Kuatesa Muthu Wana Longesa Biblia ha Guzula Desizio dia Gukombelela Yehowa

1-2. a) Mukunda natshi athu ako tuana longesa Biblia ana guvua woma ha guzula desizio dia gukombelela Yehowa? b) Itshi tuza mulonguga mu longo edi?

GUDI nu ndaga jia guhanele woma ha gubua Temue wa Yehowa ba? Yajiya gukhala egi wakhalele muvua woma egi mafuta aye nga athu wana tshita nawo mudimo nga enya fami yaye ajiya guguvuila khabu. Nga ndo, yajiya gukhala egi wakhalele mutangiza egi mbayikhala lamba gudi aye ha gutumagela mikhuala ya Yehowa. Gula wadivuile ngenyi, idi yadiago egi wajiya gukotelesa muabonga gishina athu ako wana longesa Biblia ana gutuna guzula desizio dia gubua Matemue a Yehowa.

² Yesu wakhalele mujiya egi woma wa luholo elu wajiya gutuma muthu ha gubemba gukombelela Yehowa. (Mat. 13:20-22) Uvi walanduile gukuatesa athu a luholo elu ha gubua alundudi enji. Waakuatesele 1) ha gukamba gujiya ndaga jidi guakanga njila ha gukula mu nyuma, 2) ha gukolesa guzumba guawo gudi Yehowa, 3) ha gusha Yehowa ha fundo dia thomo nu 4) ha gujiya ndaga ajiya gutshita gula atagana nu usageshi. Luholo lutshi wajiya gukalegela malongo ahanyile Yesu gudi alandudi enji tangua udi mukalegela mukanda Heta Monyo wa Ivo nu Ivo! ha gukuatesa muthu udi mulongesa Biblia ha guzula desizio dia gukombelela Yehowa?

KUATESA MUTHU WANA LONGESA BIBLIA HA GUKAMBA GUJIYA NDAGA JIDI GUMUKANGA NJILA HA GUKULA MU NYUMA

3. Itshi yakhalele mukanga Nikodemo njila ha gubua mulandudi wa Yesu?

³ Nikodemo wakhalele fumu wakoma mu gikombelelo gia enya Yuda; uvi guakhalele nu ndaga yakhalele gumukanga njila ha gubua mulandudi wa Yesu. Tangua Yesu wasendesele mudimo wa gulongesa, gungima dia mbeji 6, Nikodemo wakhalele wakotelesa gale egi Yesu udi Masiya. (Yone 3:1, 2) Uvi wayile muta maga nu Yesu mu gisuegi handaga wakhalele “muvuila enya Yuda woma.” (Yone 7:13; 12:42) Wakhalele mutangiza egi wajiya gutotesa ufumu wenji nga ndambu ya umonyi wenji gula wabua mulandudi wa Yesu.a

4. Luholo lutshi Yesu wakuatesele Nikodemo ha gujiya ndaga yakhalele mutshigina Nzambi egi atshite?

⁴ Nikodemo wakhalele mujiya Mikhuala ya Moize, uvi wakhalele nu funu ya ukuateshi ha gukotelesa ndaga yakhalele mutshigina Yehowa egi atshite. Luholo lutshi Yesu wamukuatesele? Yesu watshiginyile guta n’enji maga ikhale yakhalele mu phipha. Yesu wamonesele Nikodemo haphelo ndaga jiakhalele naye gutshita muene ha gubua mulandudi wenji: gubalumuna mutshima mu gubola guenji, gubatijiwa mu meya nu gusha gutshigina gudi Mun’a Nzambi.​—Yone 3:5, 14-21.

5. Luholo lutshi wajiya gukuatesa muthu wana longesa Biblia ha gujiya ndaga jidi gumukanga njila ha gukombelela Yehowa?

⁵ Yajiya gukhala egi muthu udi mulongesa Biblia udi mujiya Biblia muabonga, uvi wajiya gumukuatesa ha gujiya ndaga jidi gumukanga njila ha guzula desizio dia gukombelela Yehowa. Ha gufezegesa, mudimo wenji nga usageshi wa enya fami yenji wajiya gumukanga njila ha gukula mu nyuma. Hene, khala hehi ha gumukuatesa. Wajiya gumutamega ha gudia n’enji nga ha gubalegesa n’enji tangua. Gula mudi mukalagala ndaga jia luholo elu hamoshi, mbayikhala yaleba gudi muthu muene ha gugutela lumene luenji nga ndaga jidi gumusagesa. Gungima, kuatesa muthu muene ha gusombegesa ndaga jiko mu monyo wenji; muwambele egi udi naye gutshita ngenyi ha gusuanguluisa Yehowa, uvi ishigo ha gugusuanguluisa aye.

6. Luholo lutshi wajiya gukuatesa muthu wana longesa Biblia ha gukalegela ndaga jiana longuga muene? (1 Kolinto 16:13)

⁶ Gula muthu wana longesa Biblia wajiya egi Yehowa mbawumukuatesa ha gutshita ndaga jiabonga, mbawukhala nu gikhesa ha gukalegela ndaga jidi mulonguga muene. (Tanga 1 Kolinto 16:13.) Tuajiya gufuanesa mudimo waye nu mulongeshi wa khalasa. Tangua wakhalele mu khalasa, mulongeshi mutshi wakhalele musuanguluga n’enji muavula? Yajiya gukhala egi idi mulongeshi munu wagukuatesele nu guhuiminyina guagasue ha gujiya ndaga udi naye gutshita. Luholo lumoshi nji, mulongeshi wa Biblia wabonga udi naye gulongesa muthu ana longuga n’enji Biblia ha gujiya ndaga jidi gumutoga Nzambi. Udi naye nji gumukuatesa ha gusha mutshima egi wajiya gujitshita handaga Yehowa mbawumukuatesa. Luholo lutshi wajiya gubua mulongeshi wabonga?

KUATESA MUTHU WANA LONGESA BIBLIA HA GUKOLESA GUZUMBA GUENJI GUDI YEHOWA

7. Luholo lutshi Yesu wakuatesele athu akhalele gumutegelela ha gukolesa guzumba guawo gudi Yehowa?

⁷ Yesu wakhalele mujiya egi gula alandudi enji azumba Nzambi, mbayikhala yaleba gudi ene ha gukalegela malongo aalongesele muene. Matangua avula, wakhalele gualongesa ndaga jiajiya guakuatesa ha gukolesa guzumba guawo gudi Sh’awo wa mu dilu. Ha gufezegesa, wafuanesele Yehowa nu tata wana hana an’enji ima yabonga. (Mat. 7:9-11) Yajiya gukhala egi athu ako mukatshi dia athu akhalele mutegelela Yesu akhalelego nu atata akhalele guazumba. Tangiza luholo adivuile tangua Yesu wahanele gifezegeselo gia tata wa khenda wayambele mun’enji wavutugile gu inzo gungima dia gukalagala ndaga jiavuala jiabola! Gifezegeselo giene giaakuatesele ha gukotelesa egi Yehowa wana guazumba nu wana tshigina guakuatesa.​—Luka 15:20-24.

8. Luholo lutshi wajiya gukuatesa muthu wana longesa Biblia ha gukolesa guzumba guenji gudi Yehowa?

⁸ Aye nji wajiya gukuatesa muthu wana longesa Biblia ha gukolesa guzumba guenji gudi Yehowa, gula udi gumuwambela tangua diagasue makalegelo abonga a Yehowa. Tangua diagasue mudi mulonguga, mukuatese ha gukotelesa luholo ndaga adi mulonguga jidi mumonesa egi Yehowa wana gutuzumba. Tangua mudi mulonguga longo didi muzuelela luholo Yehowa wahanele mulambu wa Yesu, mukuatese ha gukotelesa egi Yehowa wahanele mulambu wene handaga wana gumuzumba nji. (Roma 5:8; 1 Yone 4:10) Gula muthu wana longesa Biblia wakotelesa egi Yehowa wana gumuzumba muavula, mbayimutuma nji ha gumuzumba muavula.​—Gal. 2:20.

9. Itshi yakuatesele Michael ha guzula desizio dia gukombelela Yehowa?

⁹ Tutadilenu lumene lua phangi Michael wa gu Indonésie. Wajiyile giamatshidia hakhalele muene mukula uvi gabatijiwego. Hakhalele muene nu ivo 18, wayile mu gifutshi giko ha gukalagala mudimo wa guwendesa tumiyo tuakoma. Gungima wavutugile gu Indonésie, wazudile mukhetu mu ulo; uvi wayile luko hakhenji mu gifutshi giko gutshita mudimo, wabembele fami yenji. Mu tangua diene, mukaji’enji nu mun’awo wa mukhetu asendesele gulonguga Biblia nu gukula mu nyuma. Gungima dia gufua gua mama wenji, Michael wavutugile mu gifutshi giawo ha gukuatesa sh’enji, watshiginyile nji gulonguga Biblia. Hakhalele ene mulonguga gitshinyi “Tukambe Gujiya Ndaga Jiavula” mu longo dia 27 mu mukanda Heta Monyo wa Ivo nu Ivo!, Michael wasuangulugile muavula nu malongo ene. Michael wadidile tangua dia tangijile muene luholo Yehowa wadivuile hamonele Mun’enji Yesu mumona malamba. Hene, ha guhana Yehowa nu Yesu mersi mu luholo ana gumuzumba muavula, Michael wasombegesele ndaga mu monyo wenji, gungima wabatijiwe.

KUATESA MUTHU WANA LONGESA BIBLIA HA GUSHA YEHOWA HA FUNDO DIA THOMO

10. Luholo lutshi Yesu wakuatesele alandudi enji ha gusha Yehowa ha fundo dia thomo? (Luka 5:5-11) (Tala nji gifuanesa.)

¹⁰ Athu ako Yesu walongesele ajiyile mu phushi egi Yesu udi Masiya, uvi akhalele nu funu ya ukuateshi ha gusha mudimo wa gulongesa ha fundo dia thomo. Phetelo nu Andele akhalele abui gale alandudi a Yesu, uvi Yesu waatamegele ha gusendesa gutshita n’enji mudimo wa gulongesa wa tangua diagasue. (Mat. 4:18, 19) Akhalele mutshita mudimo wa gulowa jishui hamoshi nu Yakoba nu Yone, mudimo wene wakhalele muwenda muabonga diago. (Mako 1:16-20) Tangua Phetelo nu Andele abembele mudimo wa gulowa jishui ha gulandula Yesu, yajiya gukhala egi alondele nji ndaga hagula enya fami jiawo akhale nu ima adi nayo funu tangua ene mbaakhala mulandula Yesu. Itshi yaakuatesele ha guzula desizio diene? Mukanda wa Luka udi gutuwambela egi Yesu wakalegele ndaga ya gushimana inyi yaakuatesele ha gusha mutshima egi Yehowa mbawulandula guakuatesa gula amuhaga ha fundo dia thomo.​—Tanga Luka 5:5-11.

11. Itshi wajiya guwambela muthu wana longesa Biblia ha gukolesa gutshigina guenji?

¹¹ Tuajiyilego gukalagala ndaga jia gushimana gifua muatshitshile Yesu, uvi tuajiya guwambela athu tuana longesa Biblia luholo Yehowa watukuatesele tangua tuamuhagele ha fundo dia thomo. Ha gufezegesa, udi muwunguluga luko luholo Yehowa wagukuatesele tangua wasendesele guya mu gudibungisa gua mu hungu ba? Yajiya gukhala egi wayile mumona fumu waye wa mudimo ha gumuwambela egi mbawukhala mukatuga gu mudimo gutuama ha guya mu gudibungisa. Hene, wambela muthu wana longesa Biblia luholo gutshigina guaye guakolele tangua wamonele luholo Yehowa wagukuatesele tangua wamushile ha fundo dia thomo.

12. a) Mukunda natshi udi naye guya nu aphangi a gudisha gudi muthu wana longesa Biblia? b) Ikadigilo itshi wajiya gukalegele ha gukuatesa muthu wana longesa Biblia? Hana gifezegeselo.

¹² Muthu wana longesa Biblia wajiya guheta malongo ako mu mene jia aphangi ako ahagele Yehowa ha fundo dia thomo. Gishina giene, khala muya nu aphangi a gudisha tangua udi muya gumutala. Wambela aphangi ene ha gumuwambela luholo ajiyile giamatshidia nu ndaga yaakuatesele ha gusha Yehowa ha fundo dia thomo mu monyo wawo. Wajiya nji gutala n’enji video jidi mu gitshinyi “Tukambe Gujiya Ndaga Jiavula” nga mu gitshinyi “Ndaga Jiko Jia Ndando” mu mukanda Heta Monyo wa Ivo nu Ivo! Ha gufezegesa, tangua mudi mulonguga longo dia 37, gula muatala video Yehowa Mbawutagenesa Nzala Jietu, muwambele ndaga jiajiya gumukuatesa ha gusha Yehowa ha fundo dia thomo.

KUATESA MUTHU WANA LONGESA BIBLIA HA GUJIYA NDAGA YAJIYA MUENE GUTSHITA GULA WATAGANA NU USAGESHI

13. Ndaga jitshi Yesu wawambelele alandudi enji ha gutshita gula atagana nu usageshi?

¹³ Yesu wawambelele alandudi enji mbala jiavuala egi mbaasagesewa gudi athu ako nu gudi enya fami yawo. (Mat. 5:11; 10:22, 36) Matangua azonda gutuama egi Yesu afue, waawambelele egi ene nji ajiya gushiyiwa handaga ana kombelela Yehowa. (Mat. 24:9; Yone 15:20; 16:2) Waawambelele ha gumonesa gutema mu mudimo wa gulongesa. Waawambelele nji ha gutuna gumana nu athu adi guawambela ndaga jiabola nu ha gukhala atema mu ndaga adi muzuela nu adi mutshita.

14. Luholo lutshi wajiya gukuatesa muthu wana longesa Biblia ha gudilondega mukunda nu usageshi ajiya gutagana nawo? (2 Timote 3:12)

¹⁴ Aye nji wajiya guwambele muthu wana longesa Biblia ndaga yajiya muene gukalagala gula watagana nu usageshi gudi mafuta enji, enya fami yenji nga mafuta enji a mudimo. (Tanga 2 Timote 3:12.) Mafuta enji ako a mudimo ajiya gumulela handaga udi mutumagela malongo a Biblia. Athu ako nga enya fami yenji ako ajiya nji gutuna malongo ako a Biblia adi mulonguga muene. Gula wadianga gumuwambela usageshi ajiya gutagana nawo, mbayikhala yaleba gudi muene ha gujiya ndaga ya guzuela nga ya gutshita gula watagana nu usageshi.

15. Itshi yajiya gukuatesa muthu wana longesa Biblia ha gukolesela gula watagana nu usageshi?

¹⁵ Gula muthu wana longesa Biblia watagana nu usageshi mu fami yenji, mukuatese ha gujiya gishina enya fami yenji adi gumusagesela. Yajiya gukhala egi ana tangiza egi Matemue a Yehowa adi athu abola nga ndo adi gumuhuiga. Yesu nji watagenele nu usageshi mu fami yenji. (Mako 3:21; Yone 7:5) Wambela muthu wana longesa Biblia ha gukhala nu guhuiminyina nu ha guwambela enya fami yenji nu athu ako ndaga nu gisemo giagasue.

16. Itshi yajiya gukuatesa muthu wana longesa Biblia ha gulongesa athu ako mu luholo luabonga?

¹⁶ Gula enya fami yenji atshigina gujiya giamatshidia, muthu wana longesa Biblia gashigo naye gukamba guawambela ndaga jiavuala mu mbala imoshi. Gula ndo, athu ene ajiya gawo guleba muila nu mbaashigo luko mutshigina gujiya ndaga jiavula. Ngenyi, mukuatese ha gulongesa enya fami yenji mu luholo luajiya gumukuatesa ha guheta ba okazio ako a gualongesa. (Kol. 4:6) Wajiya nji guawambela ha gungina mu jw.org. Ngenyi, muthu wagasue wajiya gujiya ndaga jiatadila Matemue a Yehowa mu tangua dia tshigina muene nu mu luholo lua tshigina muene.

17. Luholo lutshi wajiya gukuatesa muthu wana longesa Biblia ha gujiya mvutu jiajiya guhana muene gudi athu adi gumuhula mihu yatadila Matemue a Yehowa? (Tala nji gifuanesa.)

¹⁷ Wajiya gukalegela malongo adi mu gitshinyi “Questions fréquentes sur les Témoins de Jéhovah” mu jw.org ha gukuatesa muthu wana longesa Biblia ha gujiya mvutu jialeba jiajiya guhana muene enya fami yenji nga mafuta enji a mudimo. (2 Tim. 2:24, 25) Ubuitshigo mutshima ha gutadila gitshinyi “Athu Ako Ana Zuela Egi” mu mukanda Heta Monyo wa Ivo nu Ivo! gu suga ya longo diagasue. Mukuatese ha guhana mvutu mu mbimbi jienji. Gula luholo ludi guene, mukuatese ha gujiya luholo luabonga luajiya muene gukotelesela athu ako ndaga jiana longuga muene. Gula wamukuatesa ngenyi, mbayikhala yaleba gudi muene ha gukotelesela athu ako giamatshidia nu gikhesa giagasue.

18. Luholo lutshi wajiya gukuatesa muthu wana longesa Biblia ha gubua mulongeshi wa lukuma luabonga? (Matayo 10:27)

¹⁸ Yesu wawambelele alandudi enji ha gulongesa athu ako lukuma luabonga. (Tanga Matayo 10:27.) Gula muthu wana longesa Biblia wasendesa gulongesa lukuma luabonga, mbayimukuatesa ha gushila Yehowa mutshima. Luholo lutshi wajiya gumukuatesa ha gusendesa gulongesa? Gula mudi nu kampanye ga mudimo wa gulongesa mu hungu dienu, mukuatese ha gujiya ndaga yajiya gutshita muene ha gubua mulongeshi. Muwambele egi yakhala yaleba ha gulongesa mu sungi ya kampanye. Wajiya nji gumukuatesa ha gudishila felela dia gutshita badevuare mu gudibungisa gua mu hungu gua mukatshi dia phoso. Hadi muene mutshita ngenyi, mbayimukuatesa ha gulongesa giamatshidia nu gikhesa giagasue.

KHALA MUSHILA MUTHU WANA LONGESA BIBLIA MUTSHIMA

19. Luholo lutshi Yesu wamonesele egi wakhalele mushila alandudi enji mutshima? Luholo lutshi tuajiya gulandula gifezegeselo gienji?

¹⁹ Gutuama dia guvutuga mu dilu, Yesu wawambelele alandudi enji egi mbaakhala luko n’enji hamoshi. Akoteleselego egi Yesu wakhalele muzuela egi mbaaya mu dilu. Ikhale ngenyi, Yesu washile mutshima egi alandudi enji akhalele diago mutshigina gukombelela Yehowa. (Yone 14:1-5, 8) Wakhalele mujiya egi akhalele nu funu ya ukuateshi ha gukotelesa ndaga jiko, gifua felela dia guya mu dilu. (Yone 16:12) Esue nji tuajiya gushila athu tuana longesa Biblia mutshima egi mbaazula desizio dia gusuanguluisa Yehowa.

20. Luholo lutshi phangi Chifundo wamonesele egi wakhalele mushila Alinafe mutshima?

²⁰ Khala musha mutshima egi muthu wana longesa Biblia mbawuzula desizio dia gutshita ndaga jiabonga. Tutadilenu gifezegeselo gia phangi wa mukhetu Chifundo wa gu Malawi. Wasendesele gulonguga Biblia nu muvuala wa mukhetu wa muenya Katolike jina dienji Alinafe, akhalele mulonguga mukanda Heta Monyo wa Ivo nu Ivo! Hahetele ene mu longo dia 14, phangi Chifundo wamuhudile matangi enji mu ndaga yatadile gukombelela isongo. Ndaga yene yasuanguluishilego Alinafe, wamuvutudile egi: “Gukombelela isongo gudi desizio diami!” Phangi Chifundo watangijile egi ndaga yene yajiya gutuma Alinafe ha gutuna gulonguga luko. Uvi walanduile gulonguga n’enji nu guhuiminyina guagasue, washile nji mutshima egi gudi nu lusugu Alinafe mbawukotelesa egi gukombelela isongo gudi ndaga yabola. Gungima dia mbeji jiazonda, hakhalele ene mulonguga longo dia 34, phangi Chifundo wamuhudile egi: “Sendese tuasendesele gulonguga Biblia nu gujiya ndaga jiavula jiatadila Yehowa Nzambi wa giamatshidia, gubonga gutshi wahetele gale?” Phangi Chifundo udi muzuela egi: “Alinafe watangele ndaga jiavula jiabonga, mukatshi dia ndaga jiene wazuelele egi Matemue a Yehowa anago gutshita ndaga Biblia yana tunyisa.” Gungima Alinafe wabembele gukombelela isongo nu wabatijiwe.

21. Luholo lutshi wajiya gukuatesa muthu wana longesa Biblia ha guzula desizio dia gukombelela Yehowa?

²¹ Ikhale Yehowa wana ‘kudisa mbuto’, uvi aye nji udi nu ginemo gia gukuatesa muthu wana longesa Biblia ha gukula mu nyuma. (1 Kol. 3:7) Umuwambelago phamba ndaga jiana tshigina Nzambi egi atshite, uvi mulongese nji ndaga jiko jiavula. Mukuatese ha gukolesa guzumba guenji gudi Yehowa. Mukuatese nji ha gusha Yehowa ha fundo dia thomo. Mulongese luholo lua gushila Yehowa mutshima gula watagana nu usageshi. Gula wawambela muthu wana longesa Biblia egi wana gumushila mutshima nu udi mujiya egi mbawutshita ndaga jiabonga ha gusuanguluisa Yehowa, mbawumukuatesa ha gukhala nu gikhesa gia guzula desizio dia gukombelela Yehowa.