Tukudise Luholo Luetu lua Gulongesa Mbimbi ya Nzambi​—Kalegela Mihu mu Luholo Luatagana

MUKUNDA NATSHI IDI NU NDANDO?: Gula “matangi a muthu adi gifua meya adi moshi’a mavu,” mihu idi gifua kantine gadi mukuatesa ha guthaya meya ene. (Ish 20:5) Mihu yana gutukuatesa hagula athu tudi muta nawo maga, adivue diago egi maga ene adi guaatalela. Guhana mvutu gu mihu yabonga yatombewe guana gukalagala egi athu agasue muyadi adi muta maga, ahane matangi awo. Yesu wakhalele muhula mihu mu luholo luatagana. Luholo lutshi tuajiya gulandula gifezegeselo gienji?

LUHOLO WAJIYA GUYIKALEGELA:

• Mihu idi mukuatesa ha gujiya matangi a muthu. Yesu wahudile alandudi enji mihu ha gujiya matangi awo. (Mat 16:13-16; be-F diyiji 238 par. 3-5) Mihu itshi idi mukuatesa ha gujiya matangi a muthu ngajiya guhula?

• Hula mihu idi mukuantesa muthu ha gujiya nga guheta mvutu yatagana. Ha gukuatesa Phetelo ha gutangiza muabonga, Yesu wamuhudile mihu, wahanele nji mvutu jia kuatesele Phetelo ha guheta mvutu yatagana. (Mat 17:24-26) Mihu itshi wajiya guhula muthu hagula umukuatese ha guheta mvutu yatagana?

• Shimana muthu udi muta n’enji maga. Lusugu lumoshi, mulongeshi mumoshi wa mikhuala ‘wahanele Yesu mvutu nu gutema guagasue,’ hene Yesu wamushimanele. (Mako 12:34) Luholo lutshi wajiya gushimana muthu wahana mvutu gu muhu umoshi ngenyi?

TALENU GITSHINYI GIA THOMO GIA VIDEO IDI MUZUELA EGI, KALAGALENU MUDIMO WATSHITSHILE YESU​—LONGESENU, GUNGIMA HANENU MVUTU GU MIHU EYI:

• Mukunda natshi luholo elu lua gulongesa ludi luabola, ikhale ndaga jidi muzuela mulongeshi jidi jia giamatshidia?

• Mukunda natshi tushigo naye guwambela muthu phamba ndaga jiatadila longo tudi muzuelela?

TALENU GITSHINYI GIA MBADI GIA VIDEO, GUNGIMA HANENU MVUTU GU MIHU EYI:

• Luholo lutshi phangi wa yala wahudile mihu mu luholo luatagana?

• Metode ako atshi a luholo luenji lua gulongesa tuajiya gulandula?