Landula Gifezegeselo gia Anjelo a Gujinginyina Gudi Yehowa

1-2. a) Mu ndaga jitshi tudi yagudisha nu anjelo? b) Mu ndaga jitshi tuana khala luholo lumoshi nu anjelo?

TANGUA Yehowa wagunanele mu giamatshidia, wagunginyishile mu fami yenji idi nu akombeledi enji a maluholo a gudisha nu ana gudizumba. Mukatshi dia enya fami yene mudi nji nu anjelo avula a gujinginyina gudi Yehowa. (Dan. 7:9, 10) Mbala jiavula, tangua tuana zuelela anjelo tuana tangiza luholo ana khala a gudisha nu esue. Ha gufezegesa, anjelo asendesele gujinga ivo yavula gutuama egi tufugiwe. (Yobo 38:4, 7) Ana khala nu ngolo jiavula gutubalega. Adi agijila nu ana tshita ndaga jiabonga jinyi esue tuajiyilego gutshita.​—Luka 9:26.

² Ikhale anjelo ana khala a gudisha nu esue mu ndaga jiavula, uvi mu ndaga jiko tudi nawo luholo lumoshi. Ha gufezegesa, esue nji tuajiya gulandula makalegelo abonga a Yehowa gifua anjelo. Tuana khala nu luendu lua guditombela ndaga. Muthu nu muthu mukatshi dietu wana khala nu jina dienji nu makalegelo enji, tuana khala nu inemo ya gudisha mu mudimo wa Yehowa gifua ene. Tuana khala nji nu nzala ya gukombelela Mufugi wetu.​—1 Phet. 1:12.

3. Malongo atshi tuajiya guzula mu gifezegeselo gia anjelo a gujinginyina?

³ Luholo tudi nu ndaga jiavula jidi gudivua nu anjelo, gifezegeselo giawo giabonga giajiya gutuhana gikhesa nu gutukuatesa. Tuajiya nji guheta malongo avula mu khadilo diawo. Mu longo edi, tuza mumona luholo tuajiya gulandula gifezegeselo gia gudibulumuisa gia anjelo a gujinginyina nu guzumba guawo mukunda nu athu. Tuza nji mumona khadilo diawo dia gukolesela nu luholo ana tshita ngolo ha gulandula gubamba hungu hagula dikhale diaphelegeta.

ANJELO ANA KHALA NU KHADILO DIA GUDIBULUMUISA

4. a) Luholo lutshi anjelo ana monesa khadilo dia gudibulumuisa? b) Mukunda natshi anjelo ana khala nu khadilo diene? (Ngimbo 89:7)

⁴ Anjelo a gujinginyina gudi Yehowa ana khala nu khadilo dia gudibulumuisa. Adi nu eksperianse nu ngolo jiavula nu ndunge, uvi ana landula utuameji wa Yehowa. (Ngi. 103:20) Tangua ana tagenesa inemo yawo, anago gudisunzula ha gumonesa egi adi nu ngolo gubalega athu. Ana suanguluga ha gukalagala gutshigina gua Yehowa ikhale athu ako ashigo mujiya majina awo.a (Gis. 32:24, 29; 2 Maf. 19:35) Anago gutshigina egi nga muthu mumoshi a ahane lutumbu ludi naye guhanewa gudi Yehowa. Mukunda natshi anjelo ana khala nu khadilo dia gudibulumuisa? Handaga ana zumba Yehowa nu ana gumunemesa muavula.​—Tanga Ngimbo 89:7.

5. Luholo lutshi muanjelo wamonesele khadilo dia gudibulumuisa ha tunyishile muene Yone ha gumukombelela? (Tala nji gifuanesa.)

⁵ Tutadilenu gifezegeselo gidi mumonesa luholo anjelo ana monesa khadilo dia gudibulumuisa. Hehi nu givo 96 Gungima dia Guvalewa gua Yesu (G.Y.), muanjelo mumoshi jina dienji dishigo mujiyiwa wamonesele mupostolo Yone ndaga jia gushimana. (Gumo. 1:1) Itshi Yone wakalegele tangua diamonele muene ndaga jiene? Wafugamele ha gukombelela muanjelo muene. Uvi muanjelo wamuzugishile mu phushi, wamuwambelele egi: “Ndo! Utshitshigo ngenyi! Ame nji ngudi muhiga gifua aye nu muhiga wa aphangi’aye . . . Kombelela Nzambi!” (Gumo. 19:10) Muanjelo muene wakhalele diago nu khadilo dia gudibulumuisa! Gakhalelego mutshigina egi amutumbuise nga amukombelele. Wawambelele Yone mbala imoshi ha gukombelela Yehowa. Muanjelo muene gatangijilego egi udi nu ndando yavula gubalega Yone. Ikhale wakhalele mukombelela Yehowa sendese mualeha nu wakhalele nu ngolo jiavula gubalega Yone, uvi wamonesele khadilo dia gudibulumuisa nu wamuwambelele egi, ame nji ngudi muhiga gifua aye. Ikhale muanjelo watunyishile Yone ha gumukombelela, uvi gazuelelego n’enji mu luholo luabola. Wazuelele n’enji nu gisemo giagasue. Yajiya gukhala egi muanjelo wakotelesele egi Yone wamufugamele mukunda nu ndaga jia gushimana jiamonele muene.

6. Luholo lutshi tuajiya gulandula khadilo dia gudibulumuisa dia anjelo?

⁶ Luholo lutshi tuajiya gulandula khadilo dia gudibulumuisa dia anjelo? Esue nji tuajiya gutagenesa inemo yavula mu mudimo wa Yehowa, uvi tushigo naye gudisunzula nga gukamba lutumbu. (1 Kol. 4:7) Tushigo naye nji gumona egi tuabalega athu ako handaga tuana kalegela Yehowa sendese mualeha nga ndo tudi nu inemo inyi ene ashigo naye. Hene gula tudi nu inemo yavula, tudi naye gumonesa khadilo dia gudibulumuisa. (Luka 9:48) Tuana tshigina gukuatesa athu ako gifua anjelo. Tushigo naye gutuma athu ha gutangiza egi tudi nu ndando yavula guabalega.

7. Luholo lutshi tuajiya gumonesa khadilo dia gudibulumuisa tangua tudi muhana muthu longo?

⁷ Tuajiya nji gumonesa khadilo dia gudibulumuisa gula tudi mutshigina guhana longo gudi phangi mumoshi nga gudi mun’etu. Matangua ako, yajiya gutoga egi tangua tudi muhana muthu longo tumuwambele ndaga haphelo. Uvi tushigo naye guzuela ndaga jiajiya gumulebesa muila, tudi naye guzuela nu gisemo giagasue gifua muatshitshile muanjelo watunyishile Yone ha gumukombelela. Gula tushigo gudimona gifua tuabalega athu ako, mbayitukuatesa ha guahana malongo adi mukatuga mu Biblia nu guzumba nu ginemua giagasue.​—Kol. 4:6.

ANJELO ANA ZUMBA ATHU

8. a) Hagutadila Luka 15:10, itshi idi mumonesa egi anjelo ana zumba athu? b) Luholo lutshi anjelo ana gutukuatesa tangua tuana khala mu mudimo wa gulongesa? (Tala nji holu dia gizula.)

⁸ Anjelo ana gudisagesa muavula mukunda nu athu, ana guazumba nji muavula. Ana khala nu gusuanguluga gula muthu wakalegele gubola wabalumuna mutshima nga ndo muthu wabembele gukombelela Yehowa wavutuga mu hungu. Ana suanguluga nji gula muthu walonguga Biblia wasombegesa makalegelo enji ha gukombelela Yehowa. (Tanga Luka 15:10.) Anjelo ana gutukuatesa nji tangua tuana khala mu mudimo wa gulongesa. (Gumo. 14:6) Ngatshima ene ajiyilego guzuela nu athu, uvi ajiya gututuameza gudi athu adi mutshigina gulonguga ndaga jiatadila Yehowa. Uvi tuajiyilego diago guzuela egi anjelo atutuameza gudi muthu mumoshi ngenyi. Handaga Yehowa wajiya gutukuatesa mu maluholo ako gifua mu njila ya nyuma yenji ha gukuatesa athu adi mutshigina gumujiya nga gutuameza akombeledi enji. (Makal. 16:6, 7) Uvi anjelo ana gutukuatesa tangua tuana longesa. Hene tangua tudi mulongesa lukuma luabonga, tudi naye gusha mutshima egi tudi mutshita mudimo wene hamoshi nu anjelo.​—Tala galuanda: “Nzambi Wahanele Mvutu gu Isambu Yawo.”b

9. Luholo lutshi tuajiya gulandula khadilo dia guzumba dia anjelo?

⁹ Luholo lutshi tuajiya gulandula khadilo dia guzumba dia anjelo? Gula tuavua egi phangi mumoshi wavutuga mu hungu, tudi naye gusuanguluga gifua luholo anjelo ana suanguluga. Tudi naye gutshita ngolo ha gumonesa phangi wavutuga mu hungu egi tuana gumuzumba nu tuasuanguluga luholo ludi muene mukalegela luko Yehowa. (Luka 15:4-7; 2 Kol. 2:6-8) Tudi naye nji gutshita ngolo ha gulongesa lukuma luabonga ha gulandula gifezegeselo gia anjelo. (Mulo. 11:6) Gifua luholo anjelo ana gutukuatesa mu mudimo wa gulongesa lukuma luabonga, esue nji tudi naye gukuatesa aphangi a mala nu a akhetu mu mudimo wa gulongesa. Ha gufezegesa, tuajiya guya mu mudimo wa gulongesa nu phangi munu gashigo nu eksperianse yavula. Nga ndo, tuajiya gukuatesa aphangi a gukola nga adi nu ukhashi hagula ene nji ajiya gulongesa lukuma luabonga.

10. Longo ditshi tuajiya guzula mu eksperianse ya phangi Sara?

¹⁰ Itshi tuajiya gutshita gula tushigo luko nu luholo lua gutshita muavula mu mudimo wa Yehowa? Tuajiya gusha mutshima egi anjelo mbaalandula gutukuatesa mu mudimo wa gulongesa. Tuzuelelenu eksperianse ya phangi Sarac wana khala gu Inde. Watshitshile mudimo wa muvundji wa njila ivo 20, gungima wasendesele gukata, gakhalelego luko nu luholo lua guwenda nga lua guzuga. Ndaga yene yamusagesele muavula. Uvi wahetele luko gikhesa handaga aphangi a mu hungu diawo akhalele gumukuatesa, muene hakhenji wakhalele nji muzula tangua dia gulonguga Biblia. Wakambele nji maluholo ako ahe-ahe a gulongesa lukuma luabonga. Wakhalele mulongesa gu telefone handaga gakhalelego nu luholo lua guditumbiga ha gusonega mikanda. Watamegele athu anyi asuangulugile nu giamatshidia, athu ene amuwambelele egi gudi nji nu athu ako adi mutshigina gulonguga Biblia. Gubonga gutshi phangi muene wahetele? Gungima dia mbeji jiazonda, wahetele athu 70 a gulonguga nawo Biblia! Uvi gakhalelego nu luholo lua gulongesa athu ene agasue. Hene, wawambelele aphangi ako a mu hungu ha gulonguga nu athu ako. Athu avula mukatshi dia athu ene ana guya gale mu gudibungisa gua mu hungu. Anjelo ana suanguluga muavula ha gutshita hamoshi nu aphangi a mala nu a akhetu anyi ana tshita yagasue ha gulongesa lukuma luabonga gifua phangi Sara!

ANJELO ANA KOLESELA

11. Mu ndaga jitshi anjelo a gujinginyina ana kolesela?

¹¹ Anjelo a gujinginyina ana hana gifezegeselo giabonga mu ndaga yatadila gukolesela. Sendese mualeha, ana kolesela mu ndaga jiabola jiana kalegewa. Amonele luholo Satana nu anjelo ako avula akhalele mutshita nawo mudimo hamoshi alumbugidile Yehowa. (Gis. 3:1; 6:1, 2; Yuda 6) Biblia yana zuelela muanjelo mumoshi wa gujinginyina waluile masugu avula nu demo dimoshi dia ngolo. (Dan. 10:13) Sendese tangua Adama nu Eva afugiwe, anjelo ana mona phamba athu azonda ana tomba ha gukombelela Yehowa. Ikhale ngenyi, anjelo a gujinginyina ana landula gukombelela Yehowa nu gusuanguluga nu gikhesa giagasue. Ana jiya egi Nzambi mbawumanesela ndaga jiagasue jiabola mu tangua diatagana.

12. Itshi yajiya gutukuatesa ha gukolesela?

¹² Luholo lutshi tuajiya gulandula khadilo dia anjelo dia gukolesela? Gifua anjelo, tuajiya gumona ndaga jiabola jidi mukalegewa nga ndo tuajiya gutagana nu usageshi. Esue nji tudi musha mutshima egi Yehowa mbawukatula ndaga jiagasue jiabola mu tangua diatagana. Hene gifua anjelo a gujinginyina, mbatubembigo “gukalagala ndaga jiabonga.” (Gal. 6:9) Nzambi wana gutulaya egi mbawutukuatesa ha gukolesela. (1 Kol. 10:13) Tuajiya gutoga Yehowa ha gutuhana nyuma yenji hagula itukuatese ha gumonesa khadilo dia guhuiminyina nu ha gukhala nu gusuanguluga. (Gal. 5:22; Kol. 1:11) Itshi tudi naye gutshita gula tuatagana nu usageshi? Tudi naye diago gushila Yehowa mutshima, tushigo naye guvua woma. Yehowa mbawutukuatesa nu mbawutuhana ngolo.​—Heb. 13:6.

ANJELO ANA TSHITA YAGASUE HAGULA HUNGU DIA YEHOWA DIKHALE DIA PHELEGETA

13. Ginemo gitshi Yehowa wahanele anjelo mu masugu awa a gisugishilo? (Matayo 13:47-49)

¹³ Yehowa wahanele anjelo ginemo gimoshi gia ndando mu masugu awa a gisugishilo. (Tanga Matayo 13:47-49.) Ha mavu a mudidi athu avula ana suanguluga nu lukuma luabonga. Athu ako ana tshita ngolo ha gubua akombeledi a Yehowa, uvi ako ana tuna gawo. Anjelo ahanewe ginemo gia ‘gukhaphumuna athu abola nu athu abonga.’ Idi mukotelesa egi Yehowa waahanele ginemo gia gubamba hungu hagula dilandule gukhala dia phelegeta. Uvi ishigo mukotelesa egi athu ana bemba gukombelela Yehowa ikhale mukunda nu ndaga itshi ajiyilego guvutuga luko mu hungu. Ishigo nji mukotelesa egi mu hungu milonga mbayihua. Uvi tudi naye gusha mutshima egi anjelo ana tshita ngolo hagula hungu dilandule gukhala diaphelegeta.

14-15. Luholo lutshi tuajiya gulandula gifezegeselo gia anjelo nu gumonesa egi tuana tshigina egi hungu dikhale diaphelegeta? (Tala nji gifuanesa.)

¹⁴ Luholo lutshi tuajiya gulandula gifezegeselo gia anjelo mu ndaga yatadila gubamba hungu hagula dikhale diaphelegeta? Tudi naye gutshita ngolo ha gukolesa ufuta wetu nu Yehowa. Ha guyitshita, tudi naye gukuata ufuta nu athu ana gumuzumba; tushigo naye gutshita ndaga yajiya gubolesa ufuta wetu n’enji. Gula tuatshita ngenyi, hungu mbadikhala diaphelegeta. (Ngi. 101:3) Tuajiya nji gukuatesa aphangi’etu Aklisto ha gusala ya gujinginyina gudi Yehowa. Ha gufezegesa, itshi tuajiya gutshita gula tuajiya egi phangi mumoshi wakalagala gubola guakoma? Guzumba guetu mukunda nu phangi muene gudi naye gututuma ha gumuwambela ha guya mutela akulu ndaga yene. Uvi gula phangi muene watuna genji, tudi naye guya muwambela akulu ndaga yene. Tuana tshigina egi aphangi’etu anyi ashigo luko nu ufuta wabonga nu Yehowa ahete ukuateshi mu tangua diatagana!​—Yak. 5:14, 15.

¹⁵ Ndaga ya lamba idi egi aphangi ako ana kalagala gubola guakoma ana zolewa mu hungu. Gula ndaga ya luholo elu yabua, tushigo naye ‘gukuata nawo ufuta’.d (1 Kol. 5:9-13) Gutshita ngenyi guana bamba hungu hagula dikhale diaphelegeta. Hene gula tushigo mukuata ufuta nu aphangi azolewe mu hungu, mbayimonesa egi tuana guazumba. Gula tuazula desizio dia gutuna gudibungisa nawo, yajiya guakuatesa ha guvutugila luko Yehowa. Gula avutugila Yehowa, tuana khala nu gusuanguluga, Yehowa nu anjelo nji ana suanguluga.​—Luka 15:7.

16. Luholo lutshi tuajiya gumonesa egi tudi mulandula gifezegeselo gia anjelo?

¹⁶ Idi diago luendu luakoma luholo Yehowa wana gutukuatesa ha gulonguga ndaga jiatadila anjelo nu luholo tuana tshita nawo mudimo hamoshi! Hene, tulandulenu makalegelo awo abonga gifua: Gudibulumuisa, guzumba guawo mukunda nu athu, khadilo diawo dia gukolesela nu luholo ana tshita ngolo hagula hungu dia Yehowa dikhale diaphelegeta. Gula tudi mulandula gifezegeselo gia anjelo awa agujinginyina, tuajiya gusala mukatshi dia fami ya akombeledi a Yehowa mayilago.