Udi ya Gudilondega “ha Guheta Mavu ba”?

UDI YA GUDILONDEGA HA GUBUISA MAVU PHALADISO BA?

Tangua Yehowa wawambelele athu ha ‘guzalesa mavu nu guahinyina’ wamonesele egi mavu a mudidi mbaabua phaladiso. (Gis. 1:28) Athu mbaheta monyo wa ivo nu ivo mbaatumagela nji mukhuala wene. Mavu mbaashigo mubua phaladiso mu gisendeselo handaga dihia dia Edene diana khalago luko guene. Gungima dia ita ya Armagedona mbatukhala nu mudimo wavula wa gutshita ha gulondega mafundo ako a ha mavu abolesewe. Mbatukhala diago nu mudimo wavula!

Ndaga yene idi gutuwunguluisa mudimo enya Isalele akhalele naye gutshita tangua akatugile gu Babilona. Luholo atshitshile ivo 70 mu uhiga, gifutshi giawo giabuile makhulu. Uvi Yeshaya wadiangele guzuela egi, Yehowa mbawakuatesa ha gulondega luko gifutshi giawo. Profesi yazuelele egi: ‘Mbawubuisa temu dia Siona gifua dihia dia Edene. Mavu enji a luselenga mbaabua gifua dihia dia Yehowa.’ (Yesh. 51:3) Yehowa wakuatesele enya Isalele ha gubuisa gifutshi giawo fundo diabonga. Luholo lumoshi nji Yehowa mbawukuatesa athu mbaaheta mavu, ha guabuisa phaladiso. Aye nji wajiya gumonesa sendese mangino egi udi ya gudilondega ha gukalagala mudimo wene.

Wajiya gumonesa egi udi ya gudilondega gula udi mulondega inzo yaye muabonga nu guhaga ima yagasue mu ndonga. Ikhale athu wana jinga nawo hehi akhala nu usala, uvi aye tshita ngolo ha gukhala mulondega ima yaye muabonga. Wajiya gumonesa nji egi udi ya gudilondega gula udi gudihana ha gulondega Inzo ya Ufumu nu salle d’assemblée. Gula luholo ludi guene wajiya guya mukuatesa aphangi abuila malamba. Gula udi mutshita ngenyi mbawumonesa egi udi hehi ha gukuatesa aphangi adi nu funu ya ukuateshi. Wajiya nji gulonguga midimo iko mbawutshita mu mavu ahe-ahe gula Yehowa watshigina egi uhete monyo wa ivo nu ivo.

UDI YA GUDILONDEGA HA GUKUATESA ATHU MBAAFUZUMUGA BA?

Tangua Yesu wafuzumuine mun’a Yayiluse wa mukhetu, wazuelele egi amuhane ima ya gudia. (Mako 5:42, 43) Yakhalele ndo ndaga yakola ha guhana mona wa zonda wa mukhetu wa ivo 12 ima ya gudia. Tangiza mudimo wakola mbatukhala nawo, tangua Yesu mbawutagenesa laji dienji didi muzuela egi: “Athu agasue adi mu malumba mbaavua dijui dienji nu mbaazoga.” (Yone 5:28, 29) Biblia yanago guzuelela muavula luholo ndaga jiene jiagasue mbajikalegewa. Uvi yajiya gukhala egi athu mbaafuzumuga mbaakhala nu funu ya ima ya gudia, fundo dia gubanda nu funu ya milele. Sendese mangino wajiya gumonesa egi udi ya gudilondega ha gukuatesa athu mbaafuzumuga. Tala mihu wajiya gudihula.

Gula ahana kominike egi mutadi muwendji uza mutala hungu dienu, wana gumutamega ha guza mudia gumbo diaye ba? Gula mudimo wa phangi mumoshi wana tshita gu Betele nga wa mutadi-muwendji wahua, aatuma mu hungu dienu, wajiya guakuatesa ha guheta inzo ya gukhala ba? Gula asamble amoshi mbakalegewa mu dimbo dienu, wajiya gudihana ha gukalagala midimo gutuama nu gungima dia asamble nga ha guyamba aphangi mbaaza ba?

UDI YA GUDILONDEGA HA GULONGESA ATHU MBAAFUZUMUGA BA?

Mu gudivua nu Makalegelo 24:15, tudi musha mutshima egi athu avula mbaafuzumuga. Avula mukatshi diawo ahetelego luendu lua gujiya Yehowa gutuama egi afue. Uvi mbaaheta luendu luene tangua mbaafuzumuga.a Akombeledi a Nzambi agujinginyina mbaalongesa ha gumujiya. (Yesh. 11:9) Phangi Charlotte, watshitshile mudimo wa gulongesa gu Europe, Amerique du sud nu gu Afrique, udi munengenena tangua diene nu gusuanguluga guagasue. Udi muzuela egi: “Ngudi munengenena nu mutshima zagu-zagu ha gulongesa athu mbaafuzumuga. Tangua ngana tanga lumene lua muthu wajingile mu masugu abalega, ngana zuela egi: ‘Nga muthu yowu wajiyile Yehowa nga monyo wenji wakhalelego luholo elu.’ Ngudi munengenena nu gusuanguluga guagasue ha gulongesa athu mbaafuzumuga, ndaga jiatadila Yehowa nu luholo mbaakhala nu gusuanguluga gula amukombelela.”

Akombeledi a Yehowa agujinginyina anyi ajingile gutuama egi Yesu aze ha mavu mbaakhala nji nu ndaga jiavula jia gulonguga. Tangiza gale gusuanguluga nu luendu mbatukhala nalo ha gukotelesela Danyele gutagenesewa gua profesi jiasonegele muene, uvi gakhalelego gujikotelesa. (Dan. 12:8) Nga tangua mbatukuatesa Luta nu Naomi ha gujiya egi, ene nji adi akhakha a Yesu. Mbatukhala nu gusuanguluga guavula ha gulongesa athu a ha mavu agasue. Mu tangua diene, malamba nu ndaga jiagasue jidi musagesa athu mangino mbajikhadigo luko!

Ndaga itshi wajiya gukalagala mangino ha gumonesa egi udi wa gudilonda ha gulongesa athu mbaafuzumuga? Wajiya gudilondega gula udi mukalagala ngolo ha gubua mulongeshi wabonga nu ha gudihana mu mudimo wa gulongesa. (Mat. 24:14) Gula ushigo luko nu ngolo nga tangua dia gudihana muavula mu mudimo wa gulongesa, handaga wabua muthu wa gukola nga mukunda nu ndaga jiko, wajiya gumonesa egi udi ya gudilondega ha gulongesa athu mbaafuzumuga gula udi mukalagala yagasue ha gudihana mu mudimo wa gulongesa mangino.

Idi ndaga yabonga gula wazula tangua dia gutangigiza mihu eyi ya ndando: Udi diago ya gudilondega ha guheta mavu ba? Udi diago nu gusuanguluga ha gubuisa mavu phaladiso, ha gukuatesa athu mbaafuzumuga nu ha gualongesa ba? Wajiya gumonesa egi udi diago ya gudilondega ha guheta monyo wa ivo nu ivo ha mavu, gula udi mukalegela ba okazio agasue udi muheta mangino ha gukalagala midimo idi gifua inyi mbawukalagala mu mavu ahe-ahe!