Tukudise Luholo Luetu lua Gulongesa Mbimbi ya Nzambi​—Ulandulago Gulonguga Biblia nu Athu Anyi Ashigo Mukula mu Nyuma

IDI NU NDANDO ITSHI: Hagula athu ahuluishiwe, adi naye gutamega jina dia Yehowa. (Lomo 10:13, 14) Uvi, athu ako tuana gulonguga nawo Biblia, anago gutumagela gawo mikhuala ya Yehowa. Luko, tudi naye gukalegela tangua dietu muabonga mu mudimo wa gulongesa hagula tukuatese athu anyi atshigina diago gusombegesa makalegelo awo ha gusuanguluisa Yehowa. Hene, gungima dia gulonguga muavula Biblia nu muthu, gula tuamona egi muthu muene gashigo genji mukula mu nyuma, tudi naye gubemba gulonguga nenji ha gukuatesa athu anyi Yehowa gadi munana gudi muene nu mu organizasio wenji. (Yone 6:44) Gungima, gula muthu muene wasombegesa diago makalegelo enji nu wamonesa egi udi nu ‘mutshima watagana ha guheta monyo wa mayilago,’ tuajiya luko gusendesa gulonguga nenji Biblia.​—Makal 13:48.

LUHOLO LUA GUYIKAGALA:

• Shimana muthu muene luholo gamonesele mutshima wabonga wa gujiya Biblia muavula.​—1Tim 2:4

• Muwambele mukunda natshi idi nu ndando egi atumagele ndaga jidi muene mulonguga.​—Luka 6:46-49

• Tadila nenji gifezegeselo giahanele Yesu gidi muzuelela mukunyi wa mbuto. Gungima, mutoge ha gutangiza ndaga idi gumukanga njila ha gukula mu nyuma.​—Mat 13:18-23

• Muwambele nu gutema guagasue gishina wabembela gulonguga nenji Biblia

• Muwambele egi mbawukhala muza gumutala ha gumuhana ngolo mu nyuma. Muwambele luko egi gula muene wasombegesa makalegelo enji, muajiya luko gusendesa gulonguga Biblia

TALENU VIDEO, GUNGIMA HANENU KUETEYA GU MIHU EYI:

• Itshi wamonyi mu video idi mumonesa diago egi muthu wakhalele mulonguga Biblia gakhalelego mukula mu nyuma?

• Luholo lutshi mulongeshi gakuatesele muthu gakhalele mulongesa Biblia ha gumona egi udi naye gusombegesa makalegelo enji?

• Luholo lutshi mulongeshi gamonesele egi watshigina luko gulonguga Biblia nu muthu muene gungima?