LONGO DIA 11
Luholo Lutshi Gutanga Biblia Guajiya Gugubatela Gubonga?
Tangiza gale egi udi mutshigina gutunga inzo imoshi yakoma, uvi ushigo mumona gula usendesela gui. Ha gumanesela mudimo owu wakola, wajiya guwukhaphumuna mu itshinyi yazonda-zonda. Idi nji luholo lumoshi nu gutanga Biblia. Wajiya gudihula egi: ‘Ngusendesela gui?’ Mu longo edi, tuza muzuelela ndaga jiajiya gugukuatesa ha gusuanguluga tangua udi mutanga nu udi mulonguga Biblia.
1. Mukunda natshi tudi naye gutanga Biblia lusugu nu lusugu?
Muthu yonu wana tanga Biblia nga ‘mukhuala wa Yehowa’ lusugu nu lusugu, wana khala nu gusuanguluga nu wana binga mu ndaga jiagasue. (Tanga Ngimbo 1:1-3.) Ha gusendesa, wajiya guzula minuta yazonda ha guyitanga lusugu nu lusugu. Gutshita ngenyi, mbagugukuatesa ha gulandula guyitanga nu ha guyizumba muavula.
2. Itshi yajiya gugukuatesa ha guheta gubonga gua ndaga udi mutanga mu Biblia?
Ha guheta gubonga gua ndaga tudi mutanga mu Biblia, tudi naye gumagana ha gutangigiza ndaga jiene. Tudi naye gutanga nu ‘gutangigiza.’ (Yoshua 1:8, NWT, tala mbimbi goshi’a diyiji) Tangua udi mutanga, dihule mihu eyi: ‘Ndaga eji jidi gungulongesa itshi mukunda nu Yehowa? Luholo lutshi ngajiya gujikalegela mu monyo wami? Luholo lutshi ngajiya gukalegela ndaga jiene ha gukuatesa athu ako?’
3. Luholo lutshi wajiya guheta tangua dia gutanga Biblia?
Yakhala lamba gudi aye ha guheta tangua dia gutanga Biblia ba? Gula idi ngenyi, jiya egi ushigo hakhaye. Tshita ngolo ha ‘Gukalegela tangua diaye mu luholo luabonga.’ (Efeso 5:16) Wajiya gubinga gula watomba tangua dia gutanga Biblia lusugu nu lusugu. Athu ako ana tomba ha guyitanga mu gimenegena. Ako ana tanga mu muanya tangua adi mudia. Uvi ako ana tanga mu ngueze tangua dia gubanda. Aye giwa, tangua ditshi wajiya gusuanguluga ha gutanga Biblia?
TUKAMBE GUJIYA NDAGA JIAVULA
Tshita ngolo ha gusuanguluga nu lutango lua Biblia. Dilondege muabonga gutuama ha guheta gubonga gua ndaga udi mulonguga.
Luholo wana suanguluga gudia ima ya maluholo a gudisha, wajiya nji gusuanguluga nu lutango lua Biblia
4. Khala musuanguluga ha gutanga Biblia
Yajiya gukhala lamba gu gisendeselo. Uvi, wajiya gusuanguluga ha gutanga Biblia, gifua luholo wana suanguluga gudia ima inyi khenji udile ndo. Tanga 1 Phetelo 2:2, gungima zuelelenu mihu eyi yalandula:
Gula udi mutanga Biblia lusugu nu lusugu, udi mutangiza egi mbawusuanguluga nu ndaga udi mutanga nu mbawulandula gujitanga ba?
Tala VIDEO eyi ha gumona luholo aphangi ako asendesele gusuanguluga nu lutango lua Biblia. Gungima zuelelenu mihu eyi yalandula.
Malamba a luholo lutshi mavuala tuatala mu video eyi abingile?
Itshi yaakuatesele ha gulandula gutanga Biblia lusugu nu lusugu?
Itshi atshitshile ha gusuanguluga muavula nu lutango lua Biblia?
Ndaga jiajiya gugukuatesa ha gusendesa gutanga Biblia:
Tomba Biblia yabalumuiwe mu luholo luabonga, idi nu mbimbi jialeba ha gukotelesa. Bueta ha Biblia Gubalumuna gua Mavu Ahe-ahe gula mudi nu Biblia yene mu zuelelo dienu.
Sendesa thomo gutanga gitshinyi gidi gugusuanguluisa muavula. Wajiya gutala galuanda “Ndaga Jiajiya Gugukuatesa ha Gusuanguluga nu Lutango lua Biblia.”
Sonega ndaga jinyi watangi. Kalegela galuanda “Lutango Luami lua Biblia” mu mukanda owu.
Kalegela JW Library®. Application wawa ajiya gugukuatesa ha gutanga nga ha gutegelela lutango lua Biblia fundo diagasue ikhale mu telefone nga mu tablete yaye.
Kalegela ba appendice adi mu Traduction du monde nouveau. Ba appendice ene adi nu ba karte, tuluanda, nu ukoteleshi wa mbimbi yajiya gugukuatesa ha gutanga Biblia.
5. Khala gudilondega gutuama dia gulonguga Biblia
Tanga Ngimbo 119:34, gungima zuelelenu muhu owu:
Mukunda natshi gutshita gisambu gutuama dia gutanga nga dia gulonguga Biblia gudi nu ndando?
Luholo lutshi wajiya guheta gubonga gua ndaga udi mulonguga mu Biblia? Tangua udi gudilondega ha gulonguga, wajiya gukalegela metode awa:
Tanga paragrafe jia gisendeselo jidi mu longo mudi mulonguga.
Kamba verse mu Biblia, jitange, kamba nji gukotelesa luholo verse jiene jidi gudivua nu ndaga mudi mulonguga.
Tenda mufundunda goshi’a mbimbi jidi muhana mvutu ya muhu wagasue; gutshita ngenyi mbagugukuatesa tangua mbamulonguga nu muthu wana gugulongesa Biblia.
Wana guyijiya ba?
Matemue a Yehowa ana kalegela Biblia jia maluholo avula. Uvi, tuana suanguluga muavula nu Biblia Gubalumuna gua Mavu Ahe-ahe handaga yabalumuiwe mu luholo luatagana, yakhala nu mbimbi jialeba, yakhala nji nu jina dia Nzambi mukatshi.—Tala longo edi mu jw.org “Matemue a Yehowa ana Khala nu Biblia Yawo Ba?”
ATHU AKO ANA ZUELA EGI: “Gulonguga Biblia gudi ndaga yakola. Ngushigo nu tangua nga ngolo jia guyilonguga.”
Aye itshi udi mutangiza?
NDAGA WALONGUGA
Ha guheta gubonga gua ndaga jidi mu Biblia, khala nu programe yawaha ya guyitanga, khala mukombelela ha gukotelesa ndaga udi mutanga, khala nji gudilondega gutuama dia gulonguga nu muthu wana gugulongesa Biblia.
Mihu ya Guvutugila
Itshi yajiya gugukuatesa ha guheta gubonga gua ndaga jidi mu Biblia?
Tangua ditshi wana suanguluga gutanga Biblia nu guyilonguga?
Mukunda natshi idi nu ndando egi udilondege gutuama dia gulonguga nu muthu wana gugulongesa Biblia?
NDAGA JIKO JIA NDANDO
Tala malongo ako ajiya gugukuatesa ha gusuanguluga muavula nu lutango luaye lua Biblia.
“Pourquoi lire la Bible?” (Inzo Yaleha ya Mutaledi No. 1 2017 ya français)
Tala ndaga thathu jiajiya gugukuatesa ha gutanga Biblia.
“Comment la Bible peut-elle m’aider?—(1re partie): Explore ta bible” (Longo edi didi mu jw.org)
Tala ndaga jiajiya gugukuatesa ha gusuanguluga nu lutango lua Biblia.
Tala ndaga jiakuatesele athu ako ana tanga Biblia sendese mualeha.