LONGO DIA 20
LUNGIMBO 7 Yehowa udi Muhuluishi Wetu
Sha Mutshima egi Yehowa Mbawugukuatesa
“Tumbuisenu Nzambi . . . Tata wazala pha nu khenda, Nzambi wa ukuateshi wagasue.”—2 KOL. 1:3.
MU GUHIHIA
Tuza mumona malongo tuajiya guzula mu luholo Yehowa wahanele enya Yuda akhalele mu uhiga gu Babilona gikhesa.
1. Lujingu luakhalele luholo lutshi gudi enya Yuda anyi akhalele mu uhiga gu Babilona?
TANGIZA gale luholo enya Yuda akhalele mu uhiga gu Babilona adivile tangua amonele dimbo diawo mushiyiwa. Ayile nawo mu uhiga gualeha nu gifutshi giawo mukunda nu ndaga jiabola akhalele mukalagala nu jinyi jiakalegele akhakha awo. (2 Gudi. 36:15, 16, 20, 21) Idi yadiago egi ahiga akhalele gu Babilona akhalele nu luendu lua gukalagala midimo yawo. (Yel. 29:4-7) Ikhale ngenyi, lujingu luakhalelego lualeba guene, hene enya Yuda akhalelego mutshigina gukhala guene mayilago. Ndaga yene yakhalele guatuma ha gudivua luholo lutshi? Muenya Yuda mumoshi wagujinginyina gudi Nzambi wazuelele egi: “Gu khulo ya mita mu mavu a Babilona, tuaditumbigile hashi mudila ha guwunguluga Siona.” (Ngi. 137:1) Idi yadiago egi enya Yuda akhalele nu funu ya gikhesa, uvi nanyi wakhalele naye guahana gikhesa giene?
2-3. a) Ndaga itshi Yehowa wakalegele mukunda nu enya Yuda akhalele mu uhiga gu Babilona? b) Itshi tuza muzuelela mu longo edi?
2 Yehowa udi “Nzambi wa ukuateshi wagasue.” (2 Kol. 1:3) Wana zumba akombeledi enji nu wana guahana gikhesa. Yehowa wakhalele mujiya egi enya Yuda ako akhalele mu uhiga gu Babilona, mbaavua gikenene mukunda nu ndaga jiabola akalegele, gungima mbaabalumuna mutshima ha gumukombelela mu luholo luabonga. (Yesh. 59:20) Nyuma ya Yehowa yakuatesele profete Yeshaya ha gusonega ndaga jiatadila enya Yuda ayile mu uhiga gu Babilona ivo gubalega 100 gutuama egi ndaga jiene jikalegewe. Ndaga jiene jidi mu mukanda wa Yeshaya. Mukunda natshi asonegele ndaga jiene? Yeshaya wasonegele egi: “Nzambi wenu udi muzuela egi, ‘Kuatesenu, kuatesenu athu ami.’” (Yesh. 40:1) Yehowa wahanele diago enya Yuda gikhesa mu njila ya profete Yeshaya.
3 Esue nji tuana khala nu funu ya ukuateshi gifua enya Yuda akhalele gu Babilona. Mu longo edi tuza muzuelela maluholo thathu anyi Yehowa waakuatesele: 1) Walayele ha gutotesela athu mbaabalumuna mutshima, 2) wahanele akombeledi enji felela nu 3) waakuatesele ha gutuna guvua woma. Tuza nji mu mona luholo Yehowa wana gutuhana gikhesa mangino gifua enya Yuda.
YEHOWA WANA GUTUTOTESELA NU MUTSHIMA UMOSHI
4. Luholo lutshi Yehowa wamonesele egi udi Nzambi wazala pha nu khenda? (Yeshaya 55:7)
4 Yehowa udi “Tata wazala pha nu khenda.” (2 Kol. 1:3) Wamonesele khadilo diene tangua dialayele muene egi mbawutotesela enya Yuda anyi akhalele mu uhiga gula abalumuna mutshima. (Tanga Yeshaya 55:7.) Wazuelele egi: ‘Uvi mukunda nu guzumba guami gua giamatshidia gunu gushigo nu gisugishilo mbanguguvila khenda.’ (Yesh. 54:8) Luholo lutshi Yehowa wakhalele naye gumonesa khenda jienji? Idi yadiago egi enya Yuda amonele malamba ivo yavula mukunda nu ndaga jiabola akalegele, uvi Yehowa waalayele egi mbaashigo musala gu Babilona mayilago. (Yesh. 40:2) Mbimbi eji jiakhalele naye guhana enya Yuda anyi abalumuine mutshima gikhesa!
5. Mangino ijiyishilo itshi yavula tudi nayo gubalega enya Yuda yana gututshiginyisa egi Yehowa wana gututotesela?
5 Ndaga yene idi gutulongesa itshi? Yehowa wana khala hehi ha gutotesela akombeledi enji nu mutshima umoshi. Mangino tudi nu ndaga jiavula gubalega enya Yuda jiana gututshiginyisa egi Yehowa wana khala hehi ha gututotesela. Mukunda natshi tuazuela ngenyi? Handaga tuana jiya ndaga jiakalegele muene ha gututotesela gubola. Tangua Yeshaya wasonegele profesi yenji, ivo yabalegele yavula, gungima Yehowa watumine Mun’enji ha guhana monyo wenji gifua gibawu mukunda nu athu agasue ana balumuna mutshima. Gibawu giahanele Yesu giana kuatesa hagula Yehowa ‘atutotesele’ gubola, yakotelesa egi, mbawukatula gubola guene mayilago. (Makal. 3:19; Yesh. 1:18; Ef. 1:7) Yehowa udi diago Nzambi wa khenda!
6. Gubonga gutshi tuajiya guheta gula tudi mutangigiza luholo Yehowa wana gututotesela? (Tala nji gifuanesa.)
6 Mbimbi jidi mu Yeshaya 55:7, jiajiya gutukuatesa gula tudi gudisagesa mukunda nu gubola tuakalegele. Athu ako ana landula gudisagesa mukunda nu gubola akalegele ikhale abalumuine gale mutshima. Tuajiya guvua gikenene giene gula tudi mulandula gumona malamba mukunda nu ndaga jiabola tuakalegele. Uvi gula tuabalumuine gale mutshima nu tuabembele gale gukalagala ndaga jiabola, tuajiya diago gusha mutshima egi Yehowa watutotesele. Yadiago gula Yehowa watutotesela gubola, ganago guwunguluga luko gubola guene. (Tala nji Yelemiya 31:34.) Gula Yehowa ganago guwunguluga gubola tuatshitshile mu masugu abalega, esue nji tuajiyilego gudisagesa mukunda nu gubola guene. Yehowa wana zula nu ndando ndaga tudi mukalagala mangino uvi gubola tuakalegele mu masugu abalega ndo. (Ezek. 33:14-16) Gualeha ndo Tata wetu wazala pha nu khenda, mbawukatula malamba agasue tuana tagana nawo mukunda nu gubola tuakalegele.
Yehowa wana zula nu ndando ndaga tudi mukalagala mangino uvi gubola tuakalegele mu masugu abalega ndo (Tala paragrafe 6)
7. Itshi yajiya gututuma ha guwambela akulu gubola tuakalegele?
7 Itshi tudi naye gutshita gula tudi mulandula gudisagesa mukunda nu gubola guakoma tuakalegele uvi tudi mutshita yagasue hagula athu ako ajiyigo gubola guene? Biblia yana gututuma ha gutoga ukuateshi gudi akulu. (Yak. 5:14, 15) Uvi matangua ako yajiya gukhala lamba ha guawambela gubola tuatshitshile. Uvi gula tuabalumuna mutshima nu tudi muwunguluga egi Yehowa nu akulu mbaatukuatesa nu mbaatukalegela ndaga nu guzumba guagasue, mbayitutuma ha guawambela gubola tuakalegele. Tutadilenu luholo Yehowa wakuatesele phangi Arthur,a wakhadile gudisagesa muavula mukunda nu ndaga yabola yakalegele muene. Wazuelele egi: “Ngakhalele mutala pornografi mbeji jiavula diago. Uvi gungima dia gutegelela diskur dimoshi diakhalele mumonesa luholo lua gukhala nu mutshima waphelegeta, ngawambelele mukaji’ami nu akulu gubola guami. Gungima dia guawambela gubola guene ngadivile muabonga, uvi matangua ako ngakhalele gudibela mukunda nu gubola guene. Akulu angukuatesele ha gujiya egi Yehowa gangutunyilego. Yehowa wana gutuhana lubelo handaga wana gutuzumba. Mbimbi jiawo jiabonga jianguhanele diago gikhesa nu jiangukuatesele ha gukotelesa egi Yehowa wangutotesele.” Mangino phangi Arthur udi muvundji wa njila nu mukuateshi wa mudimo. Ndaga yene idi muhana diago gikhesa ha gujiya egi Yehowa wana gututotesela gula tuabalumuna mutshima!
YEHOWA WANA GUTUHANA FELELA
8. a) Felela ditshi Yehowa wahanele enya Yuda akhalele mu uhiga gu Babilona? b) Hagutadila Yeshaya 40:29-31, enya Yuda abalumuine mutshima akhalele naye gudivua luholo lutshi mukunda nu felela diene?
8 Yajiya gukhala egi enya Yuda akhalele mutangiza egi akhalelego luko nu luholo lua guvutuga mu gifutshi giawo. Enya Babilona akhalele Muhinyina Mavu Agasue mu tangua diene, akhalelego mubemba ahiga awo ha guvutuga mu gifutshi giawo. (Yesh. 14:17) Uvi Yehowa wahanele akombeledi enji felela. Waalayele egi mbawazola mu uhiga nu gushigo nga ndaga imoshi yajiya gumukanga njila ha guyitshita. (Yesh. 44:26; 55:12) Gumeso a Yehowa dimbo dia Babilona diakhalelego nu ngolo, diakhalele gifua fuphi ya mavu. (Yesh. 40:15) Gula wafuza fuphi muhehe yana hehumuga. Ndaga yene yakhalele naye guhana enya Yuda gikhesa ba? Yadiago yakhalele naye guahana gikhesa nu guakuatesa mu ndaga jiko. Yeshaya wasonegele egi: ‘Athu ana zegemena gudi Yehowa mbaaheta ngolo.’ (Tanga Yeshaya 40:29-31.) Yadiago felela diakhalele naye guahana gikhesa gifua “njila jia khuyi” jidi muzuga.
9. Ndaga jitshi jiakhalele naye gutuma enya Yuda ha gusha mutshima egi Yehowa mbawutagenesa ndaga jialayele muene?
9 Yehowa wamonesele nji ndaga iko yakhalele naye gutuma enya Yuda akhalele mu uhiga ha gumushila mutshima egi mbawutagenesa ndaga jialayele muene. Ndaga jitshi jiene? Jiakhalele profesi akhalele mujiya jinyi jiatagenesewe. Akhalele mujiya egi enya Asiliya abingile iphuta kumi ya enya Isalele nu ayile nji nawo mu uhiga. (Yesh. 8:4) Amonele luholo enya Babilona ashiyile dimbo dia Yelusalema nu luholo ayile nawo mu uhiga. (Yesh. 39:5-7) Amonele nji luholo Fumu Sedesiase washiyiwe meso nu luholo ayile n’enji mu uhiga gu Babilona. (Yel. 39:7; Ezek. 12:12, 13) Ndaga jiagasue jialayele Yehowa jiatagenesewe. (Yesh. 42:9; 46:10) Ndaga eji jiagasue jiakhalele naye guatuma ha gusha mutshima egi ndaga jialayele Yehowa ha guakula mu uhiga, mbajitagenesewa diago!
10. Itshi yajiya gutukuatesa ha gulandula gukolesa felela dietu mu masugu awa a gisugishilo?
10 Ndaga yene idi gutulongesa itshi? Gula tualeba muila, felela diajiya gutukuatesa ha guheta luko ngolo. Tudi mujinga mu matangua a lamba; tuana tagana nji nu usageshi wa mbalagaji jia Nzambi. Uvi tushigo naye guleba muila, handaga Yehowa watuhanele felela diabonga dia gujinga mayilago mu guhuima nu mu ubambi. Tudi naye gulandula gubamba felela diene mu matangi nu mu mutshima wetu. Gula tuatshitshilego ngenyi, felela diene diajiya gubua vuvunya gifua muthu udi mutala fundo dimoshi diabonga hanze uvi fundo diene dishigo mumonega muabonga handaga vitre ya fenetre idi nu mvindu. Tuajiya “guweva vitre ya fenetre” gula tudi mukolesa felela dietu. Luholo lutshi? Tudi naye guzula tangua dia gutangigiza monyo wabonga mbatuheta mu mavu ahe-ahe. Tuajiya gutanga malongo, gutala video nga gutegelela ngimbo jiana zuelela felela dietu. Tuajiya guwambela Yehowa mu gisambu ndaga tuana tshigina gumona jinyi mbajitagenesewa mu phaladiso.
11. Itshi yakuatesele phangi mumoshi wa mukhetu wakhalele mukata misongo yakola ha guheta luko ngolo?
11 Tutadilenu luholo felela diakuatesele phangi wa mukhetu Joy wakhalele nu misongo yakola. Wazuelele egi: “Tangua ngakhalele muleba muila, ngakhalele muwambela Yehowa luholo ngakhalele gudivua, ngakhalele nji mujiya egi wakhalele gungukotelesa. Yehowa wanguhanele ‘ngolo jiabalega ngolo jia athu.’”(2 Kol. 4:7) Phangi Joy wakhalele gudimona gifua udi mu phaladiso fundo dinyi “gushigo nga muthu mumoshi mbawuzuela egi: ‘Ngudi mukata.’” (Yesh. 33:24) Gula esue nji tuashila Yehowa mutshima nu tuasha matangi’etu mu felela dietu, tuajiya guheta ngolo.
12. Ndaga jitshi jiajiya gututuma ha gusha mutshima egi ndaga jialayele Yehowa mbajitagenesewa? (Tala nji gifuanesa.)
12 Yehowa wana gutuwambela ndaga jiavula jiana gututshiginyisa egi ndaga jialayele muene, mbajitagenesewa gifua luholo luakalegele muene gudi enya Yuda akhalele mu uhiga gu Babilona. Tutangizenu gale profesi jidi mutagenesewa mangino. Ha gufezegesega, tuana mona luholo ngolo jidi muhinyina mavu a mudidi (puissance mondiale anglo-américaine), jidi “gitshinyi giko giakola, gitshinyi giko gialeba.” (Dan. 2:42, 43) Tuana guvua mene jia gudigita gua mavu “khanda nu khanda,” tuana longesa nji lukuma luabonga “ha mavu agasue.” (Mat. 24:7, 14) Luholo tuana mona gutagenesewa gua profesi eji, yana gututshiginyisa egi ndaga jiagasue jialayele Yehowa mbajitagenesewa.
Luholo tuana mona gutagenesewa gua profesi mangino, yana gututshiginyisa egi ndaga jiagasue jialayele Yehowa mbajitagenesewa (Tala paragrafe 12)
YEHOWA WANA GUTUKUATESA HA GUTUNA GUVUA WOMA
13. a) Malamba atshi enya Yuda akhalele naye gutagana nawo mu tangua dia guzoga guawo mu uhiga? b) Gifua luholo Yeshaya 41:10-13 idi guyimonesa, luholo lutshi Yehowa wahanele enya Yuda gikhesa?
13 Yehowa wahanele enya Yuda gikhesa nu felela diabonga, uvi wakhalele mujiya egi mbaatagana nu malamba tangua mbaazoga mu uhiga. Yehowa wadiangele guzuela egi gu gisugishilo gia uhiga wa enya Yuda, fumu mumoshi wa ngolo mbawuluisa ifutshi idi hehi nu Babilona, gungima mbawuluisa nji dimbo dia Babilona. (Yesh. 41:2-5) Enya Yuda akhalele naye guvua woma mukunda nu ndaga yene ba? Ndo, handaga Yehowa wadiangele guwambela akombeledi enji gutuama egi: ‘Ukhadigo nu woma, Ame ngudi nu aye. Udisagesago handaga Ngudi Nzambi waye.’ (Tanga Yeshaya 41:10-13.) Mbimbi ‘Ngudi Nzambi waye’ jidi mukotelesa itshi? Yehowa gakhalelego muwunguluisa enya Yuda egi amukombelele handaga akhalele mujiya egi gutshita ngenyi gudi nu ndando. Uvi wakhalele guawunguluisa egi wakhalele gukhanda yawo.—Ngi. 118:6.
14. Ndaga itshi Yehowa wakalegele ha gukuatesa enya Yuda ha gutuna guvua woma?
14 Yehowa wawambelele nji enya Yuda ha gutuna guvua woma handaga muene udi Nzambi wa Ngolo nu wakhala nu ndunge jiavula. Waawambelele ha gutala dilu dia zala pha nu themua. Waawambelele egi muene wafugile themua nu wana gujiya majina ajio. (Yesh. 40:25-28) Gula Yehowa udi mujiya jina dia themua yagasue, idi mumonesa egi wana jiya akombeledi enji agasue! Gula Yehowa udi nu ngolo jia gufuga themua, ndaga yene idi mumonesa egi udi diago nu ngolo jia gukuatesa akombeledi enji. Yadiago, enya Yuda anyi akhalele mu uhiga akhalelego nu ndaga yajiya guasagesa nga guahana woma.
15. Ndaga itshi Nzambi wadiangele guwambela enya Yuda mu ndaga jiakhalele naye guabuila?
15 Yehowa wawambelele nji akombeledi enji ndaga akhalele naye gukalagala tangua mbaazoga mu uhiga. Mu gitshinyi gia thomo gia mukanda wa Yeshaya, Nzambi wawambelele enya Yuda egi: ‘Nginyenu mu sugu jienu, mujidige ijidigo. Mudisuege mukunda nu tangua diazonda uu nu hahua khabu jiami.’ (Yesh. 26:20) Yajiya gukhala egi enya Yuda akalegele malongo awa tangua Fumu Siluse waluishile Babilona. Yala mumoshi wa muenya Greke wazuelele egi tangua Siluse wanginyile mu dimbo dia Babilona, “wawambelele masuta enji ha gushiya muthu wagasue mbaasanga hanze.” Tangiza luholo athu akhalele mujinga gu Babilona akhalele naye gudivua! Uvi yajiya gukhala egi enya Yuda akhalele mu ubambi handaga atumagele malongo a Yehowa.
16. Mukunda natshi tushigo naye guvua woma mukunda nu ndaga mbajibua mu tangua dia lamba diakola? (Tala nji gifuanesa.)
16 Ndaga yene idi gutulongesa itshi? Gualeha ndo, mbatutagana nu lamba diakola dinyi khenji diabuilegalego. Tangua lamba diene mbadisendesa, athu agasue mbaavua woma nu mbaabua tunga-tunga. Uvi esue akombeledi a Yehowa mbatushigo muvua woma handaga tuana jiya egi Yehowa udi Nzambi wetu. Mbatukhala nu gikhesa handaga mbatujiya egi ‘guhuluishiwa guetu guasuena hehi.’ (Luka 21:28) Tangua ifutshi mbayidibungisa ha gutuluisa, mbatulandula gushila Yehowa mutshima. Yehowa mbawutuma anjelo enji ha gutubamba nu mbawutuhana malongo enji ha gutuhuluisa. Uvi mu luholo lutshi Yehowa mbawutuhana malongo ene? Tushigo mujiya. Yajiya gukhala egi mbatuheta malongo ene mu njila ya mahungu etu. Malongo ene mbaakhala gifua tuangina mu ‘sugu jietu’ fundo mbatukhala mu ubambi. Luholo lutshi tuajiya gudilondega mukunda nu ndaga mbajibua mu masugu adi muza? Tudi naye gukhala nu ufuta wakola nu aphangi’etu a mala nu a akhetu. Tudi naye nji gukhala hehi ha gutumagela utuameji udi mukatuga mu ulondegi wa Yehowa nu gusha mutshima egi Yehowa udi mutuameza ulondegi wenji.—Heb. 10:24, 25; 13:17.
Gujiya egi Yehowa wana khala nu ngolo nu ndunge jia gutubamba, mbayitukuatesa ha gutuna guvua woma mu tangua dia lamba diakola (Tala paragrafe 16)b
17. Luholo lutshi tuajiya gukamba ukuateshi gudi Yehowa?
17 Enya Yuda akhalele mu uhiga ataganele nu malamba, uvi Yehowa waahanele gikhesa. Mbawutshita nji ngenyi gudi esue. Ikhale ndaga ya luholo lutshi mbayitubuila mu masugu adi muza, tudi naye gulandula gukamba ukuateshi gudi Yehowa. Hene tushenu mutshima egi Yehowa wana totesela akombeledi enji a gujinginyina nu mbawutubamba. Tulandulenu gukolesa felela dietu. Tujimbilago egi Yehowa udi Nzambi wetu, tushigo naye guvua woma.
LUNGIMBO 3 Nzambi udi Ngolo Jiami, Felela Diami, Gutshigina Guami
a Mu longo edi, majina ako asombegesewe.
b UKOTELESHI WA GIFUANESA: Aphangi a mala nu a akhetu adibungisa mu hunji diazonda. Tangua adi mutala themua, adi musha mutshima egi Yehowa udi nu ngolo jia gubamba akombeledi enji ikhale adi fundo ditshi.