“Khalenu Mukalagala Ndaga Mbimbi ya Nzambi idi Muzuela”

1-2. Ndaga jitshi jiana tuma akombeledi a Nzambi ha gukhala nu gusuanguluga? (Yakoba 1:22-25)

YEHOWA nu Mun’enji Yesu ana tshigina egi tukhale nu gusuanguluga. Muthu wasonegele mukanda wa Ngimbo 119:2 wazuelele egi: ‘Gusuanguluga gudi nu athu adi mulandula mbimbi jienji nu adi gumukamba nu mutshima wawo wagasue.’ Yesu wazuelele egi: “Gusuanguluga gukhale nu athu adi muvua mbimbi ya Nzambi nu adi guyitumagela!”​—Luka 11:28.

² Mukunda natshi esue akombeledi a Yehowa tuana khala nu gusuanguluga? Tuana khala nu ndaga jiavula jiana gututuma ha gukhala nu gusuanguluga. Ha gufezegesa, tuana tanga Biblia lusugu nu lusugu nu gukalegela ndaga tudi mutanga.​—Tanga Yakoba 1:22-25.

3. Gubonga gutshi tuana heta tangua tuana kalegela ndaga tuana longuga mu Mbimbi ya Nzambi?

³ Tuana heta gubonga mu maluholo avula tangua tuana ‘kalagala ndaga mbimbi ya Nzambi idi muzuela.’ Handaga tuana jiya egi gutshita ngenyi gudi nu ndando yavula ha gusuanguluisa Yehowa. Gujiya ndaga eyi guana gutusuanguluisa. (Mulo. 12:13) Gula tudi mukalegela ndaga tudi mutanga mu Mbimbi ya Nzambi, mbatukolesa ufuta wetu nu enya fami yetu nu aphangi’etu Aklisto. Yajiya gukhala egi aye nji wana mona egi yana khala ngenyi mu monyo waye. Ndaga yene yana gutukuatesa nji ha gulenga malamba ana buila athu anyi anago gutumagela mikhuala ya Yehowa. Yene ndaga yazuelele Fumu Davidi, tangua diayimbile muene lungimbo luakhalele muzuelela mikhuala, malongo nu usopheshi wa Yehowa. Wazuelele egi: ‘Gunemesa ndaga jiene guana bata ishimbigo.’​—Ngi. 19:7-11.

4. Mukunda natshi yanakhalago yaleba ha gukalegela ndaga tudi mutanga mu Mbimbi ya Nzambi?

⁴ Yana khalago yaleba tangua diagasue ha gutanga Mbimbi ya Nzambi nu gukalegela ndaga tudi mulonguga. Ikhale tudi nu ndaga jiavula jia gutshita mu monyo wetu, tudi naye gutomba tangua diabonga dia gutanga Biblia ha gukotelesa ndaga Yehowa wana tshigina egi tukalagale. Mu longo edi tuza mutadila ndaga jiajiya gutukuatesa ha gutanga Biblia lusugu nu lusugu. Tuza nji mumona ndaga jiajiya gutukuatesa ha gutangingiza ndaga tudi mutanga nu luholo tuajiya gujikalegela mu monyo wetu.

TOMBA TANGUA DIABONGA DIA GUTANGA MBIMBI YA NZAMBI

5. Ndaga jitshi jiana gutuzula tangua diavula?

⁵ Akombeledi a Yehowa avula ana khala nu ndaga jiavula jia gutshita. Tuana balegesa tangua diavula ha gutshita ndaga Biblia yana gututoga ha gutshita. Ha gufezegesa, aphangi avula ana tshita midimo ha gudikuatesa nu gukuatesa enya fami jiawo. (1 Tim. 5:8) Ako ana kuatesa aphangi awo adi nu ukhashi nga adi a gukola. Mukut’etu agasue tuana kalagala ngolo ha gukhala nu sante yabonga, ndaga yene yana gutuzula tangua diavula. Tuana khala nji nu inemo ya ndando ya gutagenesa mu hungu. Uvi ginemo giabalega ndando gidi, gutshita ngolo ha gulongesa lukuma luabonga. Ikhale tudi nu ndaga jiavula jia gutshita, itshi yajiya gutukuatesa ha guheta tangua dia gutanga Biblia lusugu nu lusugu, gutangigiza ndaga tudi mutanga nu gukalegela ndaga jiene mu monyo wetu?

6. Itshi yajiya gugukuatesa ha gutanga Biblia lusugu nu lusugu? (Tala nji gifuanesa.)

⁶ Gutanga Biblia gudi ‘ndaga yabalega ndando’ Muklisto wagasue udi naye gukalagala, hene tudi naye gutshita ngolo ha guyitanga lusugu nu lusugu. (Fili. 1:10) Mukanda wa Ngimbo mukhapho 1 udi muzuelela muthu wana khala nu gusuanguluga egi: ‘Gusuanguluga guenji guana katuga mu mikhuala ya Yehowa, wana guyitanga mu dijui diatuluga phipha nu muanya.’ (Ngi. 1:1, 2) Idi mukotelesa egi tudi naye gukhala nu programe yabonga ya gutanga Biblia. Uvi tangua ditshi diabonga tuajiya gutanga Biblia? Muthu nu muthu wajiya gukhala nu tangua dienji. Uvi ndaga yabalega ndando idi egi tudi naye gutomba tangua diabonga diajiya gutukuatesa ha guyitanga lusugu nu lusugu. Phangi Victor wazuelele egi: “Ngana suanguluga gutanga Biblia mu gimenegena. Ikhale nganago gusuanguluga guzuga mu gimenegena, uvi diana khala tangua diabonga handaga nganago gukhala nu ndaga jiajiya gunguwunganesa matangi. Mu tangua diene nganago gutangiza ndaga jiavula, ngana kotelesa nji muabonga ndaga ngudi mutanga.” Yajiya gukhala egi aye nji wana tanga Biblia mu gimenegena! Dihule egi: ‘Tangua ditshi diana khala diabonga mukunda nu ame ha gutanga Biblia?’

KHALA MUTANGIGIZA NDAGA UDI MUTANGA

7-8. Itshi yajiya gutukanga njila ha guheta diago gubonga mu ndaga tudi mutanga? Hana gifezegeselo.

⁷ Ndaga ya giamathidia idi egi tuajiya gusendesa gutanga ndaga jiavula, uvi gukuata getu ndo. Ha gufezegesa, watangele gale ndaga imoshi uvi gungima dia tangua diazonda wabuita ndaga yene mutshima ba? Ndaga yene yatubuidile gale mukut’etu agasue. Ndaga ya luholo elu yajiya nji gutubuila tangua tudi mutanga Biblia. Yajiya gukhala egi tuatombele gale mikhapho ya Biblia tudi naye gutanga lusugu nu lusugu. Yene ndaga yabonga. Tudi naye gudishila mafelela nu gutshita ngolo ha guatagenesa. (1 Kol. 9:26) Uvi Gula tudi mutshigina guheta gubonga guavula, tushigo naye phamba gusuga ha gutanga Biblia, tudi naye nji gutshita ndaga jiko.

⁸ Tutangizenu gale ndaga eyi: Mvula yana kuatesa mitshi ha gukula. Gula yanoga yavula mu tangua diazonda, yajiya gutebesa mavu muavula, ngenyi yajiyilego gukuatesa mitshi ha gukula muabonga. Uvi gula ishigo munoga yavula, yana ngina mu mavu muabonga yana kuatesa nji mitshi ha gukula muabonga. Luholo lumoshi nji, tushigo naye gutanga Biblia mu phushi guzula ndo tangua dia gutangigiza mu ndaga tuatangi. Tudi naye nji gutshita ngolo ha guwunguluga ndaga jiene nu gujikalegela.​—Yak. 1:24.

9. Itshi tuajiya gukalagala gula tuakotelesa egi tudi mutanga Biblia mu phushi?

⁹ Wakotelesele gale egi matangua ako wana tanga Biblia mu phushi ba? Gula idi ngenyi, itshi udi naye gukalagala? Khala guyitanga mage-mage. Tshita ngolo ha gutangigiza ndaga udi mutanga nga jinyi watangele gale. Gukalagala ngenyi gushigo diago ndaga yalamba. Wajiya guzula desizio dia gubalegesa tangua diavula ha gutangigiza tangua udi mulonguga. Nga ndo, wajiya gutanga phamba verse jiazonda hagula ukalegele tangua diasala ha gutangigiza ndaga watangi. Phangi Victor tuazuelela guthunda wazuelele egi: “Nganago gutanga ndaga jiavula, matangua avula ngana tanga phamba mukhapho umoshi. Luholo ngana tanga Biblia mu gimenegena yana gungukuatesa ha gutangigiza ndaga jiene mu lusugu luagasue.” Ikhale metode atshi wana kalegela ha gutanga Biblia, uvi idi nu ndando ha guyitanga mage-mage ha guheta tangua dia gutangigiza mu ndaga watangi.​—Ngi. 119:97; tala galuanda, “Mihu ya Gutadila.”

10. Hana gifezegeselo gidi mumonesa luholo wajiya gukalegela ndaga udi mutanga. (1 Tesalonike 5:17, 18)

¹⁰ Ikhale matangua guvula gutshi udi mubalegesa ha gutanga Biblia, ndaga ya ndando idi gukalegela ndaga udi mutanga. Tangua udi mutanga Biblia dihule egi: Luholo lutshi ngajiya gukalegela ndaga eji mangino nga mu masugu adi muza?’ Ha gufezegesa, tangiza gale egi watanga ndaga jidi mu mukanda wa 1 Tesalonike 5:17, 18. (Tanga.) Wajiya gubemba gale gutanga, gungima usendesa gutangiza gula mbala guvula gutshi wana tshita gisambu nu gukamba gujiya gula isambu yene yana khala ya luholo lutshi. Wajiya nji gutangigiza ndaga jidi gugutuma ha guhana Nzambi mersi. Wajiya guhana Yehowa mersi mukunda nu ndaga thathu jiagukalegele gale muene. Gula udi muzula minuta yazonda ha gutangigiza mu ndaga udi mutanga, mbayigukuatesa ha gukotelesa muabonga Mbimbi ya Nzambi nu guyikalegela. Tangiza gubonga mbawuheta gula udi mulandula gutshita ngenyi tangua udi mutanga verse jiko jia Biblia lusugu nu lusugu! Yadiago, gutshita ngenyi mbagugukuatesa ha gukalegela ndaga udi mutanga. Uvi itshi wajiya gukalagala gula wamona egi udi nu ndaga jiavula jia gutshita?

DISHILE MAFELELA WAJIYA GUTAGENESA

11. Matangua ako ndaga itshi yajiya gutulebesa muila gula tudi mutanga Biblia? Hana gifezegeselo.

¹¹ Gula udi mutanga Biblia, matangua ako wajiya guleba muila gula wakotelesa egi gudi nu ndaga jiko jiavula udi naye gusombegesa. Ha gufezegesa, tangiza gale egi lusugu lua thomo watanga verse imoshi ya Biblia idi mutunyisa khadilo dia lutondo. (Yak. 2:1-8) Gungima dia gutanga verse yene, wakotelesa egi wana khala nu khadilo diene, gungima wazula desizio dia gusombegesa. Idi ndaga yabonga diago! Lusugu lua mbadi watanga verse jiko jidi mumonesa egi idi nu ndando ha gumonesa gutema mu ndaga udi muzuela. (Yak. 3:1-12) Gungima wakotelesa egi lusugu lumoshi wawambelelego phangi mumoshi ndaga nu gisemo. Hene wazula desizio egi tangua mbawuta luko maga nu athu, mbawuzuela ndaga jidi muhana gikhesa. Lusugu lua thathu watanga verse iko ya Biblia idi gugutemesa ha gutuna gukuata ufuta nu enya ha mavu awa. (Yak. 4:4-12) Gungima wakotelesa egi udi naye gumonesa gutema tangua udi mutomba saga jia gubalegesela tangua. Mu lusugu lua nguana, wajiya gumona gifua idi lamba ha gusombegesa ndaga eji jiagasue walonguga.

12. Mukunda natshi ushigo naye guleba muila tangua udi mutanga Biblia gula wamona egi gudi nu ndaga udi naye gusombegesa? (Tala nji mbimbi goshi’a diyiji.)

¹² Gula wamona egi gudi nu ndaga jiavula udi naye gusombegesa, ulebigo muila. Handaga gutshita ngenyi gudi mumonesa egi udi muthu wa gudibulumuisa, udi nji nu matangi abonga. Muthu wagudibulumuisa wana tanga Mbimbi ya Nzambi nu matangi egi imukuatese ha gusombegesa.a Tujimbilago egi mukut’etu agasue tudi naye gulandula gusudiga “umuthu uhe-uhe.” (Kol. 3:10) Itshi yajiya gugukuatesa ha gulandula gukalagala ndaga Mbimbi ya Nzambi idi muzuela?

13. Luholo lutshi wajiya gudishila mafelela anyi wajiya gutagenesa? (Tala nji gifuanesa.)

¹³ Ha fundo dia gukalegela ndaga jiagasue watangi mu mbala imoshi, wajiya gudihagela mafelela anyi wajiya gutagenesa. (Ish. 11:2) Wajiya guphaga ndaga eyi: Tshita liste ya ndaga udi mutshigina gusombegesa, gungima tomba ndaga imoshi nga jiyadi udi mutshigina gusombegesa thomo, uvi ndaga jiko jiasala wajiya gujisombegesa mage-mage. Ndaga itshi wajiya gusendesa nayo?

14. Mafelela atshi wajiya gusendesa gudishila?

¹⁴ Wajiya gusendesa gutagenesa mafelela aleba. Nga ndo, wajiya gusombegesa makalegelo ako udi mumona egi ashigo abonga. Gula wazula desizio dia gubemba khadilo dimoshi diabola, wajiya gutshita ba recherche mu mikanda yetu gifua, Index des publications des Témoins de Jéhovah nga Guide de recherche pour les Témoins de Jéhovah. Toga Yehowa aguhane “nzala nu ngolo jia gutshita ndaga.” (Fili. 2:13) Gungima, tshita ngolo ha gukalegela ndaga udi mulonguga. Gula udi mutshita ngolo ha gusombegesa khadilo dimoshi, mbayigutuma ha gutshita nji ngenyi mukunda nu khadilo diko. Gula wamona egi wasombegesa gale khadilo dimoshi, mbayikhala yaleba ha gusombegesa makalegelo ako.

LANDULA UTUAMEJI WA MBIMBI YA NZAMBI

15. Mu luholo lutshi akombeledi a Yehowa ana khala agudisha nu athu avula ana tanga Biblia? (1 Tesalonike 2:13)

¹⁵ Athu ako ana zuela egi atangele gale Biblia mbala jiavula. Uvi ana sha diago mutshima mu ndaga jiana zuela Biblia ba? Nga ndo ana kalegela diago ndaga jiene nga gubemba egi jituameze diago monyo wawo ba? Ndo sha. Uvi akombeledi a Yehowa anago gukalagala ngenyi! Gifua Aklisto a mu siekle ya thomo, esue nji tuana tshigina ndaga jiana zuela Biblia “egi idi mbimbi ya Nzambi gifua luholo idi yene.” Tuana tshita yagasue ha gukalegela malongo a Biblia mu monyo wetu.​—Tanga 1 Tesalonike 2:13.

16. Itshi yajiya gutukuatesa ha gukhala athu adi mukalagala ndaga Mbimbi ya Nzambi idi muzuela?

¹⁶ Yana khalago yaleba tangua diagasue ha gutanga nu gukalegela Mbimbi ya Nzambi. Yajiya gukhala lamba ha guheta tangua dia gutanga Biblia. Nga ndo tuajiya gusendesa gutanga muphushi, uvi guzula ndo tangua dia gutangigiza. Matangua ako tuajiya guleba muila mukunda nu ndaga tudi naye gusombegesa. Ngatshima idi lamba, uvi tuajiya gubinga. Yehowa wajiya gutukuatesa. Tuajiya guzula desizio dia gutshigina ukuateshi wenji nu gukhala athu adi mukalagala ndaga Mbimbi ya Nzambi idi muzuela, uvi athu adi guyibuita mutshima ndo. Idi yadiago egi gula tudi mutanga Mbimbi ya Nzambi nu guyikalegela, mbatukhala nu gusuanguluga.​—Yak. 1:25.