Gulela Guabatele Gubonga!

LUSUGU lumoshi mavuala a akhetu mbadi akhalele muwenda mu Dimbo dia Baguio fundo diana kalegewa mingenda, gu Philippines. Amonele présentoir mobile, uvi asuenelego guene. Phangi Helen, wakhalele ya gumagana hehi nu présentoir waalelesele nu gusuanguluga guagasue. Mavuala ene a akhetu alanduile guya. Uvi, asuangulugila muavula luholo phangi Helen waalelesele.

Ngungima, tangua mavuala ene akhalele mu gamiyo ha guvutuga gu inzo, amonele jw.org ya gusonega gu gibayi gia Inzo imoshi ya Ufumu. Awungulugile egi isona yene yakhalele luholo lumoshi nu inyi amonele gu présentoir mobile. Muyadi’awo tshima atulugile, aya gu Inzo yene ya Ufumu. Amonele liste ya programe ya gudibungisa ya mahungu yakhalele ha mufulo wa Inzo ya Ufumu.

Phoso ya landuile mavuala ene ayile mu gudibungisa gua mu hungu. Muthu ya thomo a monele mu Inzo ya Ufumu ya khalele nanyi? Yakhalele Phangi Helen! Mu tangua diene awungulugile egi wana lela muavula. Phangi Helen udi muzuela egi: “Ha ngamonele muza gudi ame, ngadisagesele ngatangijile egi yajiya gukhala ngakalegele ndaga yabola”. Uvi, mavuala ene awambelele phangi Helen ndaga yakalegewe.

Mavuala ene a akhetu asuangulugila muavula nu gudibungisa. Adivuile muabonga luholo akhalele mukatshi dia aphangi a mala nu a akhetu, adivuile diago gifua gumbodiawo. Tangua amonele aphangi ako mukomba Inzo ya Ufumu gungima dia gudibungisa, ene nji atogele ha gukuatesa. Muvuala muko wakatugile gale mu gifutshi giene, uvi muko wasendesele gale guya mu gudibungisa gua mu hungu. Wasendesele gale nji gulonguga Biblia!