Tuajiya Gujinga Mayilago

1. Gula tudi mutangigiza felela dia monyo wa ivo nu ivo diatuhanele Yehowa mbayitukuatesa ha gutshita itshi?

YEHOWA walayele egi athu ana gumutumagela mbaaheta “monyo wa ivo nu ivo.” (Roma 6:23) Gula tudi mutangigiza ima yana gutuhana Yehowa, mbatumuzumba muavula diago. Sh’etu wa mu dilu wana gutuzumba muavula diago, gushigo nu gima giajiya gutukhaphumuna n’enji.

2. Luholo lutshi felela dia monyo wa ivo nu ivo diana gutukuatesa?

² Felela dia monyo wa ivo nu ivo diatuhanele Nzambi, diana gutukuatesa ha gukolesela mu malamba. Ikhale mbalagaji jietu jiatuwambela egi adi naye gutushiya mbatushigo mubemba gukombelela Yehowa. Mukunda natshi? Handaga tudi mujiya egi gula tudi ya gujinginyina gudi Yehowa, ikhale tuafua muene mbawutufuzumuna nu mbatushigo mufua luko. (Yone 5:28, 29; 1 Kol. 15:55-58; Heb. 2:15) Itshi idi gututshiginyisa egi mbatujinga diago mayilago? Tutadilenu ndaga jialandula.

YEHOWA WANA JINGA MAYILAGO

3. Mukunda natshi tudi naye gusha mutshima egi Yehowa mbawutuhana diago monyo wa mayilago? (Ngimbo 102:12, 24, 27)

³ Tuana jiya egi Yehowa mbawutuhana diago monyo wa ivo nu ivo, handaga muene wafugile ima yagasue idi nu monyo nu wana jinga mayilago. (Ngi. 36:9) Tutadilenu verse jidi monesa diago egi Yehowa ganago gukhala nu gisendeselo nga gisugishilo. Ngimbo 90:2 idi muzuela egi: ‘Yehowa wana khala guene ivo nu ivo.’ Ngimbo 102 idi muzuelela nji ndaga ya luholo lumoshi. (Tanga Ngimbo 102:12, 24, 27.) Profete Habakuka wasonegele mukunda nu Tata wetu wa dilu egi: ‘Yehowa, wana khala guene ivo nu ivo. Nzambi wami, Muthu wami wa Gijila, aye wanago gufua.’​—Hab. 1:12.

4. Tudi naye gudisagesa gula tushigo mukotelesa luholo Yehowa ganago gukhala nu gisendeselo nu gisugishilo? Kotelesa.

⁴ Yana khala lamba gudi aye ha gukotelesa egi Yehowa wana ‘jinga mayilago’? (Yesh. 40:28) Ushigo hakhaye, athu avula ana tangiza nji ngenyi. Elihu wazuelele egi: “Idi lamba ha gukotelesa guvula gua ivo ya Nzambi.” (Yobo 36:26, NWT) Uvi gula tushigo mukotelesa ndaga imoshi, ishigo mumonesa egi ndaga yene idi ya mambo. Ha gufezegesa, tuana kotelesago luholo muhehe wana khala. Uvi idi mumonesa egi muhehe wana khalago guene? Ndo sha! Luholo lumoshi nji esue athu tuajiyilego gukotelesa, luholo Yehowa ana khalago nu gisendeselo nu gisugishilo. Uvi ndaga yene ishigo mukotelesa egi Yehowa gana jinga ndo mayilago. Ndaga tuana jiya nga jinyi tuanago gujiya mukunda nu Nzambi jishigo jiene jiana sombegesa giamatshidia giamutadila. (Roma 11:33-36) Yehowa wadiangele gukhala guene gutuama dia gufuga ima yagasue. Gifua muanya nu themua. Tudi diago nu gutshigina egi Yehowa ‘Wafugile mavu mu ngolo jienji.’ Yehowa wakhalele guene gutuama dia “gusununa dilu.” (Yel. 51:15; Makal. 17:24) Ndaga tshi iko yajiya gututshiginyisa egi Yehowa udi nu ngolo jia gutuhana monyo wa ivo nu ivo?

YEHOWA WATUFUGILE HA GUJINGA MAYILAGO

5. Felela ditshi Yehowa wahanele Adama nu Eva?

⁵ Ima yagasue yafugile Yehowa ha mavu yakhalele naye gufua, uvi athu ndo. Handaga Yehowa waafugile hagula ajinge mayilago. Uvi Yehowa wawambelele Adama egi: “Ushigo naye gudia mabundu a mutshi wa gujiya ndaga jiabonga nu jiabola, handaga lusugu mbawadia, mbawufua diago.” (Gis. 2:17) Gula nga Adama nu Eva atumagele Yehowa, nga afilego. Tudi musha diago mutshima egi, Yehowa wakhalele naye guahana njila ya gudia mabundu a “mutshi wa monyo.” Gutshita ngenyi guakhalele naye guatshiginyisa egi “mbaajinga mayilago.”b​—Gis. 3:22.

6-7. (a) Ndaga itshi idi mumonesa egi athu afugiwego hagula ajiya gufua? (b) Ndaga itshi yana gugusuanguluisa mbawukalagala mu mavu ahe-ahe? (Tala gifuanesa.)

⁶ Enya ndunge ako amonele ndaga jidi mumonesa egi wongo wetu wajiya gubamba ndaga jiavula, gubalega jinyi tuajiya gulonguga mangino mu monyo wetu. Idi diago ndaga ya gushimana. Wongo wetu wajiya gukuata video imoshi yaleha yajiya guzula ivo 300 ha guyimanesela. Idi mumonesa egi wongo wetu wajiya gukuata ima yavula gubalega inyi tuazuelela. Ndaga yene idi mumonesa egi Yehowa wafugile wongo wetu ha gukuata ndaga jiavula gubalega ndaga jinyi tuana kuata mu ivo 70 nga 80.​—Ngi. 90:10.

⁷ Yehowa watufugile nji nu nzala yakola ya gujinga mayilago. Biblia yana zuela egi, Nzambi wambile ‘mu mitshima ya athu nzala ya gujinga mayilago.’ (Mulo. 3:11) Gishina giene tuana tadila gufua gifua mbalagaji wetu. (1 Kol. 15:26) Gula tudi mukata muavula, tuana hena tedie egi tufue getu ba? Ndo. Matangua ako tuanaya mumona munganga, tuana nua nji ihemba hagula tukole. Tuana tshita yagasue hagula tufuigo. Gula muthu tuana zumba wafua, ikhale mona wa zonda nga muthu wa gukola, yana gutuhana gikenene giavula. (Yone 11:32, 33) Tuana khala nu nzala yakola ya gujinga mayilago handaga Yehowa watufugile ngenyi. Idi yadiago egi muene mbawutuhana diago monyo wa mayilago. Uvi gudi nji nu ndaga jiko jiana gutukuatesa ha gusha mutshima egi tuajiya gujinga mayilago. Henyaha tutadilenu ndaga Yehowa wakalegele mu masugu abalega nu jinyi jidi mukalagala muene mangino jidi mumonesa egi khenji gasombegesele ndo felela dienji.

FELELA DIA YEHOWA KHENJI DISOMBEGESELEGO

8. Yeshaya 55:11 idi gutulongesa itshi mukunda nu felela Yehowa wana khala nadio mukunda nu esue?

⁸ Ngatshima Adama nu Eva akalegele gubola nu abatelele an’awo gufua, uvi Yehowa gasombegeselego felela dienji. (Tanga Yeshaya 55:11.) Udi mutshigina egi akombeledi enji a gujinginyina ahete monyo wa mayilago. Tuazuela ngenyi handaga tudi mujiya ndaga Yehowa wazuelele nu wakalegele ha gutagenesa felela dienji.

9. Ndaga itshi Nzambi watulayele? (Danyele 12:2, 13)

⁹ Yehowa walayele egi mbawufuzumuna athu a gufua nu mbawahana monyo wa ivo nu ivo. (Makal. 24:15; Tito 1:1, 2) Yobo wakhalele diago nu gutshigina egi Yehowa wana tshigina gufuzumuna athu anyi afile gale. (Yobo 14:14, 15) Profete Danyele wakhalele mujiya egi athu mbaafuzumuga mbaaheta luendu lua gujinga mayilago. (Ngi. 37:29; tanga Danyele 12:2, 13.) Enya Yuda a mu tangua dia Yesu akhalele nji mujiya egi Yehowa mbawuhana akombeledi enji a gujinginyina “monyo wa ivo nu ivo.” (Luka 10:25; 18:18) Yesu wazuelediele felela diene muavula. Tangua diafile muene Sh’enji wamufuzumuine.​—Mat. 19:29; 22:31, 32; Luka 18:30; Yone 11:25.

10. Gufuzumuga guakalegewe mu masugu abalega gudi mumonesa itshi? (Tala gifuanesa.)

¹⁰ Yehowa wafugile ima yagasue idi nu monyo, udi nu ngolo jia guhana luko monyo gudi athu afile gale. Wahanele profete Eliya ngolo jia gufuzumuna mun’a mukhetu wa gafunda wa gudimbo dia Selefeta. (1 Maf. 17:21-23) Gungima Yehowa wakuatesele profete Elisha ha gufuzumuna mun’a mukhetu wa gu dimbo dia gu Shunema. (2 Maf. 4:18-20, 34-37) Mene eji nu mene jiko jia gufuzumuga, jiana monesa diago egi Yehowa udi nu ngolo jia gufumuzumuna athu afile gale. Tangua Yesu wakhalele ha mavu, wamonesele diago egi Sh’enji wamuhanele ngolo jia gufuzumuna athu. (Yone 11:23-25, 43, 44) Henyaha Yesu udi mu dilu, Nzambi wamuhanele ufumu wa “ndaga jiagasue . . . mu dilu nu ha mavu.” Hene udi nu ngolo jia gutagenesa felela didi muzuela egi “athu agasue adi mu malumba” mbaafuzumuga nu mbaaheta luendu lua gujinga ivo nu ivo.​—Mat. 28:18; Yone 5:25-29.

11. Luholo lutshi mulambu wa Yesu watuhanele luendu lua gujinga mayilago?

¹¹ Mukunda natshi Yehowa wahanele njila egi Mun’enji akhalele muzumba amone lamba nu afue? Yesu wahanele mvutu gu muhu owu hazuelele muene egi: “Nzambi wazumbile athu a ha mavu muavula, wahanele Mun’enji mumoshi ha mumoshi hagula muthu wagasue washa gutshigina gudi muene, gafuigo uvi ahete monyo wa ivo nu ivo.” (Yone 3:16) Nzambi watuhanele luendu lua guheta monyo wa ivo nu ivo, tangua diahanele muene mun’enji gifua mulambu ha gutukatula mu gubola. (Mat. 20:28) Mupostolo Phaula wamonesele egi ndaga jiatulayele Nzambi jidi nu ndando tangua diasonegele muene egi: “Gufua guajile mu njila ya muthu mumoshi. Gufuzumuga gua athu a gufua nji gudi muza mu njila ya muthu mumoshi. Athu agasue ana gufua mukunda nu Adama. Luholo lumoshi nji, athu agasue mbafuzumuga mukunda nu Klisto.”​—1 Kol. 15:21, 22.

12. Luholo lutshi Ufumu wa Nzambi mbawutagenesa felela Yehowa wana khala nadio mukunda nu esue?

¹² Yesu walongesele alandudi enji ha gukombelela egi Ufumu wa Nzambi uze, gutshigina guenji gukalegewe ha mavu. (Mat. 6:9, 10) Felela dia Nzambi didi egi athu ajinge mayilago ha mavu. Ha gutagenesa felela diene, Yehowa watombele Mun’enji ha gukhala Fumu wa Ufumu wenji. Nzambi wana tomba athu ha mavu ha gutshita hamoshi nu Yesu, ha gutagenesa gutshigina guenji. Mutango wa athu ene udi 144 000.​—Gumo. 5:9, 10.

13. Ndaga jitshi jidi mukalagala Yehowa mangino? Aye giwa itshi udi naye gutshita?

¹³ Mangino Yehowa udi mubungisa “thundu yakoma ya athu.” Udi guahana formasio mbayakuatesa ha gungina mu Ufumu wenji. (Gumo. 7:9, 10; Yak. 2:8) Mangino athu adi agudikhaphumuna mukunda nu ita nga mukunda nu ndaga jidi muhana woma. Uvi athu adi mukatshi dia thundu yakoma ya athu ana tshita yagasue ha gujinga hamoshi ikhale adi enya ifutshi ya gudisha nga mazuelelo a gudisha. Adi mumonesa diago mu makalegelo awo egi adi mubuisa phogo jiawo jia khusa kuphu-kuphu. (Mika 4:3) Hafundo dia gudinginyisa mu ita idi mushiyisa athu avula, ana kuatesa athu ha gujiya Nzambi wa giamatshidia nu felela dienji, hagula ajiya guheta “monyo wa giamatshidia.” (1 Tim. 6:19) Ajiya gutagana nu usageshi udi mukatuga gudi enya fami jiawo, nga ndo ajiya gutagana nu lamba dia makuta handaga adi muhana mago gu Ufumu wa Nzambi. Uvi Yehowa wana tshita yagasue hagula ajiya guheta ima adi nayo funu. (Mat. 6:25, 30-33; Luka 18:29, 30) Ndaga eji jidi diago gututshiginyisa egi Ufumu wa Nzambi udi wa giamatshidia nu mbawulandula gutagenesa felela dia Yehowa.

MU MASUGU ADI MUZA MBATUKHALA NU LUJINGU LUABONGA DIAGO

14-15. Luholo lutshi laji diatuhanele Yehowa dia gukatula gufua mayilago mbaditagenesewa?

¹⁴ Mangino Yesu udi Fumu ya Ufumu wa Nzambi mu dilu, mbawutagenesa ndaga jiagasue jiatulayele Yehowa. (2 Kol. 1:20) Sendese mu 1914, Yesu wabingile mbalagaji jienji. (Ngi. 110:1, 2) Gualeha ndo Yesu nu athu mbaahinyina n’enji mbaashiya athu agasue abola.​—Gumo. 6:2.

¹⁵ Mu Uhinyinyi wa Ivo 1 000, Yesu mbawufuzumuna athu a gufua, mbawukuatesa nji athu ana tumagela Yehowa ha gubua athu atagana. Gungima dia gulolewa gua gisugishilo, athu anyi Yehowa mbawumona egi adi athu abonga, ‘mbaaheta mavu nu mbaakhala hene ivo nu ivo.’ (Ngi. 37:10, 11, 29) Ndaga ya gusuanguluga idi egi Yesu “mbawukatula gufua, handaga gufua gudi mbalagaji yetu ya gisugishilo.”​—1 Kol. 15:26.

16. Ndaga tshi ya ndando idi naye gututuma ha gusala ya gujinginyina gudi Yehowa?

¹⁶ Mu longo edi tuamona egi, felela dietu dia gujinga ivo nu ivo diana katuga mu Mbimbi ya Nzambi. Felela diene diajiya gutukuatesa ha gusala ya gujinginyina gudi Yehowa mu masugu awa a gisugishilo. Uvi tushigo naye gusuanguluisa Yehowa phamba handaga watuhanele felela dia gujinga ivo nu ivo. Ndaga yabalega ndando yana gututuma ha gusala ya gujinginyina gudi Yehowa nu gudi Yesu, idi guzumba guetu mukunda nu ene. (2 Kol. 5:14, 15) Guzumba guene guana gututuma ha gulandula gifezegeselo giawo nu gulongesa athu ako felela dietu. (Roma 10:13-15) Gula tudi mutshita yagasue ha gutuna gukamba phamba gubonga guetu nu tudi nu khadilo dia guhana, Yehowa mbawutshigina egi tukhale mafut’enji.​—Heb. 13:16.

17. Itshi muthu wagasue udi naye gutshita? (Matayo 7:13, 14)

¹⁷ Mbawukhala mukatshi dia athu anyi mbaaheta monyo wa ivo nu ivo ba? Yehowa wahanele muthu wagasue luendu lua guheta monyo wene. Tudi naye gutomba ha gusala mu njila idi mubata gu monyo. (Tanga Matayo 7:13, 14.) Lujingu mbalukhala gikuatshi tangua mbatujinga mayilago? Mbatuheta mvutu ya muhu owu mu longo dialandula.