Ita ya Armaguédon Mbayitubatela Gubonga!

1-2. (a) Mukunda natshi ita ya Armaguédon idi ndaga yabonga mukunda nu athu? (b) Mihu itshi tuza mutadila mu longo edi?

ATHU ako ana gutangiza egi “Armaguédon” idi gushiyiwa gua ima nu mavu agasue. Uvi Biblia yanago guzuela ngenyi. Idi muzuela egi ita ya Armaguédon mbayikalagala ndaga mbajitusuanguluisa! (Yat. 1:3) Ita ya Armaguédon mbayishigo phamba mushiya, uvi mbayihuluisa athu. Luholo lutshi?

² Biblia idi mumonesa egi ita ya Armaguédon mbayihuluisa athu handaga mbayisugisa ufumu wa athu ha mavu awa. Luko, mbayishiya athu abola uvi mbayibemba athu a mitshima yabonga. Ita yene mbayihuluisa luko athu handaga mbayibamba mavu hagula abolesewago. (Yat. 11:18) Ha gukotelesa muabonga ndaga eji, tutadilenu mihu eyi nguana: Armaguédon idi itshi? Ndaga jitshi mbajikalegewa gutuama egi ita ya Armaguédon isendese? Itshi tuajiya gukalagala ha gukhala mukatshi dia athu mbahuluishiwa mu tangua dia Armaguédon? Handaga ita ya Armaguédon yasuena hyehi, luholo lutshi tuajiya gusala agujinginyina gudi Yehowa?

ARMAGUÉDON IDI ITSHI?

3. (a) Mbimbi “Armaguédon” idi mukotelesa itshi? (b) Luholo lutshi Yatuwuwe 16:14, 16 idi mumonesa egi Armaguédon ishigo jina dia fundo dimoshi ngenyi dia ha mavu?

³ Tanga Yatuwuwe 16:14, 16. Mu Biblia, mbimbi “Armaguédon” idi phamba fundo dimoshi. Mbimbi yene yakatuga mu zuelelo dia Hebelu, yakotelesa egi “Mulundu wa Megido.” (Yat. 16:16; mbimbi goshi’a diyiji) Megido yakhalele dimbo dimoshi mu Isalele ikulu. (Yosh. 17:11) Uvi, Armaguédon ishigo jina dia fundo dimoshi ngenyi dia ha mavu. Idi muzuelela gudibungisa gua “mafumu a ha mavu agasue” ha guluisa Yehowa. (Yat. 16:14) Uvi mu longo edi, tudi mukadigila luko mbimbi “Armaguédon” ha guzuelela ita mbayisendesa gungima dia gudibungisa gua mafumu a ha mavu agasue. Luholo lutshi tudi mujiya egi Armaguédon idi fundo dia gifuanesa? Thomo, gushigo nga nu mulundu umoshi ha mavu mu jina dia Megido. Ya mbadi, baba dia Megido dinyi diakhalele hehi nu dimbo dia Megido didi diazonda diago, “mafumu a ha mavu agasue” nu iluilo yawo ya ita ajiyilego gutagana ha fundo diene. Ya thathu, luholo tuza guyimona mu longo edi, ita ya Armaguédon mbayisendesa tangua “mafumu” a ha mavu mbaaluisa akombeledi a Nzambi, adi mujinga mu mafundo avula ha mavu agasue.

4. Mukunda natshi Yehowa afuanesele ita yenji yakoma ya gisugishilo nu Megido?

⁴ Mukunda natshi Yehowa afuanesele ita yenji yakoma ya gisugishilo nu Megido? Mu tangua dikulu, ita yavula yakhalele muluiwa gu Megido nu mafundo ako akhalele hehi nu Baba dia Yizelele. Matangua avula, Yehowa wakuatesele athu enji ha gubinga ita. Tangua Sisera nu masuta a enya Kanana ajile muluisa enya Isalele, Nzambi wakuatesele Nzuji Balaka ha gubinga ita “gu ito ya mita ya Megido.” Balaka nu profete wa mukhetu Debora ahanele Yehowa mvudi yavula luholo gaakuatesele ha gubinga ita. Ayimbile egi: ‘Gosa mu dilu, themua . . . Jialuishile Sisera. Gamuta ga Kishiona gahungumuine mbalagaji.’—Manz. 5:19-21.

5. Gudisha gutshi gudi mukatshi dia ita ya Armaguédon nu ita yaluile Balaka?

⁵ Balaka nu Debora asugishile lungimbo luawo nu mbimbi eji: ‘Yehowa, mbalagaji jiaye jiagasue jifue gifua muafile Sisera, uvi athu ana gu guzumba akhale muhenya gifua kumbi.’ (Manz. 5:31) Luholo lumoshi nji, mu tangua dia ita ya Armaguédon, mbalagaji jia Nzambi mbajishiyiwa, uvi athu ana guzumba Nzambi mbahuluishiwa. Uvi ita eyi mbadi idi ya gudisha lume. Mu ita ya Armaguédon, akombeledi a Nzambi mbashigo mulua, nu mbakhadigo nu mata. Ene mbakhala nu ‘ngolo gula ahena tedie nu azegemena’ gudi Yehowa nu iluilo yenji ya mu dilu.—Yesh. 30:15; Yat. 19:11-15.

6. Luholo lutshi Yehowa mbagashiya mbalagaji jienji mu ita ya Armaguédon?

⁶ Luholo lutshi Yehowa mbagashiya mbalagaji jienji mu ita ya Armaguédon? Yehowa wajiya gukalegela maluholo avula. Wajiya gunyigisa mavu, wajiya gunogesa mvula ya mayanzanza nga gutuma khuba. (Yobo 38:22, 23; Ezek. 38:19-22) Wajiya gutshita egi mbalagaji jidiluise jiene hakhajio. (2 Gudi. 20:17, 22, 23) Luko, wajiya gutuma anjelo enji ha gushiya athu abola. (Yesh. 37:36) Luholo luagasue mbalukalegela Nzambi ha gushiya mbalaga jienji, jiyenu egi muene mbawubinga. Mbalagaji jienji jiagasue mbajishiyiwa. Uvi athu agasue ana gutumagela Nzambi mbaahuluishiwa.—Ish. 3:25, 26.

NDAGA JITSHI MBAJIKALEGEWA GUTUAMA EGI ITA YA ARMAGUÉDON ISENDESE?

7-8. (a) Ha gutadila 1 Tesalonike 5:1-6, mbimbi jitshi mbajizuela atuameji a mavu awa jidi khenji azuelele galego? (b) Mukunda natshi mbajikhala mbimbi jia mambo abola diago?

⁷ Gutuama egi “lusugu lua Yehowa” luze, athu mbaazuela egi tudi mu “guhuima nu ubambi.” (Tanga 1 Tesalonike 5:1-6.) Mu mukanda wa 1 Tesalonike 5:2, “lusugu lua Yehowa” ludi mutadila “lamba diakola.” (Yat. 7:14) Luholo lutshi mbatujiya egi lamba diakola didi mutshigina gusendesa? Biblia idi gutuwambela egi athu mbazuela mbimbi jidi khenji azuelele gale. Mbimbi jiene mbajikhala gijiyishilo gidi mumonesa gusendesa gua lamba diakola.

⁸ Mbayikhala ndaga yazuelele Biblia egi athu mbazuela egi tudi nu “guhuima nu ubambi.” Mukunda natshi atuameji a mavu awa mbazuela ngenyi? Mafumu a ikombelelo mbadibungisa nawo ha guzuela nji ngenyi ba? Yajiya gukhala ngenyi. Tushigo mujiya diago tangua mbaazuela mbimbi jiene. Uvi mbajikhala mbimbi jia mambo jidi mukatuga gudi bademo. Mambo ene mbakhala ndaga yabola diago handaga mbaatuma athu ha gudivua gifua adi mu guhuima, uvi mbayikhala gisendeselo gia lamba diakola didi khenji diabuile gale. Biblia idi muzuela egi tangua mbazuela mbimbi jiene, ‘gufua gua gisagumuisa mbaguaabuila gifua mukhetu udi nu misongo ya guvuala.’ Uvi, itshi mbayibuila akombeledi a Yehowa? Ajiya gudihula handaga ene ashigo mujiya diago tangua mbadiza lusugu lua Yehowa. Uvi mbakhala agudilondega muabonga mukunda nu lusugu luene.

9. Luholo lutshi Nzambi mbagashiya mavu awa a Satana?

⁹ Yehowa mbagashigo mushiya mavu awa agasue a Satana giphungu gimoshi, gifua luholo gatshitshile mu tangua dia Nowa. Uvi, mbawashiya mu itshinyi mbadi. Thomo, mbawushiya Babilone Yakoma, yakotelesa egi ikombelelo yagasue ya mambo. Gungima, mu ita ya Armaguédon, Yehowa mbawushiya gitshinyi giko gia mavu awa a Satana, gidi mubungisa enya politike, alui a ita, nu enya ndaga jia ungenda. Henyaha, tutadilenu gushiyiwa gua itshinyi eyi mbadi.

10. Ha gutadila Yatuwuwe 17:1, 6, nu 18:24, mukunda natshi Yehowa mbagashiya Babilone yakoma?

¹⁰ ‘Gusophesewa gua thambi yakoma.’ (Tanga Yatuwuwe 17:1, 6; 18:24.) Babilone Yakoma yana gushingisa jina dia Nzambi muavula. Yana gulongesa ndaga jia mambo mukunda nu Nzambi. Luholo lumoshi nu mukhetu wa thambi, gikombelelo gia mambo giana gushiya mikhuala ya Yehowa luholo giana gukuatesa mafumu a ha mavu awa. Giana gudimba athu ana gugitshigina nu giana guazangula falanga. Giashiyile gale athu avula, nu akombeledi a Nzambi. (Yat. 19:2) Uvi, luholo lutshi Yehowa mbagashiya Babilone Yakoma?

11. (a) ‘Shitu yabenga ya mu gishitu’ idi itshi? (b) Luholo lutshi Yehowa mbakadigila shitu yene ha guluisa Babilone Yakoma?

¹¹ Yehowa mbawukadigila ‘mbinga kumi jia shitu yabenga ya mu gishitu’ ha gushiya “thambi yakoma.” Shitu yabenga ya mu gishitu idi shitu ya gifuanesa, idi mumonesa Nations unies. Uvi mbinga kumi jidi mumonesa mafumu a politike adi mukuatesa Nations unies. Mu tangua dimoshi ngenyi diahagele Nzambi, mafumu a politike nu Nations unies mbaaluisa Babilone Yakoma. ‘Mbaamutambula ima yagasue nu mbaamubemba ithowa.’ Yakotelesa egi mbaamuzangula umonyi wenji nu mbaamonesa gubola guenji haphelo. (Yat. 17:3, 16) Gushiyiwa ogu gua gisagumuisa, mbagukhala gifua gima giakalegewa phamba mu “lusugu lumoshi.” Mbaguhana gikenene giavula gudi athu ana gukuatesa Babilone Yakoma. Mukunda natshi? Handaga Babilone yene yakhalele gudihala egi: ‘Ngudi wa gukhala gifua fumu mukhetu, ame ngushigo mukhetu wa gafunda, mbanguhagigo masaga ivo nu ivo.’—Yat. 18:7, 8.

12. Yehowa mbagahanyigo njila gudi ifutshi ha gutshita itshi? Mukunda natshi?

¹² Uvi Nzambi mbagahanyigo njila egi ifutshi ishiye akombeledi enji. Mukunda natshi? Handaga akombeledi enji ana gubata jina dienji nu gusuanguluga guagasue, anemesele mukhuala wenji wa guzoga mu Babilone Yakoma. (Makal. 15:16, 17; Yat. 18:4) Luko, atshitshile mudimo wakola wa gukuatesa athu ako ha guzoga mu Babilone Yakoma. Hene, akombeledi a Yehowa mbashigo ‘muheta khapho dia malamba enji.’ Uvi, gutshigina guawo mbagulolewa.

13. (a) Goga udi nanyi? (b) Ha gutadila Ezekiele 38:2, 8, 9, itshi mbayituma Goga ha guluisa akombeledi a Nzambi?

¹³ Goga mbawuluisa akombeledi a Yehowa (Tanga Ezekiele 38:2, 8, 9.) Tangua Yehowa mbaashiya ikombelelo yagasue ya mambo, gikombelelo phamba gimoshi mbagisala, gia akombeledi enji. Satana mbawuvua khabu jiakola. Mu khabu jienji, Satana mbawutuma bademo ha ‘guzuela mbimbi jiabola’ jia mambo ha gubungisa ifutshi hagula iluise akombeledi a Yehowa. (Yat. 16:13, 14) Gudibungisa guene gua ifutshi guana gutamegewa egi ‘Goga wa gu gifutshi gia Magoga.’ Tangua ifutshi mbayiluisa akombeledi a Yehowa, ita ya Armaguédon mbayisendesa.—Yat. 16:16.

14. Goga mbawukotelesa itshi?

¹⁴ Goga mbawusha mutshima wenji mu “masuta a athu.” (2 Gudi. 32:8) Uvi esue mbatusha mutshima gudi Yehowa Nzambi wetu. Gusha mutshima gudi ifutshi mbagukhala ndaga yabola. Mukunda natshi? Handaga Babilone Yakoma yakhalele nu ngolo jiavula, uvi nzambi jienji jiamuhuluishilego gudi ‘shitu ya mu gishitu’ nu gudi “mbinga kumi.” (Yat. 17:16) Hene, Goga mbawutangiza egi mbayikhadigo lamba ha gutushiya. Muene mbawuluisa akombeledi a Yehowa ‘gifua luholo matuta ana gutshuiga mavu.’ (Ezek. 38:16) Uvi Goga mbawukotelesa diago egi wadibuisa mu muheto. Luholo lumoshi nu Pharaon mu Kianga Giabenga, Goga mbawukotelesa egi udi muluisa Yehowa.—Guz. 14:1-4; Ezek. 38:3, 4, 18, 21-23.

15. Itshi mbayikalagala Klisto mu ita ya Armaguédon?

¹⁵ Klisto nu masuta enji a mu dilu mbaaluila akombeledi a Nzambi, nu mbaashiya Goga mayilago. (Yat. 19:11, 14, 15) Uvi itshi mbayibuila Satana, mbalagaji wakoma wa Yehowa, wahuigile ifutshi ha guluisa akombeledi a Nzambi mu ita ya Armaguédon? Yesu mbawumumba mu wina waleha ushigo nu gisugishilo hamoshi nu bademo enji. Mbakhala muene agutshuigiwa uu nu hatagana ivo 1000.—Yat. 20:1-3.

LUHOLO LUTSHI WAJIYA GUHULUISHIWA MU TANGUA DIA ARMAGUÉDON?

16. (a) Luholo lutshi tuana gumonesa egi tudi “mujiya Nzambi”? (b) Mukunda natshi gujiya Yehowa mbagutuhuluisa mu ita ya Armaguédon?

¹⁶ Ikhale tudi athu ahe-ahe mu giamatshidia nga ndo, ha guhuluishiwa mu ita ya Armaguédon, tudi naye gumonesa egi tudi ‘mujiya Nzambi’ nu tuana ‘gutumagela lukuma luabonga luatadila Fumi’etu Yesu.’ (2 Tes. 1:7-9) Tuana ‘gujiya Nzambi’ gula tudi mujiya mikhuala yenji, nu ima gana gutshigina nu eyi ganago gutshigina. Luko, tuana gumonesa egi tudi mujiya Nzambi gula tudi gumuzumba, tudi gumutumagela, nu tudi mukombelela phamba muene. (1 Yone 2:3-5; 5:3) Gula tuakalagala ndaga eji, ‘Nzambi nji mbawutujiya.’ Ngenyi, mbatuhuluishiwa mu ita ya Armaguédon! (1 Kol. 8:3) Mukunda natshi? Handaga ‘gujiyiwa gudi Nzambi’ guakotelesa egi muene watutshigina.

17. ‘Gutumagela lukuma luabonga luatadila Fumi’etu Yesu’ guakotelesa itshi?

¹⁷ ‘Lukuma luabonga luatadila Fumi’etu Yesu’ ludi mutadila giamatshidia giagasue gialongesele muene, gifua luholo idi mu Biblia. Tuana gutumagela lukuma luabonga tangua tuana gukalegela giamatshidia giene mu lujingu luetu. Tuana gumonesa nji gutumaga guene gula tudi muhaga ndaga jia Ufumu ha fundo dia thomo, gula tudi munemesa mikhuala ya Nzambi, nu gula tudi mulongesa Ufumu wenji. (Mat. 6:33; 24:14) Luko, ha gumonesa gutumaga guene, tudi naye gukuatesa Aklisto ambiwe maji mu nyuma anyi adi gututuameza, hagula atagenese inemo yawo.—Mat. 25:31-40.

18. Luholo lutshi Aklisto ambiwe maji mu nyuma mbakuatesa imeme iko?

¹⁸ Gualeha ndo, akombeledi a Nzambi ambiwe maji mu nyuma mbaakuatesa “imeme iko” handaga imeme yene yaakuatesele. (Yone 10:16) Luholo lutshi? Gutuama egi ita ya Armaguédon isendese, Aklisto agasue 144000 mbakhala ayi gale gosa mu dilu ha gujinga mayilago. Gungima, mbakhala mukatshi dia masuta a mu dilu anyi mbaaza mushiya Goga, nu mbaahuluisa “thundu yakoma” ya akombeledi a Yehowa. (Yat. 2:26, 27; 7:9, 10) Yadiago, thundu yakoma mbayisuanguluga muavula lume luholo yakuatesele Aklisto ambiwe maji mu nyuma tangua diakhalele ene ha mavu!

LUHOLO GISUGISHILO GIA SUENA HEHI, ITSHI TUDI NAYE GUKALAGALA HA GUSALA AGUJINGINYINA GUDI YEHOWA?

19-20. Luholo Armaguédon yasuena hehi, itshi tudi naye gukalagala ha gusala agujinginyina gudi Yehowa ikhale tudi mutagana nu malamba?

¹⁹ Mu masugu awa a gisugishilo, akombeledi avula a Yehowa adi mutagana nu malamba. Uvi, tuajiya gukolela malamba ene nu gusuanguluga guagasue. (Yak. 1:2-4) Gima giajiya gutukuatesa muavula gidi gukombelela Yehowa mu gisambu nu mutshima wagasue. (Luka 21:36) Luko, tudi naye gutanga Biblia lusugu nu lusugu, nu gutangigiza ndaga tudi mutanga, nu profesi jidi muzuelela ndaga mbajikalegewa mu masugu adi muza. (Ngi. 77:12) Gula tuakalagala ndaga eji nu tudi mudihana muavula mu mudimo wa gulongesa, mbatukolesa gutshigina guetu nu felela dietu!

²⁰ Tangiza gusuanguluga mbawukhala nago tangua Babilone Yakoma mbayishiyiwa, nu tangua ita ya Armaguédon mbayiza! Luko, tangiza gusuanguluga guavula mbawukhala nago tangua athu agasue mbanemesa jina dia Nzambi nu Ufumu wenji! (Ezek. 38:23) Yadiago, ita ya Armaguédon idi lukuma luabonga gudi athu adi mujiya Nzambi, ana gutumagela Mun’enji, nu mbaakolesela uu nu gu gisugishilo.—Mat. 24:13.