1924—Ivo 100 Yabalega Gale
BULLETIN ya mu Janvier 1924 yakhalele mumonesa egi: “Mu gisendeselo gia givo giagasue yana khala tangua diabonga mukunda nu Muklisto wagasue wabatijiwe gale ha gukamba maluholo a gudihana muavula mu mudimo wa Yehowa.”a Mu givo giene, Alongugi a Biblia akalegele longo edi mu maluholo mbadi: amonesele gikhesa nu akalegele ba metode ahe-ahe ha gulongesa lukuma luabonga.
AKHALELE MULONGESA NU RADIO
Aphangi a gu Betele atshitshile mudimo ivo yavula ha gutunga antene a radio WBBR gu Staten Island, gu New York. Thomo alondele fundo, gungima atungile inzo imoshi yakoma mukunda nu athu akhalele mutshita mudimo ha fundo diene, atungile nji inzo iko mukunda nu ikadigilo ya mudimo. Tangua amanesele mudimo wene, azudile ikadigilo iko yakhalele nu ndando ha gutshitshila mudimo gu radio. Uvi ataganele nu malamba avula.
Yakhalele lamba mukunda nu aphangi ha gutunga antene akoma. Antene akhalele nu ulehelo wa ba metre 91, yakhalele mutoga egi ahage antene ene ha katshi na katshi dia mitshi mbadi, mitshi yene yakhalele naye gukhala nu ulehelo wa ba metre 61. Mbala ya thomo abingilego. Uvi aphangi ashidile Yehowa mutshima, gungima abingile ha gutunga antene ene. Phangi Calvin Prosser wakhalele mukatshi dia athu atshitshile mudimo wene, wazuelele egi: “Nga tuatungile antene ene muabonga mbala ya thomo, nga tuadisunzuile egi: ‘Talenu mudimo tuatshita!’” Aphangi ahanele lutumbu luagasue gudi Yehowa mukunda nu mudimo atshitshile. Uvi aphangi ene ataganele nji nu malamba ako avula.
Adi muhaga antene a radio WBBR
Gulongesa mu radio guakhalele metode ihe-ihe, yakhalelego nji ndaga ya leba ha gusumba ikadigilo ya ndando ha gukalegela mudimo wene. Uvi aphangi ahetele ikadigilo ikulu inyi muthu mumoshi wakhalele mukalegela hehi nawo. Ha fundo dia gusumba mikro, akalegele mikro ya telefone. Lusugu lumoshi mu phipha mu mbeji ya mbadi, aphangi alolele gukalegela ikadigilo yene yagasue. Akhalele nu funu ya programe imoshi ha gusha gu radio, hene asendesele guyimba ngimbo jia Ufumu. Phangi Ernest Lowe udi mumonesa ndaga jiabonga jiabalegele mu lusugu luene. Wazuelele egi tangua akhalele muyimba, phangi Rutherfordb wakhalele gualandula mu radio luholo akhalele muyimba waatamegele, uvi muene wakhalele gu Brooklyn mu ulehelo wa ba kilometre 25.
Phangi Rutherford watuwambelele egi: “Bembenu gusha matululu akola ngenyi. Majui enu adi muzoga gifua mudi mukaluluga!” Aphangi avuile musonyi hene abembele guyimba mbala imoshi. Uvi akhalele mujiya egi radio yakhalele mutshita, akhalele nji hehi ha gumba programe iko hagula athu ategelele.
Mu 24 Fevrier 1924, phangi Rutherford wazuelele egi mbaakalegela radio yene ha gutshita mudimo Klisto waahenele ha gutshita. Wamonesele egi ashile radio yene ha “gukuatesa athu agasue ha gukotelesa malongo a Biblia nu ha gujiya muabonga sungi ya ndando akhalele mujinga.”
Koko dia mama: Phangi Rutherford udi mu studio ya thomo
Koko dia tata: Ikadigilo akhalele mulondela radio
Metode ene a thomo aphangi akalegele ha gulongesa, akuatesele athu avula. Aphangi akalegele radio yene ivo 33 ha gulongesa lukuma luabonga lua Ufumu.
AMONESELE NU GIKHESA GIAGASUE EGI MAFUMU A IKOMBELELO AKHALELE ENYA MAMBO
Mu Juillet 1924, Alongugi a Biblia adibungishile ha gutshita asamble gu dimbo dia Colombie gu Ohio. Alongugi a Biblia akatugile mu mafundo avula a ha mavu, ategelele ba diskur mu mazuelelo avula gifua Arabe, anglais, français, allemand, grec, hongrois, italien, lituanien, polonais, russe, mazuelelo a Scandinavie nu mu ukrainien. Luholo athu ako akhalele mutegelela ba diskur ene mu radio, aphangi atogele enya radio imoshi ya gu Ohio ha gusonega ndaga jiakhalele mubalega gu asamble ene lusugu nu lusugu.
Asamble akalegewe gu Columbus mu dimbo dia Ohio mu givo 1924
Mu lusugu lua Nguana 24 Juillet, aphangi a mala nu a akhetu gubalega 5 000 ayile mulongesa mu dimbo diakhalele mukalegewa asamble. Ahanele mikanda gubalega 30 000 nu asendesele gulonguga Biblia nu athu 1000. Inzo Yaleha ya Mutaledi yatamegele lusugu luene egi: “Lusugu lua gusuanguluga guavula lua asamble.”
Mu lusugu lua Thano 25 Juillet guabalegele nji ndaga iko ya gusuanguluga, phangi Rutherford watangele nu gikhesa giagasue mukanda umoshi wakhalele mumonesa makalegelo abola a mafumu a ikombelelo haphelo. Wazuelele egi Nzambi mbawukalegela Ufumu wenji ha gushimbiga athu a ha mavu, uvi mafumu a politike, a ikombelelo nu enya mungenda ana kanga athu njila ha gujiya giamatshidia giatadila Ufumu wene. Wazuelele luko egi athu ene adi athu abola, handaga akhalele mukuatesa Organisation des Nations unies nu akhalele muzuela egi Nzambi wana kalegela organizasio wene ha guhinyina mavu. Alongugi a Biblia akhalele naye gumonesa gikhesa ha gulongesa malongo ene.
Gungima, longo dimoshi diakhalele mu Inzo Yaleha ya Mutaledi dia zuelele egi: “Asamble ene akalegewe gu Columbus akolesele gutshigina gua aphangi a mala nu a akhetu . . . , ahetele nji gikhesa gia gulongesa ngatshima akhalele mutagana nu usageshi.” Phangi Leo Claus wayile nji gu asamble ene, wazuelele egi: “Gungima dia asamble tuakhalele nu gusuanguluga ha gulongesa lukuma luene.”
Kopi ya trakte yakhalele mumonesa haphelo ndaga jia mambo jiakhalele mulongesa enya ikombelelo
Mu Octobre, Alongugi a Biblia asendesele gukhapha trakte jiavula jiakhalele jia gusonega ndaga phangi Rutherford watangele ha gumonesa haphelo mambo a mafumu a ikombelelo. Phangi Frank Johnson wamanesele guhana trakte jiene nu wakhalele naye gunengena minuta 20 hagula aphangi ako aze amusange mu dimbo dia Oklahoma, mu gifutshi gia Etats-Unis. Yakhalele gingonza gudi muene ha gukhala fundo dia athu avula, handaga athu a mudimbo diene akhalele nu khabu mukunda nu malongo alongesele muene, akhalele gumukamba. Phangi Johnson wayile gudisuega mu église imoshi yakhalele hehi. Guakhalelego nga muthu mumoshi mu église yene, hene phangi Johnson wabembele trakte hakatshi dia Biblia ya mulongeshi nu ha nguasa yagasue. Watshitshile ndaga jiene mu phushi diago. Uvi luholo gakhalele nu tangua diavula, wayile mu ba église ako mbadi, watshitshile nji luholo lumoshi.
Gungima, phangi Frank Johnson wavutugile ha fundo akhalele naye gudimona nu aphangi ako. Wadisuegele gungima dia pompe ya esanse (Station service) uvi wakhalele mutala athu akhalele muza gungima dienji. Athu ene amukambele uvi amumonelego. Tangua avutugile, aphangi ako akhalele mulongesa hehi n’enji, ajile ha gumuzula hene ayile gawo.
Phangi mumoshi wa yala wakhalele mukatshi dia aphangi ene wazuelele egi: “Tangua tuakhalele mukatuga ha fundo diene, tuabalegele hehi nu ba église anyi thathu.” Guakhalele nu athu hehi nu 50 akhalele agumagana gutuama dia église yagasue. Athu ako mukatshi diawo akhalele mutanga trakte jiene, uvi ako ajituphudile gosa ha gujiwambela mulongeshi wawo. Tuakatugile hene muphushi ha gutuna milonga! Tuahanele Yehowa mersi luholo luatukuatesele muene ha gulongesa lukuma luabonga uvi nu gukuatewa ndo.”
AKHALELE MULONGESA NU GIKHESA GIAGASUE MU GIFUTSHI GIKO
Józef Krett
Alongogi a Biblia alanduile gulongesa mu gifutshi giko nu gikhesa giagasue. Phangi Józef Krett walongesele athu akhalele mutshita mudimo gu ba mine a gu nord ya France. Wakalegele diskur diakhalele nu muto wa lumene egi: “Gualeha ndo Athu Agufua Mbaafuzumuga.” Tangua aphangi akhalele muhana emvitasio, fumu mumoshi wa gikombelelo wawambelele enya gikombelelo gienji egi ayigo guene. Uvi athu ene amuvidilego. Athu gubalega 5 000 nu nganga-nzambi mumoshi ayile mutegelela diskur diene! Phangi Krett wawambelele nganga-nzambi muene ha guzuelela gutshigina guenji, uvi watunyile genji. Gungima dia diskur diene, phangi Krett wahanele athu mikanda yagasue akhalele nayo handaga athu ene akhalele mutshigina gujiya ndaga jiavula jiatadila Mbimbi ya Nzambi.—Amosa 8:11.
Claude Brown
Phangi Claude Brown wayile gu Afrique mu gifutshi giana tamegewa mangino egi Ghana, ha gulongesa lukuma luabonga. Badiskur enji nu mikanda yakhalele muene muhana athu, yakuatesele athu a mu gifutshi giene ha gujiya lukuma luabonga muphushi. John Blankson wakhalele mulonguga ha gusendesa gusumbisa ihemba mu pharmacie, wayile nji ha gutegelela diskur dia phangi Brown. Gungima wakotelesele muphushi egi waheta giamatshidia. John udi muzuela egi: “Giamatshidia giene giangusuanguluishile muavula, hene ngasendesele guwambela athu ako avula ndaga jiene gu khalasa.”
John Blankson
John wakotelesele muabonga egi Biblia yanago gulongesa egi Nzambi udi Uthathu. Hene, lusugu lumoshi wayile gu église anglicane ha guhula nganga-nzambi muhu watadila longo diene. Nganga-nzambi wamukayele, wamuwambelele mangololo egi: “Ushigo Muklisto, udi muenya mudimo wa Diabulu. Zoga haha!”
Tangua John wahetele gu inzo, wasonegele nganga-nzambi muene mukanda, wamutogele ha gutagana n’enji ha fundo dia athu avula ha guzuelela ndaga yatadila uthathu. Nganga-nzambi muene wawambelele John ha guya gu biro dia ndombi mumoshi wakhalele nu ginemo giakoma gu khalasa. Ndombi muene wamuhudile ha gujiya gula wasonegele nganga-nzambi mukanda.
John wamuwambelele egi “ayi ngamusonegela.”
Ndombi muene washinjigile John ha gusonegela nganga nzambi egi amutotesele. Hene John wasonegele nganga-nzambi muene egi:
“Ndombi wami wangutogi ha gugusonegela egi wungutotesele, ngudi hehi ha gugusonegela ngenyi, uvi udi naye gutshigina egi wana longesa malongo a mambo.”
Ndaga yene yasagesele ndombi muene muavula hene wahudile John egi “yene ndaga udi mutshigina gusonega ba?”
Wazuelele egi: “Ayi.”
Ndombi muene wamuwambelele egi: “Udi naye gukayewa gu khalasa.Udi mutangiza egi wajiya gusala gu école eyi gula udi mulandula guzuela ndaga jiabola mukunda nu nganga-nzambi munu guvernema yana kuatesa ba?”
John wamuhudile egi: “Tangua wana gutulongesa, gula tuakoteleselego muabonga tuanago guguhula mihu ba?”
Ndombi wamuvutudile egi: “Ayi muana tshita ngenyi.”
John wawambelele ndombi egi: “Yene ndaga ngatagana nayo. Nganga-nzambi wakhadi gutulongesa ndaga jiatadila Biblia, hene ngamuhudi muhu. Gula gashigo nu mvutu yaguhana, na mukunda natshi ngudi naye gusonega mukanda ha gumutoga pardo?”
John wasalele gu école yene, uvi gasonegelego mukunda ha gutoga pardo.
ALONGUGI A BIBLIA AKHALELE HEHI HA GUTSHITA MIDIMO YAVULA
Mukunda nu ivo ya mudimo, Inzo Yaleha ya Mutaledi ya zuelele egi: “Gifua Davidi tuajiya guzwela egi: ‘Wanguhanyi ngolo jia gulua ita.’ (Ngimbo 18:39) Mu givo giene tuahetele diago gikhesa handaga tuamonele luholo Yehowa watukuatesele mu mudimo wenji. Akombeledi enji a giamatshidia akhalele nu gusuanguluga guavula ha gulongesa lukuma luabonga.”
Gungima dia ivo yene, aphangi ahetele fundo diko dia guhaga radio. Ayihagele hehi nu dimbo dia Chicago. Radio yene yakhalele mutamegewa egi WORD, inyi idi mukotelesa egi mbimbi. Handaga akhalele mulongesa Mbimbi ya Nzambi guene. Mu tangua diene akhalele mukalegela ikadigilo yabonga yakhalele mukuatesa athu ha gutegelela lukuma luabonga lua Ufumu mu mafundo a gualeha, ikhale uu nu gu nord ya gu Canada.
Mu givo 1925, Yehowa wakuatesele Alongugi a Biblia ha gukotelesa muabonga ndaga jihe-jihe jiatadila mukanda wa Gumonesa mukhapho 12. Mukunda nu usombegeshi wene, athu ako abembele gawo gukombelela Yehowa. Uvi athu ako avula asuangulugile luholo akotelesele muabonga ndaga jiabalegele mu dilu nu luholo ndaga jiene jiakhalele mutadila akombeledi a Nzambi ha mavu.
a Mangino yana tamegewa egi: Lujingu nu Mudimo wa Uklisto—Mukanda wa Gukalegela mu Gudibungisa.
b Phangi J. F. Rutherford wakhalele mutuameza Alongugi a Biblia mu tangua diene, wakhalele mutamegewa egi “Nzuji” Rutherford. Gutuama egi asendese mudimo gu Betele, wakhalele mutshita mudimo gifua nzuji wakoma gu Huitième Cour de circuit judiciaire du Missouri.