Ezela Walongesa Athu Mikhuala ya Nzambi

Enya Isalele akhalele atagenesa gale ivo hehi nu 70 sendese tangua avutugile gu Yelusalema. Uvi enya Isalele ako asalele mu membo a Ufumu wa gu Phelese. Nganga-nzambi Ezela munu wakhalele mulongesa athu mikhuala ya Yehowa, wasalele nji. Uvi tangua diavile muene egi athu ayi gu Yelusalema ashigo mutumagela mikhuala ya Nzambi, wakhalele mutshigina guya guene ha guakuatesa. Fumu Aletakelesese wa gu Phelese wamuwambelele egi: ‘Nzambi wa guhanele ndunge jiavula ha gulongesa athu mikhuala yenji. Zula muthu wagasue watshigina uye n’enji.’ Ezela wadimonele nu athu agasue akhalele mutshigina guvutuga gu Yelusalema. Atogele Yehowa ha guakuatesa mu vuayaje yene yaleha, gungima ayile.

Atshitshile mbeji nguana mu njila, gungima ahetele gu Yelusalema. Manene awambelele Ezela egi: ‘Enya Isalele alumbugila Yehowa, azula nji akhetu ana kombelela isongo mu ulo. Itshi Ezela watshitshile? Wafugamele gutuama dia athu, wakombelele egi: ‘Yehowa, watukuatesa muavula diago, uvi esue tuagukalegela gubola.’ Ikhale athu abalumuine mutshima, uvi alanduile gukalagala ndaga jiabola. Ezela watombele akulu nu manzuji ha gusophesa ndaga jiene. Gungima dia mbeji thathu, akayele athu anyi akhalelego mukombelela Yehowa.

Ivo 12 yabalegele. Mu tangua diene ibayi ya dimbo dia Yelusalema yakhalele yahui gale. Hene Ezela wabungishile athu hanze ha guatangela mikhuala ya Nzambi. Tangua Ezela wakangudile mukanda, athu agasue azugile mu molu. Ezela watumbuishile Yehowa, athu athuphuile mago ha gumonesa egi atshigina ndaga jiene. Gungima Ezela waatangele nu waakotelesele mikhuala. Athu akhalele gumutegelela muabonga. Atshiginyile egi akalegele ndaga jiabola gutuama dia Yehowa, asendesele gudila. Mu lusugu lualanduile, Ezela waatangele luko mikhuala. Akotelesele egi gualeha ndo, adi naye gukalagala Wano wa Isasa. Asendesele gudilondega mbala imoshi mukunda nu wano wene.

Athu akhalele nu gusuanguluga mu masugu agasue 7 a wano, ahanele nji Yehowa mersi luholo luakuatesele muene ha gukatula mbuto jiavula. Khenji guakalegewe galego Wano wa Isasa wa luholo elu sendese mu masugu a Yoshua. Gungima dia wano wene, athu adibungishile, akombelele egi: ‘Yehowa, watuzolele mu uhiga, watuhanele ima ya gudia mu mavu a luselenga, watuhanele gifutshi egi giabonga. Uvi esue tualanduile gugulumbugile mahugo avula. Watumile baprofete ha gututemesa, uvi tuategelelego. Uvi aye watumonesele khadilo dia guhuiminyina. Watagenesele ndaga walayele Abalahama. Henyaha tudi gugulaya ha gugutumagela.’ Asonegele ndaga adilogele gu mukanda. Gungima manene nu enya Levi nu nganga-nzambi ambile siniatire gu mukanda wene.