Mihu Yana Guhula Athu Ana Gutanga Mikanda Yetu

Mu Ngimbo 61:8 Davidi wasonegele egi mbawutumbuisa jina dia Nzambi “mayilago.” Idi mukotelesa egi Davidi wakhalele mutangiza egi mbagashigo mufua ba?

Ndo. Uvi ndaga jiasonegele muene jiakhalele jia giamatshidia.

Tutadilenu ndaga jiazuelele muene mu verse eyi nu mu verse jiko jidi gudivua nu verse yene. Wazuelele egi: ‘Mbanguyimba ngimbo ha gutumbuisa jina diaye mayilago. Mbangutagenesa ndaga ngadilogele lusugu nu lusugu.’ ‘Yehowa Nzambi wami, mbangugutumbuisa nu mutshima wami wagasue, mbangutumbuisa jina diaye ivo nu ivo.’ ‘Mbangutumbuisa jina diaye mayilago.’​—Ngi. 61:8; 86:12; 145:1, 2.

Tangua diasonegele Davidi mbimbi eji, gakhalelego mutangiza egi mbagashigo mufua. Davidi wakhalele mujiya egi Yehowa wazuelele egi athu adi naye gufua handaga akalegele gubola. Wakhalele mujiya egi muene nji gashigo muthu watagana. (Gis. 3:3, 17-19; Ngi. 51:4, 5) Wakhalele mujiya egi ikhale athu akhalele agujinginyina gudi Nzambi gifua Abalahama nu Izake nu Yakoba afile. Davidi wakhalele mujiya egi muene nji mbawumufua. (Ngi. 37:25; 39:4) Uvi mbimbi jienji jidi mu Ngimbo 61:8 jidi mumonesa egi wazudile desizio dia gutumbuisa Nzambi mayilago, masugu agasue a monyo wenji.​—2 Sam. 7:12.

Ndaga jiko jiasonegele Davidi jiakhalele mutadila monyo wenji. Gifua luholo mbimbi jidi gu gisendeselo gia mukhapho 18, 51 nu mukhapho 52 wa mukanda wa Ngimbo jidi guyimonesa. Mu Ngimbo 23 Davidi udi mumonesa egi Yehowa udi gifua mubambi wa imeme udi muhana utuameji, udi muhana ngolo nu udi mubamba imeme. Davidi muene hakhenji wakhalele mubambi wa imeme wa luholo elu. Wakhalele mutshigina gukalegela Nzambi ‘monyo wenji wagasue.’​—Ngi. 23:6.

Tujimbilago egi ndaga jiagasue jiasonegele Davidi, wajisonegele muwukuateshi wa nyuma ya Nzambi. Wasonegele nji profesi jiakhalele naye gutagenesewa gungima. Ha gufezegesa, mu Ngimbo mukhapho 110 Davidi wamonesele tangua Fumu wenji ‘mbawukhala gukoko dia madia dia Nzambi’ mu dilu nu tangua mbadiheta muene ngolo jiavula. Ha gutshita itshi? Ha gushiya mbalagaji jia Nzambi nu ‘ha gusophesa ifutshi’ ya ha mavu. Davidi wakhalele khakha wa Yesu Masiya. Masiya muene mbawuhinyina sendese mu dilu nu ha mavu, mbawukhala nji “nganga-nzambi ivo nu ivo.” (Ngi. 110:1-6) Yesu wazuelele egi profesi idi mu Ngimbo 110 yakhalele gumutadila muene. Profesi yene mbayitagenesewa mu masugu adi muza.​—Mat. 22:41-45.

Nyuma ya Nzambi yakuatesele Davidi ha gusonega ndaga jiakalegele muene hakhalele muene nu monyo nu ndaga mbajikalegewa mu masugu adi muza, tangua mbadifuzumuga muene nu mbadiheta muene luendu lua gutumbuisa Yehowa mayilago. Ndaga eji jidi gutukuatesa ha gujiya egi Ngimbo 37:10, 11, 29 yatagenesewe mu tangua dikulu gu Isalele. Mbayitagana nji mu masugu adi muza ha mavu agasue tangua Nzambi mbawutagenesa mafelela enji.​—Tala longo “Mbawukhala nu Ame mu Phaladiso” paragrafe 8, didi mu Inzo Yaleha ya Mutaledi eyi.

Ngimbo 61:8 nu verse jiko jidi gudivua nu verse yene, jidi mumonesa egi Davidi wakhalele mutshigina gutumbuisa Yehowa gu Isalele uu nu gu gufua guenji. Ndaga jiene jidi mumonesa ndaga mbajikalagala Davidi mu masugu adi muza, tangua mbadimufuzumuna Yehowa.