Kalegela Video ha Gulongesa Athu Wana Gulonguga Nawo Biblia

Ifuanesa yana gukuatesa muthu ha gukotelesa muabonga ndaga jidi muene mulonguga hagula gajibuitshigo mutshima. Yehowa, Mulongeshi wetu Wakoma, wakadigidile nji ifuanesa ha gulongesa malongo a ndando. (Gis 15:5; Yel 18:1-6) Yesu, Mulongeshi Wakoma, wakadigidile nji ifuanesa tangua gakhalele mulongesa. (Mat 18:2-6; 22:19-21) Video jidi mukatshi dia ifuanesa athu avula ana guzumba mangino. Wana gukalegela muabonga video ha gulongesa athu wana gulonguga nawo biblia ba?

Gudi nu video kumi jialondewa hagula jitukuatese ha gulongesa malongo adi mu gamukanda Mene Jiabonga Jiakatuga Gudi Nzambi! Mito ya mene ya video jiene idi gudivua nu mihu yakoma idi mu mikhapho ya gamukanda gene. Format ya gamukanda gaga idi mu jw.org nga mu jw Library, idi gutumonesa tangua tuajiya gudijiga muthu video. Gudi nu video jiko jidi muzuelela ndaga jiavula jidi mu Mikanda Tuana Gukalegela ha Gulongesa Athu Biblia.

Mudi mutadila longo dia Biblia diajiya gukhala lamba egi muthu udi mulonguga nenji akotelese ba? Muthu wana gulonguga nenji Biblia udi mutagana nu lamba dimoshi ngenyi? Kamba video mu jw.org® nga mu JW Télédiffusion® yinyi yajiya gumukuatesa. Wajiya gutala nenji hamoshi video yene, gungima muyizuelela.

Mbeji yagasue, tuana guzola video jihe-jihe. Ha udi mutala video jiene, tangiza luholo wajiya gujikalegela tangua udi mulongesa athu Biblia.