APPENDICE C
Luholo lua Gulonguga Biblia nu Muthu mu Njila ya Mukanda Heta Monyo wa Ivo nu Ivo!
Aphangi akombelele diago muavula nu atshitshile ba recherche avula ha gujiya malongo adi naye gumbiwa mu mukanda Heta Monyo wa Ivo nu Ivo! Ha guheta gubonga gua mukanda wene, wajiya gukalegela ba metode awa alandula tangua udi mulonguga Biblia nu muthu.
Gutuama dia gulonguga
1. Dilondege muabonga. Tangua udi gudilondega, tangiza ndaga jia ndando nu malamba nu matangi a muthu muana longuga n’enji. Kamba gujiya gutuama ndaga jiajiya gukhala jiakola mukunda nu muthu muene ha gukotelesa. Kamba gujiya nji luholo ndaga jidi mu galuanda gadi muzuela egi “Tala Ndaga Eji” jiajiya gukuatesa muthu wana longuga n’enji Bilbia, hagula akhale hehi ha gujikalegela mu tangua mudi mulonguga gula luholo ludi guene.
Tangua mudi mulonguga
2. Sendesa nu gisambu, sugisa nji nu gisambu gula muthu mudi mulonguga n’enji gatunyilego.
3. Ukhadigo muzuela muavula. Landula muabonga longo diagasue, bembela muthu mudi mulonguga n’enji tangua ha guhana matangi enji.
4. Gula muangina mu gitshinyi gihe-gihe, tanga mbimbi jiahagewa mu gisendeselo gia gitshinyi giene, zuelela nji mu giketu mito ya lumene ya mikhapho idi hene.
5. Gula muamanesela gitshinyi gimoshi, wajiya guhula mihu ya guvutugila ya gitshinyi giene, ha gukuatesa muthu mudi mulonguga n’enji ha guwunguluga ndaga jialonguga muene.
6. Tangua mudi mulonguga longo diagasue nu muthu wana longesa Biblia:
Tangenu paragrafe.
Tangenu verse jiagasue jidi jia gusonega egi “Tanga.”
Tangenu nji verse jiko jidi mu paragrafe gula wamona egi jidi nu ndando ha gujitanga.
Talesa video jiagasue jiasonegewa egi “Tala video” (gula udi najio).
Hula muthu mudi mulonguga n’enji mihu yagasue.
Wambela muthu muana longuga n’enji ha gutala ifuanesa idi ha galuanda gadi muzuela egi “Ndaga Jiko jia Ndando”, muwambele ha guzuelela ifuanesa yene.
Kalegela galuanda gadi muzuela egi “Desizio Ngazula” ha gukuatesa muthu udi mulonguga n’enji ha gusonega ba desizio adi muzula muene ha gukula mu nyuma. Mukuatese ha gutagenesa mafelela enji azonda-zonda azudi muene, nu ha gudishila mafelela ako.
Hula muthu wana longesa Biblia gula tangua diakhadi gudilondega muene wasuanguluga nu longo dimoshi nga video imoshi idi mu gitshinyi gidi muzuela egi “Tala Ndaga Eji”.
Gula luholo ludi guene, muajiya gumanesela longo dimoshi mu lusugu lumoshi.
Gungima dia gulonguga
7. Landula gutangiza muthu wana longesa Biblia. Kombelela Yehowa akuatese muthu muene ha gukula mu nyuma, nu aguhane ndunge ha gujiya luholo wajiya gumukuatesa.