Malongo Atadila Gudibungisa Mukunda nu Mudimo wa Gulongesa

Gudibungisa mukunda nu mudimo wa gulongesa nu gudibungisa gua mu hungu, gudi mukatshi dia ima Yehowa wana gutuhana ha gudimonesela guzumba nu gukalagala midimo yabonga. (Heb 10:24, 25) Gudibungisa guene gudi naye guzula minuta 5 nga 7. Gukhapha athu, guhana ba terituare nu gutshita gisambu gudi mukatshi dia minuta eyi. (Gula gudibungisa guene gudi mukalegewa gungima dia gudibungisa guko, gudi naye gukhala guahihia diago.) Mutuameji udi naye gulondega ndaga imoshi ya guzuela, yajiya gukuatesa alongeshi mu lusugu luene mu mudimo wa gulongesa. Mu lusugu lua samano gula mutuameji wamona egi alongeshi avula azogelego mu mudimo wa gulongesa mu phoso yabalega, wajiya guzuelela ndaga alongeshi ajiya guzuela gula aheta gu mufulo wa inzo ya muthu. Ndaga tshi jiko muajiya guzuelela mu gudibungisa guene?

• Luholo lua guta maga nu athu ludi mu Lujingu nu Mudimo wa Uklisto—Mukanda wa Gukalegela mu Gudibungisa

• Luholo lua gukalegela ndaga jihe-jihe jidi mubalega mu dimbo ha gusendesa guta maga nu athu

• Ndaga tuajiya guzuela gula muthu gashigo mutshigina ndaga tudi gumuwambela

• Luholo lua guta maga nu athu anago gutshigina egi Nzambi wakhala guene, athu ana tshigina longo dia evolisio, athu ana zuela zuelelo diko nga nu athu ana khala mu gikombelelo ginyi gishigo mujiyiwa muavula mu terituare yenu

• Luholo lua gukalegela ndaga jidi mu jw.org nu luholo lua gukalegela JW Library^® nga Biblia

• Luholo lua gukalegela gikadigilo gimoshi gidi mu Ikadigilo ya Gulongesela Biblia

• Luholo lua gulongesa mu njila ya telefone, gusonega mikanda, gulongesa mu mafundo a athu avula, guvutugila athu, nga gulonguga nu athu Biblia

• Malongo atadila guwenda mu ubambi, gukhala hehi ha gusombegesa, makalegelo abonga, gukhala nu matangi abonga nga ndaga iko

• Longo nga video imoshi idi mu gamukanda Dihane ha Gutanga nu Gulongesa

• Luholo lua gukuatesa muthu tudi nenji mu mudimo wa gulongesa nu gumuhana gikhesa

• Verse idi muzuelela mudimo wa gulongesa nga eksperianse imoshi idi muhana gikhesa aphangi ataganele nayo mu mudimo wa gulongesa