumona luholo Yehowa nu Yesu ana khalago enya ndaga jiakola-kola.