Sha Mutshima egi Yehowa Mbawugukuatesa mu Tangua dia Lamba

1-2. (a) Gudivua gutshi gudi mukatshi dia ndaga tudi mutagana najio mangino nu jinyi jiataganele najio enya Yuda anyi avutugile gu Yelusalema? (b) Tanga malamba enya Yuda ene ataganele nawo. (Tala galuanda “Mu Masugu a Hagai nu Zakaliya nu Ezela.”)

MATANGUA ako wana gudisagesa mukunda nu masugu adi muza ba? Yajiya gukhala egi ushigo luko nu mudimo nu udi gudisagesa ha gujiya luholo wajiya gukuatesa fami yaye. Wajiya gudisagesa ha gujiya luholo enya fami yaye ajiya gukhala mu ubambi gula ndaga jia politike jishigo muyila muabonga, nga ndo gula muatagana nu usageshi nga ndo mudimo wa gulongesa watunyishiwa. Udi mutagana nu lamba dimoshi mukatshi dia malamba awa tuazuelela ba? Gula idi ngenyi, wajiya guheta gikhesa ha tuza muzuelela luholo Yehowa wakuatesele enya Isalele tangua ataganele nji nu ndaga jia luholo elu.

² Enya Yuda anyi akatugile gu Babilona akhalele nu funu ya gutshigina guakola ha gubemba umonyi nu ima akhalele nayo ha guya mu gifutshi ginyi athu avula mukatshi diawo akhalelego mujiya muabonga. Tangua ahetele guene, asendesele gumona lamba ha gukuatesa enya fami jiawo. Mafumu apolitike asendesele nji guasagesa. Yakhalele lamba gudi athu ako ha guhaga mudimo wa gutunga luko tempelo ya Yehowa ha fundo dia thomo. Hene, hehi nu givo 520 G.G.Y., Yehowa watumile ba profete mbadi, Hagai nu Zakaliya, ha guhana athu gikhesa. (Hag. 1:1; Zak. 1:1) Gifua luholo tuza guyimona, mudimo wa baprofete ene mbadi wakuatesele diago aphangi. Uvi gungima dia ivo 50, enya Yuda anyi avutugile gu Yelusalema akhalele luko nu funu ya gikhesa. Ezela muthu watema, wakhalele mujiya gusonega Mikhuala muabonga, wakatugile gu Babilona ha guya gu Yelusalema ha gukuatesa athu ha guhaga gikombelelo gia Yehowa ha fundo dia thomo mu monyo wawo.​—Ez. 7:1, 6.

3. Mihu itshi tuza mutadila? (Ishima 22:19)

³ Profesi ya Hagai nu Zakaliya jiakuatesele akombeledi a Yehowa a mu tangua dikulu ha gulandula gumushila mutshima tangua ataganele nu usageshi. Jiajiya nji gutukuatesa mangino hagusha mutshima egi Yehowa mbawutukuatesa ikhale tudi mutagana nu malamba. (Tanga Ishima 22:19.) Tangua tudi mutadila ndaga Nzambi wawambelele Hagai nu Zakaliya ha guwambela athu nu gifezegeselo gia Ezela, iza gutukuatesa ha guheta mvutu gu mihu eyi: Luholo lutshi malamba enya Yuda akhalele mutagana nawo a alebesele muila? Mukunda natshi tudi naye gulandula gutshita gutshigina gua Nzambi tangua tudi mutagana nu malamba? Mukunda natshi tudi naye gushila Yehowa mutshima mu tangua dia lamba?

MALAMBA ALEBESELE ENYA YUDA MUILA

4-5. Ndaga jitshi jialebesele enya Yuda muila ha gutunga tempelo?

⁴ Enya Yuda anyi avutugile gu Yelusalema akhalele nu mudimo wavula wa gutshita. Atungile muphushi giwotshielo gia Yehowa nu ambile fondasio ya tempelo. (Ez. 3:1-3, 10) Uvi gungima akhalelego luko nu gikhesa. Mukunda natshi? Handaga akhalelego phamba nu mudimo wa gutunga tempelo, uvi akhalele naye nji gutunga jinzo jiawo hakhawo, gudima mahia nu gukamba ima ya gudisa enya fami jiawo. (Ez. 2:68, 70) Mbalagaji jiawo nji jiaasagesele, ayile giphungi hagula akange enya Yuda njila hagula atungigo luko tempelo.​—Ez. 4:1-5.

⁵ Enya Yuda anyi avutugile gu Yulusalema ataganele nji nu lamba dia makuta nu usageshi wa mafumu a politike. Gifutshi giawo giabuile mu uhinyinyi wa enya Phelese. Tangua Fumu Siluse wafuile mu givo 530 G.G.Y., Cambyse munu wa muhinganele wakambele guluisa enya Ejipitu. Yajiya gukhala egi tangua akhalele muya gu Ejipitu, masuta enji atogele enya Isalele ima ya gudia nu meya nu ima iko, ndaga yene yahanele luko enya Isalele lamba. Tangua Fumu Daliyuse I wasendesele gu hinyina, malamba adivudishile luko muavula, umbundudi wavudile, ndaga jia politike nji jiadibolesele luko muavula. Idi yadiago egi ndaga eji jiagasue jiatumile enya Yuda avula anyi avutugile gu Yelusalema ha gudisagesa mu luholo ajiya gukuatesa enya fami jiawo. Luholo akhalele mutagana nu malamba ene, ako mukatshi diawo amonele egi yakhalelego tangua diabonga ha gutunga tempelo ya Yehowa.​—Hag. 1:2.

6. Hagutadila Zakaliya 4:6, 7, malamba atshi ako enya Yuda ataganele nawo? Ndaga itshi Zakaliya waawambelele?

⁶ Tanga Zakaliya 4:6, 7. Enya Yuda akhalele mutagana nu lamba dia mbongo, ndaga jia politike jiakhalelego nji jiabonga, uvi ataganele nji nu usageshi. Mu givo 522 G.G.Y., mbalagaji jiawo jiawambelele mafumu a gu Phelese ha gutunyisa mudimo wa gutunga luko tempelo. Uvi Zakaliya wahanele enya Yuda gikhesa egi Yehowa mbawukalegela nyuma yenji ha guakuatesa. Mu 520 G.G.Y., Fumu Daliyuse wahanele enya Yuda njila ha gulandula gutunga tempelo. Waahanele nji mbongo ha gutshita mudimo wene, wawambelele nji mafumu a mu membo ene ha guakuatesa.​—Ez. 6:1, 6-10.

7. Gubonga gutshi enya Yuda ahetele luholo ahagele mudimo wa Yehowa ha fundo dia thomo?

⁷ Mu njila ya Hagai nu Zakaliya, Yehowa wawambelele akombeledi enji egi mbawakuatesa gula adi muhaga mudimo wa gutunga tempelo ha fundo dia thomo. (Hag. 1:8, 13, 14; Zak. 1:3, 16) Ndaga jiazuelele ba profete ene jiahanele enya Yuda gikhesa, hene asendesele gutunga luko tempelo mu givo 520 G.G.Y. Ivo thano yatagenelego amanesele gutunga tempelo yene. Luholo enya Yuda ahagele mudimo wa Yehowa ha fundo dia thomo ikhale akhalele mutagana nu malamba, Yehowa waahanele ima akhalele nayo funu nu waakuatesele ha gukhala nu ufuta wabonga n’enji. Ndaga yene yaakuatesele ha gukombelela Yehowa nu gusuanguluga.​—Ez. 6:14-16, 22.

KHALA MUTSHITA GUTSHIGINA GUA NZAMBI

8. Luholo lutshi mbimbi jidi mu Hagai 2:4 jiajiya gutukuatesa ha gutshita gutshigina gua Nzambi? (Tala nji mbimbi goshi’a diyiji.)

⁸ Luholo lamba diakola diasuena hehi, idi nu ndando ha gujiya egi tudi naye gutumagela mukhuala watadila gutshita mudimo wa gulongesa. (Mako 13:10) Uvi yajiya gukhala lamba ha gudihana mu mudimo wene gula tudi mutagana nu lamba dia makuta nga gula tudi mutagana nu usageshi mu mudimo wa gulongesa. Itshi yajiya gutukuatesa ha guhaga mudimo wa Yehowa ha fundo dia thomo? Tudi naye gusha mutshima egi ‘Yehowa Nzambi wa ngolo jiagasue’b udi gukhanda yetu. Muene mbawutukuatesa gula tudi mulandula guhaga mudimo wenji ha fundo dia thomo mu monyo wetu. Hene, tushigo naye guvua woma.​—Tanga Hagai 2:4.

9-10. Luholo lutshi phangi mumoshi nu mukaji’enji amonele egi ndaga jiazuelele Yesu mu Matayo 6:33 jidi jia giamatshidia?

⁹ Tutadilenu gifezegeselo gia phangi Oleg nu mukaji’enji Irina,c adi avundji a njila. Ayile mukuatesa hungu dia mu dimbo diko. Akhalelego luko nu mudimo handaga lamba dia mbongo dia divudishile mu gifutshi giawo. Atshitshile givo gimoshi mudimo ndo, uvi akotelesele diago egi Yehowa nu aphangi a mala nu a akhetu akhalele guakuatesa. Itshi yaakuatesele ha gukolesela mu malamba ene? Thomo phangi Oleg wakhalele gudisagesa, gungima udi muzuela egi: “Gubalegesa tangua diavula mu mudimo wa gulongesa guatukuatesele ha guhaga matangi mu ndaga yabalega ndando.” Ikhale phangi muene nu mukaji’enji akhalele mukamba mudimo, uvi alanduile gudihana muavula mu mudimo wa gulongesa.

¹⁰ Lusugu lumoshi tangua akatugile mu mudimo wa gulongesa, a awambelele egi futa diawo mumoshi waabatela makuba mbadi a ima ya gudia. Futa diawo muene watshitshile voyaje ya bakilometre 160. Phangi Oleg udi muzuela egi: “Mu lusugu luene, tuakotelesele egi Yehowa nu aphangi a mu hungu ana gudisagesa muavula mukunda nu esue. Tuajiyile diago egi Yehowa gana buitago akombeledi enji mutshima nga hazonda, ikhale adi mutagana nu malamba a luholo lutshi.”​—Mat. 6:33.

11. Gubonga gutshi mbatuheta gula tudi mulandula gutshita gutshigina gua Yehowa?

¹¹ Yehowa wana tshigina egi tulandule gubuisa athu alandudi ha guahuluisa. Gifua luholo tuayimonyi mu paragrafe 7, profete Hagai wahanele akombeledi a Yehowa gikhesa ha gusendesa luko gutunga tempelo. Yehowa waalayele egi gula atshita ngenyi ‘mbawasuanguluisa.’ (Hag. 2:18, 19) Esue nji tuajiya gusha mutshima egi Yehowa mbawutushimbiga mu ndaga tudi mutshita, gula tudi musha mudimo watuhanele muene ha fundo dia thomo.

LUHOLO TUAJIYA GUKOLESA GUTSHIGINA GUETU GUDI YEHOWA

12. Mukunda natshi Ezela nu enya Yuda ako akhalele nu funu ya gutshigina guakola?

¹² Mu givo 468 G.G.Y., Ezela nu enya Yuda ako akatugile gu Babilona ha guya gu Yelusalema. Muene nu enya Yuda ene akhalele nu funu ya gutshigina guakola ha guvutuga gu Yelusalema. Handaga akhalele naye gubalegela mu njila jia ingonza, akhalele naye nji guya nu wolo wavula nu utadi wa siliva fumu wa gu Babilona wahanele mukunda nu tempelo. Hene yakhalelego lamba gudi nzangi ha guasagesa. (Ez. 7:12-16; 8:31) Akotelesele egi dimbo dia Yelusalema nji diakhalelego mu ubambi. Dimbo diene diakhalelego nu athu avula, yakhalele nji mutoga egi alonde ibayi nu mifulo. Malongo atshi tuajiya guheta mu gifezegeselo gia Ezela mu ndaga yatadila gushila Yehowa mutshima?

13. Luholo lutshi Ezela wakolesele gutshina guenji gudi Yehowa? (Tala nji mbimbi goshi’a diyiji.)

¹³ Ezela wamonele luholo Yehowa wakuatesele akombeledi enji mu tangua dia lamba. Yajiya gukhala egi ivo yavula gutuama dia givo 484 G.G.Y., Ezela wakhalele gu Babilona tangua Fumu Aseluse wambile mukhuala egi enya Yuda agasue akhalele mu uhinyinyi wa enya Phelese akhalele naye gushiyiwa. (Es. 3:7, 13-15) Ezela nu enya Yuda agasue akhalele mu gingonza! Idi yadiago egi tangua avuile ndaga yene, avuile gikenene giakola hene atunyile gudia, adidile muavula, atogele nji Yehowa ukuateshi mu gisambu. (Es. 4:3) Tangiza luholo Ezela nu enya Yuda ako adivuile tangua diashiyiwe athu ayile giphungi ha guashiya! (Es. 9:1, 2) Ndaga Ezela watagenele najio mu tangua diene jiamukuatesele ha gudilonda mukunda nu malamba akhalele naye gumubuila gutuama. Jiamukuatesele nji ha gusha mutshima egi Yehowa udi nu ngolo jia gukuatesa akombeledi enji.d

14. Longo ditshi phangi Anastasia wahetele ha mukuatesele Yehowa mu tangua dia lamba?

¹⁴ Tangua Yehowa wana gutukuatesa mu tangua dia lamba, gutshigina guetu gudi muene guana kola. Tuzuelelenu gifezegeselo gia phangi Anastasia wana khala gu Est ya Europe. Wabembele mudimo wenji ha gutuna gudinginyisa mu ndaga jia politike. Udi muzuela egi: “Yakhalele mbala ya thomo mu monyo wami ha gusala mago a gituhu mbongo ndo. Ngawambelele Yehowa ndaga yene mu gisambu, ngamonele nji luholo luangukuatesele muene nu guzumba guagasue. Mbangushigo luko muvua woma, gula ngushigo nu mudimo. Gula Tata wami wa dilu wangukuatesa mangino, mbawukuatesa nji hamene.”

15. Itshi yakuatesele Ezela ha gulandula gushila Yehowa mutshima? (Ezela 7:27, 28)

¹⁵ Ezela wamonele luholo Yehowa wamukuatesele. Tangua Ezela wakhalele mutangiza luholo Yehowa wakhalele gumukuatesa, yamutumile ha gumushila mutshima. Udi muzuela egi, ‘Yehowa udi nu ame.’ (Tanga Ezela 7:27, 28.) Ezela wakalegele mbimbi jia luholo elu mbala thano mu mukanda wa Biblia wasonegele muene.​—Ez. 7:6, 9; 8:18, 22, 31.

16. Mu ndaga jitshi tuajiya gumona koko dia Yehowa mu monyo wetu? (Tala nji gifuanesa.)

¹⁶ Yehowa mbawutukuatesa gula tuatagana nu malamba. Ha gufezegesa, gula tuatoga gudi fumu wetu wa mudimo njila ya guya gu asamble nga ndo tudi mutoga ha gusombegesa programe yetu ya mudimo ha guya mu gudibungisa guetu guagasue, tuajiya gumona luholo Yehowa mbawutukuatesa. Yehowa wajiya gutukuatesa mu luholo tuatangijilego. Ngenyi gutshigina guetu gudi muene mbagukola.

17. Luholo lutshi Ezela wamonesele khadilo dia gudibulumuisa mu tangua dia lamba? (Tala nji gifuanesa.)

¹⁷ Ezela wakambele ukuateshi wa Yehowa nu gudibulumuisa guasasue. Matangua agasue akhalele gudivua muene ya guleba mukunda nu inemo yenji, wakhalele mutoga ukuateshi gudi Yehowa mu gisambu nu gudibulumuisa guasasue. (Ez. 8:21-23; 9:3-5) Khadilo dia Ezela diatumile athu akhalele n’enji ha gumukuatesa nu ha gulandula gifezegeselo gia gutshigina guenji. (Ez. 10:1-4) Gula tudi gudisagesa mukunda nu ima tudi naye funu, nga ha gutagenesa inemo yetu mu fami, tudi naye gutoga ukuateshi wa Yehowa mu gisambu.

18. Itshi yajiya gutukuatesa ha gulandula gushila Yehowa mutshima?

¹⁸ Gula tudi mukamba ukuateshi wa Yehowa nu gudibulumuisa guagasue nu tuatshigina egi aphangi Aklisto atukuatese, mbayikolesa gutshigina guetu gudi Nzambi. Phangi Erika udi nu ana thathu walanduile gushila Yehowa mutshima ikhale wakhalele mutagana nu malamba. Phangi muene wavualele mona wa gufwa, gungima dia tangua diazonda mulumi’enji wafuile. Udi muzuela mukunda nu malamba ene egi: “Tuajiyilego gujiya gutuama luholo Yehowa mbawutukuatesa. Wajiya gutukuatesa mu luholo lua gushimana. Ngakotelesele egi Yehowa wakalegele mafuta ami ha guhana mvutu gu isambu yami yavula ikhale mu mbimbi nga mu ndaga akhalele mutshita. Gula ngawambela mafuta ami malamba ngataganele nawo, ajiya gungukuatesa.”

LANDULA GUSHILA YEHOWA MUTSHIMA UU NU GUGISUGISHILO

19-20. Malongo atshi tuajiya guheta gudi enya Yuda anyi asalele gu Babilona?

¹⁹ Tuajiya nji guheta malongo a ndando gudi enya Yuda anyi akhalelego nu luholo lua guvutuga gu Yelusalema. Ako mukatshi diawo akhalelego nu luholo lua guvutuga handaga akhalele athu agukola, ako akhalele nu ukhashi. Ako nji avutugilego handaga ndaga akhalele mutagana najio mu fami jiaahanelego njila. Ikhale ngenyi, akhalele nu gusuanguluga ha guhana ima gudi athu akhalele muvutuga gu Yelusalema mukunda nu tempelo. (Ez. 1:5, 6) Tangua hunji dia thomo dia enya Yuda avutugile gu Yelusalema, yajiya gukhala enya Yuda ako anyi asalele gu Babilona alanduile gutuma misomonyi mu ivo 19.​—Zak. 6:10.

²⁰ Ikhale tushigo luko nu luholo lua gutshita ndaga jiagasue tudi mutshigina mu mudimo wa Yehowa, uvi tudi naye gujiya egi Yehowa wana suanguluga nu ndaga tuana tshita nu mutshima wagasue. Luholo lutshi tuayijiya? Mu masugu a Zakaliya, Yehowa wamuwambelele ha gulonda gifulu gia ufumu nu wolo nu utadi wa siliva watumile enya Yuda asalele gu Babilona. (Zak. 6:11) ‘Gifulu giene giakoma gia ufumu’ mbagiakuatesa ha ‘guwunguluga’ misomonyi yawo akhalele muhana nu mutshima umoshi. (Zak. 6:14) Tudi naye gusha mutshima egi Yehowa mbagashigo mujimbila nga hazonda ndaga tuana tshita ha gumukombelela tangua tudi mutagana nu malamba​—Heb. 6:10.

21. Itshi mbayitukuatesa ha gushila Yehowa mutshima ngatshima tuatagana nu malamba mu masugu adi muza?

²¹ Tudi mutagana nu malamba mu masugu awa a gisugishilo, uvi malamba ene ajiya nji gudivudisa mu masugu adi muza. (2 Tim. 3:1, 13) Uvi, tushigo naye gudisagesa muavula. Tujimbilago ndaga Yehowa wawambelele akombeledi enji mu masugu a Hagai egi: ‘Mulebigo muila, . . . handaga ame ngudi n’enu.’ (Hag. 2:4, 5) Esue nji tudi naye gusha mutshima egi Yehowa mbawutukuatesa gula tudi mutshita ngolo ha gukalagala gutshigina guenji. Gula tuakalegela malongo tuamonyi mu profesi jia Hagai nu Zakaliya nu mu gifezegeselo gia Ezela, mbatukolesa gutshigina guetu gudi Yehowa ngatshima tuatagana nu malamba mu masugu adi muza.