Phetelo nu Yone adi mulondega sugu ya gosa mukunda nu wano wa Pake wa givo 33 gia T.D.
MAKALEGELO A UKLISTO
Wadilondega Gale Mukunda nu Guwunguluga Gufua gua Yesu Ba?
Pake ya gisugishilo yatshitshile Yesu yakhalele nu ukoteleshi wa luholo luko. Yesu walondele ndaga hagula adie Pake hamoshi nu alandudi enji handaga gufua guenji guasuenele hehi. Gungima watshitshile Gudia gua Fumu gua mu Ngueze gunu guakhalele naye gukalegewa ivo yagasue. Watumine Phetelo nu Yone ha gulondega sugu mukunda nu Pake. (Luka 22:7-13; tala gifuanesa holu dia gizula.) Ndaga yene idi gutuwunguluisa egi tudi naye gudilondega mukunda nu Guwunguluga Gufua Gua Yesu mu lusugu lua 27 Mars. Yajiya gukhala egi mahungu atombi gale muthu mbawutshita diskur, muthu mbawulondega mapha nu ndaga jiko. Uvi, itshi muthu wagasue mukatshi dietu udi naye gukalagala ha gudilondega mukunda nu Guwunguluga Gufua gua Yesu?
Hana Mersi Mukunda nu Gufua gua Yesu. Khala mutanga nu gutangigiza verse jia Biblia jidi muzuelela gufua gua Yesu jinyi jiakhala mu gamukanda Examinons les Écritures chaque jour. Mu Appendix B12 ya La Bible. Traduction du monde nouveau idi nu programe idi muzuelela ndaga jiavula jiatadila gufua gua Yesu. (Tala nji ndaga ya luholo lumoshi mu Mukanda wa Gukalegela mu Gudibungisa gua Lujingu nu Mudimo wa Uklisto ya Avril 2020.) Muajiya gukamba mikanda idi muzuelela gibawu mu Index des publications des Témoins de Jéhovah nga mu Guide de recherche pour les Témoins de Jéhovah, mu gukombelela guenu gua mu fami.
Tamega athu ako ha guza. Dihane muavula mu kampanye ga gukhapha ba emvitasio. Wajiya gutamega athu gifua: Mafuta aye, athu wakhalele mulongesa Biblia, enya fami nu athu walongesele lukuma luabonga. Akulu adi naye nji gutamega athu alebele gale muila mu nyuma ha guza mu Guwunguluga Gufua gua Yesu. Gula udi mutshigina gutamega muthu mumoshi anago gukhala dimbo dimoshi nu aye ha guza mu Gudibungisa gua Guwunguluga Gufua gua Yesu, wajiya gukamba fundo mbadikalegewa Gudibungisa guene mu dimbo dienji. Ngina mu jw.org ha fundo diasonegewa egi NDAGA JIATUTADILA bueta ha fundo diasonegewa egi “Guwunguluga Gufua gua Yesu.”
Ndaga itshi iko tuajiya gutshita ha gudilondega?