Luholo Wajiya Gukuatesa Gula Ndaga ya Lamba Yabua

Mangino athu adi mutagana nu malamba avula gifua, guzala gua meya, gikudi nu gudigita gua mavu. Gula ndaga ya luholo elu yabua, yana toga gudilondega muabonga ha gutuameza mudimo wa gukuatesa aphangi nu ima adi nayo funu. Gishina giene, Hunji dia Akulu Atuameji diahagele Departema Yana Kuatesa Athu Abuila Malamba gu ba Betele agasue.

Gula aphangi a mu departema yene ajiya egi ndaga ya lamba yabua ha fundo dimoshi, ana tamega mbala imoshi akulu a ha fundo diene ha gujiya luholo ajiya gukuatesa aphangi. Gula aphangi ajiyilego gudikuatesa ene hakhawo handaga lamba diabui didi diakola diago, Betele yana tuma aphangi a mala ha guakuatesa. Aphangi ene ajiya gukamba ba volontere nga gutoga ima yajiya gukuatesa aphangi ene. Ajiya nji gusumba ima ha guhana athu adi nayo funu.

Gutshita ndaga mu luholo elu guana gutubatela gubonga guavula. Gula aphangi akalegelego ndaga mu luholo luawo, yana kuatesa ha gutuna gutshita mudimo wa githuhu, ha gutuna gutshita ndaga mu lumua-mua nga ha gukalegela ima mu luholo luabola.

Aphangi ene ana tombewa gu Betele, ana kamba gujiya makuta guvula gutshi adi nawo funu. Ana kamba nji gujiya gula adi nu funu ya ba volontere guvula gutshi ha gukuatesa athu abuila malamba. Ajiya nji guta maga nu mafumu a leta a ha fundo diene ha guakuatesa ha gula mudimo wene ukalegewe muabonga. Hene, aphangi ashigo naye gukungula ima ene hakhawo ha gutuma gudi athu adi nu funu ya ukuateshi nga guya ha fundo lamba diabui ha gukuatesa gula a atogelego ha gutshita ngenyi.

Tuana khala nu funu ya gukuatesa aphangi handaga tuana guazumba. (Heb 13:16) Luholo lutshi tuajiya guakuatesa? Ndaga yabalega ndando tuajiya gutshita idi gusamba mukunda nu aphangi abuila lamba nu aphangi adi guakuatesa. Tuajiya nji guhana misomonyi ha gukuatesa mudimo wa Matemue a Yehowa ha mavu a mudidi. Hunji dia Akulu Atuameji diana tuameza ba Betele ha gujiya luholo ajiya gukalegela muabonga misomonyi yene. Gula udi mutshigina guya ha fundo diene ha gukuatesa, wajiya guzalesa formilere Demande d’admission comme volontaire local de développement-construction (DC-50).

TALENU VIDEO INONDATIONS CATASTROPHIQUES AU BRÉSIL, GUNGIMA HANENU MVUTU GU MUHU WUWU:

Ndaga itshi ya gushimana wamonyi mu video, luholo Matemue a Yehowa akuatesele aphangi a gu Brésil tangua dimbo diawo diazalele nu meya mu 2020?