Luholo Lutshi Biblia Yajiya Gugukuatesa?

Athu avula ana gudihula mihu yatadila monyo, malamba, gufua nu masugu adi muza. Tuana tagana nji nu lamba dia makuta nga dia gukamba luholo fami yetu yajiya gukhala nu gusuanguluga. Athu avula ana kotelesa egi Biblia yana guakuatesa ha guheta mvutu (kueteya) gu mihu yakoma yatadila monyo. Yana guahana nji malongo ana guakuatesa lusugu nu lusugu. Udi mutangiza egi Biblia yajiya gukuatesa muthu wagasue ba?

1. Biblia yana hana mvutu gu mihu itshi?

Biblia yana hana mvutu gu mihu eyi ya ndando: Luholo lutshi monyo wasendesele? Mukunda natshi tudi nu monyo? Mukunda natshi athu ana tagana nu malamba? Gula muthu wafua wana guya gui? Gula athu agasue ana tshigina guhuima, mukunda natshi ita idi giwa yavula ha mavu awa? Mavu mbaabua gikuatshi mu masugu adi muza? Biblia idi gututoga ha gukamba mvutu jia mihu ya luholo elu. Athu avula ana suanguluga diago nu mvutu jiana hana Biblia gu mihu yene.

2. Luholo lutshi Biblia yajiya gutukuatesa ha gukhala nu gusuanguluga mu monyo wetu?

Biblia yana gutuhana malongo awaha diago. Ha gufezegesa, yana kuatesa athu ha gukhala diago nu gusuanguluga mu fami jiawo. Yana gutumonesa ndaga tuajiya gukalagala tangua tudi nu gikenene, nu luholo tuajiya gusuanguluga nu mudimo wetu. Uza mulonguga ndaga Biblia yana longesa mukunda nu ndaga eji; uza mumona nji ndaga jiko jiavula tangua tudi mulonguga mukanda owu. Yajiya gugutuma ha gutshigina egi “Ndaga jiagasue jidi mu [Biblia] jidi . . . nu ndando.”​—2 Timote 3:16.

NDAGA JIKO JIA NDANDO

Tala luholo Biblia yakuatesele athu ako nu luholo wajiya gusuanguluga tangua udi guyitanga nu gishina udi naye gukamba ukuateshi ha guyikotelesa muabonga.

3. Biblia yajiya gututuameza

Biblia idi gifua muinda udi mulema tshuya tuavula. Biblia yajiya gutukuatesa ha guzula badesizio abonga nu ha gujiya ndaga mbajibua mu masugu adi muza.

Tanga Ngimbo 119:105, gungima zuelelenu mihu eyi:

• Muthu wasonegele lungimbo elu wakhalele mutadila Biblia luholo lutshi?

• Aye luholo lutshi wana tadila Biblia?

4. Biblia yajiya guhana mvutu gu mihu yetu

VIDEO: Ubembigo Felela Diaye nga Hazonda! (1:48)

• Mukhetu tuamonyi mu video eyi wakhadile gudihula mihu ya luholo lutshi?

• Luholo lutshi gulonguga Biblia guamukuatesele?

Biblia idi gutuwambela ha gukhala nu khadilo dia guhula mihu. Tanga Matayo 7:7, gungima zuelelenu muhu walandula:

• Mihu itshi udi naye, udi mutangiza egi Biblia yajiya gugukuatesa ha guheta mvutu?

5. Wajiya gusuanguluga ha gutanga Biblia

VIDEO: Utangi wa Biblia (2:05)

• Video eyi yamonesa egi luholo lutshi mavuala ana gudivua tangua ana tanga mikanda?

• Uvi mukunda n’atshi ana tshigina gutanga Biblia?

Malongo a Biblia ajiya gutukuatesa nu gutuhana felela diabonga. Tanga Lomo 15:4, gungima zuelelenu muhu owu:

• Felela nu gikhesa gidi muhana Biblia yana gugusuanguluisa nji ba?

6. Athu ako ajiya gutukuatesa ha gukotelesa Biblia

Athu avula ana tanga Biblia hakhawo, uvi ana mona egi guta maga a Biblia nu athu ako guana kuatesa muavula. Tanga Makalegelo 8:26-31, gungima zuelelenu muhu owu:

• Luholo lutshi tuajiya gukotelesa Biblia?​—Tala verse 30 nu 31.

NDAGA WALONGUGA

Biblia yana gutuhana malongo a ndando, yana hana mvutu gu mihu ya ndando, yana hana nji athu gikhesa nu felela.

Mihu ya guvutugila

• Malongo a luholo lutshi tuajiya guheta mu Biblia?

• Biblia yana hana mvutu gu mihu itshi?

• Ndaga jitshi wana tshigina gulonguga mu Biblia?

TALA NDAGA EJI

Biblia idi nu malongo a ndando ajiya gutukuatesa mangino.

“Une sagesse à l’épreuve du temps” (Inzo Yaleha ya Mutaledi No. 1 2018 ya Français)

Tala luholo Biblia yakuatesele yala mumoshi wakhalele gudisagesa mu matangi sendese ulenge wenji.

Luholo Ngasendesele Lujingu Luhe-luhe lua Gusuanguluga (2:53)

Tala malongo a Biblia atadila lujingu lua mu fami.

“12 clés du bonheur familial” (Réveillez-vous ! No 2 2018)

Athu avula ana jiyago nanyi wana tuameza diago mavu. Tala luholo Biblia yana guakuatesa ha gusombegesa matangi awo.

Mukunda Natshi Tudi Naye Gulonguga Biblia?​—Yaleha (3:14)