LUMENE LUA MUTHU
Gudihaga ha Fundo dia Athu ako Guana Bata Gubonga Guavula
Ame nu mama nu phangi’ami wa mukhetu Pat mu 1948
“ENYA Église anglicane ana longesa ndo giamatshidia. Landula gukamba giamatshidia.” Khakha wami wakhalele muenya Église anglicane, tangua diawambelele muene mama egi landula gukamba giamastshidia, mama wasendesele gukamba gikombelelo gia giamatshidia. Uvi gakhalelego mutshigina guta maga nu Matemue a Yehowa; wanguwambelele egi ngudi naye gudisuega gula Matemue a Yehowa aza gumbo dietu gu Toronto, gu Canada. Uvi tangua mama wami wa galenge wasendesele gulonguga Biblia nu Matemue a Yehowa mu 1950, mama nji wasendesele gulonguga. Akhalele mulonguga Biblia mu inzo ya mama wa galenge, gungima abatijiwe.
Tata wakhalele mutuameji wa dingumba dimoshi gu Canada diana tamegewa egi Église Unie du Canada. Phoso nu phoso, wakhalele gututuma nu phangi’ami wa mukhetu ha guya mukombelela mu lubingo nu ana khalasa ako mu gimenegena, gungima tuakhalele muya gumusanga mu 11:00 ha gusamba mu inzo ya nzambi. Mu ngueze, tuakhalele muya nu mama mu Inzo ya Ufumu ya Matemue a Yehowa. Tuakhalele diago mumona gudisha guakhalele mukatshi dia ikombelelo yene mbadi.
Ame nu enya fami ya phangi Hutcheson gu assemblée internationale akhalele nu muto wa lumene egi La volonté divine mu 1958
Mama wakhalele mulongesa lukuma luabonga gudi futa dienji Bob nu Marion Hutcheson, asuangulugile nji nu giamatshidia giene. Mu 1958, tuayile nu fami ya phangi Hutcheson gu assemblée internationale a masugu nage akalegewe gu New York akhalele nu muto wa lumene egi: La volonté divine. Gula ngatangiza, ngana kotelesa diago egi yakhalelego ndaga yaleba luholo anguzudile ha guya nawo, uvi mbangubuitshigo asamble ene mutshima.
APHANGI ANGUKUATESELE HA GUDIHANA MUAVULA MU MUDIMO WA YEHOWA
Tangua ngakhalele muvuala, tuakhalele mujinga gu ferme, ngakhalele musuanguluga nu gufuga shitu. Ngazuelele egi mbangukhala musaga shitu (vétérinaire). Mama wawambelele mukulu mumoshi wa mu hungu dietu ndaga yene. Mukulu muene wanguwambelele nu gisemo giagasue egi tudi mujinga “mu masugu a gisugishilo,” gulonguga makhalasa aleha-leha guajiya gubolesa ufuta wami nu Yehowa. (2 Tim. 3:1) Hene ngazudile desizio dia gutuna guya gu université.
Ngakhalele gudihula egi itshi mbangutshita gula ngamanesela khalasa. Ikhale ngakhalele mulongesa muavula lukuma luabonga, uvi ngakhalelego musuanguluga nu gulongesa, ngakhalelego nji mutangiza egi lusugu ngajiya gubua muvundji wa njila. Tata wami nu lemba diami akhalelego matemue a Yehowa; mu tangua diene, akhalele gunguwambela egi ngutshite mu kompanyi imoshi gu Toronto. Lemba diami wakhalele fumu wakoma mu kompanyi yene, hene ngatshiginyile mudimo wene.
Tangua ngakhalele gu Toronto, ngakhalele mutshita mudimo muavula fundo dimoshi nu athu anyi akhalelego matemue a Yehowa, ngenyi ngakhalelego muheta tangua dia gutshita ndaga jia mu nyuma. Thomo, tuakhalele mujinga nu khakha; khakha gakhalelego Temue wa Yehowa, gungima wafuile, mu tangua diene, ngakhalele naye gukamba fundo diko dia gukhala.
Fami ya phangi Hutcheson, anyi tuayile nawo gu asamble a mu 1958, abuile gifua mvuaji jiami. Angutamegele ha guya mukhala gumbo diawo, angukuatesele nji ha gukula mu nyuma. Mu 1960, tuabatijiwe hamoshi nu mun’awo John. John wabuile muvundji wa njila, wanguhanele gikhesa gia gulongesa luko muavula. Aphangi a mu hungu amonele egi ngasendesele gukula mu nyuma, anguhanele ginemo gia gubua serviteur à l’École du ministère théocratique.a
NGAHETELE FUTA WABONGA NGABUILE NJI MUVUNDJI WA NJILA
Mu lusugu lua ulo wetu mu 1966
Mu 1966, ngazudile Randi Berge mu ulo, wakhalele mutshita mudimo wa muvundji wa njila nu gikhesa giagasue fundo diakhalele nu funu ya alongeshi. Mutadi muwendji wetu wakhalele musuanguluga nu esue muavula, watuhanele gikhesa ha guya muhana mago gu hungu dia gu Orillia, gu Ontario. Hene tuayile guene.
Tangua tuahetele gu Orillia, eme nji ngabuile muvundji wa njila gifua Randi. Ngasendesele gulongesa muavula gifua muene! Tangua ngadihanele muavula mu mudimo wa muvundji wa njila, ngasendesele gusuanguluga gukalegela Biblia nu gumona luholo athu akhalele musuanguluga nu giamatshidia. Tuasuangulugile diago muavula tangua tuakuatesele yala mungoshi nu mukaji’enji gu Orillia ha gusombegesa makalegelo awo nu ha gubua Matemue a Yehowa.
TUALONGUGILE ZUELELO DIHE-DIHE, TUASOMBEGESELE NJI LUHOLO LUA GUTANGIZA
Lusugu lumoshi tuayile gu Toronto, ngamonele phangi Arnold MacNamara, wakhalele nji mukatshi dia aphangi akhalele nu ginemo gia gutuameza Betele. Watuhudile gula tuajiya gubua bapionye spesiale. Ngamuvutudile mbala imoshi egi: “Ayi! Ngajiya guya gu khanda yagasue uvi gu Québec ndo!” Ngakhalelego musuanguluga nu dimbo diene handaga enya gu Canada anyi ana zuela anglais ana gudivua ndo muabonga nu enya gu province ya Québec anyi ana zuela Français. Mu tangua diene, athu azolele matululu nu mafumu a politike egi adi naye gukhaphumuna Québec ha guyikatula gu gifutshi gia Canada.
Arnold wazuelele luko egi: “Masugu awa, Betele idi mutuma bapionye spesiale phamba gu Québec.” Ngatshiginyile mbala imoshi. Ngakhalele mujiya egi Randi wakhalele musuanguluga gutshita mudimo guene. Gungima, ngakotelesele egi ngazudile diago desizio diabonga mu monyo wami!
Tuanginyile khalasa ha gulonguga Français phoso thano, gungima, ame nu Randi nu phangi wa yala muko nu muakji’enji tuayile gu Rimouski. Gula wakatuga gu nord ya Montréal ha guya guene udi naye gutshita bakilometre 540 mu njila. Tuakhalele nu ndaga jiavula jia gulonguga; ndaga yene yamonegele haphelo tangua ngatangele bakominike mu gudibungisa. Ha fundo dia guzuela egi, mu asamble etu a masugu thathu adi muza, ba “délégués a mu gifutshi gia Autriche” mbaakhala avula, ame ngazuelele egi, ba “délégués a tunjila tua autruche” mbaakhala avula.
“Inzo Ilaphe” gu Rimouski
Tangua tuakhalele gu Rimouski, phangi Huberdeau nu mukanji’enji, nu an’enji a akhetu mbadi, nu aphangi ako a akhetu nguana a gikhesa akhalele undumbu, ajile gutusanga. Phangi Huberdeau nu mukaji’enji azudile ginemo gia gufutshila inzo yakhalele mubanda bapionye sambadi. Tuakhalele mutamega inzo yene egi Inzo Ilaphe handaga yakhalele ilaphe gutuama, yakhalele nji nu makunji alaphe. Tuakhalele athu 12 gula 14 monzo yene. Luholo tuakhalele bapionye spesiale, ame nu Randi tuakhalele mulongesa mu gimenegena, nu mu ngueze, nu mu phipha, tuakhalele musuanguluga gula tuaheta muthu wa guya n’enji mu mudimo wa gulongesa, ikhale mu sungi ya guhuma mu ngueze.
Tuakuatele diago ufuta wakola nu avundji a njila wawa, abuile diago gifua enya fami yetu. Matangua ako, tuakhalele muweta tshuya fundo dimoshi, tuakhalele nji nu lusugu tuakhalele mutshita ima ya gudia fundo dimoshi. Phangi mumoshi wa yala wakhalele mujiya gushiga miziki, hene, mu lusugu lua phoso mu phipha, tuakhalele muyimba nu gukina.
Athu avula gu Rimouski akhalele musuanguluga nu giamatshidia! Gungima dia ivo phamba thano, tuasuangulugile ha gumona luholo athu avula tuakhalele mulongesa Biblia abatijiwe. Hungu dietu diakomele, tuabuile nu alongeshi 35.
Gu Québec, mudimo wa gulongesa watuhanele diago formasio yabonga. Yehowa watukuatesele diago mu mudimo wa gulongesa, watuhanele nji ima tuakhalele naye funu. Tuasendesele nji guzumba athu ana zuela Français, nu zuelelo diawo, nu kutime jiawo—ndaga eyi yatukuatesele nji ha gusendesa guzumba kutime jia athu ako.—2 Kol. 6:13.
Betele yatutogele ha gukatuga guma tuakhalele, atutumile gu dimbo dia Tracadie, gu Nouveau-Brunswick. Yakhalele diago lamba handaga tuakhalele tuahanyi gale makuta avula a inzo tuakhalele mufutshila, ngakhalele nji ndombi gu école imoshi, ngakalele mulongesa guene matangua azonda mu phoso. Athu ako tuakhalele mulongesa Biblia, abuile alongeshi ahe-ahe, Inzo ya Ufumu yakhalele nji mutungiwa, yakhalele khenji ihua ndo.
Tuakombelele Yehowa muavula mu lusugu lua phoso nu lua lubingo mukunda nu ndaga yene, handaga dimbo dia Tracadie diakhalelego luholo lumoshi nu Rimouski. Uvi tuazuelele egi, luholo Yehowa watuwambela ha guya guene, tudi naye guya. Tualolele Yehowa, tuamonele luholo luatukatuile muene ndaga yagasue yakhalele naye gutukanga njila. (Mal. 3:10) Mukaji’ami Randi wakhalele nu ufuta wakola nu Yehowa, gakhalelego muenya giphi, wakhalele mulelesa nji muavula; makalegelo enji atukuatesele ha gusuanguluga nu vuayaje yene.
Mu hungu dietu dihe-dihe, mukulu wakhalele phamba mumoshi, jina dienji Robert Ross. Wakhalele muvundji wa njila mu dimbo diene nu mukaji’enji Linda; tangua avualele mun’awo wa somi, azudile desizio dia gusala gununu. Ikhale tangua akhalele musansa mun’awo wa yala, akhalele nu khadilo dia guyamba, atuhanele diago gikhesa ha gutshita muavula mudimo wa gulongesa.
GUBONGA TUAHETELE HA GUYA MULONGESA FUNDO DIDI NU FUNU YA UKUATESHI
Mu sungi ya guhuma mu circonscription yetu ya thomo
Tuakalegele mudimo wa mu muvundji wa njila ivo mbadi gu Tracadie, gungima atutumile ha gutshita mudimo wa mutadi muwendji. Tuatshitshile ivo sambadi mu circonscription ya zuelelo dia anglais, gungima atutumile mu circonscription ya zuelelo dia Français gu Québec. Mutadi muwendji wetu wa district gu Québec jina dienji diakhalele Léonce Crépeault; wakhalele gungushimana mukunda nu badiskur ngakhalele mutshita. Uvi gungima wakhalele gunguhula egi: “Luholo lutshi badiskur ene akhalele naye gukuatesa athu?”b Muhu wenji wangukuatesele ha gulongesa mu luholo lualeba lunu athu ajiya gukotelesa.
Anguhanele ginemo gimoshi ginyi mbangushigo mujimbila mu monyo wami gu assemblée internationale gu Montréal mu 1978, asamble ene akhalele nu muto wa lumene egi “La foi victorieuse”. Anguhanele ginemo gia gutshita mudimo wa gulondega ima ya gudia. Tuakhalele nu athu 80 000, tuakhalele naye guadisa mu luholo lua gudisha nu luholo tuakhalele mukalagala thomo. Ima yagasue yakhalele ihe-ihe, ima ya gudia yakhalele ya luholo luko, luholo lua guyitelega nji luakhalelego gifua luholo tuana telega ima iko. Tuakhalele nu bafrigo 20, uvi matangua ako jiakhalelego mutshita muabonga. Gutuama egi lusugu lua thomo lua asamble lusendese, guakhalelego nu luholo lua gungina mu stade ha gulondega ima uu nu mukatshi dia phipha handaga saga imoshi yakhalele mukalegewa guene. Tuasendesele guwetshia ima ya gudia gutuama egi gosa gutshie hagula ima yagudia ikhale hehi mu gimenegena! Tuahuidile diago, uvi aphangi tua khalele mutshita nawo mudimo akhalele diago athu agukula, akhalele mutshita mudimo wakola, akhalele nji nu ilelesa yavula, gifezegeselo giawo giangukuatesele muavula. Tuabuile mafuta uu nu mangino. Ngana suanguluga diago muavula nu asamble a mu province ya gu Québec fundo athu akhalele musagesa Matemue a Yehowa mu ivo 1940 nu 1950!
Ame nu Randi tudi mutshita mudimo ha gudilondega gutuama egi asamble asendese gu Montréal mu givo 1985
Gifezegeselo gia atadi awendji ako giangukuatesele muavula gu asamble akoma a gu Montréal. Givo gimoshi phangi David Splane udi mangino gu hunji dia akulu atuameji, wakhalele mutuameji wa asamble. Gungima, tangua anguhanele ginemo giene, phangi David wangukuatesele diago muavula.
Mu 2011, tuatagenesele ivo 36 mu mudimo wa atadi awendji, gungima ngabuile mulongeshi gu Khalasa dia Akulu a mu Mahungu. Gungima dia ivo mbadi, ame nu Randi tuabandele ha itanda 75 ya gudisha. Gutshita ngenyi guakhalele diago nu ndando. Gusuga ya phoso yagasue, akulu akhalele diago musuanguluga luholo Hunji dia Akulu Atuameji diakhalele guakuatesa mu nyuma.
Gungima ngabuile mulongeshi wa Khalasa dia Alongeshi a Ufumu. Ana a khalasa akhalele muhuila nu akhalele gudisagesa mukunda nu programe, handaga akhalele naye gukhala hashi matangua 7 mu lusugu, gutshita midimo ya mago matangua thathu mu ngueze, nu gutagenesa badevuare ako nguana nga thano mu phoso. Mulongeshi muko wawambelele ana khalasa ene egi, ajiyilego gutagenesa midimo yene yagasue gula ukuateshi wa Yehowa ushigo guene. Ame mutangiza luko luholo ana khalasa akhalele gudihula, tangua akhalele mumona egi gula ahaga mutshima gudi Yehowa, wakhalele guakuatesa ha gutagenesa inemo yene yagasue.
GUKALEGELA APHANGI NDAGA NU GISEMO GUANA BATA GUBONGA GUAVULA
Luholo mama wakhalele mumonesela athu ako gisemo, yakuatesele athu akhalele mulonguga n’enji Biblia ha gukula, yakuatesele nji tata ha gusuanguluga nu giamatshidia. Tangua mama wafuile, gungima dia masugu thathu tata wajile mulandula diskur dia athu agasue mu inzo ya Ufumu; walanduile nji guya mu gudibungisa gua mu hungu ivo 26. Tata gabatijiwego, uvi akulu akhalele muzuela egi wakhalele muza muthu wa thomo mu gudibungisa gua mu hungu phoso nu phoso.
Mama wakhalele gifezegeselo giabonga mukunda nu ame nu phangi’ami wa mukhetu. Aphangi’ami a akhetu mutatu nu alumi’awo akhalele mukombelela nu gujinginyina guagasue. Muyadi mukatshi diawo ana tshita mudimo gu Betele, muko gu Portugal, uvi muko gu Haïti.
Ame nu Randi tudi bapionye spesiale gu Hamilton, gu Ontario. Tangua tuakhalele mutshita mudimo wa mutadi muwendji, tuakhalele musuanguluga guya mutuala aphangi ha guvutugila athu mu mudimo wa gulongesa, nu ha gulonguga Biblia nu athu. Uvi mangino tudi nu gusuanguluga ha gumona luholo athu tuana longesa Biblia esue hakhetu adi mukula mu nyuma. Luholo tuana khala nu ufuta wakola nu aphangi a mala nu a akhetu, yana gutuhana gikhesa ha gumona luholo Yehowa wana guakuatesa mu tangua ana khala nu gusuanguluga nu mu matangua a lamba.
Gula tuatangiza luko masugu abalega, tuana hana mersi luholo aphangi avula akhalele gutukuatesa nu gutumonesela gisemo. Esue nji, tuakhalele mutshita ngolo ha ‘gudisagesa muavula’ mukunda nu athu ako, nu guahana gikhesa hagula akombelele Yehowa mu luholo luabonga. (2 Kol. 7:6, 7) Ha gufezegesa, mu fami imoshi, phangi wa mukhetu nu mun’enji wa yala nu wa mukhetu akhalele mutshita mudimo wa tangua diagasue. Ngahudile mulumi’enji gula muene nji watangijile gale ha gubua muvundji wa njila. Wazuelele egi, ngana kuatesa gale enya fami yami thathu adi avundji a njila. Gungima ngamuhudile egi: “Aye wajiya guakuatesa diago muabonga gubalega Yehowa ba?” Ngamuhanele gikhesa hagula muene nji wajiya gubua muvundji wa njila. Gungima dia mbenji samano, muene nji wabuile pionye.
Ame nu Randi mbatulandula ‘guwambela indongo idi muza midimo ya gushimana’ ya Yehowa; tudi musha mutshima egi ene nji mbaasuanguluga gukombelela Yehowa gifua esue.—Ngi. 71:17, 18.
a Mangino ana gumutamega egi Mutuameji wa Gudibungisa gua Lujingu nu Mudimo wa Uklisto.
b Tala lumene lua phangi Léonce Crépeault mu Inzo Yaleha ya Mutaledi ya fevrier 2020 diyiji 26-30.