Gukuata Ufuta nu Aphangi a Aklisto Gudi Ndaga Yabonga Mukunda nu Esue!

1-2. Ndaga itshi Yehowa wana zula nu ndando? Wana gututoga ha gutshita itshi?

LUHOLO tuana kalegela athu ako ndaga luana khala nu ndando gu meso a Yehowa. Yesu wazuelele egi tudi naye guzumba athu ako gifua luholo tuana gudizumba. (Mat. 22:37-39) Yakotelesa egi tudi naye gukalagala ndaga jiabonga gudi athu agasue ikhale athu ene anago gukombelela Yehowa. Gula tuatshita ngenyi mbatumonesa egi tudi mulandula gifezegeselo gia Yehowa Nzambi “handaga muene wana zola muanya gudi athu abola nu gudi athu abonga, wana nogesa mvula gudi athu abonga nu athu abola.”​—Mat. 5:45.

² Yadiago, Yehowa wana zumba athu agasue, uvi wana zumba muavula athu ana kalagala ndaga jiabonga. (Yone 14:21) Wana tshigina egi tulandule gifezegeselo gienji. Wana gututoga ha “guzumba” aphangi etu a mala nu a akhetu “muavula.” (1 Phet. 4:8; Roma 12:10) Guzumba guene gudi luholo lumoshi nu guzumba tuana monesela muenya fami yetu nga futa dietu.

3. Itshi tushigo naye gujimbila yatadila khadilo dia guzumba?

³ Gifua luholo yana toga ngolo hagula mutshi wakunyiwa mu luphango ukule muabonga, luholo lumoshi nji tudi naye gutshita ngolo ha gukudisa guzumba. Mupostolo Phaula wawambelele Aklisto egi: “Landulenu gudizumba gifua aphangi.” (Heb. 13:1) Yehowa wana gututoga ha gulandula gukudisa guzumba guetu gudi aphangi. Mu longo edi, tuza mumona luholo tuajiya gukuata ufuta nu aphangi Aklisto nu luholo tuajiya gulandula gukudisa ufuta wene.

MUKUNDA NATSHI TUDI NAYE GUKUATA UFUTA NU APHANGI?

4. Gifua luholo Ngimbo 133:1 idi guyimonesa, luholo lutshi tuajiya gumonesa egi tudi mulandula guzula gudivua guakhala mukatshi dietu nu aphangi nu ndando? (Tala nji ifuanesa.)

⁴ Tanga Ngimbo 133:1. Tuana gudivua gifua muyimbi wa ngimbo wasonegele egi: ‘Idi ndaga yabonga nu ya gusuanguluga’ ha gukuata ufuta nu athu ana zumba Yehowa. Gifua luholo muthu wajiya gujimbila gumona muthu wakoma wana tala muene masugu agasue, esue nji tuajiya gujimbila gumona gubonga tuana heta tangua tuana khala mu gudivua nu aphangi a mala nu a akhetu. Tuana gudimona nu aphangi’etu a Aklisto muavula mukatshi dia phoso. Luholo lutshi tuajiya gulandula guazula nu ndando? Guzumba guetu mukunda nu aphangi etu a mala nu a akhetu mbagukula gula tudi muzula tangua dia gutangiza luholo muthu wagasue mukatshi dia hungu udi nu ndando.

5. Guzumba tuana gudimonesela guajiya gutuma athu ako ha gutshita itshi?

⁵ Athu ana guza mu gudibungisa mu mbala ya thomo ana gudihula muavula mukunda nu guzumba tuana gudimonesela. Yajiya gukhala egi ndaga yene yana guatuma ha gutshigina egi tudi Aklisto a giamatshidia. Yesu wazuelele egi: “Gula mudi nu guzumba mukatshi dienu, athu agasue mbaajiya egi mudi alandudi ami.” (Yone 13:35) Tutadilenu gifezegeselo gia phangi Chaithra, wakhalele mungina gu université, wakhalele nji mulonguga Biblia nu Matemue a Yehowa. Tangua amuhanele emvitasio ha guya gu asamble a masugu thathu watshiginyile. Gu gisugishilo gia programe ya lusugu lua thomo, wawambelele phangi akhalele mulonguga n’enji Biblia egi: “Mvuaji jiami khenji jianguyambele galego. Uvi gu asamble enu, athu 52 anguyambele mu lusugu lumoshi! Ngakotelesele egi Yehowa wakalegele akombeledi enji ha gungumonesela guzumba. Ndaga yene yangutumine ha gubua nji mukombeledi wenji.” Chaithra walanduile gulonguga giamatshidia, hene wabatijiwe mu 2024. Yadiago tangua athu ana mona makalegelo etu abonga nu guzumba tuana gudimonesela, yana guatuma ha gukombelela Yehowa.​—Mat. 5:16.

6. Luholo lutshi gukhala nu ufuta wakola nu aphangi guana gutubamba?

⁶ Gula tudi mukuata ufuta nu aphangi a mala nu a akhetu tuajiya gukhala mu ubambi. Phaula wawambelele aphangi enji a Aklisto egi: “Landulenu gudihana gikhesa lusugu nu lusugu . . . hagula nga muthu mumoshi gakolesago mutshima mu ngolo jia masumu jiana huiga.” (Heb. 3:13) Gula tualeba muila handaga tushigo luko mutshita ndaga mu luholo luabonga, Yehowa wajiya gukalegela phangi mumoshi ha gutuhana gikhesa. (Ngi. 73:2, 17, 23) Ukuateshi wa luholo elu wana khala nu ndando yavula.

7. Luholo lutshi khadilo dia guzumba diana wenda hamoshi nu khadilo dia gudivua? (Kolosai 3:13, 14)

⁷ Tuana heta gubonga guavula luholo tudi mukatshi dia aphangi ana tshita ngolo ha gudimonesela guzumba. (1 Yone 4:11) Ha gufezegesa, guzumba guana gututuma ha gulandula ‘gukanga mutshima mu ndaga jia athu ako’ nu guana gutukuatesa ha gukhala mu gudivua nu aphangi. (Tanga Kolosai 3:13, 14; Ef. 4:2-6) Tuana khala nu gusuanguluga guavula luholo tuana kombelela Yehowa hamoshi, gusuanguluga gua luholo elu guanago gumonega gudi enya ha mavu awa.

KHALENU GUDINEMESA

8. Luholo lutshi Yehowa wana gutukuatesa ha gukhala mu gudivua nu aphangi’etu?

⁸ Luholo tuana khala mu gudivua nu aphangi a ha mavu agasue, yana khala diago ndaga yagushimana. Yehowa wana gutukuatesa ha guyitshita handaga tushigo athu atagana. (1 Kol. 12:25) Biblia yana zuela egi: “Nzambi wana gumilongesa ha guzumba athu ako.” (1 Tes. 4:9) Yehowa wana gutuwambela mu njila ya mbimbi yenji ndaga tudi naye gutshita ha gukuata ufuta wakola nu aphangi. ‘Nzambi wana gutulongesa’ nji tangua tuana longuga mbimbi yenji nu gukalegela malongo ene. (Heb. 4:12; Yak. 1:25) Yene ndaga Matemue a Yehowa ana tshita ngolo ha gukalagala.

9. Malongo atshi tuajiya guzula mu Roma 12:9-13 mu ndaga yatadila gunemesa athu ako?

⁹ Luholo lutshi mbimbi ya Nzambi yana gutukuatesa ha gukhala nu ufuta wakola nu aphangi? Tutadilenu ndaga Phaula wazuelele mu mukanda wa Roma 12:9-13. (Tanga.) Wazuelele egi “khalenu athu a thomo ha gunemesa athu ako.” Ndaga yene idi mukotelesa itshi? Idi mukolesa egi tudi naye gukhala athu a thomo ha gumonesela athu ako “guzumba”, guatotesela, guamonesela khadilo dia guyamba, guakhaphela ima tudi nayo nu gutshita ndaga jiko. (Ef. 4:32) Hene tushigo naye gunengena egi phamba aphangi asuene hehi nu esue, uvi tudi naye gukhala “athu a thomo” ha gutshita ngenyi. Yesu wazuelele egi: “Muthu udi muhana wana khala nu gusuanguluga guavula gubalega muthu udi muzula.”​—Makal. 20:35.

10. Luholo lutshi tuajiya gumonesa egi tudi ‘munemesa athu ako’? (Tala nji gifuanesa.)

¹⁰ Gungima dia gutuwambela egi tudi naye gukhala athu a thomo ha gunemesa athu ako, Phaula wazuelele luko egi: “Khalenu mukalagala mudimo wakola, mukhadigo imonya.” Muthu wana kalagala mudimo wakola wana khala nu gikhesa. Gula amuhana mudimo umoshi ngenyi, wana tshita yagasue ha guwutagenesa muabonga. Mukanda wa Ishima 3:27, 28 udi muzuela egi: ‘Utunyigo gutshita ndaga jiabonga gudi athu adi nu funu ya ukuateshi gula wajiya guakuatesa.’ Hene, tangua tuana mona muthu udi nu funu ya ukuateshi, tuana tshita yagasue ha gumukuatesa. Tuanago guzuela egi mbatumukuatesa lusugu luko nga gunengena egi muthu muko amukuatese ha fundo dietu.​—1 Yone 3:17, 18.

11. Itshi yajiya gutukuatesa ha gukolesa ufuta wetu nu aphangi?

¹¹ Tuana monesa nji egi tuana nemesa athu ako tangua tuana khala hehi ha guatotesela gula atukalegela ndaga yabola. Efeso 4:26 idi muzuela egi: “Mukhadigo nu khabu uu nu hashiwuga tangua.” Mukunda natshi? Handaga verse 27 idi muzuela egi gula muatshita ngenyi, mbamuhana “Diabulu njila ya gumituma ha gukalagala gubola.” Ndaga yene idi mumonesa egi Yehowa udi gutuwambela tangua diagasue mu njila ya Mbimbi yenji ha gutotesela aphangi. Mukanda wa Kolosai 3:13 udi gututoga ha gulandula “guditotesela nu mutshima wagasue.” Gutotesela athu ako gubola guawo, guana gutukuatesa ha gukolesa ufuta wetu nawo. Gutshita ngenyi guana gutukuatesa ha ‘gukhala hamoshi mu nyuma; nu gukhala mu guhuima gifua ngonji jidi gutujitshiga hamoshi.’ (Ef. 4:3) Idi yadiago egi gula tudi mutotesela athu ako gubola guawo, mbayikuatesa hungu dia Yehowa ha gukhala hamoshi mu guhuima.

12. Luholo lutshi Yehowa wana gutukuatesa ha gutotesela athu ako?

¹² Idi yadiago egi yajiya gukhala lamba ha gutotesela athu atukalegela ndaga yabola. Uvi nyuma ya Nzambi yajiya gutukuatesa ha gutotesela muthu muene. Gungima dia gututoga ha ‘gudizumba mangololo gifua athu a mu fami imoshi’ nu ha ‘gukalagala mudimo wakola,’ Mbimbi ya Nzambi idi muzuela luko egi: “Nyuma ya Nzambi imikuatese ha gukhala nu gikhesa.” Muthu udi mutuamezewa gudi nyuma ya Nzambi wana khala wazala phaa nu gikhesa. Yadiago, nyuma ya Nzambi yajiya gutukuatesa ha guzumba aphangi mangololo gifua athu a mu fami imoshi nu yajiya nji gutukuatesa ha gutotesela athu ako nu mutshima wagasue. Hene, tuana toga Yehowa ha gutukuatesa ha gutotesela athu ako.​—Luka 11:13.

“MUKHADIGO NU UKHAPHUMUNYI MUKATSHI DIENU”

13. Itshi yajiya gubata ukhaphumunyi mukatshi dietu?

¹³ Hungu dia Yehowa diana khala nu “athu a maluholo agasue” ana jinga mu mafundo a gudisha. (1 Tim. 2:3, 4) Gula tuamoneselego gutema, gudisha guene guajiya gubata ukhaphumunyi mukatshi dietu mu ndaga gifua, luholo lua gusudiga, lua gudisembega, luholo tudi mutshigina gusagewa nga saga tudi mutomba. (Roma 14:4; 1 Kol. 1:10) Luholo ‘Nzambi wana gutulongesa ha guzumba athu ako,’ tushigo naye guwambela aphangi ako ha gutshita ndaga phamba luholo tuana tshigina nga gumona egi luholo luetu lua gukalagala ndaga ludi luabonga gubalega athu ako.​—Fili. 2:3.

14. Itshi tudi naye gukalagala tangua diagasue? Mukunda natshi?

¹⁴ Tuajiya nji gutshita yagasue hagula egi ukhaphumunyi ukhadigo mukatshi dietu gula tudi muhana aphangi gikhesa tangua diagasue. (1 Tes. 5:11) Masugu awa, aphangi avula anyi akhalelego luko mulongesa lukuma luabonga nga anyi akhalelele hanze dia hungu, avula adi muvutuga. Tuana guatagana nu mutshima wagasue! (2 Kol. 2:8) Tutadilenu gifezegezelo gia phangi mumoshi wa mukhetu wajile luko mu gudibungisa gu Inzo ya Ufumu gungima dia ivo 10. Wazuelele egi: “Aphangi asuangulugile muavula ha gungumona luko, hene akhalele mu muemueta nu gunguhana mbote.” (Makal. 3:19) Luholo lutshi guzumba gua aphangi guamukuatesele? Udi muzuela egi: “Yangukuatesela ha gukotelesa egi Yehowa wakhalele mukita yagasue ha gula egi nguhete luko gusuanguluga.” Klisto wajiya gutukalegela ha guhana ngolo gudi athu adi ‘aguhuila nu adi mubata inemo’ gula tudi nu khadilo dia guhana aphangi gikhesa.​—Mat. 11:28, 29.

15. Ndaga itshi iko yajiya gutukuatesa ha gukhala mu gudivua? (Tala nji gifuanesa.)

¹⁵ Luholo luetu lua guzuela ludi nji mukatshi dia ndaga jiajiya gutukuatesa ha gukhala mu gudivua nu aphangi. Mukanda wa Yobo 12:11 udi muzuela egi: ‘Matshui ana vua mbimbi jidi muzuelewa gufula gifua luholo dimi diana vua ima ya gudia gufula.’ Gifua luholo muthu wana telega ima wana dianga guyilola ha gujiya gula ima yene idi yafula gutuama dia guyihana athu ako, tudi naye nji gutanginza diago muabonga gutuama dia guzuela. (Ngi. 141:3) Tudi naye guzula desizio dia guzuela tangua diagasue mbimbi jiana hana gikhesa nu gusuanguluga gudi ‘athu adi gujitegelela.’​—Ef. 4:29.

16. Akuatshi adi naye gukhala athu a thomo ha guhana athu ako gikhesa mu mbimbi jiawo?

¹⁶ Mvuaji jidi naye gumonesa gutema tangua jidi muzuela. Adi naye guzuela mbimbi jidi muhana gikhesa. (Kol. 3:19, 21; Tito 2:4) Akulu nji adi naye gutshita yagasue ha guhana imeme ya Yehowa gikhesa. (Yesh. 32:1, 2; Gal. 6:1) Gishima gimoshi gia Biblia giana zuela egi: ‘Mbimbi yazuelewa mu tangua diabonga yana hana gusuanguluga guavula sha!’​—Ish. 15:23.

GUZUMBA “GUDI NAYE NJI GUKHALA GUA GIAMATSHIDIA”

17. Luholo lutshi tuajiya gumonesa egi guzumba guetu mukunda nu aphangi gudi gua giamatshidia?

¹⁷ Mupostolo Yone wazuelele egi tushigo naye “guzumba athu phamba gu kano, uvi guzumba gudi naye gumonega mu makalegelo, gudi naye nji gukhala gua giamatshidia.” (1 Yone 3:18) Tuana tshigina egi guzumba guetu mukunda nu aphangi gukhale gua giamatshidia. Luholo lutshi tuajiya guyikalagala? Gula tudi mubalegesa tangua hamoshi nu aphangi a mala nu a akhetu, mbatubua mafuta nu guzumba guetu mbagukola. Hene, khala mukamba ba okazio ha gubalegesa tangua nu aphangi, yajiya gukhala mu gudibungisa gua mu hungu nga mu mudimo wa gulongesa. Khala nji nu khadilo dia guya mutala aphangi. Gula tudi mutshita ngenyi, mbatumonesa egi ‘Nzambi wana gutulongesa ha guzumba athu ako.’ (1 Tes. 4:9) Mbayitukuatesa ha gukotelesa egi ‘idi ndaga yabonga nu ya gusuanguluga egi athu a Nzambi akhale hamoshi mugudivua!’​—Ngi. 133:1.