Udi Mujiya Luko ba?

Watangele muabonga malongo a Inzo Yaleha ya Mutaledi a givo egi ba? Gula idi ngenyi, wajiya guhana mvutu gu mihu eyi:

Gubonga gutshi mbatuheta gula tudi muzula tangua dia guta maga nu Yehowa, dia gumutegelela nu dia gutangigiza ndaga jiamutadila?

Mbatuzula ba desizio abonga, mbatubua alongeshi abonga, mbatukolesa gutshigina guetu nu mbatuzumba Yehowa muavula.​—w22.01, diyiji 30-31.

Luholo lutshi gushila Yehowa mutshima nu athu atombele muene ha gututuameza mbagutukuatesa?

Sendese mangino gula tudi mutumagela utuameji wa akulu nu badesizio awo mbatumonesa egi tuana sha mutshima mu luholo Yehowa wana kalagala ndaga. Mu tangua dia lamba diakola, mbayikhadigo lamba ha gutumagela malongo mbaatuhana akulu ikhale tushigo guakotelesa muabonga.​—w22.02, diyiji 4-6.

Itshi muanjelo watshiginyile guwambela Zekaliya mukunda nu ‘shinga ya bamaso yakhalele ha mago a guvelenele Zolobabela’? (Zak. 4:8-10)

Vizio yene yakuatesele akombeledi a Nzambi ha gujiya egi mbaamanesela gutunga tempelo. Tempelo yene nji mbayisuanguluisa Yehowa.​—w22.03, diyiji 16-17.

Luholo lutshi tuajiya gukhala “gifezegeselo . . . mu guzuela”? (1 Tim. 4:12)

Tudi naye guzuela nu gisemo nu ginemua mu mudimo wa gulongesa. Tudi naye nji guyimbila Yehowa nu mutshima umoshi nu guhana ba komantere muavula mu gudibungisa gua mu hungu. Tudi naye guzuela giamatshidia nu guzuela mbimbi jidi mukolesa athu ako nu gubemba guzuela mbimbi jiabola jia maluholo agasue.​—w22.04, diyiji 6-9.

Mukunda natshi shitu imoshi ya mu foto idi muzuelewa mu Gumonesa 13:1, 2 idi nu makalegelo agasue adi gu shitu nguana jia mu foto (ma ufumu) adi muzuelela mu Danyele mukhapho 7?

Shitu ya mu foto Biblia idi muzuelela mu Gumonesa 13 ishigo mumonesa ufumu phamba umoshi gifua Roma. Uvi idi mumonesa ma ufumu agasue a politike ahinyine mavu agasue.​—w22.05, diyiji 9.

Luholo lutshi tuajiya gumonesa egi tuana sha mutshima mu luholo Yehowa wana wakalagala ndaga?

Gula muthu watushinga, wazuela ndaga yatusagesa nga watukalegela ndaga yabola tuana tshita yagasue ha gutuna gumubambela khabu nu umbalagaji. Uvi tuana bemba ndaga yene ha mago a Yehowa. Handaga muene mbawukatula malamba agasue tudi mutagana nawo.​—w22.06, diyiji 10-11.

Ndaga itshi phangi wa yala gashigo naye gujimbila gula amutoga ha gutshita gisambu mu gudibungisa gua mu hungu?

Tangua udi mutshita gisambu ushigo naye guhana aphangi malongo nga guzuela ndaga imoshi gifua udi muhana kominike. Ushigo naye nji guzuela “ndaga jiavula,” mu gisambu gia gisendeselo. (Mat. 6:7)​—w22.07, diyiji 24-25.

Luholo lutshi “athu anyi akalegele ndaga jiabola” “mbaafuzumuga ha gusophesewa”? (Yone 5:29)

Mbaashigo guasophesa mukunda nu ndaga akalegele gutuama egi afue. Uvi mbaasophesewa ha gutadila makalegelo awo gungima dia gualongesa giamatshidia tangua mbaafuzumuga.​—w22.09, diyiji 18.

Ndaga itshi ya gusuanguluga phangi Rutherford wazuelele gu asamble akalegewe mu Septembre 1922?

Gu asamble akalegewe gu Cedar Point gu Ohio, (Etats-Unis) wazuelele egi: “Fumu udi mu hinyina! Mudi athu enji. Hene longesenu, longesenu, longesenu Fumu nu Ufumu wenji!”​—w22.10, diyiji 3-5.

Maluholo atshi thathu Yehowa wana gutukuatesa ha gukolesela gifua luholo Yeshaya mukhapho 30 idi mumonesa?

Mukhapho wene udi mumonesa egi (1) Yehowa wana gututegelela nu wana hana mvutu gu isambu yetu (2) wana gutuhana malongo nu (3) wana gutuhana ima tudi nayo funu mangino nu mbawutuhana nji ima mbatukhala nawo funu mu masugu adi muza.​—w22.11, diyiji 9.

Mukunda natshi tudi muzuela egi mbimbi jidi mu Ngimbo 37:10, 11, 29 jiatagenesewe mu tangua dikulu nu mbajitagana nji mu masugu adi muza?

Mbimbi jia Davidi jidi mumonesa gubonga enya Isalele ahetele, gifua mu uhinyinyi wa Salomo. Yesu wakhalele muzuelela phaladiso idi muza. Wavutugidile mbimbi jidi mu verse 11. (Mat. 5:5; Luka 23:43)​—w22.12, diyiji 8-10, 14.