Mukanda Wajiya Gutukuatesa ha Gukolesela uu nu Gugisugishilo

1-2. a) Lujingu luakhalele luholo lutshi gudi Aklisto a gu Yudea tangua mupostolo Phaula waasonegele mukanda? b) Itshi idi mumonesa egi mukanda wene wajile diago mu tangua diabonga?

GUNGIMA dia gufua gua Yesu mu givo 33, Aklisto a gu Yelusalema nu a gu Yudea ataganele nu malamba avula. Matangua azonda gungima dia guzolewa gua hungu dia Uklisto, Aklisto ataganele nu usageshi wakola. (Makal. 8:1) Gungima dia ivo 20, nzala yanginyile mu dimbo, yabatele lamba dia makuta. (Makal. 11:27-30) Hehi nu givo 61 Gungima dia Guvualewa gua Yesu (G.Y.) Aklisto ene ahetele guhuima handaga ajiyile ndaga jiakhalele naye gubua mu masugu adi muza. Mu tangua diene Yehowa wakuatesele mupostolo Phaula ha guatumila mukanda. Ndaga jiakhalele mu mukanda wene, jiaakuatesele ha gudilondega mukunda nu masugu adi muza.

² Mukanda wene wajile diago mu tangua diabonga, handaga sungi yene ya guhuima yakhalelego naye gushipha. Phaula waahanele malongo abonga akhalele naye guakuatesa ha gukolesela mu malamba akhalele naye gutagana nawo gutuama. Gushiyiwa gua Yelusalema guadiangele guzuelela Yesu guasendesele gusuena hehi. (Luka 21:20) Idi yadiago egi ikhale Phaula nga ene Aklisto a gu Yudea akhalelego diago mujiya tangua dimbo diene mbadishiyiwa. Uvi Aklisto ene akhalele naye gukalegela sungi yene ya guhuima ha gudilondega nu gukudisa makalegelo gifua, gutshigina nu gukolesela.​—Heb. 10:25; 12:1, 2.

3. Mukunda natshi Mukanda wa Hebelu udi nu ndando mukunda nu esue?

³ Guasala hazonda esue nji mbatutagana nu lamba diakola gubalega dinyi diataganele nadio Aklisto a gu Yelusalema nu a gu Yudea. (Mat. 24:21; Gumo. 16:14, 16) Malongo anyi Yehowa wahanele ha guakuatesa, ajiya nji gutukuatesa mangino.

“TUTSHITENU NGOLO HA GUBUA ATHU A GUKULA”

4. Malamba atshi enya Yuda anyi abuile Aklisto ataganele nawo? (Tala nji gifuanesa.)

⁴ Enya Yuda anyi abuile Aklisto akhalele naye gusombegesa ndaga jia monyo wawo; gutshita ngenyi guakhalelego gualeba. Thomo akhalele athu anyi Nzambi watombele. Yelusalema yakhalele fundo diakhalele Ufumu wa Nzambi ha mavu, athu akhalele muya guene ha gukombelela Nzambi mu luholo luabonga gu tempelo. Athu akhalele mutshigina gukombelela Yehowa, akhalele muya mu tempelo gu Yelusalema. Enya Yuda agasue agujinginyina akhalele mutumagela mikhuala ya Moize gifua luholo mafumu awo a ikombelelo akhalele mulongesa. Mikhuala yawo yakhalele mutadila gudia, gumbiwa gumukanda nu luholo luagukalegela athu anyi akhalelego enya Yuda ndaga. Uvi gungima dia gufua gua Yesu, Yehowa gakhalelego mutshigina luko milambu yakhalele muhanewa mu tempelo. Ndaga yene yakhalelego yaleba gudi enya Yuda anyi abuile Aklisto ha gusombegesa luholo luawo lua gukombelela. (Heb. 10:1, 4, 10) Yakhalele nji lamba ha gusombegesa ikhale gudi Aklisto akhalele agukula mu nyuma gifua mupostolo Phetelo. (Makal. 10:9-14; Gal. 2:11-14) Aklisto ene asagesewe diago gudi mafumu a ikombelelo ya enya Yuda mukunda nu gutshigina guawo.

5. Mu ndaga jitshi Aklisto akhalele naye gumonesa gutema?

⁵ Aklisto a gu Yudea ataganele nu usageshi mu maluholo mbadi. Thomo, mafumu a ikombelelo a enya Yuda akhalele guamona gifua ba aposta. Ya mbadi, athu ako mu hungu akhalele muzuela egi Aklisto adi naye gulandula gutumagela Mikhuala ya Moize. Yajiya gukhala egi akhalele muzuela ngenyi ha gulenga usageshi. (Gal. 6:12) Na itshi yakhalele naye gukuatesa Aklisto ene ha gusala yagujinginyina gudi Yehowa?

6. Ndaga itshi mupostolo Phaula wawambelele aphangi’enji Aklisto ha gutshita? (Hebelu 5:14–6:1)

⁶ Mu mukanda wa Hebelu, Mupostolo Phaula wahanele aphangi’enji Aklisto gikhesa ha gutanga nu gutangigiza Mbimbi ya Nzambi. (Tanga Hebelu 5:14–6:1.) Phaula wakalegele Gitshinyi gia Biblia Giasonegewe mu Hebelu ha gukuatesa aphangi’enji Aklisto ha gujiya egi luholo lua gukombelela lua Aklisto ludi luabonga gubalega lua enya Yuda.a Waakuatesele nji ha gulonguga Mbimbi ya Nzambi muabonga nu guyikotelesa hagula yajiya guakuatesa ha gukotelesa malongo a mambo nu guatuna.

7. Malamba atshi tuana tagana nawo mangino?

⁷ Mangino, tuana mona athu mumuanga mene jia mambo mukunda nu ndaga Yehowa wana zuela egi jidi jiabonga nga jiabola, gifua luholo Aklisto akhalele mujinga gu Yelusalema nu a gu Yudea ataganele nu usageshi. Athu ako ana azuela egi Matemue a Yehowa adi enya ndaga jiakola nu adi enya khuta handaga tuana tumagela malongo a Biblia atadila gubungisa muila. Luholo lua gutangiza lua athu ludi muya nu gudisha mangololo nu luholo Yehowa wana tadila ndaga. (Ish. 17:15) Tudi naye gutshita ngolo ha gujiya matangi abola a athu nu gutuna gubemba egi mbalagaji jietu jitulebese muila ha gubolesa ufuta wetu nu Yehowa.​—Heb. 13:9.

8. Itshi yajiya gutukuatesa ha gulandula gukula mu nyuma?

⁸ Gula tudi mutshigina gukula mu nyuma, tudi naye guzula nu ndando malongo mupostolo Phaula wahanele Aklisto a gu Yelusalema nu a gu Yudea. Yakotelesa egi, tudi naye gulonguga Biblia muabonga ha gujiya Yehowa nu makalegelo enji. Tudi naye nji gulandula gutshita ngenyi ikhale tuadihanele gale gudi Yehowa nu tuabatijiwe gale. Ngatshima tuatagenesa gale ivo guvula gutshi mu giamatshidia, tudi naye gulandula gutanga Biblia lusugu nu lusugu nu guyilonguga. (Ngi. 1:2) Gukhala nu programe yabonga ya gulonguga Biblia mbayitukuatesa ha gukudisa khadilo dinyi mupostolo Phaula wasonegele Aklisto a gu Yelusalema nu a gu Yudea; khadilo diene didi gutshigina.​—Heb. 11:1, 6.

‘TUKHALENU NU GUTSHIGINA HA GUHULUISA MIONYO YETU’

9. Mukunda natshi Aklisto akhalele nu funu ya gutshigina guakola?

⁹ Aklisto akhalele nu funu ya gutshigina guakola, handaga guakhalele naye guakuatesa ha guhuluisa mionyo yawo mu lamba diakhalele naye guza gu Yudea. (Heb. 10:37-39) Yesu watemesele alandudi enji egi tangua mbaamona masuta mujieta dimbo dia Yelusalema, adi naye gulenga gu milundu. Ndaga jiazuelele muene jiakhalele mutadila Aklisto agasue, ikhale anyi akhalele mujinga gu Yelusalema nga mu membo a hehi. (Luka 21:20-24) Tangua masuta ajile ha gualuisa, athu ako akhalele mujinga mu membo a hehi akhalele naye gutangiza egi yajiya gukhala ndaga yabonga ha guya gudisuega gu Yelusama handaga dimbo diene diakhalele nu ibayi yaleha, ngenyi mbaakhala mu ubambi. Mu tangua diene desizio dia gulenga gu milundu diakhalele mumonega gifua dishigo diabonga, hene yakhalele mutoga gutshigina guakola ha gulenga guene.

10. Gukhala nu gutshigina guakola mbagukuatesa Aklisto ha gutshita itshi? (Hebelu 13:17)

¹⁰ Aklisto ene akhalele naye nji gusha mutshima gudi athu anyi Yesu watombele ha gutuameza hungu. Yajiya gukhala egi athu anyi akhalele mutuameza akhalele muhana malongo amonesele tangua dia gulenga nu luholo lua gulenga. (Tanga Hebelu 13:17.) Mupostolo Phaula wawambelele aphangi’enji Aklisto ha ‘gutumagela’ athu adi guatuameza. Gazuelelego egi adi naye guatumagela handaga adi naye guyitshita, uvi wazuelele egi adi naye guatumagela handaga ana guashila mutshima. Aklisto a gu Yelusalema nu a gu Yudea akhalele naye gushila athu akhalele mutuameza mutshima, gutuama egi Yelusalema ishiyiwe. Gula Aklisto adi mutumagela akulu mu sungi ya guhuima, mbayikhala yaleba ha guatumagela mu tangua dia lamba.

11. Mukunda natshi Aklisto adi naye gukhala nu gutshigina guakola mangino?

¹¹ Esue nji tudi nu funu ya gutshigina gifua Aklisto a gu Yelusalema nu a gu Yudea. Mangino athu avula anago gutshigina egi gisugishilo gia mavu awa giasuena hehi. Hene ana gutusegulula luholo tuana gutshigina giamatshidia giene. (2 Phet. 3:3, 4) Ikhale Biblia yana gutuwambela ndaga jiavula jiazonda-zonda jiatadila luholo lamba diakola mbadikhala, uvi gudi nu ndaga jiavula tushigo mujiya. Tudi naye gusha mutshima egi gisugishilo gia mavu awa mbagiza mutangua diatagana nu gusha mutshima egi Yehowa mbawutubamba mu tangua diene.​—Hab. 2:3.

12. Itshi mbayitukuatesa ha guhuluisa monyo wetu mu tangua dia lamba diakola?

¹² Tudi naye nji gusha gutshigina guakola gudi “muhiga wafubidila nu watema” munu Yehowa wana kalegela mangino ha gututuameza. (Mat. 24:45) Tangua lamba diakola mbadisendesa, yajiya gukhala egi mbatuheta malongo mbaatukuatesa ha guhuluisa monyo wetu gifua luholo Aklisto a gu Yelusalema nu a gu Yudea atshitshile tangua masuta a enya Roma ajietele Yelusalema. Edi tangua dia gutumagela malongo ana gutuhanewa gudi athu ana gutuameza mu ulondegi wa Yehowa. Gula tushigo mutumagela malongo awo mangino, mbayikhala lamba ha guatumagela mu tangua dia lamba diakola.

13. Mukunda natshi longo didi mu Hebelu 13:5 diakhalele nu ndando yavula gudi Aklisto a gu Yelusalema nu a gu Yudea?

¹³ Aklisto a gu Yelusalema nu a gu Yudea akhalele naye gulebesa ndaga jia monyo wawo nu gutuna khadilo dia ‘guzumba mbongo’ tangua akhalele munenga gijiyishilo giaawambelele Yesu ha gulenga gu milundu. (Tanga Hebelu 13:5.) Yajiya gukhala egi athu ako mukatshi diawo akhalele nu uphutu nu nzala ya ima ya gudia. (Heb. 10:32-34) Ngatshima atshiginyile gumona malamba mukunda nu lukuma luabonga, uvi yajiya gukhala egi athu ako mukatshi diawo asendesele gudihana ha gukamba mbongo jiavula ha gudibamba. Uvi mbongo jiakhalelego naye guahuluisa mu tangua dia gushiyiwa gua Yelusalema. (Yak. 5:3) Idi yadiago egi yakhalele lamba gudi athu akhalele muzumba ima yawo muavula ha gulenga handaga akhalele naye gubemba jinzo jiawo nu ima yene.

14. Luholo lutshi gutshigina guakola guajiya gutukuatesa ha guzula badesizio abonga mu ndaga yatadila umonyi?

¹⁴ Gula tudi nu gutshigina egi gisugishilo gia mavu awa giasuena hehi, mbayitukuatesa ha gutuna gukamba gukhala nu ima yavula-vula. Mu tangua dia lamba diakola, athu ‘mbaabishila utadi wawo wa siliva mu njila’ handaga mbaakotelesa egi ‘utadi wawo wa siliva nu wolo wawo wajiyilego guahuluisa mu lusugu lua khabu jia Yehowa.’ (Ezek. 7:19) Ha fundo dia gukamba gukhala nu mbongo jiavula-vula, tudi naye guzula desizio dia gutshita ndaga yajiya gutuhana njila ha gukuatesa enya fami yetu nu yajiya gutukuatesa ha gukombelela Yehowa. Yakotelesa egi tudi naye gutuna gulaba guzula mikudi ishigo nu ndando nu gutuna gubalegesa tangua diavula ha gulondega ima tudi nayo. Tudi naye nji gumonesa gutema hagula ima tudi naye izudigo fundo dia thomo mu munyo wetu. (Mat. 6:19, 24) Luholo gisugishilo gia suena hehi, tudi naye gutomba gula tuajiya gushila Yehowa mutshima nga gusha mutshima mu ima tudi naye.

“MUDI NAYE GUKOLESELA”

15. Mukunda natshi Aklisto a gu Yelusalema akhalele naye gukolesela?

¹⁵ Aklisto a gu Yelusalema akhalele naye gukolesela mu mudimo wa Yehowa handaga mu tangua diene malamba akhalele hehi ha guabuila. (Heb. 10:36) Aklisto ako akhalele atagana gale nu usageshi mu masugu abalega, uvi ako akhalele khenji atagana gale nawo ndo. Hene Phaula wamonesele egi ngatshima atagenele nu malamba, uvi malamba ene akhalelego luholo lumoshi nu a Yesu, handaga malamba a Yesu amubatele uu nu gu gufua. (Heb. 12:4) Enya Yuda avula akhalele muvua khabu, abuile nji nu khuta yavula handaga athu avula akhalele mubua Aklisto. Ivo yazonda gutuama, thundu ya athu yayile muluisa Phaula hakhalele muene mulongesa gu Yelusalema. Enya Yuda gubalega 40 “adilogele egi ajiyilego gudia nga gunua gula ashiyilego Phaula.” (Makal. 22:22; 23:12-14) Ikhale atagenele nu ndaga eji jia lamba, uvi Aklisto akhalele naye gudibungisa ha gukombelela, gulongesa lukuma luabonga nu gulandula gukolesa gutshigina guawo.

16. Luholo lutshi mukanda wa Hebelu wajiya gutukuatesa ha gukhala nu matangi abonga tangua tudi mutagana nu usageshi? (Hebelu 12:7)

¹⁶ Itshi yakhalele naye gukuatesa Aklisto a gu Yelusalema ha gukolesela mu usageshi wene? Phaula wakhalele mujiya egi gula atadila malamba ene mu luholo luabonga mbayakuatesa ha gukolesela. Waawambelele egi Nzambi wajiya guhana njila egi atagane nu malamba ha gula akolese gutshigina guawo. (Tanga Hebelu 12:7.) Gukolesela guajiya gukuatesa muthu wagasue ha gukudisa makalegelo a Uklisto. Yakhalele naye gukhala yaleba gudi Aklisto a gu Yelusalema ha gukolesela mu lamba diene gula atangiza gubonga mbaaheta mukunda nu usageshi wene.​—Heb. 12:11.

17. Malongo atshi Phaula wazudile mu ndaga yatadila gukolesela mu usageshi?

¹⁷ Phaula wawambelele Aklisto a gu Yelusalema nu a gu Yudea ha gukhala nu gikhesa nu ha gukolesela mu malamba uu nu gu gisugishilo. Mupostolo Phaula wakhalele watagana ha guhana Aklisto ene malongo, handaga wakhalele musagesa Aklisto gutuama egi abue Muklisto. Wakhalele nji mujiya luholo lua gukolesela mu malamba. Wataganele nji nu usageshi wavula gungima dia gubua Muklisto. (2 Kol. 11:23-25) Hene mupostolo Phaula wakhalele mujiya muabonga ndaga yagukalagala ha gukolesela mu usageshi wene. Wawambelele Aklisto ene egi tangua adi mukolesela mu malamba, adi naye gushila Yehowa mutshima uvi mu ngolo jiawo hakhawo ndo. Ndaga yene yahanele Phaula gikhesa hene gazuelele egi: “Yehowa udi mukuateshi wami; mbangushigo muvua woma.”​—Heb. 13:6.

18. Mu luholo lutshi gujiya ndaga mbajibua mu masugu adi muza guajiya gutukuatesa ha gukolesela?

¹⁸ Mangino nji aphangi’etu ako a mala nu a akhetu adi mutagana nu usageshi. Tuajiya guakuatesa gula tudi mukombelela mukunda nu ene nga guahana ima adi nayo funu. (Heb. 10:33) Biblia idi mumonesa haphelo egi: “Athu agasue adi mutshigina gukhala ya gujinginyina gudi Nzambi mu gudivua nu Klisto Yesu mbaamonesewa nji malamba.” (2 Tim. 3:12) Hene mukut’etu agasue tudi naye gudilondega mukunda nu malamba ajiya gutubuila mu masugu adi muza. Tulandulenu gushila Yehowa mutshima egi mbawutukuatesa ha gukolesela mu malamba mbatutagana nawo mu masugu adi muza. Muene mbawukuatesa athu agasue ana khala yagujinginyina gudi muene mu tangua diatagana.​—2 Tes. 1:7, 8.

19. Itshi yajiya gutukuatesa ha gudilondega mukunda nu lamba diakola? (Tala nji gifuanesa.)

¹⁹ Yadiago, Mukanda Phaula wasonegele Aklisto a gu Yelusalema nu a gu Yudea waakuatesele ha gudilondega mukunda nu malamba akhalele naye guabuila. Phaula wawambelele aphangi’enji Aklisto ha gulonguga Mbimbi ya Nzambi nu guyikotelesa muabonga. Gutshita ngenyi guaakuatesele ha gutuna malongo ajiya gulebesa gutshigina guawo. Waawambelele ha gukolesa gutshigina guawo, ngenyi ajiya gukhala hehi ha gulandula utuameji wa Yesu nu wa athu anyi akhalele mutuameza hungu mu tangua diene. Wakuatesele nji Aklisto ha gulandula gutadila malamba mu luholo luabonga nu guamona gifua luendu lua gukolesa gutshigina guawo gudi Yehowa Tata wawo wa guzumba. Gula esue nji tuakalegela malongo ene, mbaatukuatesa ha gukolesela uu nu gugisugishilo.​—Heb. 3:14.