LONGO DIA 52
Khala Mukuatesa Athu Ako mu Tangua dia Lamba4
‘Utunyigo gutshita ndaga jiabonga gudi athu adi najio funu, gula udi nu luholo lua gujikalagala.’—ISH. 3:27.
LUNGIMBO 103 Les bergers, des dons de Dieu
NDAGA JIDI MU LONGO EDIa
1. Luholo lutshi Yehowa wana hana mvutu gu isambu ya akombeledi enji?
UDI mujiya egi Yehowa wajiya gugukalegela ha gula ahane mvutu gudi muthu mumoshi udi gumutoga ukuateshi mu gisambu? Wajiya gukuatesa athu ako ikhale udi mukulu, mukuateshi wa mudimo, muvundji wa njila, nga mulongeshi mu hungu. Wajiya nji gukuatesa aphangi, ikhale udi muvuala nga muthu wa gukola, ikhale udi phangi wa yala nga wa mukhetu. Gula phangi mumoshi wana zumba Yehowa wamutoga ukuateshi mu gisambu, Yehowa wana kalegela akulu nga aphangi ako agujinginyina ha guhana muthu muene “gikhesa giavula.” (Kol. 4:11) Tuana khala diago nu gusuanguluga ha gukombelela Yehowa nu gukuatesa aphangi’etu! Tuajiya guakuatesa mu tangua dia misongo ya gisambugila, gula ndaga ya lamba yaabuila, nga gula atagana nu usageshi.
KHALA MUKUATESA ATHU AKO MU TANGUA DIA MISONGO YA GISAMBUGILA
2. Mukunda natshi yajiya gukhala lamba ha gukuatesa athu ako mu tangua dia misongo ya gisambugila?
2 Gula misongo ya gisambugila idi musagesa athu ha fundo wana khala, yajiya gukhala lamba ha gukuatesa athu ako. Ha gufezegesa, yajiya gukhala egi tudi mutshigina guya mutala mafut’etu, uvi gutshita ngenyi guajiya gukhala gingoza. Yajiya gukhala nji egi tudi mutshigina gutamega aphangi adi mu lamba dia makuta ha guza mudia gumbo dietu, uvi luholo lua guyitshita guetuhu. Tuajiya gutshigina nji gukuatesa athu ako, uvi yajiya gukhala lamba gula enya fami yetu adi mukata. Ndaga ya ndando idi egi, tuana tshigina gukuatesa aphangi’etu. Yehowa nji wana suanguluga muavula tangua tuana tshita yagasue ha guakuatesa. (Ish. 3:27; 19:17) Luholo lutshi tuajiya guyitshita?
3. Longo ditshi tuazula mu gifezegeselo gia akulu a mu hungu dia phangi Desi? (Yelemiya 23:4)
3 Ndaga akulu ajiya gutshita. Gula udi mukulu tshita ngolo ha gujiya imeme muabonga. (Tanga Yelemiya 23:4.) Phangi Desi tuazuelela mu longo diabalega udi muzuela egi: “Akulu a mu hunji dietu dia mudimo wa gulongesa, akhalele mulongesa hamoshi nu ame nu alongeshi ako. Tuakhalele nji mubalegesa tangua hamoshi nawo.”b Phangi Desi wakhalele gudisagesa mukunda nu misongo ya corona virus, wafuishile nji enya fami yenji. Uvi luholo akulu akhalele mubalegesa n’enji tangua hamoshi, yakhalele yaleba gudi ene ha gumukuatesa.
4. Mukunda natshi yakhalelego lamba gudi akulu ha gukuatesa phangi Desi? Ndaga yene idi gugulongesa itshi?
4 Phangi Desi udi muzuela egi: “Luholo ngakuatele ufuta nu akulu, yakhalelego lamba gudi ame ha guawambela luholo ngakhalele gudivua nu ndaga jiakhalele gungusagesa.” Longo ditshi akulu ajiya guzula? Khalenu mubamba imeme yamihanele Yehowa gutuama egi lamba diaabuile. Khalenu mukuata nawo ufuta. Gula misongo ya gisambugila ishigo guguhana njila ya guya mutala aphangi gu jinzo jiawo, akambe mu maluholo ako. Phangi Desi udi muzuela egi: “Matangua ako akulu akhalele gungutamega nga gungusonegela ba mesaje mbala jiavula mu lusugu. Verse akhalele ngungutangela jiakhalele diago mukuata mutshima wami, ngatshima ngakhalele ngana gujijiya gale muabonga.”
5. Luholo lutshi akulu ajiya gujiya ndaga aphangi a mala nu akhetu adi najio funu? Luholo lutshi ajiya guakuatesa?
5 Tuajiya gukuatesa aphangi adi nu funu ya ukuateshi, gula tudi guahula mihu nu gutema guagasue. (Ish. 20:5) Tuajiya gukamba gujiya gula adi nu ima ya gudia, ihemba nga ima iko ajiya gukhala nayo funu? Tuajiya guahula nji gula mudimo wawo udi mutshigina gufua nga gula ashigo luko nu mbongo jia gufutshila inzo? Tuajiya nji guahula gula adi nu funu egi tuakuatese ha gujiya luholo lua gutoga ukuateshi gudi mafumu a leta? Aphangi ahanele phangi Desi ima akhalele nayo funu. Uvi akulu amumonesele guzumba nu amutangele verse jia Biblia. Gutshita ngenyi guakuatesele muavula ha gukolesela mu malamba. Udi muzuela egi: “Akulu akhalele mukombelela hamoshi nu ame. Ngushigo muwunguluga luko ndaga jiagasue azuelele, uvi ame muwunguluga luholo ngadivile. Yakhalele gifua Yehowa udi gunguwambela egi: ‘Ushigo hakhaye.’”—Yesh. 41:10, 13.
Phangi udi mutuameza Inzo Yaleha ya Mutaledi udi nu gusuanguluga ha guvua komantere jia aphangi avula adi mu gudibungisa jidi muhana gikhesa. Udi nu gusuanguluga nji ha gumona egi phangi udi mukata udi muhana komantere mu visioconférence (Tala paragrafe 6)
6. Ndaga tshi aphangi avula mu hungu ajiya gutshita ha gukuatesa athu ako? (Tala gifuanesa.)
6 Ndaga athu ako ajiya gutshita. Tuana tshigina egi akulu akuatese aphangi a mala nu akhetu adi nu funu ya ukuateshi. Uvi Yehowa udi gututoga mukut’etu agasue ha gukuatesa athu ako nu guahana gikhesa. (Gal. 6:10) Ikhale tuakalagala ndaga yazonda ha gukuatesa muthu udi mukata yajiya diago gumukuatesa muavula. Mona wazonda wajiya gusonega mukanda nga gulondega gifuanesa ha gutumila phangi mumoshi wa yala ha gumuhana gikhesa. Phangi mumoshi wa muvuala, wajiya guya musumba ima nga gukalagala ndaga iko ha gukuatesa phangi wa mukhetu. Aphangi ako mu hungu ajiya gulondega ima ya gudia ha guya mubembela phangi mumoshi udi mukata gumbo dienji. Uvi gula misongo ya gisambugila idi mulandula gudivudisa, aphangi agasue mu hungu ana khala nu funu ya gikhesa. Hene gungima dia gudibungisa mu Inzo ya Ufumu nga mu visioconférence tuajiya gusala ha guta maga nu aphangi. Akulu nji ana khala nu funu egi aphangi a ahane gikhesa. Aphangi ako asonegele mikanda ha guhana akulu mersi, luholo akalegele mudimo wakola wa gukuatesa aphangi a mala nu a akhetu mu tangua dia misongo ya gisambugila. Idi diago ndaga yabonga gula tudi mutshita ngolo ha gudihana “gikhesa nu gudikolesa”!—1 Tes. 5:11.
KHALA MUKUATESA ATHU AKO ADI MUTAGANA NU NDAGA JIA LAMBA
7. Itshi yajiya gubuila aphangi gula atagana nu ndaga imoshi ya lamba?
7 Ndaga jia lamba jiajiya gusombegesa monyo wa muthu mu gisagumuisa. Malamba ajiya gutshita egi athu ako akhadigo luko nu inzo, atotesa ima yawo yagasue nga gufuisa athu ana zumba. Malamba ene ana buila nji aphangi’etu a mala nu a akhetu. Luholo lutshi tuajiya guakuatesa?
8. Ndaga tshi akulu nu mafumu a fami ajiya gutshita gutuama egi ndaga imoshi ya lamba ibue?
8 Ndaga akulu ajiya gutshita. Akulu, kuatesenu aphangi ha gudilondega, gutuama egi ndaga ya lamba yaabuile. Mudi naye gujiya gula aphangi agasue mu hungu adi mujiya ndaga adi naye gukalagala gula lamba diaabuila ha gudibamba nu luholo ajiya gumitamega. Phangi Margaret, tuazuelela mu longo diabalega udi muzuela egi: “Mu gitshinyi, milonga ya gulondega mu hungu, akulu atutemesele egi fundo tuakhalele mujinga diajiya guhia tshuiya. Azuelele egi tudi naye gukatuga gu jinzo jietu mbala imoshi gula mafumu a leta atuwambela ha gukatuga nga gula tuamona egi tudi mu gingonza.” Aphangi atuwambelele diago ndaga jiene mu tangua diatagana. Handaga gungima dia phoso 5, fundo tuakhalele mujinga diakuatele tshuya. Mu tangua dia gukombelela gua mu fami, mafumu a fami ajiya guzuelela ndaga muthu wagasue mu fami wajiya gutshita. Gula aye nu an’aye muadilondega gutuama, mbamushigo gudisagesa muavula gula ndaga ya lamba yamibuila.
9. Luholo lutshi akulu ajiya gudilondega ha gukuatesa aphangi gutuama nu gungima dia ndaga imoshi ya lamba?
9 Gula udi mutuameji wa hunji dia mudimo wa gulongesa, kamba gujiya gula udi nu ba nimero nu udi mujiya mafundo aphangi a mu hunji diaye ana khala, gutuama egi lamba dibue. Khala nu liste ya ba nimero nu mafundo ana khala aphangi. Gula phangi mumoshi wasombegesa nimero nga fundo diana khala muene, londega mbala imoshi mu liste yaye. Ngenyi, gula ndaga imoshi ya lamba yabua, mbayikhala yaleba ha gutamega phangi wagasue wa mu hunji diaye ha gujiya luholo wajiya gumukuatesa. Gungima, tamega mbala imoshi mutuameji wa hunji dia akulu, ha gumuwambela ndaga yene. Mutuameji wa hunji dia akulu udi naye nji gutamega mutadi-muwendji ha gumuwambela ndaga yene. Gula aphangi awa adi mukalagala hamoshi, ajiya gukuatesa aphangi mu tangua dia lamba. Tangua tshuya tuakhalele muhia ha fundo diakhalele mujinga phangi Margaret, mutadi-muwendji wawo watshitshile matangua 36 gubanda tulo ndo, ha gutuameza mudimo wakhalele mutshita akulu wa gutamega aphangi abembele jinzo jiawo mukunda nu tshuya. (2 Kol. 11:27) Ngenyi akuatesele aphangi agasue ha guheta fundo dia gukhala.
10. Mukunda natshi akulu adi naye guzula mudimo wa gubamba imeme nu ndando? (Yone 21:15)
10 Akulu adi nu ginemo gia guhana aphangi agasue gikhesa, nu malongo adi mukatuga mu Biblia nu gukuatesa aphangi adi muvua gikenene. (1 Phet. 5:2) Gula ndaga imoshi ya lamba yabua, adi naye gutshita yagasue hagujiya gula phangi wagasue udi muabonga, udi nu ima ya gudia, udi nu milele, nga udi nu fundo dia gubanda. Uvi gungima dia lamba diene, aphangi ana khala nu funu ya gikhesa nu ya ukuateshi gula adi muvua gikenene. (Tanga Yone 21:15.) Phangi Harold wana tshita gu komite ya filiale, watele gale maga nu aphangi avula a mala nu a akhetu ataganele nu ndaga jia lamba. Udi muzuela egi: “Yana zula tangua diavula hagula aphangi ene adivue muabonga. Aphangi ene ajiya guheta ima iko ya gujingila, uvi, ana landula gutangiza athu akhalele muzumba anyi afile, nu ima yawo ya ndando atotesele nu malamba amonele mutangua diene. Gutangiza ndaga eji, guajiya guahana luko gikenene giavula. Ndaga yene ishigo mumonesa egi aphangi ene ana khalago nu gutshigina, handaga athu agasue ajiya nji gudivua ngenyi.”
11. Akulu ajiya gukuatesa enya fami mu ndaga tshi?
11 Akulu ana kalegela longo diana zuela egi, “dilenu nu athu adi mudila.” (Roma 12:15) Adi naye gukuatesa aphangi adi mutagana nu malamba ha gujiya egi, Yehowa nu aphangi’awo Aklisto, ana guazumba. Akulu adi naye gukuatesa enya fami ha gulandula gukalagala ndaga jia mu nyuma, gifua: Gutshita gisambu, gulonguga Biblia, guya mu gudibungisa, nu gukalagala mudimo wa gulongesa. Akulu adi naye gukolesa mvuaji ha gukuatesa an’awo ha gukolesa ufuta wawo nu Yehowa. Ngenyi gula ndaga imoshi ya lamba yaabuila, yajiyilego gubolesa ufuta wawo nu muene. Mvuaji, kuatesenu an’enu ha gujiya egi Yehowa mbawulandula gukhala Futa diawo, mbawulandula nji guakuatesa. Khalenu guawambela egi, adi mu fami ya aphangi a mala nu a akhetu ya ha mavu a mudidi adimutshigina guakuatesa.—1 Phet. 2:17.
Wajiya guya mukuatesa gula ndaga imoshi ya lamba yabua ha fundo wana khala? (Tala paragrafe 12)e
12. Ndaga tshi athu ako ajiya gutshita ha gukuatesa gula ndaga imoshi ya lamba yabua? (Tala gifuanesa.)
12 Ndaga athu ako ajiya gukalagala. Gula ndaga imoshi ya lamba yabua hehi nu fundo wana khala, hula akulu luholo lutshi wajiya gukuatesa. Wajiya guhana fundo dia gukhala, gudi aphangi abuila ndaga ya lamba, nga gudi aphangi aji ha gukuatesa aphangi ene abuila malamba. Wajiya nji guhana aphangi ene ima ya gudia nga ima iko adi nayo funu. Uvi luholo lutshi wajiya gukuatesa aphangi gula ndaga ya lamba yaabuila gualeha nu fundo wana khala? Wajiya guakuatesa gula udi mutshita isambu mukunda nu ene. (2 Kol. 1:8-11) Wajiya nji gukuatesa aphangi adi mubuila malamba, gula wahana musomonyi ha gukuatesa mudimo wa Matemue a Yehowa wa ha mavu agasue. (2 Kol. 8:2-5) Gula udi nu luholo lua guya fundo ndaga yene ya lamba yabui ha gukuatesa, hula akulu ndaga udi naye gukalagala. Gula agutamega ha guya, ajiya guguhana formasio hagula wajiya gukuatesa muabonga ha fundo didi nu funu ya ukuateshi.
KHALA MUKUATESA APHANGI ADI MUTAGANA NU USAGESHI
13. Malamba atshi aphangi ana tagana nawo mu ifutshi inyi ana tunyisa mudimo wetu?
13 Aphangi ana khala mu ifutshi inyi ana tunyisa mudimo wetu, ana jinga mu lamba mukunda nu usageshi. Aphangi ene ana khala nu lamba dia mbongo, ana kata, ana fuisa nji athu ana zumba. Yajiya gukhala lamba gudi akulu ha guya mutala aphangi ene gu jinzo jiawo nga ha guta nawo maga ha guahana gikhesa, handaga mudimo wetu wana tunyishiwa mu ifutshi yene. Ndaga yene yabuidile nji phangi Andrei tuazuelela mu longo diabalega. Phangi mumoshi wa mukhetu wa mu hunji dienji dia mudimo wa gulongesa wakhalele mu lamba dia makuta. Gungima watshitshile aksida mu gamiyo. Phangi muene gakhalelego nu luholo lua gutshita mudimo, handaga akhalele naye gumutshita operasio. Ikhale atunyishile mudimo wetu mu gifutshi giene nu akhalele mu sungi ya Corona virus, uvi aphangi atshitshile yagasue ajiya gutshita ha gumukuatesa. Yehowa wakhalele mumona ndaga phangi muene wa mukhetu wakhalele mutagana najio, hene atumile aphangi ha gumukuatesa.
14. Luholo lutshi akulu ajiya guhana gifezegeselo giabonga gula adi mushila Yehowa mutshima?
14 Ndaga akulu adi naye gukalagala. Phangi Andrei watshitshile gisambu, gungima watshitshile ngolo ha gukuatesa phangi muene. Luholo lutshi Yehowa wahanele mvutu gu gisambu gienji? Wakalegele aphangi avula mu hungu anyi akhalele nu luholo lua guzoga ha guya mukuatesa phangi muene. Aphangi ako ayile mutuala phangi muene wa mukhetu gu hôpital. Ako amuhanele makuta ajiya gumukuatesa. Yehowa wakalegele aphangi ene ha gukuatesa phangi wetu wa mukhetu. (Heb. 13:6) Watshitshile nji yagasue hagula amukuatese mu ndaga jiagasue akhalele najio funu. (Yel. 36:5, 6) Akulu, gula mudimo watunyishiwa mu gifutshi gienu, togenu aphangi ako ha gumikuatesa. Ndaga ya gubalega ndando idi gushila Yehowa mutshima. Wajiya guguhana ngolo hagula ukuatese aphangi’etu a mala nu a akhetu.
15. Luholo lutshi tuajiya gukhala hamoshi nu aphangi etu Aklisto tangua tudi mutagana nu usageshi?
15 Ndaga athu ako ajiya gutshita. Gula mudimo wetu watunyishiwa, tuajiya gusendesa gudibungisa nu aphangi mu tumahunji tuazonda zonda. Hene idi nu ndando yavula ha gukhala mu guhuima nu aphangi. Mbalagaji wetu udi Satana, uvi aphangi’etu ndo. Khala mutotesela aphangi gubola guawo. Gula udi nu mulonga nu phangi mumoshi, ulondegenu muphushi (Ish. 19:11; Ef. 4:26) Khala hehi ha gukuatesa athu ako. (Tito 3:14) Tangua aphangi akuatesele phangi wa mukhetu watshitshile aksida mu gamiyo, ndaga yene yasuanguluishile aphangi a mu hunji diawo dia mudimo gulongesa. Abuile nu ufuta wakola gifua enya fami imoshi.—Ngi. 133:1.
16. Ha gutadila Kolosai 4:3, 18, Luholo lutshi tuajiya gukuatesa aphangi a mala nu a akhetu adi mutagana nu usageshi?
16 Aphangi’etu avula a mala nu a akhetu ana kombelela Yehowa ngatshima mafumu a leta ana tunyisa mudimo wetu. Ako adi mu mabologo mukunda nu gutshigina guawo. Tuajiya gukombelela mukunda nu aphangi ene nu enya fami jiawo. Tuajiya nji gukombelela mukunda nu aphangi adi muhaga monyo wawo mu gingonza, ha gukuatesa aphangi awa adi mu mabologo. Handaga adi mutshita yagasue ha gukuatesa aphangi ene ha gushila Yehowa mutshima, nu ha guahana ima adi nayo funu. Ana guya nji musopha milonga ya aphangi ene gu ba tribinale.c (Tanga Kolosai 4:3, 18.) Mujimbilago egi isambu yenu yajiya gukuatesa aphangi awa a mala nu a akhetu!—2 Tes. 3:1, 2; 1 Tim. 2:1, 2.
Luholo lutshi wajiya gukuatesa enya fami yaye ha gudilondega sendese mangino mukunda nu usageshi? (Tala paragrafe 17)
17. Luholo lutshi wajiya gudilondega sendese mangino mukunda nu usageshi?
17 Aye nu enya fami yaye muajiya gudilondega luenyelu mukunda nu usageshi. (Makal. 14:22) Ukhadigo mutangiza ndaga jiagasue jia lamba jiajiya gugubuila. Uvi kolesa ufuta waye nu Yehowa, kuatesa nji an’aye ha gutshita luholo lumoshi. Gula tangua diko wavua gikenene, wambela Yehowa ndaga yene mu gisambu. (Ngi. 62:7, 8) Zuelelenu mu fami ndaga jiagasue jidi gumituma ha gushila Yehowa mutshima.d Tuamonyi egi gula mudi gudilondega gutuama egi ndaga imoshi ya lamba imibuile, mbayikuatesa an’aye muavula diago. Luholo lumoshi nji gula fami yaye idi gudilondega nu idi mushila Yehowa mutshima, ndaga yene mbayikuatesa an’aye ha gukhala nu gikhesa nu gutuna gudisagesa tangua mbaatagana nu usageshi.
18. Ndaga jitshi jidi gutunenga mu masugu adi muza?
18 Guhuima gua Nzambi guana gutubamba. (Fili. 4:6, 7) Yehowa wana gutuhana guhuima guene mangino, ikhale tudi mu tangua dia misongo ya gisambugila, ndaga imoshi ya lamba yatubuila nga tuatagana nu usageshi. Wana kalegela akulu ha gutubamba. Wana hana nji muthu wagasue mukatshi dietu luendu lua gukuatesa aphangi ako. Guhuima tudi nago mangino, mbagutukuatesa ha gukolesela mu malamba agasue tudi mutagana nawo, “ikhale lamba diakola.” (Mat. 24:21) Mu tangua diene, mbatukhala nu funu ya guhuima, mbatukuatesa nji athu ako ha gukhala mu guhuima. Uvi gungima dia lamba diakola, mbatushigo luko mutagana nga nu lamba dimoshi diajiya gutuhana gikenene. Mbatuheta guhuima gua mayilago gifua luholo Yehowa wana tshigina.—Yesh. 26:3, 4.
LUNGIMBO 109 Zumba Diago nu Mutshima Umoshi
a Yehowa wana gukalegela akombeledi enji agujinginyina ha gukuatesa athu adi mutagana nu malamba. Wajiya gugukalegela ha guhana aphangi ako gikhesa. Tutadilenu ndaga tuajiya gukalagala ha gukuatesa athu adi nu funu ya ukuateshi.
b Mu longo edi, majina ako asombegesewe.
c Betele yana khalago nu luholo lua gusonegela phangi wagasue wa yala nu wa mukhetu udi mu bologo mukanda.
d Tala longo “Dilondege ha Gulua nu Umbalagaji Sendese Mangino” mu Inzo Yaleha ya Mutaledi ya Juillet 2019
e UKOTELESHI WA GIFUANESA: Phangi mumoshi wa yala nu mukaji’enji abatela aphangi abuila ndaga ya lamba ima ya gudia. Aphangi ene adi mu tenta imoshi mukunda nu tangua diazonda.