Mukunda Natshi Yesu Wakhalele Muzula Jina dia Yehowa nu Ndando?

1-2. a) Ndaga itshi Yesu wakalegele mu phipha ya gisugishilo gutuama egi afue? b) Mihu itshi tuza mutadila mu longo edi?

MU NGUEZE ya lusugu lua nguana 14 Nisana ya givo 33 Gungima dia Guvualewa gua Yesu (G.Y.), Yesu wakhalele naye gukuatewa, gubetewa, gusophesewa, gufuishiwa milonga, gukhokhewa ha mutshi nu gushiyiwa. Wakhalele wamanesela gale gudia gua mu ngueze nu apostolo enji a gujinginyina gu sugu ya gosa. Gungima dia gudia, Yesu wawambelele apostolo enji mbimbi jidi muhana gikhesa. Gutuama egi akatuge gu sugu ya gosa, Yesu wakalegele gisambu gia ndando yavula. Tuajiya gutanga gisambu giene mu mukanda wa Yone mukhapho 17.

² Mu longo edi tuza muhana mvutu gu mihu eyi: Malongo atshi tuajiya guzula mu gisambu giakalegele Yesu? Ndaga jitshi jiakhalele gumusagesa gutuama egi afue? Ndaga itshi yakhalele nu ndando yavula gudi muene hakhalele muene ha mavu? Tutadilenu mvutu jia mihu eyi.

“NGAAJIYISHILE JINA DIAYE”

3. Itshi Yesu wazuelele mukunda nu jina dia Yehowa? Itshi Yesu wakhalele mutshigina guzuela? (Yone 17:6, 26)

³ Mu gisambu giakalegele Yesu wazuelele egi: “Ngaajiyishile jina diaye.” Wajiyishile jina dia Yehowa gudi alandudi enji mbala jiyadi. (Tanga Yone 17:6, 26.) Itshi Yesu wakhalele mutshigina guzuela? Wakhalele nu funu ya guawambela jina dinyi akhalelego mujiya ba? Alandudi a Yesu akhalele enya Yuda, ndaga yene idi mumonesa egi akhalele ajiyile gale egi jina dia Nzambi didi Yehowa. Jina diene didi mbala jiavula mu Gitshinyi gia Biblia Giasonegewe mu Hebelu. Yesu gakhalelego mutshigina gualongesa jina dia Nzambi uvi wakhalele mutshigina guakuatesa ha gujiya gula jina diene didi mukotelesa itshi. Wakhalele mutshigina guakuatesa ha gujiya Yehowa muabonga, yakotelesa egi ndaga jialayele muene, ndaga jiana tshita muene nu makalegelo enji anyi athu ako ajiyilego gukotelesa.

4-5. a) Luholo lutshi jina dia muthu diajiya gubua nu ndando yavula? Hana gifezegeselo. b) Itshi yakuatesele alandudi a Yesu ha gujiya Yehowa muabonga?

⁴ Tangiza egi mudi nu mukulu mumoshi mu hungu dienu jina dienji David, phangi muene udi nji docteur. Uvi lusugu lumoshi wakata misongo idi mutoga egi usagewe mu phushi. Waya gu opitale fundo diana tshita phangi muene, gungima phangi muene watshita yagasue ha guguhuluisa. Wajiya gusendesa gumutamega mu majina avula ba? Ayi! Phangi David udi mukulu wana jiya gale sendese mualeha uvi udi nji docteur wahuluishile monyo waye.

⁵ Luholo lumoshi nji, alandudi a Yesu akhalele ajiyile gale egi jina dia Nzambi didi Yehowa. Uvi ajiyile ukoteleshi wa jina diene muabonga tangua Yesu waakuatesele. Mukunda natshi tuazuela ngenyi? Handaga Yesu wakhalele muzuela nu gukalagala ndaga gifua Sh’enji. Apostolo ajiyile Yehowa muabonga tangua akhalele mutegelela luholo Yesu wakhalele mulongesa nu gumona luholo luakhalele muene mukalegela athu ndaga.​—Yone 14:9; 17:3.

“JINA DIAYE DINYI WANGUHANELE”

6. Mu luholo lutshi Yehowa wahanele Yesu jina Dienji? (Yone 17:11, 12)

⁶ Mu gisambu giakalegele Yesu, watogele mukunda nu alandudi enji egi: “Abambe mukunda nu jina diaye dinyi wanguhanele.” (Tanga Yone 17:11, 12.) Ndaga yene idi mukotelesa egi Yesu wakhalele naye gutamegewa egi Yehowa ba? Ndo sha. Tangua Yesu wazuelele egi “jina diaye,” idi mumonesa egi wakhalele mukalegela jina dia Yehowa. Hene jina dia Yehowa diabuilego jina dia Yesu. Na itshi Yesu wakhalele mutshigina guzuela hazuelele muene egi ngamiwambelele jina dia Nzambi? Thomo Yesu wakhalele mumoneshi nu muzueledi wa Yehowa. Wajile mu jina dia Shi’enji nu wakalegele ndaga jiavula mu ngolo jia Yehowa. (Yone 5:43; 10:25) Ndaga ya mbadi idi egi, jina dia Yesu diana kotelesa egi “Yehowa Udi muhuluishi.” Jina dia Yesu diana khala nu jina dia Yehowa mukatshi.

7. Hana gifezegeselo gidi mumonesa egi Yesu wakhalele muzueledi wa Yehowa.

⁷ Ha gukotelesa mukunda natshi Yesu wakhalele muzueledi wa Yehowa, tutadilenu gifezegeselo egi: Fumu wajiya gutuma muthu ha guwambela athu ako ndaga jidi gumutadila. Tangua muthu muene udi muzuela yajiya gukhala gifua fumu udi muzuela. Luholo lumoshi nji, Yesu wakhalele mumoneshi wa Yehowa nu wakhalele muwambela athu jina dia Yehowa.​—Mat. 21:9; Luka 13:35.

8. Mukunda natshi Yehowa wazuelele egi Yesu wakhalele mutshita mudimo mu jina dienji gutuama egi aze ha mavu? (Guzoga 23:20, 21)

⁸ Biblia idi mutamega Yesu egi Mbimbi handaga Yehowa wakhalele gumutuma ha guwambela anjelo nu athu ndaga jiakhalele mutshigina muene egi ajiye nu atshite. (Yone 1:1-3) Yajiya gukhala egi Yesu wakhalele muanjelo munu Yehowa watumile ha guhana enya Isalele ima akhalele nayo funu tangua akhalele mu mavu a luselenga. Tangua Yehowa wawambelele enya Isalele ha gutumagela muanjelo muene, wazuelele egi: “Muene udi mutshita mudimo mu jina diami.”a (Tanga Guzoga 23:20, 21.) Yehowa wazuelele ngenyi handaga Yesu wakhalele mumoneshi wenji nu wakhalele muthu wa thomo watumbuishile nu wanemesele jina dienji.

“TATA, TUMBUISA JINA DIAYE”

9. Luholo lutshi Yesu wamonesele egi wakhalele muzula jina dia Yehowa nu ndando yavula? Kotelesa.

⁹ Gifua luholo tuayizuelela, Yesu wakhalele muzula jina dia Yehowa nu ndando yavula ikhale gutuama egi aze ha mavu. Tangua Yesu wakhalele ha mavu, wamonesele mu ndaga jiagasue egi jina dia Yehowa diakhalele nu ndando yavula! Wazuelele gu gisugishilo gia mudimo wenji ha mavu egi: “Tata, tumbuisa jina diaye.” Mu tangua diene, dijui diazogele mu dilu egi: “Ngaditumbuishile gale nu mbanguditumbuisa luko.”​—Yone 12:28.

10-11. a) Luholo lutshi Yesu watumbuishile jina dia Sh’enji? (Tala nji gifuanesa.) b) Mukunda natshi jina dia Yehowa didi naye gunemesewa nu gumonesa egi ndaga jiazuelele Satana jidi jia mambo?

¹⁰ Yesu watumbuishile nji jina dia Sh’enji. Luholo lutshi? Wayikalegele tangua diawambelele muene athu ako makalegelo nu midimo ya Sh’enji. Yesu gasugilego phamba ha gutumbuisa jina dia Sh’enji uvi watshitshile ndaga jiko. Wakhalele naye nji gunemesa jina dia Sh’enji nu gumonesa egi ndaga jiazuelele Satana mukunda nu Yehowa jiakhalele jia mambo.b Yesu wamonesele egi gunemesa jina dia Sh’enji gudi nu ndando tangua dialongelesele muene alandudi enji luholo lua gukombelela. Wazuelele egi: “Tata wetu udi mu dilu, jina diaye dinemesewe.”​—Mat. 6:9.

¹¹ Mukunda natshi jina dia Yehowa didi naye gunemesewa nu gumonesa egi ndaga jiazuelele Satana jidi jia mambo? Handaga sendese mu gilanga gia Edene, Satana wazuelele ndaga jia mambo mukunda nu Yehowa Nzambi. Satana wazuelele egi Yehowa udi muenya mambo nu wasuegele Adama nu Eva ndaga jiabonga. (Gis. 3:1-5) Satana wazuelele nji egi utuameji wa Yehowa ushigo wabonga. Ndaga jiene jia mambo jiabolesele lukuma lua Yehowa nga jina dienji. Mu masugu a Yobo Satana wazuelele egi, athu ana kombelela Yehowa handaga wana guahana ima adi nayo funu. Mambo ene amonesele egi gushigo nga muthu mumoshi wajiya gusala ya gujinginyina gudi Yehowa gula watagana nu malamba. (Yobo 1:9-11; 2:4) Yakhalele mutoga tangua hagula athu akotelese gula Yehowa nga Satana udi muenya mambo.

“NGUDI MUHANA MONYO WAMI”

12. Itshi Yesu wakalegele ha gumonesa egi wakhalele muzumba Yehowa?

¹² Luholo Yesu wakhalele muzumba Yehowa, watshitshile yagasue ha gunemesa jina dia Yehowa nu gumonesa egi ndaga jiazuelele Satana jidi jia mambo. Yesu wazuelele egi: “Ngudi muhana monyo wami.” (Yone 10:17, 18) Idi yadiago egi Yesu watshiginyile guhana monyo wenji mukunda nu jina dia Yehowa.c Adama nu Eva akhalele athu a thomo atagana, alumbugile Yehowa nu ayile gukhanda ya Satana. Uvi Yesu gakalegelego ngenyi, wamonesele egi wakhalele muzumba Yehowa nu watshiginyile guza ha mavu. Yesu wamonesele ndaga yene luholo luatumagele muene Yehowa mu ndaga jiagasue jiakalegele muene nu mu guzuela guenji. (Heb. 4:15; 5:7-10) Wasalele nji ya gujinginyina gudi Yehowa uu nu hafuile muene ha mutshi wa lamba. (Heb. 12:2) Ngenyi wamonesele egi wakhalele muzumba Yehowa nu jina dienji.

13. Mukunda natshi Yesu wakhalele muthu watagana ha gumonesa egi Satana udi muenya mambo? (Tala nji gifuanesa.)

¹³ Tangua Yesu wakhalele ha mavu, wamonesele mu ndaga jiagasue egi Satana udi muenya mambo uvi Yehowa ndo! (Yone 8:44) Yesu wakhalele mujiya Yehowa muabonga gubalega athu agasue. Gula nga ndaga jiazuelele Satana jiakhalele jia giamatshidia, Yesu wakhalele naye nji gujiya ndaga jiene. Uvi watshitshile yagasue ha gumonesa egi ndaga jiagasue jiazuelewe mukunda nu Yehowa jiakhalele jia mambo. Yesu wakhalele hehi ha guhana monyo wenji ha fundo dia gutuna Sh’enji munu gakhalele muzumba muavula ikhale mu tangua yakhalele mumonega gifua Yehowa wamubembele.​—Mat. 27:46.d

“NGAMANESELA MUDIMO WANGUHANELE”

14. Luholo lutshi Yehowa washimbigile Yesu luholo luasalele muene ya gujinginyina gudi muene?

¹⁴ Mu gisambu giakalegele Yesu mu phipha gutuama egi afue, wazuelele egi: “Ngamanesela mudimo wanguhanele ha gukalagala.” Yesu wakhalele musha mutshima egi Yehowa mbawumushimbiga gula wasala ya gujinginyina gudi muene. (Yone 17:4, 5) Yesu wakhalele diago mushila Sh’enji mutshima. Yehowa gabembelego egi Yesu asale mu malumba. (Makal. 2:23, 24) Wamufuzumuine nu wamukanduishile holu dia ima yagasue mu dilu. (Fili. 2:8, 9) Gungima, Yesu wabuile Fumu wa Ufumu wa Nzambi. Ndaga itshi Ufumu wene mbawutshita? Mu gisambu gialongesele Yesu alandudi enji, mu gitshinyi gia mbadi wazuelele egi: “Ufumu waye uze, gutshigina guaye gukalegewe ha mavu gifua mu dilu.”​—Mat. 6:10.

15. Ndaga jitshi Yesu mbawukalagala?

¹⁵ Gualeha ndo, Yesu mbawuluisa mbalagaji jia Nzambi nu mbawushiya athu abola mu ita ya Alemagedona. (Gumo. 16:14, 16; 19:11-16) Gungima, mbawumba Satana mu “wina ushigo nu gisugishilo,” hagula gakalagalago luko nga ndaga yabola. (Gumo. 20:1-3) Mu Uhinyinyi wa Yesu wa Ivo 1000, mbawubatela athu guhuima nu mbawaabuisa athu atagana. Mbawufuzumuna athu a gufua nu mbawubuisa mavu agasue phaladiso. Ndaga jialayele Yehowa mbajitagenesewa!​—Gumo. 21:1-4.

16. Ndaga jitshi mbajikalegewa gu gisugishilo gia Uhinyinyi wa Ivo 1000 wa Yesu?

¹⁶ Monyo mbawukhala gikhuatshi gu gisugishilo gia Uhinyinyi wa Ivo 1000 wa Yesu? Gubola mbagukhadigo luko, athu mbaabua athu atagana. Athu mbaashigo luko mutoga egi aatotesele gubola guawo mu njila ya gibawu gia Yesu. Mbaashigo nji mukhala nu funu ya Aklisto ambiwe maji mu nyuma nga Yesu udi Nganga-nzambi Wakoma ha guakuatesa ha gukhala nu ufuta wakola nu Yehowa. Yesu “mbawukatula gufua, handaga gufua gudi mbalagaji yetu ya gisugishilo.” Malumba mbaasala a githuhu, athu a gufua mbaafuzumuga. Athu agasue ha mavu mbaabua athu atagana.​—1 Kol. 15:25, 26.

17-18. a) Itshi mbayibua gu suga ya Uhinyinyi wa Ivo 1000? b) Itshi Yesu mbawukalagala tangua mbaamanesela guhinyina? (1 Kolinto 15:24, 28) (Tala nji gifuanesa.)

¹⁷ Ndaga jitshi jiko mbajikalegewa gu gisugishilo gia Uhinyinyi wa Ivo 1000 wa Yesu? Ndaga imoshi ya ndando mbayikalegewa. Giphapha giazolele Satana mukunda nu jina dia Yehowa mbagisuga. Luholo lutshi? Satana wazuelele mu gilanga gia Edene egi Yehowa udi muenya mambo nu ganago gutuameza athu nu guzumba. Sendese mu tangua diene, akombeledi a Yehowa ana nemesa jina dienji, ana nji guditumbuisa. Hene, gu gisugishilo gia Uhinyinyi wa Ivo 1 000, jina dia Yehowa mbadiwevewa diago gu ndaga jia mambo jiazuelele Satana. Yehowa mbawumonesa diago egi wakhala Tata wa guzumba.

¹⁸ Gu gisugishilo gia Uhinyinyi wa Ivo 1000 wa Yesu, athu agasue mbaajiya egi ndaga jiagasue jiazuelele Satana mukunda nu Yehowa jiakhalele jia mambo. Itshi Yesu mbawukalagala tangua mbaamanesela guhinyina? Mbawulandula gifezegeselo gia Satana ha gulumbugila Yehowa ba? Ndo! (Tanga 1 Kolinto 15:24, 28.) Yesu mbawuvutula Ufumu gudi Sh’enji. Mbawubembela Yehowa ha guhinyina. Yesu gashigo gifua Satana handaga muene mbawukhala hehi ha gubembela Yehowa Ufumu wagasue handaga wana gumuzumba.

19. Mukunda natshi Yesu wakhalele muzula jina dia Yehowa nu ndando?

¹⁹ Idi yadiago egi Yehowa watshiginyile guhana Yesu jina Dienji! Yesu wamonesele egi wakhalele mumoneshi watagana wa Sh’enji. Mukunda natshi Yesu wakhalele muzula jina dia Yehowa nu ndando? Handaga diakhalele nu ndando yavula gudi muene gubalega ima yagasue. Wakhalele hehi ha gufua mukunda nu jina dia Yehowa nu mbawukhala hehi ha guvutula Ufumu gu gisugishilo gia Uhinyinyi wa Ivo 1000. Luholo lutshi tuajiya gulandula gifezegeselo gia Yesu? Mbatuheta mvutu ya muhu owu mu longo dialandula.