“Mbawukhala nu Ame mu Phaladiso”

1. Itshi Yesu wawambelele nzangi yakhalele hehi n’enji tangua diazonda gutuama egi afue? (Luka 23:39-43)

YESU nu nzangi mbadi jiakhalele gu khanda yenji amonele lamba diavula tangua akhalele mutshigina gufua. (Luka 23:32, 33) Nzangi jiene mbadi jiakhalele mulela Yesu. Ndaga yene yamonesele egi akhalelego alandudi enji. (Mat. 27:44; Mako 15:32) Uvi mumoshi wasombegesele makalegelo enji. Wazuelele egi: “Yesu, ngutangize tangua mbawuza mu Ufumu waye.” Yesu wamuvutudile gamba: “Giamatshidia ngudi guguwambela mangino egi, mbawukhala nu ame mu Phaladiso.” (Tanga Luka 23:39-43.) Gushigo nga ndaga imoshi idi mumonesa egi nzangi yene yatshigininyile ndaga jiatadila ‘Ufumu wa mu dilu’ walongesle Yesu. Yesu gazuelelego nji egi muthu muene mbawungina mu Ufumu wa mudilu. (Mat. 4:17) Uvi wakhalele muzuelela phaladiso mbayikhala ha mavu mu masugu adi muza. Mukunda natshi tuazuela ngenyi?

2. Ndaga itshi idi mumonesa egi nzangi yabalumuine mutshima yakhalele muenya Yuda?

² Yajiya gukhala egi nzangi yinyi yabalumuine mutshima yakhalele muenya Yuda. Nzangi yene yawambelele nzangi iko egi: “Aye ushigo muvuila Nzambi woma nga hazonda, luholo udi muhanewa ndola ya luholo lumoshi nu muthu yowu ba?” (Luka 23:40) Enya Yuda akhalele mukombelela Nzambi mumoshi, uvi enya ifutshi iko akhalele musha gutshigina gudi Nzambi jiavula. (Guz. 20:2, 3; 1 Kol. 8:5, 6) Gula nga nzangi jiene jiakhalelego enya Yuda, nga iko yahudilego iko egi, “Aye ushigo muvuila jinzambi woma ba?” Yesu nji gatumiwego mukunda nu enya ifutshi iko, uvi watumiwe “phamba gudi imeme ya monzo ya Isalele yatotele.” (Mat. 15:24) Nzambi wakuatesele enya Isalele ha gujiya egi mbawufuzumuna athu a gufua. Yajiya gukhala egi nzangi yene yakhalele mujiya ndaga yene. Mbimbi jienji jidi mumonesa egi wakhalele mujiya egi Yehowa mbawufuzumuna Yesu ha gubua fumu ya Ufumu wenji. Yajiya gukhala egi muthu muene wakhalele nji mutshigina egi Nzambi mbawumufuzumuna.

3. Yajiya gukhala egi ndaga itshi nzangi yatangijile tangua Yesu wazuelele ndaga yatadila phaladiso? Kotelesa. (Gisendeselo 2:15)

³ Luholo nzangi yinyi yabalumuine mutshima yakhalele muenya Yuda, yakhalele mujiya ndaga jiatadila Adama nu Eva. Yakhalele nji mujiya egi Yehowa waahagele mu phaladiso. Ngenyi yajiya gukhala egi, nzangi yene yakotelesele egi phaladiso yakhalele muzuelela Yesu mbayikhala fundo dimoshi diabonga ha mavu.​—Tanga Gisendeselo 2:15.

4. Ndaga Yesu wawambelele nzangi imoshi jidi gututuma ha gutshita itshi?

⁴ Ndaga Yesu wawambelele nzangi jidi gutukuatesa ha gujiya luholo lujingu mbalukhala mu phaladiso. Mangino, gujiya luholo athu akhalele mu guhuima mu uhinyinyi wa Salomo gudi gutukuatesa ha gujiya luholo athu mbaakhala mu guhuima mu phaladiso. Biblia yana zuela egi uhinyinyi wa Yesu wabalega wa Salomo gukoma. Hene, tudi musha mutshima egi, Yesu nu athu mbaahinyinya n’enji mbaabuisa mavu phaladiso yabonga. (Mat. 12:42) Gishina giene, “imeme iko” idi naye gutshita ngolo ha gukalagala ndaga Yehowa wana guatoga hagula mbaajinge mayilago mu phaladiso.​—Yone 10:16.

LUHOLO LUJINGU MBALUKHALA MU PHALADISO

5. Itshi yana gugujila mu matangi tangua wana tangigiza luholo lujingu mbalukhala mu phaladiso?

⁵ Itshi yana gugujila mu matangi tangua wana tangigiza luholo lujingu mbalukhala mu phaladiso? Yajiya gukhala egi, wana tangigiza fundo diabonga didi gifua dihia dia Edene. (Gis. 2:7-9) Yajiya gukhala egi, wana wunguluga nji profesi ya Mika yana zuela egi, akombeledi a Nzambi mbaakhala ‘muthu nu muthu ha mushina mutshi wenji wa vinyo nu ha mushina mutshi wenji wa figi.’ (Mika 4:3, 4) Yajiya gukhala nji egi wana tangigiza verse jia Biblia jiana zuela egi ima ya gudia mbayikhala yavula. (Ngi. 72:16; Yesh. 65:21, 22) Nga wana gudimona mu dihia dimoshi diabonga ya gukhala gu mesa a guzala nu ima yabonga ya gudia. Yajiya gukhala nji udi mutangiza luholo mitshi nu iyaji mbayikhala muzola vumba diabonga, nga ndo udi mutangiza luholo enya fami, mafuta nu athu mbaafuzumuga mbaakhala mulela nu gubalegesa tangua hamoshi. Ndaga eji jishigo nzoji. Uvi tudi naye gusha mutshima egi ndaga jiene jiagasue mbajikalegewa ha mavu. Mu Phaladiso mbatukhala nji nu midimo yabonga.

6. Itshi mbatukalagala mu Phaladiso? (Tala gifuanesa.)

⁶ Yehowa watufugile nu luendu lua gusuanguluga nu mudimo wetu. (Mulo. 2:24) Mu sungi ya uhinyinyi wa ivo mile wa Klisto, mbatukhala diago nu mudimo wavula wa gutshita. Athu mbaahuluga mu lamba diakola nu athu avula mbaafuzumuga mbaakhala nu funu ya milele, ima ya gudia nu mafundo a gukhala. Ha guheta ima eyi yagasue mbatukalagala mudimo wavula. Gifua luholo Nzambi wawambelele Adama nu Eva ha gudima dihia dia Edene, esue nji mbatukhala nu mudimo wa gubuisa mavu agasue phaladiso. Mbatukhala nji nu gusuanguluga ha gulongesa athu avula mbaafuzumuga anyi ashigo mujiya ndaga jiavula jiatadila Yehowa nu felela dienji! Mbatukuatesa nji athu agujinginyina anyi ajingile gutuama egi Yesu aze ha mavu, ha gulonguga ndaga jiakalegewe gungima dia gufua guawo.

7. Mu ndaga itshi tudi naye gusha mutshima? Mukunda natshi?

⁷ Tudi naye gusha mutshima egi mu Phaladiso mbatukhala mu guhuima, mbatukhala nu ima yagasue tudi nayo funu, ima yagasue nji mbayikhala mu ndonga. Mukunda natshi? Handaga Yehowa watuhanele gale gifezegeselo gidi mumonesa luholo lujingu mbalukhala mu Ufumu wa Mun’enji. Gifezegeselo giene gidi uhinyinyi wa Fumu Salomo.

UHINYINYI WA FUMU SALOMO WANA GUTUKUATESA HA GUJIYA LUHOLO LUJINGU MBALUKHALA MU PHALADISO

8. Luholo lutshi mbimbi jidi mu Ngimbo 37:10, 11, 29 jiatagenesewe mu uhinyinyi wa Salomo? (Tala “Mihu Yana Guhula Athu Ana Gutanga Mikanda Yetu” idi mu Inzo Yaleha ya Mulaledi eyi.)

⁸ Nyuma ya Yehowa yakuatesele fumu Davidi ha gusonega luholo monyo mbawukhala mu masugu adi muza tangua fumu watema nu wa gujinginyina mbawuhinyina. (Tanga Ngimbo 37:10, 11, 29.) Tangua tuana wambela athu ndaga jiatadila phaladiso idi muza, mbala jiavula tuana tanga Ngimbo 37:11. Gutshita ngenyi gudi ndaga yabonga handaga Yesu nji wazuelediele ndaga jidi mu verse yene mu Diskur dienji holu dia Mulundu. Wamonesele egi ndaga jidi mu verse yene mbajitagenesewa mu masugu adi muza. (Mat. 5:5) Uvi mbimbi jia Davidi jiakhalele nji mumonesa luholo lujingu mbalukhala mu uhinyinyi wa Salomo. Tangua Salomo wakhalele muhinyina gu Isalele akombeledi a Nzambi akhalele mu guhuima. Akhalele nji nu umonyi mu gifutshi giakhalele nu ‘miliki nu wigi.’ Nzambi wazuelele egi: ‘Gula mualandula mikhuala yami . . , mbangumihana guhuima ha mavu, gushigo nga gima gimoshi mbagimisagesa ha mbamukhala ya gubanda.’ (Levi 20:24; 26:3, 6) Nzambi watagenesele ndaga eji jiagasue mu uhinyinyi wa Salomo. (1 Gudi. 22:9; 29:26-28) Yehowa walayele egi, athu abola ana kombelela isongo mbaashigo ‘mukhala luko guene.’ (Ngi. 37:10) Hene ndaga jidi mu mukanda wa Ngimbo 37:10, 11, 29 jiataganesewe mu tangua dikulu, uvi mbajitagesewa nji mu masugu adi muza.

9. Ndaga tshi mukhetu wa gu Sheba wazuelele mukunda nu uhinyinyi wa fumu Salomo?

⁹ Fumu wa mukhetu wa gu Sheba wavile luholo enya Isalele akhalele mu guhuima nu akhalele nu umonyi tangua Salomo wakhalele muhinyina gu Isalele. Mukhetu muene watshitshile vuayage yaleha uu nu gu Yelusalema ha gumona ndaga yene nu meso enji. (1 Maf. 10:1) Tangua diamonele muene ndaga jiakhalele mukalegewa mu ufumu wa Salomo, wazuelele egi: ‘Ngavilego nga giene gitshinyi gia ndaga eji. . . . Athu aye nu enya mudimo waye adi nu gusuanguluga gutuama diaye tangua diagasue. Adi mutegelela ndaga wana zuela nu ndunge jiagasue!’ (1 Maf. 10:6-8) Uvi ndaga jiakalegewe mu uhinyinyi wa Salomo jidi gifezegeselo gia ndaga Yehowa mbawukalegela athu ha mavu mu uhinyinyi wa mun’enji Yesu.

10. Mu ndaga jitshi Yesu udi wabalega Salomo?

¹⁰ Yesu wabalega Salomo mu ndaga jiagasue. Handaga Salomo gakhalelego muthu watagana. Wakalegele nji gubola guakoma guabatelele akombeledi a Nzambi malamba. Uvi Yesu udi fumu watagana gana kalagalago nga ndaga imoshi yabola. (Luka 1:32; Heb. 4:14, 15) Yesu wasalele ya gujinginyina gudi Nzambi ikhale wataganele nu malamba akola. Klisto wamonesele egi muene mbagakalagalago nga ndaga imoshi yabola yajiya gubatela alandudi enji a gujinginyina malamba. Yesu udi diago Fumu wabonga mukunda nu esue.

11. Akhuatshi mbaakuatesa Yesu mu uhinyinyi wenji?

¹¹ Yesu nu athu 144 000 mbahinyina n’enji mbaatshita hamoshi ha gukuatesa athu nu ha gutagenesa felela dia Yehowa mukunda nu mavu. (Gumo. 14:1-3) Tangua Aklisto ambiwe maji mu nyuma akhalele ha mavu ataganele nu usageshi nu malamba avula. Hene mbaadisha ha fundo dia athu mbaakhala ha mavu. Ndaga jitshi athu mbaahinyinya nu Yesu mbaakalagala?

NDAGA JITSHI AKLISTO AMBIWE MAJI MU NYUMA MBAAKALAGALA?

12. Mudimo utshi Yehowa mbawuhana Aklisto 144 000?

¹² Yesu nu athu mbaahinyina n’enji adi nu mudimo wavula wa gukalagala gubalega mudimo watshitshile Salomo. Fumu Salomo wakuatesele athu avula phamba mu gifutshi gimoshi. Uvi Yesu nu athu mbaahinyina n’enji mbaakuatesa athu avula a ha mavu agasue. Yehowa wahanele Aklisto 144 000 luendu luakoma!

13. Mudimo utshi wa ndando athu mbaahinyina nu Yesu mbakalagala?

¹³ Athu 144 000 mbaakhala mafumu nu nganga-nzambi gifua Yesu Aklisto. (Gumo. 5:10) Tangua enya Isalele akhalele mutumagela mukhuala wa Moize, nganga-nzambi jiakhalele naye thomo guakuatesa ha gukhala nu sante yabonga nu ha gukhala nu ufuta wabonga nu Yehowa. Mukhuala wakhalele “givule-vule gia ndaga jiabonga jidi naye guza.” Ndaga yene idi gutukuatesa ha gujiya egi, athu mbaahinyina nu Yesu mbaakuatesa akombeledi a Nzambi ha gukhala nu sante yabonga nu ha gukhala nu ufuta wabonga nu Yehowa. (Heb. 10:1) Tunengenenu ha gumona luholo mafumu ene nu nganga-nzambi jiene mbaakuatesa akombeledi a Nzambi adi ha mavu. Ikhale Yehowa walondega ndaga luholo lutshi, tudi nu gutshigina egi mu phaladiso idi muza akombeledi enji adi ha mavu mbaaheta malongo adi nawo funu.​—Gumo. 21:3, 4.

NDAGA JITSHI “IMEME IKO IDI NAYE GUTSHITA” HA GUNGINA MU PHALADISO?

14. Gudivua gutshi gudi mukatshi dia “imeme iko”nu aphangi’a Klisto?

¹⁴ Yesu watamegele athu mbaahinyina n’enji egi “thundu yazonda.” (Luka 12:32) Yesu wazuelediele nji hunji dia mbadi. Waatamegele egi “imeme iko.” Mahunji ene mbadi adi a gubungisa mu thundu imoshi. (Yone 10:16) Mangino athu agasue adi mu mahunji ene mbadi ana tshita hamoshi. Mbaalandula nji gutshita hamoshi tangua mavu mbaabua phaladiso. Athu adi mukatshi dia “thundu yazonda” mbaakhala mu dilu, uvi “imeme iko” mbayikhala nu luendu lua gujinga mayilago ha mavu. Uvi gudi nu ndaga “imeme iko” idi naye gukalagala mangino hagula mbaangine mu phaladiso.

15. (a Luholo lutshi “imeme iko” yana kuatesa aphangi’a Klisto? (b) Luholo lutshi wajiya gulandula gifezegeselo gia phangi wa yala udi mudiga mu pharmacie? (Tala gifuanesa.)

¹⁵ Nzangi yinyi yabalumuine mutshima yadiangele gufua gutuama dia guheta luendu lua guhana mersi mukunda nu ndaga yamukalegele Klisto. Uvi esue “imeme iko” tudi nu ba okazio avula a guhana mersi mukunda nu ndaga yatukalegele Yesu. Ha gufezegesa, ndaga tuana kalegela Aklisto ambiwe maji mu nyuma jiana monesa gula tuana zumba Klisto nga ndo. Yesu wazuelele egi mbawusophesa athu ha gutadila ndaga athu ene ana kalegela aphangi’enji. (Mat. 25:31-40) Tuajiya gukuatesa aphangi’a Klisto gula tudi mulongesa lukuma luabonga nu gikhesa giagasue nu tudi mukuatesa athu ha gubua alandudi enji. (Mat. 28:18-20) Gishina giene, tudi naye gukalegela muabonga ikadigilo yana gutukuatesa ha gulongesa Biblia, gifua mukanda Heta Monyo wa Ivo nu Ivo! Gula ushigo nu muthu wa gulonguga n’enji Biblia, gula luholo ludi guene tshita yagasue ha gutoga athu avula ha gusendesa gulonguga nawo Biblia.

16. Itshi tudi naye gutshita mangino ha gubua athu a Ufumu wa Nzambi?

¹⁶ Ha gukhala nu makalegelo abonga ana tshigina Yehowa, tushigo naye gunengena uu nu lusugu mbatungina mu phaladiso. Uvi sendese mangino, tudi naye guzuela giamatshidia mu mbimbi jietu nu mu ndaga tudi mukalagala. Tudi naye nji gukhala nu makalegelo abonga. Tudi naye gukhala ya gujinginyina gudi Yehowa, gudi mulumi’etu nga mukaji’etu nu gudi aphangi’etu Aklisto. Gula mangino tudi mutumagela mikhuala ya Nzambi ha mavu awa a Satana, mbayikhala ndaga yaleba gudi esue ha gumutumagela mu phaladiso. Tuajiya nji gukudisa makalegelo abonga nu ndaga jiko mbajitukuatesa mu mavu ahe-ahe. Tala longo “Udi ya Gudilondega ‘ha Guheta Mavu ba’?” mu Inzo Yaleha ya Mutaledi eyi.

17. Tudi naye guleba muila mukunda nu gubola tuakalegele mu masugu abalega ba? Kotelesa.

¹⁷ Tudi naye nji gutshita ngolo ha gutuna gudisagesa muavula mukunda nu gubola guakoma tuakalegele mu masugu abalega. Uvi tushigo naye “gukalagala gubola nu mutshima” wagasue handaga Yesu wahanele gibawu mukunda nu esue. (Heb. 10:26-31) Tudi naye gusha mutshima egi gula tuabalumuna diago mutshima mu ndaga jiabola tuakalegele, tuatoga Yehowa nu akulu ha gutukuatesa nu tuasombegesa makalegelo etu, Yehowa mbawututotesela diago. (Yesh. 55:7; Makal. 3:19) Wunguluga ndaga Yesu wawambelele Afalese egi: “Ngajilego ha gutamega athu abonga, uvi ngajile ha gutamega enya gubola.” (Mat. 9:13) Mulambu wa Yesu udi diago watagana ha gutshuiga gubola guetu.

WAJIYA GUJINGA IVO NU IVO MU PHALADISO

18. Maga a luholo lutshi muajiya guta nu nzangi yafuile fundo dimoshi nu Yesu?

¹⁸ Tangiza egi udi mu phaladiso, udi muta maga nu nzangi yinyi yazuelele nu Yesu. Aye nu nzangi yene mbamuhana diago mersi mukunda nu mulambu wa Yesu. Wajiya gumutoga ha guguwambela ndaga jiakalegewe gutuama egi Yesu afue, nu luholo luadivile muene tangua Yesu wahanele mvutu gu muhu wenji. Uvi muene nji wajiya guguhula ha gumuwambela luholo ndaga jiakalegewe mu masugu a gisugishilo a mavu awa a Satana. Mbayikhala diago ndaga yabonga ha gulonguga Mbimbi ya Nzambi nu athu gifua nzangi yene!​—Ef. 4:22-24.

19. Mukunda natshi mbatushigo muhuila ha gujinga mu phaladiso? (Tala gifuanesa holu dia gizula.)

¹⁹ Mbatushigo muhuila ha gujinga mu phaladiso. Tangua diagasue mbatukhala nu athu adi nu makalegelo abonga, mbatukhala nji nu midimo yabonga ya gutshita. Ndaga yabalega ndando idi egi, lusugu nu lusugu mbatukhala mujiya Tata wetu wa mu dilu muabonga nu mbatusuanguluga nu ima mbayituhana muene. Mbatukhala nu ndaga jiavula jia gulonguga mukunda nu muene. Mbatulonguga nji ndaga jiavula mu ima yafugile muene. Luholo mbatujinga muavula, guzumba guetu mukunda nu Yehowa mbagukola. Tudi muhana Yehowa nu Yesu mersi yavula, luholo atuhanele felela dia gujinga mayilago mu phaladiso!