MAKALEGELO A UKLISTO
Gukalagala Hamoshi ha Gulongesa mu Terituare ya Mazuelelo Avula
Athu avula ana gusuanguluga muavula nu lukuma luabonga lua Ufumu gula a alongesa nalo mu zuelelo diawo. Yajiya gukhala gishina giene Yehowa watshitshile methode awa mu Pantekote ya givo 33 gia Tangua Dietu hagula ‘enya Yuda, athu akhalele muvua Nzambi woma ajile mu ifutshi yagasue ya ha mavu’ avue lukuma luabonga ‘mu mazuelelo awo a gubutshiwa,’ ngatshima mukuta wawo agasue akhalele mujiya guzuela Hebelu nu Greki. (Makal 2:5, 8) Mangino, mu mafundo avula ana zuelewa mazuelelo avula. Hene, mahungu ana tshita gudibungisa mu mazuelelo a gudisha adi naye gukhala nu terituare mu mafundo ene. Luholo lutshi alongeshi a mu mahungu ene ajiya gudivua muabonga ha gulongesa athu agasue a mu terituare yene ha gula egi ataganago luphango lumoshi ha guhana khabu gudi muthu udi guategelela?
Guyizuelela Gutuama (Ish 15:22): Atadi a mudimo wa gulongesa adi naye gudimona ha guzuelela ndaga yene ha gukamba luholo luatagana luajiya gukuatesa mahungu agasue ha gulongesa lukuma luabonga. Gila terituare yawo idi yazonda, mahungu ana longesa mu mazuelelo ako ajiya guzuela egi hungu dienu dilongesago mu jiphango jidi nu athu ana guzuela zuelelo dia hungu diawo. Uvi, gula ashigo nu luholo lua gulongesa mu terituare yagasue handaga idi yakoma, ajiya guzuela egi mulongese mu jiphango jiagasue, gula muamona muthu wa zuelelo diko wasuanguluga nu giamatshidia, muajiya guadijiga n’enji. (od-F diyiji 93 par. 37) Nga ndo ajiya gumitoga egi gula alongeshi a hungu dienu amona athu adi muzuela zuelelo dia hungu diawo, muatumina ba adresse a athu ene. (km-F 7/12 diyiji 5, galuanda) Jiyenu egi, mu matangua ako luphango lumoshi luajiya gukhala nu athu adi muzuela mazuelelo avula. Ulondegi muazudi ha gulongesa teriture yenu yagasue udi naye gudivua nu ndaga mikhuala ya leta yana zuela.
Gudivua Muabonga (Ef 4:16): Landulenu muabonga utuameji udi muhana mutadi wa mudimo wa gulongesa wa hungu dienu. Wana gulonguga Biblia nu muthu mumoshi wago zuelelo dienji didi dia gudisha nu zuelelo dia hungu dienu ba? Muthu muene wajiya gukula muphushi gula wamutuma ha guya mulonguga mu hungu dia hehi nga groupe ya zuelelo dienji.
Gudilondega muabonga (Ish 15:28; 16:1): Gula muthu udi muta n’enji maga udi muzuela zuelelo dia gudisha nu dia hungu dienu, tshita yagasue ha gumulongesa lukuma luabonga. Wajiya gudilondega gutuama: kamba gujiya mazuelelo wajiya gutagana nawo, diangela gu télécharger Biblia nu jivideo jia mazuelelo ene mu telefone yaye. Wajiya gukalegela nji application a JW Language ha gulonguga luholo lua gumenega muthu mu mbimbi jiene.