Wajiya Gukhala mu Guhuima Tangua udi Mutagana nu Malamba

1. “Guhuima gua Nzambi” gudi itshi? Gubonga gutshi guhuima guene guana gutubatela? (Filiphi 4:6, 7)

GUDI nu guhuima gumoshi ngenyi athu a ha mavu awa anago gujiya. Guhuima guene gudi “guhuima gua Nzambi.” Tata wetu wa mu dilu wana gutuhana guhuima guene gula tudi nu ufuta wabonga n’enji. Gula Nzambi watuhana guhuima guenji tuana khala mu ubambi. (Tanga Filiphi 4:6, 7.) Tuana suanguluga gukuata ufuta nu athu anyi ana gumuzumba. Tuana suanguluga nji gukhala nu ufuta wabonga nu “Nzambi wa guhuima.” (1 Tes. 5:23) Gula tudi mujiya Yehowa muabonga, tudi gumushila mutshima nu tudi gumutumagela, muene mbawutuhana guhuima guenji. Guhuima guene mbagutulula mitshima yetu tangua tudi mutagana nu ndaga jia lamba.

2. Mukunda natshi tudi musha mutshima egi tuajiya guheta guhuima gua Nzambi?

² Tuajiya diago gukhala mu guhuima gua Nzambi gula tudi mutagana nu malamba gifua misongo ya gisambugila, ndaga jia lamba, ita nga usageshi? Ndaga eji jiagasue jiajiya gutuhana woma. Uvi Yesu wawambelele alandudi enji egi: “Mudisagesago mu mitshima yenu, muvuigo nji woma.” (Yone 14:27) Ndaga yabonga idi egi aphangi a mala nu a akhetu ana tumagela longo edi dia Yesu. Yehowa wana guakuatesa ha gukhala mu guhuima ngatshima adi mutagana nu malamba akola.

LUHOLO TUAJIYA GUKHALA MU GUHUIMA MU TANGUA DIA MISONGO YA GISAMBUGILA

3. Luholo lutshi misongo ya gisambugila yajiya gutukatula guhuima?

³ Misongo ya gisambugila yajiya gusombegesa ndaga jiavula mu monyo wetu. Tutadilenu luholo misongo ya corona virus yabatele athu avula malamba. Zulunalu imoshi idi mumonesa egi athu avula azuelele egi akhalelego mubanda muabonga mu sungi ya corona virus. Musungi ya misongo yene athu avula akhalele muvua gikenene giavula, athu ako akatele depression, ako akhalele munua matombe akola, ako akhalele mukalegela drogue, ako akhalele gudikalegela ndaga nu khuta um fami. Athu ako nji akambele gudishiya. Gula misongo ya gisambugila idi nji ha fundo wana jinga, itshi yajiya gugukuatesa hagula uvuigo gikenene giavula nu ha gukhala mu guhuima gua Nzambi?

4. Mukunda natshi gujiya profesi ya Yesu mukunda nu masugu a gisugishilo yana gutukuatesa ha gukhala mu guhuima?

⁴ Yesu wadiangele guzuela egi mu masugu a gisugishilo misongo ya gisambugila mbayikhala “khanda nu khanda.” (Luka 21:11) Luholo lutshi gujiya ndaga eji guana gutukuatesa ha gukhala mu guhuima? Tuanago gudihula gula misongo imoshi ngenyi yazoga. Tuana kotelesa egi ndaga jiene jidi mukalegewa gifua luholo Yesu wadiangele guzuela. Gishina giene tuana landula longo Yesu wahanele athu adi mujinga mu masugu a gisugishilo egi: “Muvuigo woma.”​—Mat. 24:6.

5. (a) Ha gutadila Filiphi 4:8, 9, ndaga tshi tudi naye gutoga Yehowa mu gisambu gula misongo ya gisambugila yazoga? (b) Luholo tshi gutegelela enregistrement a lutango lua Biblia guajiya gugukuatesa?

⁵ Misongo ya gisambugila yajiya gutuhana gikenene giavula nga woma. Ndaga yene yabuidile phangi mumoshi wa mukhetu mu jina dia Desi.b Tangua misongo ya corona virus yashiyile sh’enji wa galenge nu gisonyi gienji nu munganga, phangi Desi wavile diago woma. Watangijile egi misongo yene yajiya nji gumukuata nu wajiya guyihana gin’enji wakhalele muthu wa gukola. Wakhalele nji muvua woma egi mudimo wenji wajiya gufua, ngenyi mbayikhala lamba ha guheta ima ya gudia nga mbongo jia gufutshila inzo. Ndaga eji jiagasue jiakhalele gumuhana gikenene giavula, hene wakhalele mubanda gikole-kole. Uvi ndaga tshi yakuatesele phangi Desi ha gukhala mu guhuima? Wakombelele Yehowa ha gumukuatesa hagula akhale nu matangi abonga nu hagula adisagesago muavula. (Tanga Filiphi 4:8, 9.) Tangua diakhalele mutegelela muene enregistrement a lutango lua Biblia, yakhalele gifua udi mutegelela Yehowa. Udi muzuela egi, ndaga jiakhalele mutegelela muene jia mukuatesele ha gutuna guvua gikenene giavula nu ha guwunguluga egi Yehowa wana gudisagesa mukunda nu muene.​—Ngi. 94:19.

6. Luholo lutshi gulonguga guaye hakhaye nu guya mu gudibungisa gua mu hungu guajiya gugukuatesa?

⁶ Mu tangua dia misongo ya gisambugila, yana khalago yaleba ha gukalagala ndaga jiagasue tuakhalele mukalagala thomo. Uvi tushigo naye gubemba egi misongo yene itukange njila ha gulonguga esue hakhetu nga ha guya mu gudibungisa gua mu hungu. Ba eksperianse a aphangi a mala nu a akhetu adi mu mikanda yetu nu mu ba video, mbaagukuatesa ha gujiya egi, ene nji adi mutagana nu malamba a luholo lumoshi uvi ana sala ya gujinginyina gudi Yehowa. (1 Phet. 5:9) Guya mu gudibungisa gua mu hungu mbagugukuatesa ha gutangigiza ndaga jiabonga jidi mu Biblia. Mbawuheta nji ba okazio a guhana athu ako gikhesa, aye nji mbawuheta gikhesa. (Roma 1:11, 12) Gula udi mutangigiza luholo Yehowa wakuatesele akombeledi enji tangua akhalele mukata, akhalele muvua woma nga tangua akhalele gudivua hakhawo, gutshigina guaye mbagukola nu mbawusha mutshima egi muene mbawugukuatesa nji.

7. Longo tshi tuajiya guzula mu gifezegeselo gia mupostolo Yone?

⁷ Khala muta maga nu aphangi a mala nu akhetu. Mu tangua dia misongo ya gisambugila, yajiya gutoga egi tukhale gualeha-leha ngatshima tudi mukatshi dia aphangi’etu Aklisto. Mu tangua diene wajiya gudivua gifua luholo mupostolo Yone wadivile. Wakhalele mutshigina gumona futa dienji Gayuse nu meso. (3 Yone 13, 14) Uvi wajiyile egi mu tangua dimoshi ngenyi gakhalelego naye gumona Gayuse. Hene, Yone wasonegele Gayuse mukanda. Gula misongo nga ndaga iko yatukanga njila ya guya mumona aphangi’etu, tuajiya guatamega mu telefone mu appel vidéo nga guasonegela mesaje. Gula tudi mulandula guta maga nu aphangi’etu Aklisto mbatushigo gudivua esue hakhetu, mbatukhala nji mu guhuima. Gula udi muvua gikenene giavula, toga akulu ha gugukuatesa. Tshigina nji ukuateshi wawo.​—Yesh. 32:1, 2.

LUHOLO TUAJIYA GUKHALA MU GUHUIMA GULA NDAGA JIA LAMBA JIATUBUILA

8. Luholo lutshi ndaga jia lamba jiajiya gugukatula guhuima?

⁸ Gula tuatagana nu malamba gifua, gudigita gua mavu, tshuya nga meya azala mu dimbo, tuajiya guvua gikenene giavula masugu avula. Gula muthu tuana zumba wafua nga gula tuatotesa ima yetu tuajiya guvua gikenene giavula. Tuajiya nji gutangiza egi gushigo nu muthu wa gutukuatesa nga ndo tuajiya guvua khabu. Gula udi gudivua ngenyi, ishigo mukotelesa egi wana tshigina gukhala nu ima yavula nga ndo ushigo nu gutshigina. Mu tangua dia lamba wajiya gutshita ndaga jiko jiajiya gutuma athu ha gutangiza egi udi nu matangi abola. (Yobo 1:11) Uvi luholo lutshi wajiya gukhala mu guhuima mu tangua diene?

9. Ndaga jitshi Yesu wazuelele ha gutukuatesa ha gudilondega mukunda nu malamba mbaatubuila?

⁹ Ujimbilago ndaga Yesu wazuelele. Athu ako ana tangiza egi mbaashigo mutagana nu ndaga jia lamba nga hazonda, uvi esue tuana jiya egi ndaga jia lamba mbajibua muavula mu masugu etu. Ndaga jiene jiajiya nji gutubuila. Yesu wawambelele alandudi enji egi, gutuama egi gisugishilo gize “mavu mbaadigita mangololo” nu ndaga jiko jia lamba mbajibuila athu. (Luka 21:11) Wazuelele nji egi: “Athu mbaakhala mushiya mikhuala muavula.” Tudi mumona gutagenesewa gua profesi yene mangino luholo khuta idi yavula ha mavu. (Mat. 24:12) Uvi Yesu gazuelelego egi malamba ene mbaabuila phamba athu anyi anago gukombelela Yehowa. Handaga malamba ene anabuila nji akombeledi a Yehowa a gujinginyina. (Yesh. 57:1; 2 Kol. 11:25) Yehowa ganago gutubamba mu malamba ene agasue mu luholo lua gushimana. Uvi wana gutuhana ima yagasue tuana khala nayo funu ha gukhala mu guhuima.

10. Mukunda natshi gudilondega sendese mangino mukunda nu ndaga ya lamba yajiya gutubuila gudi mumonesa egi tudi nu gutshigina? (Ishima 22:3)

¹⁰ Gula tuadilondega gutuama, mbayikhala ndaga yaleba mukunda nu esue ha gukhala mu guhuima gula malamba atubuila. Uvi gudilondega gutuama gudi mukotelesa egi tushigo nu gutshigina gudi Yehowa ba? Ndo sha. Gula tudi gudilondega gutuama mukunda nu lamba diajiya gutubuila, idi mumonesa egi tuana sha gutshigina egi Yehowa udi nu ngolo jia gutukuatesa. Luholo lutshi tuajiya guyikalagala? Mbimbi ya Nzambi yana gutuhana malongo ana gutukuatesa ha gudilondega mukunda nu malamba ajiya gutubuila. (Tanga Ishima 22:3.) Mbala jiavula organizasio wa Yehowa wana gutuhana malongo mu njila ya mikanda, gudibungisa gua mu hungu nu ba kominike ha gudilondega mukunda nu ndaga ya lamba yajiya gutubuila mu gisagumuisa.c Tuana shila Yehowa mutshima ba? Gula idi ngenyi, mbatulandula malongo adi gutuhanewa mangino gutuama egi ndaga ya lamba itubuile.

11. Longo ditshi wazula mu gifezegeselo gia phangi Margaret?

¹¹ Tutadilenu gifezegeselo gia phangi mumoshi wa mukhetu mu jina dia Margaret. Mafumu a leta amuwambelele ha gukatuga gumbo dienji, handaga tshuya tuakhalele muhia ha fundo diakhalele ene. Athu avula akhalele mulenga hamoshi, hene njila yazalele pha nu tumiyo. Luholo lua gubalega luakhalelego guene. Phangi Margaret gakhalelego nu luholo lua guzoga mu gamiyo, handaga mishi yabuita yakhalele yavula diago. Wahulugile handaga wadilondele gutuama. Wakhalele nu karte mu gakuba genji gakhalele gumukuatesa ha gujiya njila adi naye gulengela. Phangi Margaret wakhalele wadiangele gale guya mutala njila yene, ngenyi gula ndaga ya lamba ya mubuila mu gisagumuisa wajiya gulengela mu njila yene lamba ndo. Wahulugile handaga wadilondele gutuama. Watshitshile ndaga yabonga.

12. Mukunda natshi tudi naye gulandula malongo ana gutuhanewa ha gudibamba?

¹² Mafumu a leta ajiya gututoga ha gukatuga fundo tuana khala, nga ha gukalagala ndaga iko ha gudibamba nga ha gubamba athu ako. Athu ako ana tumagelago mikhuala yene handaga ana tshigina ndo gubemba ima yawo. Itshi Aklisto adi naye gukalagala? Biblia idi muzuela egi: “Mukunda nu Fumu, tumagelenu uhinyinyi wagasue wa athu, muthu udi fumu mutumagelenu handaga wamibalega gukoma nga baguvelenele atumagelenu, handaga adi athu atumiwe.” (1 Phet. 2:13, 14) Organizasio wa Yehowa wana gutuhana nji malongo ana gutukuatesa ha gudibamba. Mbala jiavula ana gutuwunguluisa ha guhana akulu ba nimero etu a telefone nu guawambela fundo tuana khala hagula ajiya gutukamba gula lamba diatubuila mu gisagumuisa. Wahanele gale akulu nimero yaye ya telefone nga guawambela fundo wana khala ba? Gula lamba diabua, akulu ajiya gutuwambela ha gusala ha fundo tudi nga ha gukatuga ha fundo diene, nu luholo tuajiya guheta ima tudi nayo funu. Ajiya gutukuatesa nji ha gujiya luholo nga tangua tudi naye gukuatesa athu ako. Gula tuatuna guatumagela tuajiya gusha monyo wetu nu wa akulu mu gingonza. Tujimbilago egi, akulu ana tshita yagasue ha gulandula gutubamba. (Heb. 13:17) Phangi Margaret wazuelele egi: “Ngudi diago nu gutshigina egi gula ngahulugile, idi handaga ngatumagele malongo a akulu nu a organizasio wa Yehowa.”

13. Itshi yana kuatesa Aklisto avula anyi akatugile gale mu mafundo akhalele mujinga ha gukhala nu gusuanguluga nu guhuima?

¹³ Aphangi avula a mala nu akhetu akatugile gale mu mafundo akhalele mujinga mukunda nu ita nga mukunda malamba ako. Atshitshile ngolo ha gujidila mu mafundo ayile mujinga nu ana gudihana muavula mu mudimo wa Yehowa. Aphangi ene atshitshile gifua luholo Aklisto a mu siekle ya thomo atshitshile tangua alengele usageshi. Alanduile “gulongesa lukuma luabonga lua mbimbi ya Nzambi.” (Makal. 8:4) Gutshita mudimo wa gulongesa guana guakuatesa ha gusha matangi phamba mu Ufumu wa Nzambi ha fundo dia gudisagesa mukunda nu malamba awo. Ngenyi, yana guakuatesa ha gubamba gusuanguluga nu ha gukhala mu guhuima.

LUHOLO WAJIYA GUKHALA MU GUHUIMA TANGUA UDI MUTAGANA NU USAGESHI

14. Luholo lutshi usageshi wajiya gutukatula guhuima?

¹⁴ Tangua tudi mutagana nu usageshi tuajiya gutotesa ima yavula yana gutukuatesa ha gukhala mu guhuima. Tuana khala nu gusuanguluga tangua tuana gudibungisa hamoshi, tuana longesa nu tuana kalagala midimo yetu ya lusugu nu lusugu guvua woma ndo egi ajiya gutukuata. Uvi gula atutunyisa ha gukalagala ndaga eji, tuajiya guvua gikenene nu woma mukunda nu ndaga mbajitubuila mu masugu adi muza. Ishigo ndaga yabola gula tuadivua ngenyi. Uvi tudi naye gumonesa gutema. Yesu wazuelele egi alandudi enji ajiya gubua mu gubola gula atagana nu usageshi. (Yone 16:1, 2) Luholo lutshi tuajiya gukhala mu guhuima tangua tudi mutagana nu usageshi?

15. Mukunda natshi tushigo naye guvua woma gula tuatagana nu usageshi? (Yone 15:20; 16:33)

¹⁵ Mbimbi ya Nzambi idi muzuela egi: “Athu agasue adi mutshigina gukhala ya gujinginyina gudi Nzambi mu gudivua nu Klisto Yesu mbaamonesewa nji malamba.” (2 Tim. 3:12) Yakhalele lamba gudi phangi Andrei ha gutshigina egi mudimo wa Matemue a Yehowa watunyishiwa mu gifutshi giawo. Wazuelele egi: ‘Mu gifutshi gietu Matemue a Yehowa adi avula, luholo lutshi mafumu ajiya guaakuata mukut’awo agasue?’ Luholo phangi Andrei wakhalele mulandula gutangiza ndaga yene, wakhalele muvua gikenene giavula, gakhalelego luko mu guhuima. Uvi aphangi ako ashile mutshima gudi Yehowa, atangijilego egi ajiyilego gukuatewa. Akhalele mujiya egi ajiya nji gukuatewa, uvi akhalelego gudisagesa muavula gifua phangi Andrei. Phangi Adrei wazudile desizio dia gulandula gifezegeselo giawo nu gushila diago Nzambi mutshima. Gungima wahetele guhuima. Mangino udi nu gusuanguluga guavula ngatshima yowu genji mutagana nu malamba avula. Esue nji tuajiya gutagana nu ndaga ya luholo lumoshi. Tangua Yesu wazuelele egi mbatutagana nu usageshi, wazuelele nji egi tuajiya gusala ya gujinginyina gudi Yehowa.​—Tanga Yone 15:20; 16:33.

16. Malongo atshi tudi naye gutumagela tangua tudi mutagana nu usageshi?

¹⁶ Gula mudimo wetu watunyishiwa, Betele nu akulu ajiya gutuhana malongo ajiya gutukuatesa ha gudibamba, ha gulandula guheta ima ya gudia ya mu nyuma, nu ha gulandula gukalagala mudimo wa gulongesa gula luholo ludi guene. Tshita ngolo ha gutumagela malongo agasue adi gutuhanewa, ikhale ushigo mukotelesa mukunda natshi adi gutuhana malongo ene. (Yak. 3:17) Tushigo naye guzuelela ndaga jiatadila aphangi’etu a mala nu akhetu nga luholo tuana kalagala midimo yetu mu hungu gudi athu anyi ashigo naye guyijiya.​—Mulo. 3:7.

17. Itshi tudi naye gukalagala gifua luholo apostolo a mu siekle ya thomo atshitshile?

¹⁷ Ndaga ya thomo yana tuma Satana ha guluisa akombeledi a Nzambi idi handaga “adi nu mudimo wa gulongesa lukuma luatadila Yesu.” (Gumo. 12:17) Ubembigo egi Satana nu enya ha mavu awa aguhane woma. Gulongesa lukuma luabonga ikhale tudi mutagana nu usageshi guana gutukuatesa ha gukhala nu gusuanguluga nu ha gukhala mu guhuima. Mu siekle ya thomo tangua mafumu a enya Yuda awambelele apostolo ha gubemba gulongesa, apostolo atumagele Nzambi ha fundo dia guatumagela. Akhalele nu gusuanguluga guavula luholo alanduile gukalagala mudimo wa gulongesa. (Makal. 5:27-29, 41, 42) Yadiago, gula atunyisa mudimo wetu tudi naye gulongesa mu gisuegi. (Mat. 10:16) Uvi gula tuatshita ngolo mbatukhala mu guhuima handaga tudi musuanguluisa Yehowa nu tudi mulongesa lukuma luabonga ludi muhuluisa athu.

“NZAMBI WA GUHUIMA MBAWUKHALA N’ENU”

18. Nanyi wajiya gutuhana guhuima gua giamatshidia?

¹⁸ Tudi naye gusha mutshima egi tuajiya gukhala mu guhuima ngatshima tudi mutagana nu malamba akola. Mu tangua diene tudi naye gujiya egi tudi nu funu ya guhuima gua Nzambi. Phamba Yehowa wajiya gutuhana guhuima guene. Tudi naye gumushila mutshima gula misongo ya gisambugila yabua ha fundo tuana jinga, tuatagana nu lamba diakola nga tuatagana nu usageshi. Sala ya gujinginyina mu ulondegi wenji. Tangiza ndaga jiabonga jidi gugunengena mu masugu adi muza. Gula muatshita ngenyi, “Nzambi wa guhuima mbawukhala n’enu.” (Fili. 4:9) Mu longo dialandula, mbatumona luholo tuajiya gukuatesa aphangi Aklisto adi mutagana nu malamba ha gukhala mu guhuima gua Nzambi.