LONGO DIA 49
Yehowa Mbawuhana Mvutu gu Isambu Yami ba?
‘Enue mbamungutamega, mbamuza ha gungukombelela, ame mbangumitegelela.’—YEL. 29:12.
LUNGIMBO 41 “Ô Dieu, entends ma prière”
NDAGA JIDI MU LONGO EDIa
1-2. Mukunda natshi tuajiya gutangiza egi Yehowa gashigo muhana mvutu gu isambu yetu?
‘KAMBA gusuanguluga gudi Yehowa, muene mbawuguhana ima mutshima waye udi nayo funu.’ (Ngi. 37:4) Laji diabonga diago! Tudi naye gunengenena egi Yehowa atuhane muphushi ima yagasue tudi gumutoga ba? Mukunda natshi idi nu ndando ha gudihula muhu owu? Tutadilenu ifezegeselo eyi yalandula. Phangi mumoshi wa mukhetu udi mutshita gisambu hagula wajiya gutamegewa gu Khalasa dia Alongeshi a Ufumu. Uvi wabalegesa gale ivo yavula gutamegewa ndo. Muvuala mumoshi wa yala udi mutshita gisambu gudi Yehowa ha gumukuatesa hagula avue muabonga gu misongo yakola, ngenyi wajiya gumukalegela muavula mu hungu. Uvi gashigo muvua muabonga. Mvuanji jidi mukombelela Yehowa ha gukuatesa mun’awo hagula gabembigo giamatshidia. Uvi mona muene wabemba genji gukombelela Yehowa.
2 Yajiya gukhala egi aye nji watogele gale Yehowa gima gimoshi uvi khenji wagihetelego. Ngenyi, wajiya gutangiza egi Yehowa wana hana mvutu gu isambu ya athu ako uvi yaye ndo. Nga ndo wajiya nji gutangiza egi wakalegele ndaga imoshi yabola. Phangi wa mukhetu Janiceb wadivuile nji ngenyi. Muene nu mulumi’enji akhalele mutshita gisambu handaga akhalele mutshigina guya gu Betele. Udi muzuela egi: “Ngakhalele musha mutshima egi gualeha ndo tudi mutamegewa gu Betele.” Uvi ivo yavula yabalegele, atamegewego. Phangi Janice udi muzuela egi: “Ngavuile gikenene, ngakhalelego mujiya ndaga ya gutshita. Ngakhalele gudihula egi ndaga itshi yabola ngakalegele Yehowa. Ngakhalele mutshita isambu muavula hagula tutamegewe gu Betele. Mukunda natshi Yehowa gahanelego mvutu gu isambu yami?”
3. Itshi tuza muzuelela mu longo edi?
3 Matangua ako tuajiya gudihula gula Yehowa wana guvua diago isambu yetu. Akombeledi enji ako a mu tangua dikulu adihudile nji muhu wene. (Yobo 30:20; Ngi. 22:2; Hab. 1:2) Itshi yajiya gugutshiginyisa egi Yehowa mbawuhana mvutu gu isambu yaye? (Ngi. 65:2) Ha guhana mvutu gu muhu owu, tuhanenu thomo mvutu gu mihu eyi: 1) Ndaga itshi tuana tshigina egi Yehowa atukalegele? 2) Ndaga tshi Yehowa wana tshigina egi tukalagale? 3) Mukunda natshi matangua ako yajiya gutoga egi tusombegese isambu yetu?
NDAGA ITSHI TUANA TSHIGINA EGI YEHOWA ATUKALEGELE?
4. Ha gutadila Yelemiya 29:12, ndaga itshi Yehowa walayele ha gutshita?
4 Yehowa walayele egi mbawutegelela isambu yetu. (Tanga Yelemiya 29:12.) Nzambi wetu wana gutuzumba handaga tuana gumukombelela nu gujinginyina guagasue, hene mbawutegelela isambu yetu tangua diagasue. (Ngi. 10:17; 37:28) Uvi ishigo mukotelesa egi mbawutuhana ima yagasue tudi gumutoga. Matangua ako yajiya gutoga egi tunengenene uu nu mu mavu ahe-ahe ha guheta ima iko tuana gumutoga.
5. Ndaga itshi Yehowa wana tadila tangua diana tegelela muene isambu yetu? Kotelesa.
5 Yehowa wana tala gula isambu yetu yana gudivua nu felela dienji. (Yesh. 55:8, 9) Mukatshi dia mafelela ene, wana tshigina egi mavu a mudidi azale pha nu athu adi gumutumagela nu gusuanguluga guagasue gifua Fumu wawo. Uvi Satana wazuelele egi athu mbaakhala muabonga gula adituameza hakhawo. (Gis. 3:1-5) Ha gumonesa egi ndaga jiazuelele Diabulu jiakhalele jia mambo, Yehowa wabembele egi athu adituameze ene hakhawo. Uvi uhinyinyi wa athu wabatele malamba avula tudi mutagana nawo mangino. (Mulo. 8:9) Tuana jiya muabonga egi Yehowa mbagashigo mumanesela malamba ene agasue mangino. Gula nga watshitshile ngenyi, nga athu anyi anago gusha gutshigina gudi Nzambi ajiya gutangiza egi, athu n’ako ana manesela malamba ene. Ajiya nji gutangiza egi uhinyinyi wa athu wana binga.
6. Mukunda natshi tudi nu gutshigina egi tangua diagasue Yehowa wana tshita ndaga jiatagana nu guzumba?
6 Yehowa wajiya guhana mvutu jia gudisha mu isambu ya luholo lumoshi. Ha gufezegesa, tangua Fumu Ezekiase wakhalele mukata muavula, wabubidile Yehowa ha gumukuatesa. Yehowa wamusagele. (2 Maf. 20:1-6) Uvi tangua mupostolo Phaula wamububidile ha gumukatula “muya mu muila,” yajiya gukhala egi muya wene wakhalele misongo, gamukatudilego nawo. (2 Kol. 12:7-9) Tutadilenu nji gifezegeselo gia mupostolo Yakoba nu Phetelo. Fumu Helode wakhalele mutshigina guashiya. Aphangi mu hungu akhalele mukombelela mukunda nu Phetelo; yajiya gukhala egi akombelele nji mukunda nu Yakoba. Yakoba washiyiwe, uvi Phetelo wazogele mu bologo mu luholo lua gushimana. (Makal. 12:1-11) Tuajiya gudihula egi: ‘Mukunda natshi Yehowa wahuluishile Phetelo uvi Yakoba ndo?’ Biblia ishigo guyizuelela.c Uvi tujimbilago egi tangua diagasue Yehowa wana tshita ndaga ‘jiatagana.’ (Mikh. 32:4) Tudi mujiya egi Yehowa wakhalele guazumba mukut’awo agasue. (Gumo. 21:14) Matangua ako Yehowa ganago guhana mvutu gu isambu yetu gifua luholo tuakhalele gudifelela. Uvi luholo tuana jiya egi tangua diagasue Yehowa wana tshita ndaga mu luholo luatagana nu guzumba, tuanago gudisagesa mukunda nu luholo luana tomba muene ha guhana mvutu gu isambu yetu.—Yobo 33:13.
7. Ndaga itshi tudi naye gutuna? Mukunda natshi?
7 Tushigo naye gufuanesa ndaga tudi mutagana najio nu jia athu ako. Ha gufezegesa, tuajiya gutoga Yehowa ha gutukuatesa mukunda nu ndaga imoshi tudi mutagana nayo uvi tushigo muheta mvutu. Gungima tuavua egi phangi muko wataganele nu lamba gifua dietu, watshitshile nji gisambu mukunda nu ndaga yene, Yehowa wamuhanele mvutu. Ndaga yene yabuidile phangi wa mukhetu Anna. Wakhalele mutshita gisambu hagula mulumi’enji Matthew avue muabonga gu misongo ya cancer gakhalele nayo. Guakhalele nji nu aphangi ako mbadi a akhetu a gukola akhalele mukata misongo yene. Phangi Anna wakhalele mukombelela muavula mukunda nu mulumi’enji nu aphangi ene a akhetu. Aphangi a akhetu avuile muabonga uvi mulumi’enji wafuile. Thomo, phangi Anna wadihudile egi gula aphangi ene a akhetu avuile muabonga, yakhalele handaga Yehowa waakuatesele. Gula idi ngenyi, mukunda natshi Yehowa gakuateselego mulumi’enji ha guvua muabonga? Tushigo mujiya mukunda natshi aphangi a akhetu avuile muabonga. Uvi tudi mujiya egi Yehowa mbawumanesela malamba agasue tuana tagana nawo nu udi mulaya egi mbawufuzumuna akombeledi enji afuile gale.—Yobo 14:15.
8. (a) Ha gutadila Yeshaya 43:2, luholo lutshi Yehowa wana gutukuatesa? (b) Luholo lutshi gisambu giajiya gutukuatesa mu tangua dia lamba? (Tala video La prière peut nous aider à endurer une épreuve.)
8 Yehowa mbawulandula gutukuatesa. Yehowa udi Tata wetu wa guzumba, ganago gutshigina egi tumone malamba. (Yesh. 63:9) Uvi ganago gukanga njila gu malamba tuana tagana nawo anyi ajiya gukhala gifua mita nu tshuya. (Tanga Yeshaya 43:2.) Udi gutulaya egi, mbawutukuatesa tangua ‘mbatutagana’ nu malamba. Mbagashigo mubemba egi malamba ene atukange njila ha gumukombelela. Yehowa wana gutuhana nji nyuma yenji ha gutukuatesa ha gukolesela. (Luka 11:13; Fili. 4:13) Tudi naye gusha mutshima egi mbawutukuatesa ha gukolesela nu ha gusala yagujinginyina gudi muene.d
NDAGA TSHI YEHOWA WANA TSHIGINA EGI TUKALAGALE?
9. Mu gudivua nu Yakoba 1:6, 7, mukunda natshi tudi naye gusha mutshima egi Yehowa mbawutukuatesa?
9 Yehowa wana tshigina egi tumushile mutshima. (Heb. 11:6) Matangua ako tuajiya gutangiza egi malamba etu adi avula diago gubalega. Tuajiya nji gutangiza egi Yehowa mbagashigo gutukuatesa. Uvi Biblia idi gutuwambela egi, ngolo jia Nzambi jiajiya gutukuatesa ha ‘gukanduga gibayi.’ (Ngi. 18:29) Hene, ha fundo dia gutangiza ngenyi, tudi naye gutshita gisambu nu gutshigina guagasue nu gusha mutshima egi Yehowa mbawuhana mvutu gu isambu yetu.—Tanga Yakoba 1:6, 7.
10. Hana gifezegeselo gidi mumonesa luholo tuajiya gutshita ndaga mu gudivua nu isambu yetu.
10 Yehowa wana tshigina egi tukalagale ndaga mu gudivua nu isambu yetu. Ha gufezegesa, phangi wa yala wajiya gutoga Yehowa ha gumukuatesa hagula fumu wenji wa mudimo wajiya gumuhana njila ya guya gu asamble. Luholo lutshi Yehowa wajiya gumuhana mvutu? Yehowa wajiya guhana phangi muene gikhesa gia guya mumona fumu wenji wa mudimo. Uvi phangi muene udi naye guya gudi fumu wenji wa mudimo ha gumutoga njila. Wajiya gumutoga mbala jiavula. Wajiya nji gusombegesa lusugu luenji lua mudimo nu muenya mudimo n’amuko. Gula luholo ludi guene, wajiya nji guzula konje.
11. Mukunda natshi tudi naye gutshita gisambu muavula mukunda nu ndaga tudi nayo funu?
11 Yehowa wana gutuwambela ha gumukombelela muavula mukunda nu ndaga tudi najio funu. (1 Tes. 5:17) Ndaga jiazuelele Yesu jidi mumonesa egi matangua ako Yehowa ganahana ndo mvutu gu isambu yetu mbala imoshi. (Luka 11:9) Hene, tushigo naye guleba muila! Tudi naye gutshita gisambu mbala jiavula nu mutshima umoshi. (Luka 18:1-7) Gula tudi mulandula gutshita gisambu mukunda nu ndaga imoshi, tuana monesa Yehowa egi tudi diago nu funu ya gima giene. Tuana monesa nji egi tudi diago nu gutshigina egi Yehowa udi nu ngolo jia gutukuatesa.
MUKUNDA NATSHI MATANGUA AKO YAJIYA GUTOGA EGI TUSOMBEGESE ISAMBU YETU?
12. (a) Muhu utshi tuajiya gudihula mukunda nu isambu yetu? Mukunda natshi? (b) Luholo lutshi tuajiya gumonesa egi isambu yetu yana nemesa Yehowa? (Tala galuanda “Isambu Yami Yana Monesa egi Ngana Nemesa Yehowa ba?”)
12 Gula tuahetelego ndaga tudi mutoga Yehowa mu gisambu, tuajiya gudihula mihu thathu. Wa thomo, ‘Ngudi mu tshita gisambu mukunda nu ndaga yabonga ba?’ Matangua ako tuana tangiza egi tudi mujiya ndaga idi yabonga mukunda nu esue. Uvi matangua ako ndaga jiene tudi mutoga jiajiyilego gutubatela gubonga. Gula tudi mutshita gisambu mukunda nu mulonga umoshi, Yehowa wajiya gutukuatesa mu luholo luko, gubalega ndaga tuamutogi. Matangua ako ndaga tudi mutoga jishigo gudivua nu gutshigina guenji. (1 Yone 5:14) Ha gufezegesa, tutadilenu lumene lua mvuaji tuazuelela gu thunda. Akhalele mutoga Yehowa hagula mun’awo alandule gumukombelela. Ashigo matangi abola, uvi Yehowa gana gutushinjiga ndo ha gumukombelela. Wana tshigina egi mukut’etu agasue nu ene ana, tutombe esue hakhetu ha gumukombelela. (Mikh. 10:12, 13; 30:19, 20) Hene, mvuaji jiene jiakhalele naye gutoga Yehowa ha guakuatesa hagula ajiya gukuatesa mun’awo ha guzumba Yehowa nu gubua futa dienji.—Ish. 22:6; Ef. 6:4.
13. Ha gutadila Hebelu 4:16, tangua ditshi Yehowa wajiya gutukuatesa? Kotelesa.
13 Muhu wa mbadi, ‘Didi tangua diabonga mukunda nu Yehowa ha guhana mvutu gu isambu yami ba?’ Tuajiya gudifelela egi Nzambi ahane mvutu gu isambu yetu mbala imoshi. Idi yadiago egi Yehowa wana jiya tangua diabonga dia gutukuatesa. (Tanga Hebelu 4:16.) Gula tuahetelego ima tudi gumutoga muphushi, tuajiya gutangiza egi Yehowa ‘watunyi’ genji gutuhana mvutu. Uvi mvutu ya Yehowa yajiya gukhala egi, ‘ishigo tangua diabonga.’ Ha gufezegesa, tutangizenu luko gifezegeselo gia muvuala wa yala wakhalele mutshita gisambu egi misongo yenji ihue. Gula nga Yehowa wamusagele mu luholo lua gushimana, matangua ako Satana wakhalele naye guzuela egi phangi muene udi mulandula gukombelela Yehowa handaga wamusagele. (Yobo 1:9-11; 2:4) Yehowa watombele gale nji tangua mbadimanesela muene misongo yagasue. (Yesh. 33:24; Gumo. 21:3, 4) Mangino tushigo naye gudifelela egi Yehowa atusage mu luholo lua gushimana. Hene, phangi muene wa yala wakhalele naye gutoga Yehowa ha gumuhana ngolo nu ha gumukuatesa ha gukhala mu guhuima ha gukolesela nu ha gulandula gumukombelela nu gujinginyina guagasue.—Ngi. 29:11.
14. Gifezegeselo gia phangi Janice gidi gutulongesa itshi?
14 Tuzuelelenu luko gifezegeselo gia phangi Janice wakhalele mutshita gisambu hagula atamegewe gu Betele. Gungima dia ivo thano, wakotelesele egi Yehowa wahanele mvutu gu isambu yenji mu luholo luko. Udi muzuela egi: “Yehowa wakalegele tangua diene ha gungulongesa nu gungukuatesa ha gubua muklisto wabonga. Yakhalele nu ndando egi ngukolese gutshigina guami gudi muene. Yakhalele mutoga egi ngukudise luholo luami lua gulonguga Biblia. Ngakhalele naye nji gulonguga luholo ngajiya gukhala nu gusuanguluga ngatshima ndaga jiasombegesa mu monyo wami.” Gungima, phangi Janice nu mulumi’enji atamegewe ha guya mutshita mudimo wa atadi awendji. Phangi Janice udi muzuela egi: “Yehowa wahanele mvutu gu isambu yami ngatshima yakhalelego mu luholo ngakhalele mutangiza. Yazudile tangua hagula ngukotelese egi mvutu ya nguhanele Yehowa yakhalele kado gabonga. Hene ngudi muhana Yehowa mersi mukunda nu guzumba guenji nu gisemo gienji.”
Gula udi mumona egi Yehowa gashigo muhana mvutu gu gima wamutogi, wajiya gutoga gima giko (Tala paragrafe 15)f
15. Mukunda natshi matangua ako yajiya gutoga egi tutangigo ndaga tudi najio funu mu gisambu? (Tala nji ifuanesa.)
15 Muhu wa thathu, ‘ngajiya gusamba mukunda nu gima giko ba?’ Gutoga Yehowa gima tudi nagio funu ishigo ndaga yabola. Uvi matangua ako yajiya gukhala yabonga ha gutuna gutanga gima giene mu gisambu hagula tujiye ndaga Yehowa udi mutshigina mukunda nu esue. Tutadilenu gifezegeselo gia phangi wa mukhetu wakhalele mutshita gisambu hagula wajiya gutamegewa gu Khalasa dia Alongeshi a Ufumu. Wakhalele mutshigina gungina khalasa diene hagula wajiya guya muhana mago fundo didi nu funu ya alongeshi. Hakhalele muene mulandula gutoga Yehowa hagula wajiya gungina khalasa diene, wakhalele naye nji gutoga Yehowa ha gumukuatesa ha guheta ba okazio ako avula a gumukalegela. (Makal. 16:9, 10) Gungima wakhalele naye gutshita ndaga mu gudivua nu isambu yenji. Wajiya gutoga mutadi muwendji wawo ha gujiya gula gudi nu mahungu a hehi adi nu funu ya alongeshi avula. Nga ndo wajiya gusonega mukanda gu Betele yawo ha gujiya fundo didi nu funu ya alongeshi.e
16. Mu ndaga itshi tudi naye gusha mutshima?
16 Gifua luholo tuayimonyi, tuajiya gusha mutshima egi Yehowa mbawuhana mvutu gu isambu yetu nu guzumba guagasue mu tangua diatagana. (Ngi. 4:3; Yesh. 30:18) Matangua ako tuajiyilego guheta mvutu gu isambu yetu gifua luholo tuakhalele gudifelela. Uvi Yehowa mbagashigo mujimbila isambu yetu nga hazonda. Wana gutuzumba muavula. Mbagashigo gutubemba nga hazonda. (Ngi. 9:10) Hene, tulandulenu ‘gumushila mutshima tangua diagasue,’ tukhalenu nji gumuwambela ndaga jidi mu mutshima wetu mu gisambu.—Ngi. 62:8.
LUNGIMBO 43 Prière de remerciement
a Longo edi diza mumonesa mukunda natshi tudi naye gusha mutshima egi Yehowa mbawuhana mvutu gu isambu yetu nu guzumba guagasue mu tangua diatagana.
b Mu longo edi, majina ako asombegesewe.
c Tala longo “Wana Gusha Mutshima Egi Yehowa Wana Kalagala Ndaga mu Luholo Luabonga Tangua Diagasue ba?” mu Inzo Yaleha Ya Mutaledi ya Fevrier 2022 par. 3-6.
d Ha gujiya ndaga jiavula jidi mumonesa luholo Yehowa wana gutukuatesa ha gukolesela mu malamba, tala video La prière peut nous aider à endurer une épreuve mu jw.org.
e Ha gumona malongo ajiya gugukuatesa hagujiya luholo wajiya guya mutshita mu terituare ya Betele iko, tala mukanda Organisés pour faire la volonté de Jéhovah mukh. 10 par. 6-9.
f UKOTELESHI WA GIFUANESA: Aphangi mbadi a akhetu adi mukombelela gutuama dia guzalesa formilere ya gungina Khala dia Alongeshi a Ufumu. Gungima mumoshi watamegewa, uvi muko ndo. Phangi muene wa mukhetu galebelego muila, uvi udi musamba Yehowa hagula amukuatese akhale mulongesa muavula. Gungima udi musonegela Betele mukanda ha guawambela egi udi nu funu ya guya mutshita mudimo fundo didi nu funu ya alongeshi.