1921 Ivo 100 Yabalega Gale

Inzo Yaleha ya Mutaledi ya français ya 1 janvier 1921 yahudile Athu Akhalele Mulonguga Biblia muhu egi: “Mudimo utshi tuza mukalagala mu givo egi?” Inzo Yaleha ya Mutaledi yene yakhalele nu mukanda wa Yeshaya 61:1, 2 wakhalele guawunguluisa mudimo wa gulongesa. Udi muzuela egi: ‘Yehowa wangutombele ha gulongesa lukuma luabonga gudi athu agudibulumuisa . . . , ha gulongesa lusugu Yehowa mbawuhuluisa athu nu lusugu lua khabu jia Nzambi.’

ALONGESHI A GIKHESA

Ha gutshita mudimo wa gulongesa muabonga Athu Akhalele Mulonguga Biblia akhalele nu funu ya gikhesa. Akhalele naye gulongesa ‘lukuma luabonga’ gudi athu agudibulumuisa nu gulongesa ‘lusugu lua khabu jia Nzambi’ gudi athu abola.

Phangi J. H. Hoskin wakhalele mujinga gu Canada. Wakhalele mulongesa nu gikhesa ikhale watagenele nu umbalagaji mu gifutshi giene. Mu gisendeselo gia 1921 wadimonele nu mulongeshi wa gikombelelo gimoshi. Phangi Hoskin wamuwambelele egi: “Tudi naye guta maga a Biblia muabonga ikhale tushigo gudivua mu ndaga jiko, tuajiya gusugisa maga etu mu guhuima. Tuajiya nji gukhala mafuta.” Uvi muthu muene watunyine genji. Phangi Hoskin udi muzuela egi: “Tuazuelele n’enji phamba minuta yazonda, gungima muthu muene wakangele gijidigo mangololo diago. Yajiya gukhala egi vitre yakoma ya gijidigo giene yamuanganele.”

Muthu muene wabalediele phangi Hoskin egi: “Mukunda natshi wajiyilego guya mulongesa athu anyi ashigo Aklisto?” Phangi Hoskin wahenele tedie, wakatugile genji. Hakhalele muene muya wasendesele gudizuelela egi: ‘Ngamonele gifua muthu muene udi Muklisto, hoho ndo!’

Tangua muthu muene wakhalele mulongesa mu gikombelelo giawo mu lusugu lualanduile, wazuelele ndaga jia mambo mukunda nu phangi Hoskin. Phangi Hoskin wazuelele egi: “Muthu muene wawambelele athu egi khenji amonele muthu mumba mambo akoma mu dimbo diawo gifua ame, ngudi naye gushiyiwa.” Uvi phangi Hoskin walanduile gulongesa, wakhalele muta maga nu athu avula. Wazuelele egi: “Ngakhalele musuanguluga gulongesa mu dimbo diene muavula. Athu ako asendesele guzuela egi: ‘Tudi mujiya egi udi mukalagala mudimo wa Nzambi,’ akhalele gunguhana ima ngakhalele nayo funu.”

GULONGUGA GUAMI HAKHAMI NU GUA MU FAMI

Ha gukuatesa athu akule mu nyuma, Athu Akhalele Mulonguga Biblia akhalele muzola programe imoshi mu zulunalu yakhalele mutamegewa egi Âge d’Or.a Programe yene yakhalele nu mihu yatadila mavuala. Mvuaji jiakhalele guyikalegela ha guta maga nu an’awo. “Akhalele muhula an’awo mihu yene ha guakuatesa ha guheta mvutu mu Biblia.” Programe yene yakhalele nu mihu yakhalele mulongesa malongo aleba a Biblia, gifua: “Biblia yana khala nu mikanda guvula gutshi?” Yakhalele nji nu mihu yakhalele mukuatesa mavuala ha gutuna guvua woma mu mudimo wa gulongesa, gifua: “Aklisto agasue adi naye gutagana nu malamba ba?”

Guakhalele nji nu mihu ya Biblia nu mvutu jia jiajiya gukuatesa athu anyi akhalele mutshigina gujiya ndaga jiavula jia mu Biblia. Mvutu jiene jiakhalele mu volime ya thomo ya mukanda Études des Écritures. Mihu yene yakhalele mukuatesa diago athu avula, uvi Âge d’Or ya 21 decembre 1921 yazuelele egi mbaashigo luko muzola mihu yene. Mukunda natshi?

MUKANDA UHE-UHE!

Mukanda *La Harpe de Dieu*

Karte didi mumonesa mafundo a gutanga

Karte dia mihu

Aphangi akhalele mutuameza akotelesele egi athu akhalele nu funu ya gujiya malongo a Biblia mu luholo luabonga. Mu novembre 1921, azolele mukanda La Harpe de Dieu. Athu anyi asuangulugile nu mukanda wene asonegewe majina hagula ene nji asendese gulonguga. Mukanda wene wakuatesele athu ene ha gujiya “felela dia Nzambi dia guhana athu monyo wa ivo nu ivo.” Luholo lutshi akhalele guwukalegela?

Gula muthu watshigina mukanda, akhalele gumuhana karte diazonda diakhalele mumonesa mafundo a gutanga. Mu phoso yakhalele mulandula, akhalele gumuhana karte diko diakhalele nu mihu yavula yatadila ndaga jiatangele muene. Karte diene diakhalele nji mumonesa fundo dia gutanga mu phoso yalandula.

Akhalele mukalagala phoso 12. Uvi phoso yagasue athu akhalele mulonguga akhalele muheta bakarte ahe-ahe gudi aphangi a mu hungu diakhalele hehi nu ene. Matangua avula, athu akhalele mutuma bakarte ene akhalele athu a gukola nga athu anyi akhalelego nu luholo lua gulongesa inzo nu inzo. Ha gufezegesa, Anna K. Gardner, muenya gu Millvale, Pennsylvania, gu États-Unis wazuelele egi: “Tangua mukanda La Harpe de Dieu wazogele, wahanele phangi’enji wa mukhetu Thayle yonu wakhalele muwenda mu lamba, mudimo wavula wa gutumila athu bakarte akhalele nu mihu phoso nu phoso.” Gula muthu wamanesela gulonguga, phangi wa mu hungu dimoshi wakhalele muya gumutala ha gumukuatesa ha gujiya ndaga jiavula jiatadila Biblia.

Thayle Gardner udi ha velo dia ikata (fauteuil roulant)

MUDIMO WAKHALELE GUTUNENGA GUTUAMA

Gu gisugishilo gia givo phangi J. F. Rutherford watumine mikanda gudi mahungu agasue. Wasonegele egi “givo egi mudimo wa gulongesa lukuma luabonga lua Ufumu wakalegewa muavula nu wakuatesa athu avula gubalega ivo iko.” Gungima wazuelele luko egi: “Tudi nu mudimo wavula wa gukalagala luko. Tudi naye gukolesa athu ako ha gutshita mudimo owu wa ndando.” Yadiago Athu Akhalele Mulonguga Biblia akalegele ndaga jiazuelele phangi Rutherford. Mu 1922 alongesele lukuma luabonga lua Ufumu nu gikhesa giagasue gubalega ivo iko yagasue.

Mafuta a Gikhesa

Athu Akhalele Mulonguga Biblia akhalele gudimonesela guzumba luholo akhalele gudikuatesa. Lumene elu ludi gutumonesa egi akhalele mafuta a gikhesa handaga ‘akhalele gudikuatesa mu matangua a lamba.’—Ish. 17:17.

Mu lusugu lua mbadi lua 31 mai 1921, yala mumoshi wa gilema giabuita wa mu dimbo dia Tulsa (Oklahoma gu États-Unis) wambiwe mu bologo handaga waluishile mukhetu mumoshi wa mundele. Gungima mindele gubalega 1 000 ayile muluisa gahunji gamoshi gazonda ga athu a gilema giabuita. Ita yavudile muphushi mu kartie ya Greenwood, fundo athu avula a gilema giabuita akhalele mujinga. Athu akuyile ima mu jinzo jia gubanda nu jia gukalegela mingenda gubalega 1 400, gungima akondele jinzo jiene. Mafumu azuelele egi athu 36 afile, uvi rapore ya mangino idi mumonesa egi yajiya gukhala egi athu hehi nu 300 afile. Ita yene yana tamegewa mu français egi Le massacre de Tulsa.

Phangi Richard J. Hill wakhalele muthu wa gilema giabuita, wakhalele Mulonguga Biblia. Wakhalele nji mujinga mu kartie ya Greenwood. Wazuelele egi: “Mu phipha yaluiwe ita yene, tuakhalele mu gudibungisa gua mu hungu. Tangua tuamanesele gudibungisa guetu, tuavuile mata mudila mu dimbo dia Tulsa. Mata ene alanduile gudila uu nu mukatshi dia phipha yakola.” Mu 1 juin mu lusugu lua thathu mu gimenegena, ndaga jiabolele luko muavula. “Athu ako ajile gutuwambela egi gula tuatshigina gukhala mu ubambi, tudi naye guya mukhala mu inzo imoshi yakoma ya guvernema.” Hene phangi Hill nu mukaji’enji nu an’awo mutano alengele ha guya mukhala mu inzo yene. Masuta anyi guvernema yatumine ha gusugisa ita akhalele mubamba athu hehi nu 3 000 a gilema giabuita anyi akhalele mu inzo yene.

Phangi Arthur Claus wakhalele muthu wa gilema gilaphe, wazudile desizio dimoshi nu gikhesa giagasue. Wazuelele egi: “Tangua ngavuile egi athu akhalele mukuya ima nu gukonda jinzo mu kartie ya Greenwood, ngayile guene mutala futa diami Hill ha gujiya gula udi muabonga.”

Phangi Arthur Claus udi mulongesa ana khalasa 14 mukanda La Harpe de Dieu

Tangua phangi Arthur wahetele gumbo dia phangi Hill wamonele mundele mumoshi wakhalele mujinga hehi nu phangi Hill nu uta ha mago. Mundele muene wakhalele futa dia phangi Hill, wamonele gifua phangi Arthur wakhalele nji mukatshi dia athu akhalele mulua ita. Wabalediele phangi Arthur egi: “Itshi waza mutshita mu luphango lua muthu owu?”

Phangi Arthur wazuelele egi: “Nga ngahanelego ukoteleshi wabonga gudi muthu muene, nga wangulozele.” “Ngamuwambelele egi phangi Hill udi futa diami, ngana guza gumbo dienji mbala jiavula.” Phangi Arthur nu muthu muene akuatesele phangi Hill ha gubamba ima yenji, hagula athu akhalele mulua ita ayibolesago.

Matangua azonda gungima, Arthur wavuile egi phangi Hill nu enya fami yenji ayile mukhala mu inzo imoshi yakoma ya guvernema. Awawambelele Arthur egi athu a gilema giabuita ajiyilego gukatuga gu inzo yene gula Général Barrett nu guahana ndo njila, handaga muene wakhalele guatala. Arthur wazuelele egi: “Yakhalele lamba ha guya muta maga nu général. Tangua ngawambelele général egi ngudi mutshigina guya nu fami ya Hill, muene wanguhudile egi: ‘Aye mbawabamba muabonga nu mbawahana ima adi nayo funu ba?’ Ngatshiginyile nu gusuanguluga guagasue.”

Arthur wanginyile muphushi mu inzo yene handaga général wamuhanele njila. Wahanele mukanda gudi muthu wakhalele mubamba athu akhalele mu inzo yene, uvi muthu muene wadihudile egi: “Signature eyi ya général! Aye mujiya egi udi muthu wa thomo ha guza muzola athu mu inzo eyi ba?” Gungima, phangi Hill nu fami yenji azogele mu inzo yene, anginyile mu gamiyo ga phangi Arthur, avutugile gumbo diawo.

Phangi Arthur watshitshile yagasue hagula phangi Hill nu fami yenji akhale mu ubambi. Khadilo dia phangi Arthur diasuanguluishile athu ako muavula. Arthur udi muzuela egi: “Mundele munu wakuatesele ha gubamba ima ya phangi Hill wasendesele gunemesa Matemue a Yehowa muavula gubalega masugu ako. Athu ako avula asendesele gusuanguluga nu giamatshidia handaga amonele egi tuana khala ndo nu khadilo dia gutomba-tomba, mukut’etu agasue tuana khala luholo lumoshi gu meso a Nzambi.”

a Mu 1937 Âge d’Or yasombegesele jina, asendesele guyitamega egi Consolation, uvi mu 1946 yabuile Réveillez-vous!