Luholo Tuajiya Gukolesa Guzumba Guetu Mukunda nu Athu Ako

1-2. (a) Mukunda natshi mupostolo Phaula wazuelele egi guzumba gudi khadilo “diabalega gukoma”? (b) Mihu itshi tuza mutadila?

TANGUA mupostolo Phaula wakhalele muzuelela gutshigina nu felela nu guzumba, wazuelele egi khadilo ‘diabalega gukoma mukatshi dia makalegelo ene agasue didi guzumba.’ (1 Kol. 13:13) Mukunda natshi Phaula wazuelele ngenyi? Handaga mu masugu adi muza mbatushigo mukhala luko nu funu ya gusha gutshigina mu ndaga jialayele Nzambi mukunda nu mavu ahe-ahe, nga gudifelela egi ndaga jiene mbajitagenesewa handaga mbajikhala jiatagenele gale. Uvi mbatulandula guzumba Yehowa nu akombeledi enji. Mbatulandula gukolesa guzumba guetu mukunda nu ene ivo nu ivo.

² Tuamona egi mbatulandula gukhala nu funu ya guzumba, hene tutadilenu mihu eyi thathu. Wa thomo, mukunda natshi tudi naye gudizumba mukatshi dietu? Wa mbadi, luholo lutshi tuajiya gudimonesela guzumba guene? Wa thathu, luholo lutshi tuajiya gukolesa guzumba guetu mukunda nu athu ako?

MUKUNDA NATSHI TUDI NAYE GUDIZUMBA MUKATSHI DIETU?

3. Ndaga jitshi jiana gututuma ha guzumba athu ako?

³ Mukunda natshi idi nu ndando ha guzumba athu ako? Gula tudi muzumba aphangi, tuana monesa egi tudi Aklisto a giamatshidia. Handaga Yesu wazuelele egi: “Gula mudi nu guzumba mukatshi dienu, athu agasue mbaajiya egi mudi alandudi ami.” (Yone 13:35) Guzumba aphangi guana gutukuatesa ha gukhala mugudivua. Phaula wazuelele egi guzumba gudi gifua “shinga yana gutujitshiga ha gukhala hamoshi.” (Kol. 3:14) Uvi gudi nu ndaga iko ya ndando yana gututuma ha guzumba athu ako. Mupostolo Yone wasonegele aphangi enji Aklisto egi: “Muthu yagasue udi muzumba Nzambi, udi naye nji guzumba phangi’enji.” (1 Yone 4:21) Tangua tuana zumba athu ako, tuana monesa nji egi tuana zumba Nzambi.

4-5. Monesa luholo guzumba guetu mukunda nu Nzambi guana gudivua nu guzumba guetu mukunda nu athu ako.

⁴ Luholo lutshi guzumba guetu mukunda nu Nzambi guana gudivua nu guzumba tuana monesela aphangi’etu Aklisto? Ha gukotelesa ndaga yene muabonga, tudilenu gudivua guana khala mukatshi dia mutshima wetu nu itshinyi iko ya muila. Gula munganga wakuata koko dietu ha gutshita examen ha gujiya gula mahatshi adi mubalega muabonga nga ndo, wajiya gukotelesa luholo mutshima wetu udi mutshita. Ndaga eyi idi idi gutulongesa itshi?

⁵ Examen yana kuatesa munganga ha gujiya gula mutshima wetu udi mutshita muabonga. Luholo lumoshi nji ha gujiya egi tuana zumba Nzambi muavula, tudi naye gutala luholo tuana zumba athu ako. Gula tuakotelesa egi guzumba guetu mukunda nu aphangi’etu gushigo luko guakola, yajiya gumonesa egi guzumba guetu mukunda nu Nzambi gushigo nji guakola. Uvi gula tudi muzumba aphangi’etu Aklisto muavula, idi mumonesa egi tuana zumba nji Nzambi muavula.

6. Mukunda natshi idi ndaga yabola gula guzumba guetu mukunda nu aphangi’etu Aklisto gushigo luko guakola? (1 Yone 4:7-9, 11)

⁶ Gula guzumba guetu mukunda nu aphangi’etu a mala nu a akhetu gushigo luko guakola, idi diago ndaga yabola. Mukunda natshi? Handaga yana monesa egi ufuta wetu nu Yehowa ushigo wabonga. Mupostolo Yone wamonesele ndaga yene haphelo tangua diazuelele muene egi: “Muthu gashigo muzumba phangi’enji yonu wana mona muene, gajiyilego guzumba Nzambi khenji gamonele ndo.” (1 Yone 4:20) Ndaga yene idi gutulongesa itshi? Yehowa wana suanguluga nu esue phamba gula tudi ‘muzumba athu ako.’​—Tanga 1 Yone 4:7-9, 11.

LUHOLO LUTSHI TUAJIYA GUMONESA EGI TUANA ZUMBA ATHU AKO?

7-8. Itshi tuajiaya gutshita ha gumonesa egi tuana zumba athu ako?

⁷ Mbimbi ya Nzambi yana gutuwambela mbala jiavula ha ‘guzumba athu ako.’ (Yone 15:12, 17; Roma 13:8; 1 Tes. 4:9; 1 Phet. 1:22; 1 Yone 4:11) Uvi guzumba gudi khadilo dia mu mutshima nga ndo umuthu wa mukatshi, muthu muko gajiyilego gumona khadilo diene. Luholo lutshi tuajiya gumonesa egi tuana zumba athu ako? Mu mbimbi nu mu makalegelo etu.

⁸ Gudi nu ndaga jiavula tuajiya gutshita ha gumonesa egi tuana zumba aphangi’etu a mala nu a akhetu. Verse eji jialandula jidi mumonesa ndaga jiko tuajiya gutshita: ‘Guzuela giamatshidia mukatshi dietu.’ (Zak. 8:16) “Khalenu nji nu guhuima mukatshi dienu.” (Mako 9:50) “Khalenu athu a thomo ha gunemesa athu ako.” (Roma 12:10) “Yambenu athu ako.” (Roma 15:7) “Khalenu . . . guditotesela.” (Kol. 3:13) “Landulenu gudibatesa inemo.” (Gal. 6:2) “Landulenu gudikolesa.” (1 Tes. 4:18) “Khalenu . . . gudikolesa.” (1 Tes. 5:11) “Khalenu musamba nji mukunda nu athu ako.”​—Yak. 5:16.

9. Mukunda natshi gukolesa athu ako gudi luholo luabonga lua gumonesa egi tuana guazumba? (Tala nji gifuanesa.)

⁹ Henyaha tutadilenu ndaga imoshi tuajiya gutshita mukatshi dia ndaga tuazuelela ha gumonesa egi tuana zumba athu ako. Phaula wazuelele egi: “Landulenu gudikolesa.” Mukunda natshi gukolesa athu ako gudi luholo luabonga lua gumonesa egi tuana guazumba? Mukanda umoshi wana kotelesa Biblia udi muzuela egi mbimbi “gukolesa” Phaula wakalegele idi mukotelesa “gumagana hehi nu muthu, ha gumuhana gikhesa handaga udi mu lamba diakola.” Hene tangua tuana kolesa phangi mumoshi udi nu lamba tuana gumukuatesa ha gulandula gukombelela Yehowa nu gujinginyina guagasue. Tangua diagasue tuana hana phangi’etu wa yala nga wa mukhetu gikhesa, tuana monesa egi tuana gumuzumba.​—2 Kol. 7:6, 7, 13.

10. Gudivua gutshi gudi mukatshi dia guvila athu khenda nu guahana gikhesa?

¹⁰ Mu luholo lutshi guvila athu ako khenda nu guahana gikhesa guana gudivua? Muthu wana vila athu ako khenda wana guahana gikhesa nu wana guakuatesa mu malamba adi mutagana nawo. Gula tudi nu khadilo dia guvila athu ako khenda, mbayitutuma ha guahana gikhesa. Phaula wazuelele egi luholo Yehowa wana vila athu khenda, yana gumutuma ha guahana gikhesa. Wazuelele nji egi Yehowa udi “Tata wazala pha nu khenda, Nzambi wa ukuateshi wagasue.” (2 Kol. 1:3) Mu verse eyi Phaula udi mutamega Yehowa egi “Tata wazala pha nu khenda.” Idi mukotelesa egi Yehowa wana vila athu khenda jiavula. Khadilo diene diana gumutuma ha gutukuatesa “mu malamba etu agasue.” (2 Kol. 1:4) Gifua luholo meya abonga a gu gito ana tulula mitshima ya athu adi nu luhungu, Yehowa nji wana tulula mitshima ya athu adi nu gikenene nu wana guahana gikhesa. Luholo lutshi tuajiya gulandula khadilo dia Yehowa dia guvila athu ako khenda nu guahana gikhesa? Tudi naye gukudisa makalegelo anyi ajiya gutukuatesa ha guvila athu ako khenda nu guahana gikhesa. Makalegelo atshi ene?

11. Ha gutadila Kolosai 3:12 nu 1 Phetelo 3:8, makalegelo atshi ako tudi naye gukudisa anyi ajiya gutukuatesa ha guzumba athu ako nu guahana gikhesa?

¹¹ Itshi mbayitukuatesa ha guzumba athu ako nu “gulandula gudihana gikhesa” lusugu nu lusugu? Tudi naye gukudisa makalegelo gifua, gudihaga ha fundo dia athu ako, gukhala nu guzumba gua uphangi nu gisemo. (Tanga Kolosai 3:12; 1 Phetelo 3:8.) Luholo lutshi makalegelo awa ajiya gutukuatesa? Gula tudi muvila aphangi’etu Aklisto khenda nu tudi guakuatesa nu mutshima umoshi, mbayitutuma ha guahana gikhesa tangua adi mutagana nu malamba. Yesu wazuelele egi: “Kano diana zuela ndaga jidi jia guzala mu mutshima. Muthu wabonga wana zuela ndaga jiabonga, handaga mutshima wenji udi waguzala pha nu ndaga jiabonga.” (Mat. 12:34, 35) Gula tudi muhana aphangi’etu a mala nu a akhetu adi mu lamba gikhesa, mbatumonesa egi tuana guazumba.

LUHOLO LUTSHI TUAJIYA GUKUDISA GUZUMBA GUETU MUKUNDA NU ATHU AKO?

12. (a) Mukunda natshi tudi naye gumonesa gutema? (b) Muhu utshi tuza mutadila?

¹² Mukut’etu agasue tuana tshigina ‘gulandula gudizumba.’ (1 Yone 4:7) Uvi idi nu ndando ha gujiya egi Yesu wazuelele egi, “guzumba gua athu avula mbaguleba.” (Mat. 24:12) Yesu gazuelelego egi alandudi enji mbaashigo luko gudimonesela guzumba. Uvi tudi naye gumonesa gutema hagula tulandulago khadilo diabola dia enya ha mavu awa dia gutuna guzumba athu ako. Hene tutadilenu muhu owu wa ndando: Itshi yajiya gutukuatesa ha gujiya gula tuana zumba aphangi’etu muavula?

13. Itshi yajiya gutukuatesa ha gujiya gula guzumba guetu mukunda nu aphangi gudi guakola?

¹³ Ha gujiya gula tuana zumba aphangi’etu muavula, tudi naye gukamba gujiya luholo tuana kalagala ndaga gula mulonga wabua. (2 Kol. 8:8) Mupostolo Phetelo wazuelele egi: “Ndaga yabalega ndando idi egi khalenu gudizumba muavula, handaga guzumba guana tshuiga masumu avula.” (1 Phet. 4:8) Hene ndaga tuana tshita gula aphangi atukalegela ndaga yatusagesa, mbayitukuatesa ha gujiya gula guzumba guetu mukunda nu ene gudi guakola.

14. Hagutadila 1 Phetelo 4:8, guzumba gua luholo lutshi tudi naye gumonesela aphangi? Hana gifezegeselo.

¹⁴ Tutadilenu muabonga mbimbi jiazuelele Phetelo. Gitshinyi gia thomo gia mukanda wa 1 Phetelo 4:8 gidi mumonesa egi tudi naye “gudizumba muavula.” Mbimbi Phetelo wakalegele ha guzuelela mbimbi “muavula” idi mukotelesa egi, “gunana.” Gitshinyi gia mbadi gia verse yene gidi mumonesa ndaga mbatutshita gula tudi muzumba athu ako muavula. Guzumba mbagutukuatesa ha “gutshuiga” gubola gua aphangi’etu. Tutadilenu gifezegeselo egi: Tangiza egi mesa aye adi nu mawina, udi nu mulele wajiya gutshuiga mawina ene agasue, uvi dimoshi nga ayadi ndo. Luholo lumoshi nji, gula tudi muzumba aphangi’etu Aklisto muavula tuajiya gutshuiga gubola guawo nga guatotesela “gubola guavula,” uvi mbala imoshi nga jiyadi ndo.

15. Gula tudi muzumba aphangi’etu muavula mbayitutuma ha gutshita itshi? (Kolosai 3:13)

¹⁵ Gula tudi muzumba aphangi’etu muavula mbayitukuatesa ha guatotesela gubola guawo ngatshima matangua ako yana khala lamba ha guyitshita. (Tanga Kolosai 3:13.) Tangua tuana gutotesela athu ako, tuana monesa egi guzumba guetu mukunda nu ene gudi guakola nu tuana tshigina gusuanguluisa Yehowa. Itshi iko yajiya gutukuatesa ha gutotesela athu ako nu gutuna guvua khabu muphushi gula atukalegela gubola?

16-17. Itshi iko yajiya gutukuatesa ha gutotesela aphangi’etu gula atukalegela gubola? Hana gifezegelo. (Tala nji gifuanesa.)

¹⁶ Tudi naye guhaga matangi’etu mu ndaga jiabonga jiana kalagala aphangi uvi mu ndaga jiabola ndo. Tutadilenu gifezegeselo egi. Tangiza egi mudi hamoshi nu aphangi a mala nu a akhetu nu mudi mubalegesa tangua diabonga, muakuata foto. Muakuata foto jiko mbadi handaga foto ya thomo yakhalelego yabonga. Muabua nu foto thathu. Uvi wamona egi mukatshi dia foto jiene, phangi mumoshi wa yala gashigo mulela mu foto imoshi. Itshi wajiya gutshita nu foto yene? Udi naye gukatula foto yene handaga foto jiko mbadi udi najio, phangi muene wa yala udi nji mulela.

¹⁷ Tuajiya gufuanesa foto jinyi tuabembi nu ndaga tuana bamba mu matangi. Idi yadiago egi ha tuana balegesa tangua hamoshi nu aphangi’etu, tuana bamba ndaga jiabonga mu matangi. Uvi tangiza gale egi phangi mumoshi wazuela nga watshita ndaga imoshi yagusagesa. Itshi mbawutshita mukunda nu mulonga wene? Mbawubamba ndaga yene mu matangi ba? Ndo, udi naye gutshita yagasue ha guyibuita mutshima gifua luholo tuakatula foto tuazuelela guthunda. (Ish. 19:11; Ef. 4:32) Tudi naye gubuita mutshima mu ndaga yabola yatshitshi phangi handaga tudi nu ndaga jiavula jiabonga tudi naye guwunguluga ha tuabalegesele tangua nu phangi muene. Tudi naye gubamba ndaga jiabonga mu matangi etu.

MUKUNDA NATSHI MANGINO IDI DIAGO NU NDANDO HA GUZUMBA ATHU AKO?

18. Ndaga itshi ya ndando yatadila guzumba tuamona mu longo edi?

¹⁸ Mukunda natshi tuana tshigina egi guzumba guetu mukunda nu athu ako gukhale guakola? Gifua luholo tuayimonyi, gula tudi muzumba aphangi’etu tuana monesa egi tuana zumba Yehowa. Luholo lutshi tuana monesa guzumba gudi aphangi’etu Aklisto? Tudi naye guahana gikhesa. Gula tudi muvuila athu ako khenda mbayitukuatesa ha ‘gulandula gudikolesa.’ Luholo lutshi tuajiya gukolesa guzumba guetu mukunda nu athu ako? Tudi naye gutshita ngolo ha gutotesela aphangi’etu gula atukalegela ndaga imoshi yabola.

19. Mukunda natshi mangino idi diago nu ndando yavula ha guzumba aphangi’etu a mala nu a akhetu?

¹⁹ Mukunda natshi mangino idi diago nu ndando ha guzumba athu ako? Phetelo wazuelele egi: “Gisugishilo gia ndaga jiagasue giasuena hehi. Hene, . . . khalenu gudizumba muavula.” (1 Phet. 4:7, 8) Luholo gisugishilo gia mavu awa giasuena hehi, itshi tushigo naye gujimbila? Yesu wadiangele guwambela alandudi enji egi: “Ifutshi yagasue mbayikhala n’enu umbalagaji mukunda nu jina diami.” (Mat. 24:9) Ha gusala ya gujinginyina gudi Yehowa, tudi naye gukhala nu gudivua guabonga nu aphangi’etu. Gula tudi muzumba aphangi’etu, Satana mbagashigo gutukhaphumuna handaga guzumba gudi gifua “shinga yana gutujitshiga ha gukhala hamoshi.”​—Kol. 3:14; Fili. 2:1, 2.