Khala Munengena Dimbo Mbadisala Mayilago

1. Itshi Yesu wazuelele mukunda nu dimbo dia Yelusalema?

MASUGU azonda gutuama egi Yesu afue, wawambelele alandudi enji profesi imoshi. Profesi yene yatagenesewe thomo tangua ashiyile dimbo dia Yelusalema nu tempelo yenji. Waatemesele egi gudi nu lusugu mbaamona “masuta mujieta” dimbo dia Yelusalema. (Luka 21:20) Yesu wawambelele alandudi enji egi tangua mbaamona masuta ene, adi naye gukatuga mbala imoshi gu Yudea. Ndaga jiazuelele Yesu jiatagenele. Masuta a gu Roma ajietele dimbo dia Yelusalema.​—Luka 21:21, 22.

2. Malongo atshi mupostolo Phaula wasonegele Aklisto a gu Yudea nu a gu Yelusalema?

² Ivo yazonda gutuama egi masuta a gu Roma ajiete dimbo dia Yelusalema, mupostolo Phaula wasonegele Aklisto a gu Yudea nu a gu Yelusalema mukanda umoshi wa ndando. Mukanda wene wana tamegewa egi mukanda wa Hebelu. Mu mukanda wene, Phaula wahanele Aklisto ene malongo akhalele naye guakuatesa ha gudilondega mukunda nu malamba akhalele naye guabuila. Malamba atshi ene? Dimbo dia Yelusalema diakhalele naye gushiyiwa. Aklisto ene akhalele naye guhuluga gula atshigina gubemba jinzo jiawo nu midimo yawo. Mupostolo Phaula wasonegele mukunda nu Yelusalema egi: “Tushigo nu dimbo diana khala ivo nu ivo.” Gungima wazuelele egi: “Tudi munengena nu nzala yagasue dimbo dinyi mbadiza.”​—Heb. 13:14.

3. “Dimbo didi nu fondasio jia diago” didi mukotelesa itshi? Mukunda natshi tudi naye gunengena dimbo diene?

³ Tangua Aklisto ene azudile desizio dia gukatuga gu Yelusalema nu gu Yudea, athu avula akhalele guatamega egi athu aheya, akhalele nji gualela. Uvi desizio diene diaahuluishile. Mangino nji, athu ajiya gutumona gifua tuaheya handaga tuanago gushila mafumu a ha mavu awa mutshima nga gukamba gukhala nu ima yavula. Mukunda natshi tuana zula desizio dia luholo elu? Handaga tudi mujiya egi gualeha ndo mavu awa abola mbaashiyiwa. Tudi munengena “dimbo didi nu fondasio jia diago,” yakotelesa egi Ufumu wa Nzambi.a (Heb. 11:10; Mat. 6:33) Tumito tuagasue tua mene tuza muzuelela mu longo edi, tuza mumonesa: 1) Luholo malongo asonegele Phaula akuatesele Aklisto a mu siekle ya thomo ha gunengena “dimbo dinyi mbadiza.” 2) Luholo Phaula waakuatesele ha gudilondega mukunda nu ndaga mbajiabuila nu 3) luholo malongo ene ana gutukuatesa mangino.

SHILA YEHOWA MUTSHIMA HANDAGA MBAGASHIGO GUGUBEMBA

4. Mukunda natshi Aklisto akhalele muzula dimbo dia Yelusalema nu ndando yavula?

⁴ Aklisto a mu siekle ya thomo akhalele muzula dimbo dia Yelusalema nu ndando yavula. Hungu dia thomo dia Aklisto diazolewe mu dimbo diene mu givo 33 Gungima dia Guvualewa gua Yesu; aphangi a gu hunji dia akulu atuameji akhalele mu dimbo diene. Aklisto avula akhalele nji nu jinzo nu ima iko yavula mu dimbo diene. Uvi Yesu watemesele alandudi enji ha gukatuga mu dimbo dia Yelusalema nu guene gu Yudea.​—Mat. 24:16.

5. Luholo lutshi Phaula wakuatesele Aklisto ha gudilondega mukunda nu lamba diakhalele naye guabuila?

⁵ Phaula wakuatesele Aklisto ha gutadila dimbo dia Yelusalema gifua luholo Yehowa wakhalele guditadila, gutshita ngenyi guakhalele naye guakuatesa ha gudilondega mukunda nu lamba diakhalele naye guabuila. Phaula waawambelele egi Yehowa gakhalelego luko musuanguluga nu nganga-nzambi jiakhalele mutshita mudimo gu tempelo, gakhalelego nji mutshigina milambu yakhalele muhanewa guene. (Heb. 8:13) Athu avula a mu dimbo diene atunyile gawo Masiya. Athu akhalelego luko nu funu ya guya gu Yelusalema ha gukombelela Yehowa handaga Yelusalema nu tempelo yenji yakhalele naye gushiyiwa.​—Luka 13:34, 35.

6. Mukunda natshi longo dia Phaula didi mu Hebelu 13:5, 6 diakhalele nu ndando mukunda nu Aklisto?

⁶ Tangua Phaula wasonegele enya Hebelu mukanda, Yelusalema yakhalele dimbo diakoma diago. Muenya Roma mumoshi wakhalele musonega mikanda mu tangua diene watamegele Yelusalema egi, “dimbo diabalega lukuma mukatshi dia membo agasue a gu khanda ya mazogelo a kumbi.” Enya Yuda akhalele mu membo ako akhalele muya gu Yelusalema givo nu givo ha gukalagala mawano, ndaga yene yakhalele mukuatesa dimbo ha gukhala nu makuta avula. Yajiya gukhala egi, ndaga yene yakhalele mukuatesa Aklisto ako ha guheta makuta avula. Yajiya nji gukhala egi yene ndaga yatumile Phaula ha guasonegela egi: “Mukhadigo muzumba mbongo mu monyo wenu. Suangulugenu nu ima mudi nayo.” Gungima waawunguluishile laji dimoshi dia Yehowa dia ndando didi muzuela egi: “Ame mbangugutunyigo nga hazonda nu mbangugubembigo nga hazonda.” (Tanga Hebelu 13:5, 6; Mikh. 31:6; Ngi. 118:6) Aklisto akhalele gu Yelusalema nu gu Yudea akhalele naye gusha mutshima gu laji diene. Mukunda natshi? Handaga tangua diazonda gungima dia guheta mukanda wene, akhalele naye gubemba jinzo jiawo, midimo yawo nu ima yawo iko. Akhalele naye guya ha fundo diko ha gusendesa lujingu luhe-luhe, ndaga yene yakhalele naye gukhala lamba diago.

7. Mukunda natshi tudi naye gushila Yehowa mutshima sendese mangino?

⁷ Longo mukunda nu esue: Itshi mbayitubuila mu masugu adi muza? Mavu awa abola mbaashiyiwa tangua “lamba diakola” mbadisendesa. (Mat. 24:21) Tudi naye gusala ya gujinginyina gudi Yehowa nu gukhala ya gudilondega gifua muatshitshile Aklisto a mu siekle ya thomo. (Luka 21:34-36) Mu tangua dia lamba diakola, tuajiya gutotesa jinzo jietu nu ima yetu yagasue. Mu tangua diene tudi naye gusha mutshima egi Yehowa mbagashigo gutubemba nga hazonda. Gutuama egi lamba diakola disendese, tudi naye gumonesa egi tuana shila Yehowa mutshima. Dihule egi: ‘Ndaga ngana kalagala nu mafelela ami ana monesa egi ngana sha mutshima gu umonyi nga gudi Yehowa?’ (1 Tim. 6:17) Tuajiya guzula malongo mu ndaga jiabuidile Aklisto mu siekle ya thomo, handaga mu masugu adi muza mbatutagana nu “lamba diakola” dinyi khenji diabuile galego. Itshi mbayitukuatesa ha gujiya ndaga yagutshita tangua lamba diakola mbadisendesa?

TUMAGELA ATHU ANA GUTUTUAMEZA

8. Malongo atshi Yesu wahanele alandudi enji?

⁸ Tangua Aklisto a gu Hebelu ahetele mukanda waasonegele Phaula, gungima dia ivo yazonda amonele masuta a Roma mujieta dimbo dia Yelusalema. Ndaga yene yaakuatesele ha gujiya egi adi naye gulenga, handaga dimbo dia Yelusalema diakhalele naye gushiyiwa. (Mat. 24:3; Luka 21:20, 24) Na gui Aklisto ene akhalele naye gulengela? Yesu wazuelele egi: “Athu adi gu Yudea alenge ha guya gu milundu.” (Luka 21:21) Membo ene akhalele nu milundu yavula. Itshi yakhalele naye guakuatesa ha gujiya mulundu wa gulengela?

9. Yajiya gukhala egi itshi yatumine Aklisto ha gudihula gula mulundu utshi akhalele naye gulengela? (Tala nji karte.)

⁹ Guakhalele nu milundu yavula Aklisto akhalele naye gulengela; ha gufezegesa, milundu ya gu Samaliya, ya gu Galileya, wa gu Helemona, ya gu Libane nu milundu ya gu khanda ya Yordani. (Tala nji karte.) Gu milundu yene guakhalele nu membo avula. Athu akhalele mutangiza egi gula alengela guene ajiya guhuluga. Ha gufezegesa, dimbo dia Gamala diakhalele ha songi ya mulundu, yakhalele nji lamba ha guya guene. Enya Yuda avula akhalele mutangiza egi dimbo diene diakhalele fundo diabonga dia gulengela. Uvi masuta a gu Roma aluishile dimbo diene nu adishiyile, ashiyile nji athu avula.b

10-11. a) Luholo lutshi Yehowa watuamezele Aklisto a mu siekle ya thomo? (Hebelu 13:7, 17) b) Gubonga gutshi Aklisto ene ahetele tangua atumagele aphangi akhalele mutuameza? (Tala nji gifuanesa.)

¹⁰ Yehowa watuamezele Aklisto mu njila ya athu akhalele mutuameza hungu. Muenya ndunge mumoshi mu jina dia Eusebius wasonegele ndaga jiabuile mu tangua diene. Wasonegele egi, Nzambi wakuatesele aphangi ako a gu Yelusalema mu njila ya nyuma yenji ha gukotelesa egi Aklisto akhalele naye gukatuga gu Yelusalema ha guya gu dimbo dimoshi dia gu Perea diana tamegewa egi Pela. Dimbo dia Pela diakhalele fundo diabonga Aklisto akhalele naye guya. Diakhalelego gualeha nu Yelusalema, yakhalelego nji lamba ha guya guene. Enya mu dimbo diene avula akhalelego enya Yuda, akhalelego nji nu ndaga yajiya guatuma ha guluisa enya Roma.​—Tala karte.

¹¹ Aklisto anyi alengele gu milundu atumagele longo diaahanele Phaula egi adi naye ‘gutumagela athu adi guatuameza’ mu hungu. (Tanga Hebelu 13:7, 17.) Gutumaga guawo guakuatesele ha guhuluga. Luholo akhalele munengena “dimbo didi nu fondasio jia diago” yakotelesa egi Ufumu wa Nzambi, Yehowa gaabembelego.​—Heb. 11:10.

12-13. Luholo lutshi Yehowa watuamezele akombeledi enji mu tangua dia lamba?

¹² Longo mukunda nu esue: Yehowa wana tuameza akombeledi enji mu njila ya aphangi atombele muene. Biblia idi nu mene jiavula jidi mumonesa luholo Yehowa wakalegele athu a gushila mutshima ha gutuameza akombeledi enji mu tangua dia lamba. (Mikh. 31:23; Ngi. 77:20) Mangino, tudi nji nu ijiyishilo yavula idi mumonesa egi Yehowa wana tuameza akombeledi enji mu njila ya athu a gushila mutshima.

¹³ Ha gufezegesa, mu sungi ya misongo ya corona virus, aphangi ana gututuameza atuhanele diago malongo abonga. Aphangi ene ahanele akulu malongo atadila luholo aphangi adi naye gutshita gudibungisa gua mu hungu nu luholo adi naye gulandula gukombelela Yehowa. Mbeji jiazonda gungima dia gusendesa gua misongo yene, tuakalegele ba asamble mu mazuelelo 500; aphangi alanduile programe yene mu njila ya Internet, televizio nga radio. Asamble a luholo elu khenji akalegewe galego. Akombeledi a Yehowa alanduile diago guheta malongo abonga. Ndaga yene yatukuatesele ha gulandula gukhala mu gudivua. Tudi naye gusha mutshima egi, ikhale tuatagana nu malamba a luholo lutshi mu masugu adi muza, Yehowa mbawulandula gukuatesa aphangi ana gututuameza ha guzula badesizio abonga. Katula gushila Yehowa mutshima nu gutumagela malongo enji, makalegelo atshi ako mbaatukuatesa ha gudilondega mukunda nu lamba diakola nu ha guzula badesizio abonga mu tangua diene?

KHALA MUZUMBA APHANGI, KHALA NJI NU KHADILO DIA GUYAMBA ATHU

14. Ha gutadila Hebelu 13:1-3, makalegelo atshi Aklisto akhalele naye gukudisa gutuama egi Yelusalema ishiyiwe?

¹⁴ Mu sungi ya lamba diakola, mbatukhala nu funu ya guzumba aphangi muavula diago. Mu tangua diene, mbayikhala nu ndando ha gulandula gifezegeselo gia Aklisto a gu Yelusalema nu a gu Yudea. Alanduile guzumba aphangi ako muavula. (Heb. 10:32-34) Uvi ivo yazonda gutuama egi dimbo dia Yelusalema dishiyiwe, yatogele egi Aklisto ene alandule gumonesela aphangi’awo khadilo dia ‘guzumba’ nu dia “guyamba” muavula gubalega.c (Tanga Hebelu 13:1-3.) Mu sungi ya lamba diakola, mbatukhala nji nu funu ya guzumba aphangi’etu muavula gubalega.

15. Mukunda natshi Aklisto a gu Yelusalema nu a gu Yudea akhalele naye gudizumba nu gumonesa khadilo dia guyamba?

¹⁵ Tangua masuta a gu Roma ajietele Yelusalema nu akatugile, Aklisto alengele phamba nu ima yazonda. (Mat. 24:17, 18) Tangua akhalele mutshita vayaje ha gulenga gu milundu akhalele naye gudikuatesa. Hahetele ene gu Pela, akhalele naye nji gudikuatesa ha guheta fundo dia gukhala nu midimo. Aphangi avula akhalele nu funu ya ima ya gudia, milele nu fundo dia gukhala. Aklisto ene akhalele naye gumonesa egi ana gudizumba nu gudiyamba gula adikuatesa nu adikhaphela ima.​—Tito 3:14.

16. Luholo lutshi tuajiya gumonesa egi tuana zumba aphangi’etu adi nu funu ya ukuateshi? (Tala nji gifuanesa.)

¹⁶ Longo mukunda nu esue: Guzumba guana gututuma ha gukuatesa aphangi’etu tangua adi nu funu ya ukuateshi. Ha gufezegesa, akombeledi avula a Nzambi akuatesele gale aphangi’awo akhalele nu funu ya ukuateshi handaga alengele ita nga ndo ataganele nu lamba dia mu gisagumuisa. Ahanele aphangi’awo ene ima, aahanele nji gikhesa ha gulandula gukombelela Yehowa. Phangi wa mukhetu wa gu Ukraine walengele gumbo dienji mukunda nu ita, udi muzuela egi: “Ngamonele luholo Yehowa watukuatesele mu njila ya aphangi ha gututuameza nu gutuhana ima tuakhalele nayo funu. Atuyambele nu gusuanguluga guagasue nu atukuatesele tangua tuakhalele gu Ukraine, gu Hongrie nu haha gu Allemagne.” Tangua tuana yamba aphangi’etu nu tuana guakuatesa, tuana monesa diago egi tudi mulandula gifezegeselo gia Yehowa.​—Ish. 19:17; 2 Kol. 1:3, 4.

17. Mukunda natshi guzumba aphangi’etu nu guayamba gudi nu ndando yavula mangino?

¹⁷ Mu tangua dia lamba diakola, mbayitoga egi tuzumbe aphangi’etu muavula gubalega luholo tuana guyikalagala mangino. (Hab. 3:16-18) Yehowa wana gutulongesa ha gukudisa makalegelo gifua guzumba nu guyamba aphangi’etu sendese mangino; makalegelo awa mbaakhala nu ndando yavula mu masugu adi muza.

ITSHI MBAYITUBUILA MU MASUGU ADI MUZA?

18. Luholo lutshi tuajiya gulandula gifezegeselo gia Aklisto alengele dimbo dia Yelusalema?

¹⁸ Gifua luholo mikanda ya histoire yana guyimonesa, Aklisto alengele gu milundu ahulugile tangua dimbo dia Yelusalema diashiyiwe. Abembele dimbo diawo uvi Yehowa gaabembelego. Ndaga yene idi gutulongesa itshi? Tushigo diago mujiya ndaga jiagasue mbajitubuila mu masugu adi muza. Uvi Yesu watutemesele ha gukhala hehi ha gutumaga. (Luka 12:40) Tuajiya nji gutangigiza malongo Phaula wahanele Aklisto a gu Yelusalema nu a gu Yudea nu gukalegela malongo ene gifua luholo Aklisto ene akalegele. Yehowa udi nji gutulaya egi mbagashigo gututuna nga hazonda nga gutubemba. (Heb. 13:5, 6) Tulandulenu gunengena dimbo diana khala ivo nu ivo, yakotelesa egi Ufumu wa Nzambi; ngenyi mbatuheta diago ishimbigo mu Ufumu wene.​—Mat. 25:34.