Landula Gifezegeselo gia Yehowa, Ukhadigo Muenya Ndaga Jiakola-kola

1. Mu luholo lutshi Aklisto adi naye gukhala gifua mutshi? (Tala nji gifuanesa.)

“FUNJI yanago gubuisa mutshi unu wana gudifugula.” Gishima gigi gidi mumonesa egi mitshi idi naye gudifugula gula funji idi mubunda mangololo hagula ibuigo. Gifua luholo mutshi wana gudiveba, gula esue nji tushigo enya ndaga jiakola-kola tangua tudi mutagana nu malamba, mbayitukuatesa ha gulandula gukombelela Yehowa nu gusuanguluga guagasue. Luholo lutshi? Gula tushigo enya ndaga jiakola-kola mbayikhala yaleba ha gujidila gula ndaga jiasombegesa mu monyo wetu, nu ha gunemesa matangi nu badesizio a athu ako.

2. Makalegelo atshi mbaatukuatesa gula ndaga jiasombegesa mu monyo wetu? Itshi tuza muzuelela mu longo edi?

² Luholo tudi akombeledi a Yehowa, tushigo naye gukhala enya ndaga jiakola-kola. Tudi naye gukhala nu khadilo dia gudibulumuisa nu dia guvuila athu ako khenda. Mu longo edi tuza mumona luholo makalegelo awa akuatesele Aklisto ako ha gukolesela tangua ndaga jia monyo wawo jiasombegesele. Tuza mumona nji luholo makalegelo ene ajiya gutukuatesa. Thomo, tutadilenu malongo tuajiya guzula mu gifezegeselo gia Yehowa nu Yesu, luholo ana khalago enya ndaga jiakola-kola.

YEHOWA NU YESU ANA KHALAGO ENYA NDAGA JIAKOLA-KOLA

3. Luholo lutshi tudi mujiya egi Yehowa gana khalago muenya ndaga jiakola-kola?

³ Biblia yana tamega Yehowa egi “Seso” handaga udi tenyi nu wa gudijigamesa. (Mikh. 32:4) Uvi ganago gukhala muenya ndaga jiakola-kola. Gula ndaga jia ha mavu jiasombegesa, Yehowa gana kolesago ndaga, uvi wana tshita yagasue ha gutagenesa ndaga jialayile muene. Yehowa watufugile mu gifuanesa gienji, watuhanele luendu lua gujidila gula ndaga jia monyo wetu jiasombegesa. Wana gutuhana malongo mu Biblia ana gutukuatesa ha guzula badesizio abonga tangua tudi mutagana nu malamba. Gifezegeselo gia Yehowa hakhenji nu malongo ana gutuhana muene ana monesa egi ikhale wana khala gifua “Seso,” uvi gana khalago muenya ndaga jiakola-kola.

4. Hana gifezegeselo gidi mumonesa egi Yehowa gana khalago muenya ndaga jiakola-kola. (Levi 5:7, 11)

⁴ Ndaga jiana kalagala Yehowa jidi jiatagana, jiakhalago jiakola ha gukotelesa. Ganago gutoga athu ha gukalagala ndaga jiaabalega ngolo. Tutadilenu luholo Yehowa wamonesele egi gakhalelego muenya ndaga jiakola-kola gudi enya Isalele. Gakhalelego mutoga milambu ya luholo lumoshi gudi athu agasue, ikhale enya umonyi nga phutu. Matangua ako, wahanele njila gudi athu agasue ha guhana milambu mu gudivua nu ima akhalele nayo.​—Tanga Levi 5:7, 11.

5. Hana gifezegeselo gidi mumonesa egi Yehowa wana khala nu khadilo dia gudibulumuisa nu dia khenda.

⁵ Khadilo dia Yehowa dia gudibulumuisa nu dia khenda diana gumutuma ha gutuna gukhala muenya ndaga jiakola-kola. Ha gufezegesa, Yehowa wamonesele egi udi Nzambi wa gudibulumuisa tangua dia tshiginyile muene gushiya athu abola gu Sodoma. Yehowa wawambelele Lota mu njila ya anjelo enji ha gulenga gu khanda ya milundu. Lota wavuile woma ha guya guene. Hene wabubidile Yehowa hagula muene nu enya fami yenji aye gu gadimbo ga Soale; Yehowa wakhalele nji mutshigina gushiya gadimbo gene. Yehowa wakhalele naye gushinjiga Lota ha gutshita phamba ndaga yazuelele muene. Uvi watshiginyile egi Lota aye gu Soale, gashiyilego luko nji dimbo diene. (Gis. 19:18-22) Gungima dia ivo yavula, Yehowa wavidile enya gu Ninive khenda. Watumine profete Yona ha guwambela athu abola akhalele gu Ninive egi, ene nu dimbo diawo mbaashiyiwa. Uvi tangua athu a mu dimbo diene abalumuine mitshima, Yehowa waavuidile khenda, gaashiyilego luko; gashiyilego nji dimbo diawo.​—Yona 3:1, 10; 4:10, 11.

6. Hana ifezegeselo idi mumonesa egi Yesu walanduile gifezegeselo gia Yehowa gia gutuna gukhala muenya ndaga jiakola-kola.

⁶ Yesu walanduile gifezegeselo gia Yehowa, gakhalelego muenya ndaga jiakola-kola. Yehowa wamutumile ha mavu ha gulongesa lukuma luabonga gudi “imeme ya monzo ya Isalele yatotele.” Uvi wamonesele egi gakhalelego muenya ndaga jiakola-kola hakhalele muene mulongesa athu. Lusugu lumoshi, mukhetu mumoshi gakhalelego muenya Isalele wamububidile ha gusaga mun’enji wa mukhetu wakhalele nu ‘demo diakhalele gumusagesa mangololo.’ Yesu wavidile mukhetu muene khenda, wasagele mun’enji. (Mat. 15:21-28) Tutadilenu gifezegeselo giko. Hasendesele Yesu mudimo wa gulongesa, wazuelele egi: “Muthu wangutuna . . . , ame nji mbangumutuna.” (Mat. 10:33) Uvi hamutunyine Phetelo mbala thathu, Yesu gamutunyinego. Yesu wajiyile egi Phetelo wakhalele muthu wa gujinginyina nu wakhalele muvua gikenene giavula mukunda nu ndaga jiakalegele muene. Tangua diafuzumugile Yesu, wamonegele gudi Phetelo. Idi naye gukhala ha gumutshiginyisa egi wamutotesele nu wakhalele gumuzumba.​—Luka 24:33, 34.

7. Ha gutadila Filiphi 4:5, tuana tshigina gukhala athu a luholo lutshi?

⁷ Tuamonyi egi Yehowa Nzambi nu Yesu Klisto ana khalago enya ndaga jiakola-kola. Itshi tuajiya guzuela mukunda nu esue? Yehowa wana tshigina egi tukhadigo enya ndaga jiakola-kola. (Tanga Filiphi 4:5.) Mu Biblia imoshi, verse eyi yabalumuiwe egi: ‘Khalenu mujiyiwa gu meso a athu agasue egi mushigo enya ndaga jiakola-kola.’ Tuajiya gudihula egi: ‘Athu ako ana gungujiya egi ngushigo muenya ndaga jiakola-kola, nu ngana gudivua nu athu muabonga ba? Nga ndo ana mona egi ngudi muenya ndaga jiakola-kola? Ngana shinjiga athu ako ha gutshita phamba ndaga ngudi mutshigina? Nga ndo, ngana tshigina nji matangi a athu ako gula luholo lulu guene?’ Gula tushigo enya ndaga jiakola-kola idi mumonesa diago egi tuana landula gifezegeselo gia Yehowa nu gia Yesu. Tuzuelelenu ndaga mbadi jiana toga egi tukhadigo enya ndaga jiakola-kola: Gula ndaga jia monyo wetu jiasombegesa nu gula matangi a athu ako nu badesizio awo ashigo gudivua nu etu.

UKHADIGO MUENYA NDAGA JIAKOLA-KOLA GULA NDAGA JIA MONYO WAYE JIASOMBEGESA

8. Itshi yajiya gugukuatesa ha gutuna gukhala muenya ndaga jiakola-kola, gula ndaga jia monyo waye jiasombegesa? (Tala nji mbimbi goshi’a diyiji.)

⁸ Tushigo naye gukhala enya ndaga jiakola-kola gula ndaga jia monyo wetu jiasombegesa. Usombegeshi wene wajiya gutubatela malamba anyi tuatangijilego. Ha gufezegesa, tuajiya gukata misongo yakola. Tuajiya gutagana nu lamba dia makuta nga ndo mafumu a leta ajiya gusendesa gutumonesa lamba. (Mulo. 9:11; 1 Kol. 7:31) Yajiya nji gukhala lamba gudi esue ha gutagenesa inemo adi gutuhana mu ulondegi wa Yehowa. Ikhale watagana nu malamba a luholo lutshi, wajiya gujidila gula wakalagala ndaga eji nguana: (1) tshigina ndaga gifua luholo jidi, (2) tangiza ndaga wajiya wakalagala, (3) tadila ndaga mu luholo luabonga, nu (4) kuatesa athu ako.b Tutadilenu luholo aphangi’etu ako ahetele gubonga tangua akalegele ndaga eji tuatanga.

9. Luholo lutshi phangi mumoshi wa misionere nu mukaji’enji akolesele mu malamba anyi atangijilego egi ajiya guabuila?

⁹ Tshigina ndaga gifua luholo jidi. Phangi Emanuele nu mukaji’enji Francesca atumiwe mu gifutshi gihe-gihe ha gutshita mudimo wa gimisionere. Tangua asendesele gulonguga zuelelo dia mu gifutshi giene nu gukamba gujiya muabonga aphangi a mu hungu diawo dihe-dihe, misongo ya coronavirus yasendesele, akhalelego luko nu luholo lua gudimona nu aphangi. Gungima mama wa phangi Francesca wafuile mu gisagumuisa. Phangi Francesca wakhalele mutshigina guya mutala enya fami yenji, uvi gakhalelego nu luholo lua guya guene mukunda nu misongo yene. Itshi yamukuatesele ha gukolesela mu malamba ene agasue? Thomo, phangi Emanuele nu Francesca akombelele Yehowa hamoshi ha gutoga ndunge jia gukolesela mu malamba a lusugu nu lusugu, hagula akhadigo nu gikenene giavula. Yehowa wahanele mvutu gu isambu yawo mu njila ya ulondegi wenji. Ha gufezegesa, ndaga jiazuelele phangi mumoshi mu video jiaakuatesele muavula. Phangi muene wazuelele egi: “Gula tuatshigina ndaga jihe-jihe tudi mutagana najio gifua luholo jidi, mbayitukuatesa ha gukhala nu gusuanguluga nu gutshita ndaga mu luholo luabonga.”c Ya mbadi, azudile desizio dia gukalegelela telefone muavula ha gulongesa lukuma luabonga nu gulonguga Biblia nu athu. Ya thathu, akhalele mutshigina nu gusuanguluga guagasue luholo aphangi a mu hungu diawo akhalele guakuatesa. Phangi mumoshi wa mukhetu wakhalele guasonegela mesaje akhalele nu verse ya Biblia lusugu nu lusugu mu givo gia mudidi. Gula esue nji tuatshigina ndaga jihe-jihe tudi mutagana najio gifua luholo jidi, mbatusuanguluga ha gutshita ndaga jiko.

10. Itshi yakuatesele phangi mumoshi wa mukhetu ha gujidila nu usombegeshi umoshi wakoma mu monyo wenji?

¹⁰ Tangiza ndaga wajiya wakalagala, tadila nji ndaga mu luholo luabonga. Phangi wa mukhetu Christina wa gu Roumanie, wana jinga gu Japon gasuangulugilego tangua hungu diawo dia Anglais diabungishiwe. Uvi gakhalelego mutangiza phamba ndaga jiakhalele muene mukalagala thomo. Wazudile desizio dia gutshita muavula mu hungu dia zuelelo dia Japonais, nu gudihana mu mudimo wa gulongesa. Wahudile mukhetu mumoshi akhalele mutshita n’enji mudimo thomo ha gumulongesa zuelelo dia Japonais. Mukhetu muene wakalegele Biblia nu gamukanda Heta Monyo wa Ivo nu Ivo! ha gulongesa phangi Christina zuelelo dia Japonais. Phangi Christina wajiyile guzuela zuelelo dia Japonais muabonga, mukhetu munu wakhalele gumulongesa, wasendesele nji gusuanguluga nu giamatshidia. Gula tudi mutangiza ndaga tuajiya gukalagala, nu tudi mutadila ndaga mu luholo luabonga, ngatshima ndaga jiasombegesa mu gisagumuisa mu monyo wetu, tuajiya gukhala nu gusuanguluga.

11. Itshi yakuatesele phangi mumoshi wa yala nu mukaji’enji anyi ataganele nu lamba dia mbongo?

¹¹ Kuatesa Athu Ako. Phangi mumoshi nu mukaji’enji anyi ana khala mu gifutshi ginyi mudimo wetu watunyishiwe, atagenele nu lamba dia mbongo. Luholo lutshi aphangi ene ajidile nu lamba diene? Thomo, azondesele badepanse. Gungima, akhalelego mutangiza phamba malamba awo, uvi azudile nji desizio dia gukuatesa athu ako nu gutshita muavula mudimo wa gulongesa. (Makal. 20:35) Mulumi’enji udi muzuela egi: “Gudihana muavula mu mudimo wa gulongesa guatukuatesele ha gutuna gutangiza muavula malamba etu, nu ha gudihana muavula mu mudimo wa Nzambi.” Gula ndaga jia monyo wetu jiasombegesa, tudi naye gujiya egi idi nu ndando ha gulandula gukuatesa athu ako, muavula gubalega tangua tudi gualongesa lukuma luabonga.

12. Luholo lutshi gifezegeselo gia mupostolo Phaula giajiya gutukuatesa gula yatoga egi tusombegese luholo luetu lua gulongesa?

¹² Tushigo naye gukhala enya ndaga jiakola-kola mu mudimo wa gulongesa. Tuana tagana nu athu ana sha gutshigina mu ndaga jia gudisha, adi nu makalegelo nu bakutime a gudisha. Mupostolo Phaula wakhalele mujidila nu usombegeshi, gifezegeselo gienji giajiya gutukuatesa muavula. Yesu watombele Phaula ha gukhala “mupostolo wa athu a ifutshi.” (Roma 11:13) Ngenyi, Phaula walongesele enya Yuda nu enya Greke, athu alongugile nu athu anyi alongugilego, athu a lutumbu nu mafumu. Ha gukuata mitshima ya athu ene agasue, Phaula wabuile “ndaga jiagasue mukunda nu athu a maluholo agasue.” (1 Kol. 9:19-23) Wakhalele mutangiza mafundo athu ene akatugile, nu kutime jiawo, nu ndaga akhalele musha gutshigina hagula a alongese mu luholo luajiya gukuata mitshima yawo. Esue nji tuajiya gukudisa luholo luetu lua gulongesa gula tushigo enya ndaga jiakola-kola, nu tudi mutshita ngolo ha gutangiza maluholo abonga tuajiya gukuatesa muthu nu muthu.

NEMESA MATANGI A ATHU AKO

13. Gula tudi mutshigina gunemesa matangi’a athu ako, ndaga itshi idi mu 1 Kolinto 8:9 tudi naye gutuna?

¹³ Gula tushigo enya ndaga jiakola-kola, mbatunemesa matangi’a athu ako. Ha gufezegesa, aphangi avula a akhetu ana tshigina gudisembega gu phala, uvi ako ndo. Aphangi ako ana suanguluga gunua matombe mu luholo luabonga, uvi ako ana nua ndo. Aklisto agasue ana tshigina gukhala nu sante yabonga uvi ana tomba maluholo a gusagewa a gudisha. Gula tudi mutangiza egi maluholo ana gutusaga adi abonga, tuasendesa gushinjiga aphangi ako ha gusagewa gifua esue, tuajiya guakhakhuisa nga gubata ukhaphumunyi mu hungu. Tushigo naye gutshita ngenyi nga hazonda! (Tanga 1 Kolinto 8:9; 10:23, 24) Tutadilenu ifezegeselo mbadi idi mumonesa luholo gukalegela malongo a Biblia guajiya gutukuatesa ha gutadila ndaga mu luholo luabonga nu gubamba guhuima.

14. Malongo tshi a Biblia ajiya gutukuatesa mu ndaga yatadila luholo luetu lua gusudiga nu lua gulonda sanga?

¹⁴ Gusudiga nu gulonda sanga. Yehowa ganago gututombela milele tudi naye gusudiga, uvi wana gutuhana malongo ana gutukuatesa. Tudi naye gusudiga mu luholo luatagana ludi munemesa Nzambi, nu ginemua giagasue, nu mu luholo luabonga nu “matangi abonga.” (1 Tim. 2:9, 10; 1 Phet. 3:3) Tushigo naye gusudiga hagula athu ako akhale gututala phamba esue. Malongo a Biblia ajiya gukuatesa akulu ha gutuna gumba mikhuala mu ndaga yatadila gusudiga nu gulonda sanga. Ha gufezegesa, akulu a mu hungu dimoshi akhalele mutshigina gukuatesa mavuala a mala anyi akhalele mubunga sanga gifua luholo enya ha mavu awa ana bunga sanga dia hihia uvi dilazagalala. Luholo lutshi akulu akhalele naye guakuatesa uvi gumonesa ndo egi adi muhaga mikhuala? Mutadi muwendji wawambelele akulu ha guwambela muvuala ene egi: “Gula udi muzuela gutuama dia athu, wamona egi athu ene adi gugutala muavula uvi gulandula diago ndo ndaga udi muzuela, idi mukotelesa egi luholo luaye lua gusudiga nu lua gulondega sanga lushigo luabonga.” Mbimbi eji jiazonda jiakuatesele mavuala ene ha gukotelesa ndaga akhalele naye gutshita. Jiakuatesele nji akulu ha gutuna gusha mikhuala.d

15. Malongo atshi a Biblia ajiya gutukuatesa tangua tudi mutshigina gutomba bametode a gusagewa? (Roma 14:5)

¹⁵ Luholo lua gusagewa. Muklisto wagasue udi naye gutomba luholo adi naye gumusaga. (Gal. 6:5) Tangua Aklisto adi mutomba luholo lua gusagewa, adi naye gutumagela mikhuala ya Biblia yatadila gutuna gumbiwa mahatshi nu gutuna gudinginyisa mu ndaga jia wanga. (Makal. 15:20; Gal. 5:19, 20) Uvi mu ndaga jiko, yana toga egi muthu nu muthu azule desizio dienji. Athu ako ana tomba ha guya musagewa phamba gudi minganga yakoma (professionnels de la santé), uvi ako ana tomba maluholo ako agusagewa gifua luholo adi mutshigina. Ikhale tudi diago nu gutshigina egi luholo lumoshi ngenyi lua gusaga luajiya gukuatesa aphangi, uvi tudi naye gunemesa desizio diawo dia gutomba ene hakhawo luholo adi naye gusagewa. Tushigo naye gujimbila ndaga eji: (1) Phamba Ufumu wa Nzambi mbawusaga athu mayilago. (Yesh. 33:24) (2) Muklisto wagasue udi naye “gutshigina diago” ndaga idi yabonga gu meso enji. (Tanga Roma 14:5.) (3) Tushigo naye gusophesa aphangi nga gukalagala ndaga imoshi yajiya guatuma ha gubua mu gubola. (Roma 14:13) (4) Aklisto ana gudimonesela guzumba, ana jiya nji egi gukhala hamoshi mu hungu gudi nu ndando gubalega matangi ajiya guhana mukunda nu badesizio atadila gusagewa. (Roma 14:15, 19, 20) Gula tudi mujiya ndaga eji, mbatukhala nu ufuta wabonga nu aphangi’etu mu hungu, mbatujinga nji nawo mu guhuima.

16. Luholo lutshi mukulu wajiya gumonesa egi gashigo muenya ndaga jiakola-kola gudi akulu ako? (Tala nji ifuanesa.)

¹⁶ Akulu ashigo naye gukhala enya ndaga jiakola-kola. (1 Tim. 3:2, 3) Ha gufezegesa, mukulu mumoshi gashigo naye gutangiza egi khuta matangi enji adi naye gutshiginyiwa handaga udi mbuta ya akulu ako agasue. Udi naye gujiya egi nyuma ya Yehowa yajiya gukuatesa mukulu muko ha guhana matangi ajiya guakuatesa ha guzula desizio diabonga. Gula akulu avula atshigina desizio dimoshi ngenyi dishigo mushiya mikhuala ya Yehowa, mukulu muko munu wasala gashigo naye gukolesa ndaga, udi naye gutshigina matangi awo, ikhale gashigo musuanguluga nu ndaga yene.

GUBONGA TUAJIYA GUHETA GULA TUSHIGO ENYA NDAGA JIAKOLA

17. Gubonga gutshi Aklisto ana heta gula ashigo enya ndaga jiakola?

¹⁷ Gula tushigo enya ndaga jiakola-kola tuana heta gubonga guavula. Tuana khala nu ufuta wabonga nu aphangi a mala nu a akhetu, tuana khala nji mu guhuima mu hungu. Tuana suanguluga muavula luholo tuana khala nu ndaga jiavula jia gudisha, gifua umuthu wetu nu kutime. Uvi ikhale ngenyi, tuana suanguluga muavula gukombelela Yehowa hamoshi mu fami ya aphangi. Ndaga yabalega ndando idi egi, tuana suanguluga ha gujiya egi tuana landula gifezegeselo gia Yehowa Nzambi wetu munu gana khalago muenya ndaga jiakola.