LONGO DIA 23
LUNGIMBO 2 Jina Diaye Yehowa
Mukunda Natshi Tudi Naye Guzula Jina dia Yehowa nu Ndando?
‘Mudi matemue ami, ame ngamitombele ha gukhala enya mudimo ami.’—YESH. 43:10.
MU GUHIHIA
Tuza mumona ndaga tuajiya gutshita ha gumonesa egi jina dia Yehowa didi dia gijila nu ndaga jiagasue jiazuelele Satana jidi jia mambo.
1-2. Luholo lutshi tudi mujiya egi Yesu wakhalele muzula jina dia Yehowa nu ndando yavula?
YESU wakhalele muzula jina dia Yehowa nu ndando yavula gubalega ima yagasue. Wakhalele muthu wa thomo watshitshile egi jina dia Yehowa dijiyiwe muavula. Mu longo diabalega, tuamonele egi Yesu wakhalele hehi ha gufua mukunda nu jina dia Yehowa nu wamonesele egi Yehowa wana tshita ndaga mu luholo luatagana. (Mako 14:36; Heb. 10:7-9) Gu gisugishilo gia Uhinyinyi wa Ivo 1000, Yesu mbawuvutula Ufumu gudi Yehowa ha gutumbuisa jina dienji. (1 Kol. 15:26-28) Mu ndaga jiagasue jiakalegele Yesu, wamonesele egi wakhalele muzumba Yehowa muavula.
2 Yesu wajile ha mavu ha gulongesa ndaga jiatadila Yehowa. (Yone 5:43; 12:13) Wakuatesele alandudi enji ha gujiya muabonga jina dia Yehowa. (Yone 17:6, 26) Walongesele nu wakalegele ndaga jia gushimana mu jina dia Yehowa. (Yone 10:25) Yesu watogele Yehowa ha gubamba alandudi enji, wazuelele egi “abambe mukunda nu jina diaye.” (Yone 17:11) Yesu wakhalele muzula jina dia Nzambi nu ndando yavula gubalega ima yagasue. Luholo lutshi muthu wajiya gumonesa egi udi mulandudi wa Yesu gula gashigo mujiya nu gukalegela jina dia Sh’enji?
3. Itshi tuza muzuelela mu longo edi?
3 Luholo tudi Aklisto a giamatshidia, tuana landula gifezegeselo gia Yesu tangua tuana zumba nu tuana nemesa jina dia Yehowa. (1 Phet. 2:21) Mu longo edi tuza mumona mukunda natshi Yehowa wahanele jina dienji gudi athu ana longesa “lukuma . . . luabonga lua Ufumu.” (Mat. 24:14) Tuza mumona nji mukunda natshi muthu wagasue mukatshi dietu udi naye guzula jina dia Yehowa nu ndando.
ATHU “MUKUNDA NU JINA DIENJI”
4. a) Ndaga itshi Yesu wawambelele alandudi enji gutuama egi avutuge mu dilu? b) Muhu utshi tuza muzuelela mukunda nu ndaga yene?
4 Gutuama egi Yesu avutuge mu dilu, wawambelele alandudi enji egi: “Mbamuheta ngolo tangua nyuma ya Nzambi mbayimijila, enue mbamukhala matemue ami gu Yelusalema nu gu Yudea yagasue nu gu Samaliya, uu nu mu mafundo a gualeha a ha mavu.” (Makal. 1:8) Hene, lukuma luabonga luakhalelego naye gulongesewa phamba gu Isalele uvi luakhalele naye nji gulongesewa mafundo agasue. Ngenyi athu a mu ifutshi yagasue akhalele naye guheta luendu lua gubua alandudi a Yesu. (Mat. 28:19, 20) Uvi Yesu wazuelele egi: “Enue mbamukhala matemue ami.” Alandudi ene ahe-ahe akhalele naye gujiya jina dia Yehowa nga akhalele naye gukhala phamba matemue a Yesu? Lumene ludi mu mukanda wa Makalegelo mukhapho 15 luza gutukuatesa ha guheta mvutu ya muhu owu.
5. Luholo lutshi apostolo nu akulu a gu Yelusalema amonesele egi athu agasue adi naye gujiya jina dia Yehowa? (Tala nji gifuanesa.)
5 Mu givo 49 Gungima dia Guvualewa gua Yesu (G.Y.), apostolo nu akulu adibungishile ha guzuelela ndaga enya ifutshi iko akhalele naye gutshita ha gubua Aklisto. Ha gusugisa mulonga wene, Yakoba phangi’a Yesu wazuelele egi: “[Phetelo] wazuedi muabonga luholo Nzambi watangijile enya ifutshi mbala ya thomo ha gutomba athu mukatshi diawo mukunda nu jina dienji.” Jina ditshi Yakoba wakhalele muzuelela? Gungima dia gutanga profete Amose, wazuelele luko egi: “Hagula athu anyi asala angukambe ame Yehowa nu mutshima umoshi, hamoshi nu enya ifutshi yagasue, athu adi mutamegewa mu jina diami. Ame Yehowa ngudi muzuela.” (Makal. 15:14-18) Alandudi ene ahe-ahe akhalelego naye gujiya phamba jina dia Yehowa uvi akhalele naye nji ‘gutamegewa mu jina dienji.’ Ndaga yene idi mukotelesa egi akhalele naye gulongesa athu ako jina dia Nzambi nu gutamegewa mu jina diene.
Tangua hunji dia akulu atuameji a mu siekle ya thomo adibungishile, akotelesele egi Aklisto adi naye gutamegewa mu jina dia Nzambi (Tala paragrafe 5)
6-7. a) Mukunda natshi Yesu wajile ha mavu? b) Ndaga itshi iko ya ndando yatshitshile egi Yesu aze ha mavu?
6 Jina dia Yesu didi mukotelesa egi: “Yehowa Udi Muhuluishi.” Mu njila ya Yesu, Yehowa mbawuhuluisa athu adi musha gutshigina gudi muene nu gudi Mun’enji. Yesu wajile ha mavu ha guhana monyo wenji mukunda nu athu. (Mat. 20:28) Tangua diahanele muene gibawu, wahanele athu luendu lua guhuluishiwa nu lua guheta monyo wa ivo nu ivo.—Yone 3:16.
7 Mukunda natshi athu akhalele nu funu ya gibawu? Akhalele nu funu ya gibawu mukunda nu ndaga jiakalegelewe mu gilanga gia Edene. Gifua luholo tuayizuelela mu longo diabalega, Adama nu Eva mvuaji jietu jia thomo alumbugidile Yehowa nu atotesele luendu lua gukhala nu monyo wa mayilago. (Gis. 3:6, 24) Yesu wajile ha mavu ha guhuluisa athu, uvi wakalegele nji ndaga imoshi ya ndando yavula. Satana wabolesele diago jina dia Yehowa. (Gis. 3:4, 5) Hene guhuluga gua ana a Adama nu Eva guakhalele naye gukuatesa athu ha gunemesa jina dia Yehowa. Handaga Yesu wakhalele mumoneshi wa Yehowa nu wazudile jina Dienji, wakalegele nji ndaga jiagasue Yehowa wakhalele mutshigina egi atshite.
Luholo lutshi muthu wajiya gumonesa egi udi mulandudi wa Yesu gula gashigo mujiya nu gukalegela jina dia Sh’enji?
8. Ndaga itshi alandudi agasue a Yesu adi naye gujiya?
8 Aklisto agasue adi naye gujiya egi guhuluga guawo guana katuga gudi Yehowa Nzambi. (Yone 17:3) Ene nji adi naye gutamegewa mu jina dia Yehowa gifua Yesu. Adi naye nji gujiya egi gunemesewa gua jina dia Yehowa gudi nu ndando yavula. Adi naye gukalagala ngenyi ha guhuluishiwa. (Makal. 2:21, 22) Hene, alandudi agasue a gujinginyina a Yesu akhalele naye gulonguga ha gujiya Yehowa nu Yesu muabonga. Gishina giene Yesu wasugishile gisambu gienji gidi mu mukanda wa Yone mukhapho 17 nu mbimbi eji: “Ngaajiyishile jina diaye, mbangudijiyisa luko, hagula guzumba guwanguzumbile gukhale mukatshi diawo, hagula ame nu ene tukhale nu gudivua guabonga.”—Yone 17:26.
‘MUDI MATEMUE AMI’
9. Luholo lutshi tuajiya gumonesa egi tudi muzula jina dia Yehowa nu ndando?
9 Ha gukhala alandudi a Yesu, tudi naye gunemesa jina dia Yehowa. (Mat. 6:9, 10) Tudi naye guzula jina dia Yehowa nu ndando yavula gubalega ima yagasue. Tuajiya guyimonesa mu ndaga tudi mutshita mukunda nu ene. Luholo lutshi tuajiya gunemesa jina dia Yehowa nu gumonesa egi ndaga jiazuelele Satana jidi jia mambo?
10. Ndaga jitshi Yeshaya mukhapho 42 uu nu 44 udi muzuelela? (Yeshaya 43:9; 44:7-9) (Tala nji gifuanesa.)
10 Mukanda wa Yeshaya mukhapho 42 uu nu 44 udi gutukuatesa ha gujiya ndaga tudi naye gutshita ha gunemesa jina dia Yehowa. Mu mikhapho yene, Yehowa udi muwambela athu anago gumukombelela ha gumonesa gula nzambi jiawo jiana khala diago guene. Udi nji mutoga matemue a nzambi jiene ha gumonesa gula nzambi jiawo jidi jia giamatshidia. Uvi gushigo nga muthu wajiya guyikalagala!—Tanga Yeshaya 43:9; 44:7-9.
Tuana monesa mu maluholo avula egi tudi Matemue a Yehowa (Tala paragrafe 10-11)
11. Gifua luholo mukanda wa Yeshaya 43:10-12 udi guyimonesa, ndaga itshi Yehowa udi muwambela akombeledi enji?
11 Tanga Yeshaya 43:10-12. Yehowa udi muwambela akombeledi enji egi: ‘Mudi matemue ami, . . . ame ngudi Nzambi.’ Udi guatoga nji ha guhana mvutu gu muhu owu: “Gudi nu Nzambi muko ba?” (Yesh. 44:8) Tudi nu luendu lua guhana mvutu ya muhu owu. Tuajiya gumonesa egi Yehowa udi Nzambi wa giamatshidia mu mbimbi jietu nu mu ndaga tuana kalagala. Jina dienji diabalega majina agasue. Tuana monesa egi tuana zumba Yehowa nu tudi ya gujinginyina gudi muene ikhale Satana udi mutshita yagasue ha gutukanga njila ha gumukombelela. Gula tuatshita ngenyi, mbatumonesa egi tudi munemesa jina dia Yehowa.
12. Luholo lutshi profesi idi mu Yeshaya 40:3, 5 yatagenesewe?
12 Tuana landula gifezegeselo gia Yesu Klisto tangua tuana tumbuisa jina dia Yehowa. Yeshaya wadiangele guzuela egi, gudi nu muthu ‘mbawulondega njila ya Yehowa.’ (Yesh. 40:3) Luholo lutshi ndaga yene yatagenesewe? Yone Mubatiji walondele njila mukunda nu Yesu munu wajile mu jina dia Yehowa nu walongesele ndaga jiatadila Yehowa. (Mat. 3:3; Mako 1:2-4; Luka 3:3-6) Profesi yene idi muzuela nji egi: ‘Lutumbu lua Yehowa mbalumonesewa.’ (Yesh. 40:5) Luholo lutshi ndaga yene yakhalele naye gutagenesewa? Tangua Yesu wajile ha mavu, wakhalele mumoneshi watagana wa Yehowa, yakhalele gifua Yehowa muene hakhenji wajile ha mavu.—Yone 12:45.
13. Luholo lutshi tuajiya gulandula gifezegeselo gia Yesu?
13 Esue nji tudi Matemue a Yehowa gifua Yesu. Tuana khala nu jina dia Yehowa nu tuana wambela muthu wagasue tuana tagana nenji ndaga jia gushimana jiakalegele muene. Ha gukhala matemue a Yehowa abonga, tudi naye nji guwambela athu ndaga jiakalegele Yesu ha gunemesa jina dia Yehowa. (Makal. 1:8) Yesu wakhalele Temue wa thomo wa Yehowa, esue nji tuana landula gifezegeselo gienji. (Gumo. 1:5) Uvi mukunda natshi muthu wagasue mukatshi dietu udi naye guzula jina dia Yehowa nu ndando?
MALUHOLO AKO TUAJIYA GUMONESA EGI TUANA ZULA JINA DIA YEHOWA NU NDANDO
14. Gifua luholo mukanda wa Ngimbo 105:3 udi guyimonesa, luholo lutshi tuana gudivua mukunda nu jina dia Yehowa?
14 Tuana suanguluga nu jina dia Yehowa. (Tanga Ngimbo 105:3.) Yehowa wana suanguluga tangua tuana gudisunzula mukunda nu jina dienji. (Yel. 9:23, 24; 1 Kol. 1:31; 2 Kol. 10:17) Gudisunzula “mukunda nu Yehowa” gudi mukotelesa gusuanguluga luholo Yehowa udi Nzambi wetu. Yana khala luendu mukunda nu esue tangua tuana wambela athu ako egi Yehowa udi Nzambi wa gijila nu wana kalagala ndaga mu luholo luabonga. Tushigo naye guvua musonyi ha guwambela mafuta etu a mudimo, ana khalasa, nu athu tuana khala nawo egi tudi Matemue a Yehowa! Diabulu wana tshigina egi tubembe guwambela athu ako ndaga jiatadia jina dia Yehowa. (Yel. 11:21; Gumo. 12:17) Satana nu ba profete enji a mambo ana tshigina egi athu ajimbile jina dia Yehowa. (Yel. 23:26, 27) Uvi luholo tuana zumba jina dia Yehowa yana gututuma ha gumutumbuisa tangua diagasue tuaheta luendu.—Ngi. 5:11; 89:16.
15. Gutamega jina dia Yehowa gudi mukotelesa itshi?
15 Tuana landula gutamega jina dia Yehowa. (Yow. 2:32; Roma 10:13, 14) Tushigo naye gusuga phamba ha gujiya jina dia Yehowa nu gudikalegela, uvi tudi naye gukalagala ndaga jiko jiavula. Tuana monesa egi tuana jiya jina dienji muabonga tangua tuana gumushila mutshima, tuana kamba ukuateshi gudi muene nu utuameji wenji. (Ngi. 20:7; 99:6; 116:4; 145:18) Tuana wambela nji athu ako jina nu makalegelo a Yehowa; tuana guakuatesa nji ha gubalumuna mutshima nu gusombegesa makalegelo awo hagula Yehowa aatshigine.—Yesh. 12:4; Makal. 2:21, 38.
16. Luholo lutshi tuajiya gumonesa egi Satana udi muenya mambo?
16 Tuana khala hehi ha gumona lamba mukunda nu jina dia Yehowa. (Yak. 5:10, 11) Tangua tuana sala ya gujinginyina gudi Yehowa mu tangua dia lamba, tuana monesa egi Satana udi muenya mambo. Mu tangua dia Yobo, Satana wazuelele mukunda nu akombeledi a Yehowa egi: ‘Muthu mbawuhana gima giagasue gidi nagio muene ha guhuluisa monyo wenji.’ (Yobo 2:4) Satana wamonesele egi athu ana kombelela Yehowa phamba gula adi nu gusuanguluga, uvi gula atagana nu malamba mbaabemba gumukombelela. Yobo wamonesele egi ndaga jiazuelele Satana jiakhalele jia mambo. Esue nji tuajiya gumonesa egi Satana udi muenya mambo gula tushigo mubemba gukombelela Yehowa ikhale tudi mutagana nu malamba. Tudi naye gusha mutshima egi Yehowa mbawulandula gutubamba mukunda nu jina dienji.—Yone 17:11.
17. Gifua luholo 1 Phetelo 2:12 idi guyimonesa, luholo lutshi luko tuajiya gutumbuisa jina Yehowa?
17 Tuana tshita yagasue ha gunemesa jina dia Yehowa. (Ish. 30:9; Yel. 7:8-11) Luholo tudi Matemue a Yehowa, ndaga tuana kalagala jiana monesa gula tudi munemesa jina dia Yehowa nga ndo. (Tanga 1 Phetelo 2:12.) Hene, tuana kalagala yagasue ha gutumbuisa jina dia Yehowa mu mbimbi jietu nu mu makalegelo etu. Gula tuatshita ngenyi, mbatulandula gutumbuisa jina dienji ikhale tushigo athu atagana.
18. Luholo lutshi luko tuajiya gumonesa egi tuana zula jina dia Yehowa nu ndando? (Tala nji mbimbi goshi’a diyiji.)
18 Tuana zula jina dia Yehowa nu ndando yavula gubalega ndaga jiagasue athu ana zuela mukunda nu esue. (Ngi. 138:2) Mukunda natshi idi nu ndando? Handaga luholo tuana zumba jina dia Yehowa, athu ako ajiya gusendesa guzuela ndaga jiabola mukunda nu esue.a Yesu wakhalele naye gushiyiwa gifua mbundudi ha gutumbuisa jina dia Yehowa. ‘Watshiginyile egi ahanewe musonyi,’ uvi gakhalelego gudisagesa mukunda nu ndaga jiakhalele muzuela athu ako. (Heb. 12:2-4) Washile matangi enji ha gutshita gutshigina gua Yehowa.—Mat. 26:39.
19. Luholo lutshi wana gudivua mukunda nu jina dia Yehowa? Mukunda natshi?
19 Tuana khala nu gusuanguluga ha gukombelela Yehowa nu tuana suanguluga nji luholo tuana tamegewa egi Matemue enji. Luholo tuana zula jina dia Yehowa nu ndando, tuana landula gumukombelela ikhale athu ako adi muzuela ndaga jiabola mukunda nu esue. Jina dia Yehowa didi nu ndando yavula gubalega lukuma luetu. Hene tulandulenu gutumbuisa jina dia Yehowa ikhale Satana udi mutshita yagasue ha gutulebesa. Gula tuatshita ngenyi, mbatumonesa egi jina dia Yehowa didi nu ndando yavula gifua luholo Yesu Klisto wakalegele.
LUNGIMBO 10 Tumbuisa Yehowa Nzambi Wetu!
a Yobo wakhalele ya gujinginyina gudi Yehowa, uvi wasendesele gudisagesa muavula tangua mafuta enji azuelele ndaga jiabola mukunda nu muene. Tangua an’enji afuile nu hatotesele muene umonyi wenji wagasue, ‘Yobo gatshitshilego nu gazuelelego nga ndaga imoshi yabola mukunda nu Yehowa.’ (Yobo 1:22; 2:10) Uvi tangua afundjile Yobo egi watshita ndaga jiabola, muene wabuile muenya ‘izuele-zuele.’ Ha fundo dia gukamba gutumbuisa jina dia Yehowa, wadisagesele muavula mukunda nu lukuma luenji.—Yobo 6:3; 13:4, 5; 32:2; 34:5.