“Yehowa Wana Kuatesa Athu ha Gubinga gu Ita”

Mu 1999, mafumu a gu France azuelele egi aphangi a gu Betele ya gu France adi naye guafuta gitadi mukunda nu misomo yahetele ene sendese mu 1993 uu nu mu 1996. Uvi tribinale jia gu France jiakhalelego musophesa mulonga wene mu luholo luabonga. Tuatogele ha gusophesa luko mulongo wene, uvi atunyile; mafumu ene azudile makuta bamilio 4,5 a euro (nga 6 300 000 dollars), azudile makuta ene mbala imoshi mu compte bancaire ya Betele. Tuakhalele mutshigina egi atuvutudile makuta ene, hene tuayile nu mulonga wene gu Cour européenne des droits de l’homme (CEDH). Uvi gutuama dia gusophesa mulonga wetu, enya gu CEDH atuwambelele ha guta maga nu ba avocat a guvernema ya gu France hamoshi nu mumoneshi wa gu CEDH ha gujiya gula tuajiya gulondega mulonga wene gutuama dia gudimona gu tribinale.

Tuakhalele mujiya egi mumoneshi muene wakhalele naye gututoga ha gufuta guvernema ya gu France nga makuta azonda. Uvi tuakhalele nji mujiya egi gula tuaafuta nga dikuta dimoshi dia euro, mbatushigo mutumagela ndaga yazuelele Yesu mu Matayo 22:21. Aphangi a mala nu a akhetu ahanele misomo yene ha gukuatesa midimo ya Ufumu, uvi ishigo ha guahana gudi mafumu ene. Ikhale ngenyi, tuatshiginyile ha gudimona nawo ha gunemesa ndaga yazuelele enya gu Cour européenne des droits de l’homme.

Tuadibungishile mukunda nu audience yene mu sugu imoshi mukatshi dia sugu jiabonga jia gudibungishila jia tribinale yene. Maga ene asendeselego muabonga. Mumoneshi wa CEDH wazuelele egi Matemue a Yehowa adi naye gufuta nga makuta azonda mukatshi dia makuta a gitadi aatogi mafumu a gu France. Uvi nyuma ya Yehowa yatutumile ha gumuhula egi: “Udi mujiya egi mafumu ene atutambula gale makuta bamilio 4,5 a euro mu compte bancaire yetu ba?”

Ndaga yene yamuhanele khabu handaga gakhalelego mujiya egi mafumu a gu France akalegele ngenyi. Tangua ba avocat a guvernema ya gu France amuwambelele egi mafumu ene akalegele diago ngenyi, mumoneshi muene wasombegesele mbala imoshi matangi enji mu mulonga wene. Wasendesele guabalela, wasugishile nji audience yene. Ngakotelesele diago egi Yehowa watukuatesele mu luholo tuakhalelego mutangiza hagula tubinge mulonga wene. Tuazogele nu gusuanguluga guagasue, tuakhalele nji gudihula luholo ndaga jiene jiabalegele.

Mu lusugu lua 30 Juin 2011, Cour européenne des droits de l’homme (CEDH) yatubingishile mu mulonga wene. Azuelele egi gitadi giakhalele gututoga mafumu a gu France giakhalelego gudivua nu mikhuala, aawambelele nji ha guvutula makuta agasue atutambudile nu gushimbiga makuta ako holu! Desizio diene diana kuatesa aphangi a gu France ha gulandula gukombelela Yehowa mu guhuima uu nu mangino. Muhu wene umoshi tuahudile wakhalele gifua seso diashiyile Goliyate; watukuatesele diago ha gubinga. Na mukunda natshi tuabingile? Handaga gifua luholo Davidi wawambelele Goliyate: “Yehowa wana kuatesa athu ha gubinga gu ita.”​—1 Sam. 17:45-47.

Yakhalelego mbala ya thomo tuabingile milonga gu tribinale. Uu nu mangino, tribinale jiakoma jia mu ifutshi 70 nu tribinale jiavula jia mu ifutshi iko (tribunaux internationaux) jiakuatesele gale Matemue a Yehowa ha gubinga mbala 1 225 tangua mafumu a politike nga a ikombelelo akhalele gutukambela milonga. Badesizio ene ana gutukuatesa mu ndaga gifua: gusonegesa gikombelelo gietu gu mukanda wa mafumu a leta ha gutuhana njila ya gutshita midimo mu guhuima, gulongesa mu mafundo a athu avula, gutuna gudinginyisa mu ndaga jia gifutshi jinyi jiana shiya mikhuala ya Yehowa nu gutuna gumbiwa mahatshi.

Ngakhalele gami mutshita mudimo gu Biro Diakoma dia Matemue a Yehowa mu dimbo dia New York gu États-Unis, na mukunda natshi ngayile muzuelela milonga gu tribinale jia gu Europe?

MVUAJI JIAMI JIAKHALELE BAMISIONERE

Tata wami George nu mama wami Lucille azudile maplome gu khalasa dia 12 dia Gileade; akhalele mutshita mudimo wa gimisionere gu Ethiopie mu 1956 tangua ngavualewe. Angulugile jina dia Philip handaga atangijile mulongeshi Filipho wa mu siekle ya thomo. (Makal. 21:8) Mu givo gialanduile, mafumu a leta atunyishile mudimo wetu gu Ethiopie. Ngakhalele mona wazonda mu tangua diene, uvi ngudi muwunguluga egi fami yetu yakhalele mukombelela mu gisuegi. Mu matangi ami a ulenge, gutshita ngenyi guakhalele gami gungusuanguluisa! Uvi gungima, mafumu a leta atukayele mu gifutshi mu 1960.

Fami yetu yayile mukhala gu Wichita mu dimbo dia Kansas gu États-Unis; mvuaji jiami jialanduile gajio gulongesa lukuma luabonga nu gusuanguluga, gifua hakhalele ene bamisionere. Atulongesele ha guzumba Yehowa nu ha gumukombelela nu mutshima wagasue; tuakhalele ame nu yaya wami Judy nu galenga gami ga yala Leslie, ene nji avualewe gu Ethiopie. Ngabatijiwe nu ivo 13. Ivo thathu gungima, fami yetu yayile muhana mago fundo diakhalele nu funu ya alongeshi avula mu dimbo dia Arequipa gu Pérou.

Mu 1974 ngakhalele nu ivo 18; Betele ya gu Pérou yatutogele nu aphangi ako a mala nguana ha gubua bapionye spesiale. Tuayile mulongesa gu khanda ya Milundu ya Andes mu mafundo anyi Matemue a Yehowa khenji alongesele gale ndo. Tuakhalele mulongesa athu ana zuela zuelelo dia Quechua nu dia Aymara. Tuakhalele muwenda mu gamiyo gakhalele nu sugu mukatshi, tuakhalele gugatamega egi Wato handaga gakhalele gifua carton gakoma. Ngana khala nu gusuanguluga tangua ngana wunguluga luholo tuakhalele mukalegela Biblia ha gulongesa athu a gu khanda yene egi gualeha ndo Yehowa uza mukatula uphutu, misongo nu gufua. (Gumo. 21:3, 4) Avula mukatshi diawo abuile Matemue a Yehowa.

MUDIMO GU BIRO DIAKOMA DIA MATEMUE A YEHOWA

Mu 1977, phangi Albert Schroeder wajile mutala Betele ya gu Pérou; wakhalele mukalagala mudimo gu Hunji dia Akulu Atuameji, wanguwambelele ha guzalesa formilere ha guya mutshita mudimo gu Betele gu biro diakoma dia Matemue a Yehowa. Ngatshitshile diago ngenyi. Ngasendesele gukalagala mudimo gu Betele ya gu Brooklyn mu lusugu lua 17 Juin 1977. Ngakalegele mudimo wa guwevua nu gulondega jinzo ivo nguana.

Mu Juin 1978, ngayile gu assemblée internationale mu dimbo dia Nouvelle-Orléans gu Louisiane; guene tuadimonele nu phangi Elizabeth Avallone. Muene nji wakudile mu fami ya Matemue a Yehowa gifua ame, mvuaji jienji nji jiakhalele mukombelela Yehowa nu mutshima wagasue. Mu tangua diene, Elizabeth wakhalele watshitshi gale ivo nguana mu mudimo wa muvundji wa njila wa tangua diagasue, wakhalele nji nu felela dia gutshita mudimo wa tangua diagasue monyo wenji wagasue. Tualanduile guta maga. Gungima dia masugu, tuadijiyile muabonga, tuadizumbile nji. Tuadizudile mu ulo mu lusugu lua 20 Octobre 1979; Elizabeth wajile gungusanga gu Betele, tualanduile gukalagala mudimo hamoshi.

Aphangi a mala nu a akhetu a mu hungu dietu dia thomo dia zuelelo dia Espagnole gu Brooklyn akhalele gutuzumba muavula. Gungima dia ivo, tuakhalele nji mu mahungu ako thathu; aphangi a mu mahungu ene akhalele nji gutuzumba muavula, akhalele nji gutuhana gikhesa ha gulandula gutshita mudimo wetu gu Betele. Tuana guahana mersi mukunda nu ukuateshi wawo; tuana hana nji mersi gudi mafuta etu nu enya fami yetu ako atukuatesele ha gubamba mvuaji jietu habuile ene athu a gukola.

MUDIMO GU SERVICE JURIDIQUE

Mu Janvier 1982, ngasendesele gukalagala mudimo gu service juridique ya Betele. Ivo thathu gungima, angutogele ha guya gu université ha gubua avocat. Ndaga ngakhalele mulonguga mu khalasa jiakhalele gungutuma ha gudihula muavula handaga tuakhalele mulonguga egi milonga yavula yabingile Matemue a Yehowa gu tribinale, yatumile mafumu ha gusha mikhuala yana hana njila gudi athu avula gu États-Unis nu mu ifutshi iko gutshita ndaga jiavula mu guhuima. Tuakhalele muzuelela milonga yene ya ndando yabingile Matemue a Yehowa mu khalasa.

Tangua ngatagenesele ivo 30 mu 1986, angutombele ha gubua mutuameji wa service juridique. Ngakhalele nu gusuanguIuga luholo Betele yakhalele gungushila mutshima ikhale ngakhalele muvuala, uvi ngavuile nji woma handaga ngakhalelego mujiya ndaga jiavula, ngakhalele nji mujiya egi ginemo giene gishigo gialeba.

Mu 1988 ngabuile avocat, uvi ngakhalelego mukotelesa egi makhalasa ene alebesele ufuta wami nu Yehowa. Makhalasa aleha-leha ajiya gutuma muthu ha gubua nu lulendo nga gutangiza egi muene wabalega athu ako anyi alongugilego muavula gifua muene. Uvi mukaji’ami Elizabeth wangukuatesele. Wangukuatesele ha guvutugila programe ya gutshita ndaga jia mu nyuma ngakhalele nayo gutuama dia guya gu université. Yazudile tangua diavula, uvi ufuta wami nu Yehowa wabuile luko wakola. Eksperianse yami yangukuatesele ha gukotelesa egi gukhala nu ujiyi wavula gushigo ndaga yabalega ndando mu monyo wetu. Ndaga ya ndando yana bata gusuanguluga gua giamatshidia idi gukhala nu ufuta wakola nu Yehowa, gumuzumba muavula nu guzumba akombeledi enji.

GUMONESA GUTUAMA DIA MAFUMU EGI LUKUMA LUABONGA LUDI NAYE GULONGESEWA

Tangua ngamanesele khalasa, ngadihanele muavula ha gukuatesa departema yetu ha gutadila milonga gu Betele nu guzuelela midimo ya ulondegi wetu gu tribinale. Mudimo wami wakhalele gungusuanguluisa, uvi guakhalele nji malamba ako handaga ndaga jiakhalele musombegesa muphushi mu ulondegi wetu. Ha gufezegesa, thomo tuakhalele mutoga misomo mukunda nu mikanda yetu; uvi sendese mu 1991, atogele service juridique ha gukhala muhana malongo ajiya gukuatesa ha gubemba gutshita ngenyi. Gungima Matemue a Yehowa asendesele guhana athu mikanda ya ofele. Gutshita ngenyi gualeluile mudimo gu Betele nu mu mahungu, guatukuatesele nji ha gutuna gukhala mufuta itadi. Athu ako atangijile egi usombegeshi wene mbawutshita egi tutotese makuta avula, mbawutshita nji egi phamba athu azonda mbaakhala nu luholo lua gujiya giamatshidia. Uvi ndaga jiakalegewego ngenyi. Sendese nu 1990, mutango wa akombeledi a Yehowa wavudile luko muavula, henyaha muthu wagasue wajiya gulonguga Biblia ya ofele mu njila ya mikanda yetu. Ngakotelesele egi usombegeshi wagasue wana kalegewa mu ulondegi wa Yehowa wana yila muabonga handaga Yehowa wana gutukuatesa, tuana heta nji malongo gudi muhiga wafubidila nu watema.​—Guz. 15:2; Mat. 24:45.

Tuanago gubinga milonga gu tribinale handaga tuana khala nu ba avocat abonga. Matangua avula, ndaga yana tshita egi manzuji nu mafumu a leta atukuatese idi makalegelo abonga a akombeledi a Yehowa. Ngamonele ndaga yene mu 1998 tangua aphangi thathu a gu Hunji dia Akulu Atuameji nu akaji’awo ayile gu ba asamble spesiale gu Cuba. Akhalele nu gisemo nu ginemua, ndaga yene yatumile mafumu a leta ha gutshigina egi tuanago gudinginyisa mu ndaga jia politike.

Uvi matangua ako, gula tushigo nu luholo lua gulondega milonga mu ginenene, tuana guya nayo gu tribinale ha ‘gumonesa gutuama dia mafumu egi lukuma luabonga ludi naye gulongesewa.’ (Fili. 1:7) Ha gufezegesa, ivo yavula yabalega gale, mafumu a leta a gu Europe nu gu Corée du Sud akhalele mutshigina egi aphangi atshite mudimo wa gisuta. Ndaga yene yakalegele egi aphangi a mala a gu Europe 18000 nu aphangi a mala gu Corée du Sud 19000 ambiwe mu bologo handaga atunyile guya mu mudimo wa gisuta.

Gu gisugishilo, mu lusugu lua 7 Juillet 2011, Cour européenne des droits de l’homme yazudile desizio mu mulonga wakhalele mutamegewa egi Bayatyan v. Armenia; desizio diene diakhalele mutoga ifutshi yagasue ya gu Europe ha gutshigina egi gula muthu watuna genji guya mu mudimo wa gisuta mukunda nu ndaga jia gikombelelo giawo, wajiya gutshita midimo iko ha gukuatesa gifutshi. Gungima Cour constitutionnelle ya gu Corée du Sud yazudile nji desizio dia luholo lumoshi mu lusugu lua 28 Juin 2018. Tuakhalelego naye gubinga milonga eyi yagasue gula nga aphangi ako mukatshi dia aphangi ene atshiginyile guya mu mudimo wa gisuta.

Service juridique ya biro diakoma dia Matemue a Yehowa nu service juridique jia mu Betele jia ha mavu agasue ana tshita mudimo wakola ha guzuelela ndaga jia ulondegi wetu gutuama dia mafumu gu batribinale. Tuana khala nu gusuanguluga ha gukuatesa aphangi etu ana sagesewa gudi mafumu a leta. Ikhale tuabinga milonga nga ndo, ndaga tuana tshita yana khala gijiyishilo mukunda nu baguvelenele, mafumu nu ifutshi. (Mat. 10:18) Manzunji nu amoneshi a baguvernema nu ba journaliste nu ene athu agasue ana landula milonga yetu, ana tanga baverse tuana gumba mu mikanda tuana guahana nu mu ndaga tuana zuela gu batribinale. Ndaga yene yana kuatesa athu adi nu mitshima yabonga ha gujiya Matemue a Yehowa muabonga nu gujiya ndaga jiana gututuma ha gusha gutshigina mu Biblia. Athu ako mukatshi dia athu ene abuile gale Matemue a Yehowa.

NGANA HANA YEHOWA MERSI!

Mu ivo yagasue 40 yabalega gale, ngahetele luendu lua gutshita hamoshi nu service juridique jia Betele jia ha mavu agasue; ngahetele nji luendu lua guzuelela ndaga jia ulondegi wetu gutuama dia batribinale akoma nu gutshita hamoshi nu mafumu akoma. Ngana suanguluga muavula nu aphangi tuana kalagala nawo mudimo gu service juridique ya biro diakoma dia Matemue a Yehowa nu a mu service juridique jia ha mavu agasue; ngana guazumba nji muavula. Ngana khala nu gusuanguluga guavula, ngahetele nji ishimbigo yavula mu monyo wami.

Mukaji’ami Elizabeth wana gungukuatesa muavula mu ivo 45 tuabalegesa gale hamoshi, ikhale mu tangua dia gusuanguluga nga dia lamba. Ngana gumushimana muavula mukunda nu ndaga jiana kalagala muene ikhale wana kata misongo yana tshita egi gakhadigo nu ngolo jiavula.

Tuakotelesele gale egi Yehowa wana gutuhana ngolo nu wana gutukuatesa ha gubinga milonga. Gifua muazuelele Davidi egi: “Yehowa wana hana athu enji ngolo.” (Ngi. 28:8) Ya diago “Yehowa wana kuatesa athu ha gubinga gu ita.”