Udi Hehi ha Gudihana Gudi Yehowa Ba?

1-2. Itshi muthu udi naye gutshita gutuama egi abatijiwe?

MU IVO eyi thano yabalega, athu avula abatijiwe ha gubua Matemue a Yehowa. Avula mukatshi diawo alongugile giamatshidia ‘sendese ulenge wawo,’ gifua Timote, mulandudi mumoshi wa mu siekle ya thomo. (2 Tim. 3:14, 15) Uvi ako alongugile giamatshidia tangua abuile athu a gukola. Mukhetu mumoshi walongugile Biblia nu Matemue a Yehowa, wabatijiwe nu ivo 97!

² Gula wana longuga Biblia nga ndo mvuaji jiaye jidi Matemue a Yehowa, watangijile gale egi wajiya gubatijiwa ba? Gula idi ngenyi, didi diago felela diabonga! Gutuama egi ubatijiwe, udi naye thomo gudihana gudi Yehowa. Longo edi diza mumonesa gula gudihana gudi Nzambi gudi mukotelesa itshi. Diza nji gugukuatesa ha gutuna guvua woma gula udi mutshigina gudihana gudi Nzambi nu gubatijiwa.

GUDIHANA GUDI NZAMBI GUDI MUKOTELESA ITSHI?

3. Hana ifezegeselo idi mu Biblia idi mumonesa athu adihanele gudi Yehowa.

³ Mu tangua dikulu, muthu wakhalele gudihana gudi Yehowa wakhalele mutombewa ha gutshita mudimo wa ndando. Enya Isalele akhalele giphuta gia dihanele gudi Yehowa. Uvi athu ako mukatshi diawo adihanele gudi Yehowa ha gutshita mudimo wabalega ndando. Ha gufezegesa, Alona wakhalele nu “njimbu ya gijila,” amuhagele ginzanza gia wolo ha mbombo giakhalele mungedima. Ginzanza giene gia wolo giakhalele mumonesa egi watombewe ha gukalegela Yehowa mudimo gifua nganga-nzambi wakoma. (Levi 8:9) Banazileya nji adihanele gudi Yehowa ha gutshita mudimo wabalega ndando. Mbimbi “Nazileya,” yazudiwa mu mbimbi ya Hebelu nazirʹ, idi mukotelesa egi: “Muthu wadihanyi.” Banazileya akhalele mutumagela mikhuala ya ndando yasonegele Moize mukunda nu ene.​—Lutang. 6:2-8.

4. a) Gudihana guaye gudi Yehowa guana monesa itshi? b) “Gudituna” gudi mukotelesa itshi? (Tala nji gifuanesa.)

⁴ Gula wadihana gudi Yehowa, idi mumonesa egi watomba ha gubua mulandudi wa Yesu Klisto nu watshigina gusha gutshigina gua Nzambi ha fundo dia thomo mu monyo waye. Ndaga yene idi mukotelesa itshi mukunda nu aye? Yesu wazuelele egi: “Gula muthu watshigina gungulandula, udi naye gudituna.” (Mat. 16:24) Mbimbi ya Greke yabalumuiwe egi, “udi naye gudituna,” yajiya gubalumuiwa luko egi “gashigo naye gujinga mukunda nu muene hakhenji.” Luholo wadihanele gale gudi Yehowa, udi naye gutuna ndaga jiagasue jishigo gumusuanguluisa. (2 Kol. 5:14, 15) Yakotelesa egi udi naye gutuna “nzala jia muila” gifua uthambi. (Gal. 5:19-21; 1 Kol. 6:18) Mbayikhala lamba gudi aye ha gutumagela mikhuala eyi ba? Ndo sha, handaga gula wana zumba Yehowa nu wana tshigina diago egi mikhuala yene idi mukunda nu gubonga guaye mbayishigo mukhala lamba. (Ngi. 119:97; Yesh. 48:17, 18) Phangi Nicholas udi muzuela egi: “Wajiya gumona mikhuala ya Yehowa gifua bologo didi gugukanga njila ha gutshita ndaga udi mutshigina nga ndo gifua luphango ludi gugubamba hagula khoshi igukalagalago gubola.”

5. a) Luholo lutshi wajiya gudihana gudi Yehowa? b) Gudisha gutshi gudi mukatshi dia gudihana gudi Yehowa nu gubatijiwa? (Tala nji gifuanesa.)

⁵ Luholo lutshi wajiya gudihana gudi Yehowa? Wajiya guyitshita tangua udi gumulaya mu gisambu egi mbawumukombelela phamba muene nu mbawusha gutshigina guenji ha fundo dia thomo mu monyo waye. Idi yadiago egi, udi mulaya Yehowa egi mbawulandula gumuzumba “nu mutshima waye wagasue nu monyo waye wagasue nu matangi aye agasue nu ngolo jiaye jiagasue.” (Mako 12:30) Gudihana gudi Yehowa Nzambi guana kalegewa mu gisuegi, yakotelesa egi phamba aye nu muene. Uvi gubatijiwa guana kalegewa ha meso a athu agasue; guana monesa egi wadihanyi gale gudi Yehowa. Gudihana guaye gudi Yehowa gudi laji dia ndando. Yehowa udi gugutoga ha gunemesa laji diene gifua luholo wamulayele.​—Mulo. 5:4, 5.

MUKUNDA NATSHI UDI NAYE GUDIHANA GUDI YEHOWA?

6. Ndaga itshi yajiya gutuma muthu ha gudihana gudi Yehowa?

⁶ Ndaga ya ndando yajiya gugutuma ha gudihana gudi Yehowa idi guzumba guaye gudi muene. Guzumba guene gushigo naye gukatuga phamba mu ndaga udi mutangiza. Uvi gudi naye gukatuga mu “ujiyi wa giamatshidia” nu mu “ndaga jia mu nyuma,” yakotelesa egi ndaga jinyi walongugile mukunda nu Yehowa jiakolesele guzumba guaye gudi muene. (Kol. 1:9) Gulonguga guaye gua Biblia guagukuatesele ha gutshigina egi 1) Yehowa udi Nzambi wa giamatshidia, 2) Biblia yasonegewe mu ukuateshi wa nyuma yenji 3) nu Yehowa wana kalegela ulondegi wenji ha gutagenesa gutshigina guenji.

7. Itshi tudi naye gutshita gutuama egi tudihane gudi Nzambi?

⁷ Athu ana gudihana gudi Yehowa adi naye gujiya malongo a gisendeselo adi mu Mbimbi ya Nzambi nu guatumagela. Ana tshita ngolo ha guwambela athu ako ndaga ana longuga. (Mat. 28:19, 20) Guzumba guawo gudi muene guana kola, ana zula nji desizio dia gumukombelela phamba muene. Idi nji ngenyi mukunda nu aye ba? Gula udi nu guzumba gua luholo elu, mbawushigo mumona egi gudihana guaye gudi Yehowa nu gubatijiwa gudi ndaga watshitshi ha gusuanguluisa muthu wana gugulongesa Biblia nga mvuaji jiaye, nga ndo handaga mafuta aye agasue atshitshi ngenyi.

8. Luholo lutshi khadilo dia guhana mersi diajiya gugukuatesa ha guzula desizio dia gudihana gudi Yehowa? (Ngimbo 116:12-14)

⁸ Gula udi mutangiza ndaga jiagasue Yehowa wagukalegele gale, mbayigutuma ha gumuhana mersi nu guzula desizio dia gudihana gudi muene. (Tanga Ngimbo 116:12-14.) Biblia yana tamega Yehowa egi Muhanyi wa “khapho diagasue diabonga nu gima giagasue giatagana.” (Yak. 1:17) Khapho diabalega gukoma didi mulambu wa Mun’enji Yesu. Tangiza gale ndaga eyi! Gibawu giaguhanele luendu lua gukolesa ufuta waye nu Yehowa. Giaguhanele nji luendu lua guheta monyo wa mayilago. (1 Yone 4:9, 10, 19) Gudihana gudi Yehowa gudi ndaga yabalega ndando wajiya gukalagala ha gumonesa egi udi gumuhana mersi mukunda nu luholo lua tuzumbile muene nu mukunda nu ishimbigo yenji jiagasue yatuhanele muene. (Mikh. 16:17; 2 Kol. 5:15) Mukanda Heta Monyo wa Ivo nu Ivo! longo dia 46 mu gitshinyi gia 4 gidi mumonesa luholo wajiya gukhala nu khadilo dia guhana mersi, gidi nji nu video ya minuta thathu idi muzuela egi Offrons des cadeaux à Dieu.

UDI HEHI HA GUDIHANA GUDI YEHOWA NU GUBATIJIWA BA?

9. Mukunda natshi tushigo naye gushinjiga muthu ha gudihana gudi Yehowa?

⁹ Wajiya gutangiza egi ushigo hehi ha gudihana gudi Yehowa nu gubatijiwa. Yajiya gukhala egi gudi nu ndaga jiko udi naye gusombegesa mu monyo waye ha gudivua nu mikhuala ya Yehowa; nga ndo idi mutoga egi uzule luko tangua dia gukolesa gutshigina guaye. (Kol. 2:6, 7) Ujimbilago egi athu agasue tuana longesa Biblia anago gukula mu nyuma luholo lumoshi; nga ndo ishigo handaga mavuala agasue adi gindongo gimoshi yakotesela egi mukut’awo agasue adi hehi ha gudihana gudi Yehowa nu gubatijiwa. Hene, kamba gujiya ndaga udi naye gutshita ha gukula mu nyuma, uvi udifuanesago nu muthu muko.​—Gal. 6:4, 5.

10. Itshi wajiya gutshita gula udi mutangiza egi ushigo hehi ha gudihana gudi Yehowa nu gubatijiwa? (Tala nji galuanda “Mukunda nu Mavuala adi mu Fami jia Matemue a Yehowa.”)

¹⁰ Ikhale udi mutangiza egi ushigo hehi ha gudihana gudi Yehowa, landula gubamba felela diene. Khala mutoga Yehowa ha gugukuatesa ha gusombegesa ndaga jiko mu monyo waye. (Fili. 2:13; 3:16) Wajiya gusha mutshima egi muene mbawugutegelela nu mbawuhana mvutu gu isambu yaye.​—1 Yone 5:14.

MUKUNDA NATSHI ATHU AKO ANA GUVUA WOMA?

11. Luholo lutshi Yehowa mbawukuatesa akombeledi enji ha gusala yagujinginyina gudi muene?

¹¹ Athu ako ana guvua woma wa gudihana gudi Yehowa nu gubatijiwa, ikhale adi gawo hehi ha guyitshita. Ajiya guvua woma egi gungima dia gubatijiwa, ajiya gukalagala gubola guakoma nu guzolewa mu hungu. Gula udi gudivua ngenyi, khala musha mutshima egi Yehowa mbawugukuatesa ha ‘guwenda mu luholo luatagana ludi gumusuanguluisa diago.’ (Kol. 1:10) Mbawuguhana nji ngolo jia gutshita ndaga jiabonga. Wakuatesele gale nji athu avula ha gutshita ndaga jiabonga. (1 Kol. 10:13) Yehowa wana kuatesa akombeledi enji ha gusala yagujinginyina gudi muene. Gishina giene, phamba athu azonda ana zolewa mu hungu.

12. Itshi tuajiya gutshita ha gutuna gubua mu muheto wa gubola?

¹² Mukut’etu agasue tuajiya gukalagala ndaga jiabola handaga tushigo athu atagana. (Yak. 1:14) Uvi gula walolewa, aye hakhaye udi naye gutomba ndaga udi naye gutshita. Ndaga ya ndando idi egi aye udi mujiya luholo udi naye gutuameza monyo waye. Athu ako ana zuela egi ashigo nu luholo lua gudikanda, uvi ishigo ngenyi. Wajiya gulonguga luholo wajiya gutuna gubua mu muheto wa ndaga jiabola. Ikhale nzala jiabola jiagujila, wajiya gujituna. Gudi nji nu ndaga jiko wajiya gutshita ha gutuna gubua mu muheto wa gubola. Ha gufezegesa, khala mutshita gisambu lusugu nu lusugu. Khala nu programe yabonga ya gulonguga Mbimbi ya Nzambi. Khala muya mu gudibungisa gua mu hungu. Khala nji muya mu mudimo wa gulongesa. Gutshita ndaga eji jiagasue mbaguguhana ngolo nu mbagugukuatesa ha gutagenesa felela diaye dia gudihana gudi Yehowa. Ujimbilago nji egi Yehowa mbawugukuatesa.​—Gal. 5:16.

13. Gifezegeselo gitshi giabonga Yozefe watubembelele?

¹³ Mbayikhala yaleba gudi aye ha gusala yagujinginyina gudi Yehowa gula wadiangela gujiya ndaga mbawutshita gula walolewa. Biblia idi nu mene jiavula jia athu atshitshile ngenyi ikhale akhalelego athu atagana. Ha gufezegesa, mukaji’a Potifale wakhalele mukamba gubungisa muila nu Yozefe mbala jiavula. Uvi Yozefe wakhalele mujiya ndaga yakhalele naye muene gutshita. Biblia idi muzuela egi, “watunyile,” wazuelele egi: “Luholo lutshi ngajiya gukalagala gubola guakoma ngegi? Luholo lutshi ngajiya gukalagala gubola gu meso a Nzambi?” (Gis. 39:8-10) Idi yadiago egi Yozefe wadiangele gujiya ndaga yakhalele naye muene gutshita gula walolewa. Gutshita ngenyi guamukuatesele ha guzula desizio diabonga halolewe muene.

14. Luholo lutshi tuajiya gutuna mbala imoshi ndaga jiabola?

¹⁴ Luholo lutshi wajiya gulandula gifezegeselo gia Yozefe nu gutshita ndaga jiabonga gula walolewa? Sendese mangino, zula desizio dia gujiya ndaga wajiya gutshita gula walolewa. Khala mutuna mbala imoshi ndaga jinyi Yehowa wana tuna; ukhadigo nji gujitangiza. (Ngi. 97:10; 119:165) Ngenyi, mbawushigo mubua mu muheto wa gubola. Mbawudiangela nji gujiya ndaga mbawutshita.

15. Luholo lutshi muthu wajiya gumonesa egi wana kamba Yehowa nu “mutshima umoshi”? (Hebelu 11:6)

¹⁵ Yajiya gukhala egi wajiyile gale giamatshidia nu wana tshigina gukalegela Yehowa nu mutshima wagasue, uvi udi muvua woma ha gudihana gudi muene nu gubatijiwa. Gula idi ngenyi, wajiya gutshita ndaga yakalegele Fumu Davidi. Wajiya gububila Yehowa egi: ‘Oo Nzambi, sanda muabonga matangi ami, jiya nji mutshima wami. Ngulole, jiya nji ndaga jidi gungusagesa. Tala gula ngakalagala ndaga yabola, ngutuameze mu njila ya mayilago.’ (Ngi. 139:23, 24) Yehowa wana shimbiga athu “ana gumukamba nu mutshima umoshi.” Gula udi mutshita yagasue ha gutagenesa felela diaye dia gudihana gudi Yehowa nu gubatijiwa, mbawumonesa egi wana kamba Yehowa nu mutshima umoshi.​—Tanga Hebelu 11:6.

LANDULA GUKOLESA UFUTA WAYE NU YEHOWA

16-17. Luholo lutshi Yehowa wana suena hehi nu athu akudile mu giamatshidia? (Yone 6:44)

¹⁶ Yesu wazuelele egi Yehowa wana gunana alandudi enji. (Tanga Yone 6:44.) Tangiza luholo giamatshidia egi gidi nu ndando gu meso aye nu luholo wajiya gugikalegela. Yehowa wana mona ndaga imoshi yabonga gudi muthu wagasue wana nana muene. Wana mona muthu wagasue gifua ‘khapho dienji dia ndando,’ nga ‘muthu wenji diago.’ (Mikh. 7:6; note) Wana gugumona nji ngenyi.

¹⁷ Yajiya gukhala egi wakudile mu fami ya Matemue a Yehowa. Matangua ako wajiya gutangiza egi wana kombelela Yehowa handaga mvuaji jiaye jiana tshita ngenyi, uvi ishigo Yehowa wagunanele gudi muene. Uvi Biblia yana zuela egi: “Suenenu hehi nu Nzambi, muene mbawusuena hehi nu enue.” (Yak. 4:8; 1 Gudi. 28:9) Gula wazula desizio dia gusuena hehi nu Yehowa, muene nji mbawusuena hehi nu aye. Yehowa ganago gusuena hehi nu aye handaga wakhala mu fami ya Matemue a Yehowa. Uvi wana suena hehi nu muthu wagasue ikhale wakudile mu giamatshidia nga ndo. Gula muthu wakudile mu giamatshidia wazula desizio dia gusuena hehi nu Yehowa, muene nji wana suena hehi n’enji gifua luholo Yakoba 4:8 idi guyimonesa.​—Tala nji 2 Tesalonike 2:13.

18. Itshi mbatumona mu longo dialandula? (Ngimbo 40:8)

¹⁸ Gula wadihana gudi Yehowa nu wabatijiwa, mbawulandula gifezegeselo gia Yesu. Wadihanele gudi Sh’enji ha gukalagala gutshigina guenji. (Tanga Ngimbo 40:8; Heb. 10:7) Mu longo dialandula, mbatumona ndaga jiajiya gugukuatesa ha gulandula gukombelela Yehowa nu gujinginyina guagasue gungima dia gubatijiwa guaye.