Wana ‘Suanguluga nu Ima udi Nayo’ ba?

1. Gusuanguluga nu ima tudi nayo gudi mukotelesa itshi? Gushigo nji mukotelesa itshi?

WANA suanguluga nu ima udi nayo ba? Muthu wana suanguluga nu ima idi nayo muene ganago gudisagesa nu wana khala mu guhuima. Ganago guvua gisegela nga khabu mukunda nu ima inyi gashigo nayo. Uvi gusuanguluga nu ima tudi nayo, ishigo mukotelesa gutuna gudisagesa mukunda nu monyo wetu. Ha gufezegesa, idi ndaga yabonga gula Muklisto udi mutshigina gudihana muavula mu mudimo wa Yehowa. (Roma 12:1; 1 Tim. 3:1) Uvi gula khenji gaheta galego inemo idi gudifelela muene, gashigo naye gutotesa gusuanguluga guenji.

2. Itshi yajiya gubuila muthu gula gashigo musuanguluga nu ima idi nayo muene?

² Gula tushigo musuanguluga nu ima tudi nayo, yajiya gutubatela malamba avula. Athu anyi anago gusuanguluga nu ima adi nayo, ajiya gudihana ha gutshita mudimo udi guazula tangua diavula ha gusumba ima ashigo diago nayo funu. Ndaga ya lamba idi egi Aklisto ako akuyile gale mbongo nga ima iko akhalele nayo funu. Yajiya gukhala egi azuelele egi: ‘Ngudi naye gukhala nu gima egi,’ ngana gugikamba gale sendese mualeha,’ nga ndo ‘ngumuza mufuta mbongo jiene gungima.’ Uvi Yehowa ganago gusuanguluga nu uzangi handaga athu ana gukuya ana seguluisa jina dienji. (Ish. 30:9) Athu ako alebele gawo muila nu abembele gukombelela Yehowa handaga ahetelego inemo akhalele gudifelela. (Gal. 6:9) Itshi yajiya gutuma mukombeledi wa Yehowa ha gutshita ngenyi? Yajiya gukhala egi phangi muene ganago luko gusuanguluga nu ima adi nayo.

3. Malongo atshi tuajiya guzula mu Filiphi 4:11, 12?

³ Mukut’etu agasue tudi naye gukudisa khadilo dia gusuanguluga nu ima tudi nayo. Mupostolo Phaula wasonegele egi ‘wajiyile luholo lua gukhala nu gusuanguluga mu ndaga jiagasue.’ (Tanga Filiphi 4:11, 12.) Wasonegele mbimbi eji tangua diakhalele muene mu bologo. Ikhale ngenyi wakhalele nu gusuanguluga. Wakhalele mujiya ndaga idi naye gutshita muene ha gusuanguluga nu ima gakhalele nayo. Gula tushigo mujiya luholo lua gusuanguluga nu ima tudi nayo, ndaga jiasonegele Phaula nu malamba ataganele nawo muene ajiya gutukuatesa. Gusuanguluga nu ima tudi nayo guakhalago ndaga yaleba. Uvi tudi naye gutshita yagasue ha gujiya ndaga jiajiya gutukuatesa ha gukudisa khadilo diene. Luholo lutshi? Longo edi diza gutukuatesa ha gujiya makalegelo ajiya gutukuatesa ha gukhala nu gusuanguluga.

KHALA NU KHADILO DIA GUHANA MERSI

4. Luholo lutshi khadilo dia guhana mersi diajiya gutukuatesa ha gusuanguluga nu ima tudi nayo? (1 Tesalonike 5:18)

⁴ Muthu wana khala nu khadilo dia guhana mersi wana suanguluga nu ima adi nayo. (Tanga 1 Tesalonike 5:18.) Ha gufezegesa, gula tudi musuanguluga nu ima tudi nayo, mbayitukuatesa ha gutuna gudisagesa muavula mukunda nu ima inyi tushigo nayo. Ha fundo dia gudisagesa mukunda nu inemo tudi gudifelela, tudi naye guhana Yehowa mersi mukunda nu inemo tudi nayo mangino nu gutshita ngolo ha guyitagenesa muabonga. Biblia yana gututoga ha guhana Yehowa mersi mu isambu yetu! Gukhala nu khadilo edi guana gutukuatesa ha gukhala nu “guhuima guabalega ndaga jiagasue athu ajiya gukotelesa.”​—Fili. 4:6, 7.

5. Ndaga jitshi jiakhalele naye gutuma enya Isalele ha guhana Yehowa mersi? (Tala nji gifuanesa.)

⁵ Tutadilenu ndaga yabuidile enya Isalele. Akhadile mulaba gudidila Yehowa handaga akhalelego luko mudia ima yakhalele ene mudia gu Ejipitu. (Lutang. 11:4-6) Idi yadiago egi mu mavu a luselenga lujingu luakhalelego lualeba. Itshi yakhalele naye guakuatesa ha gusuanguluga nu ima akhalele nayo? Akhalele naye gutangiza ndaga Yehowa waakalegele. Ha gufezegesa, akhalele naye guwunguluga egi tangua akhalele gu Ejipitu akhalele guakalegela ndaga nu khuta gifua ahiga, uvi Yehowa wahanele enya Ejipitu ndola 10 ha guazola mu uhiga. Tangua enya Ejipitu a abembele ha guya “enya Isalele azanguile ima yavula diago ya enya Ejipitu” utadi wa siliva, wolo nu milele. (Guz. 12:35, 36) Tangua enya Ejipitu akhalele mulandula enya Isalele gu Kianga Giabenga, Yehowa wakhaphumuine meya mu itshinyi mbadi mu luholo lua gushimana. Tangua akhalele mu mavu a luselenga Yehowa wakhalele guahana mana lusugu nu lusugu. Na mukunda natshi enya Isalele akhalele mulaba gudidila Yehowa? Akalegele ngenyi handaga akhalelego luko musuanguluga nu ima akhalele nayo, uvi ishigo handaga akhalelego nu ima ya gudia akhalele nayo funu.

6. Itshi yajiya gutukuatesa ha gukhala nu khadilo dia guhana mersi?

⁶ Itshi yajiya gugukuatesa ha gukhala nu khadilo dia guhana mersi? Thomo, khala muzula tangua lusugu nu lusugu dia gutangigiza ima yabonga yana gugusuanguluisa. Wajiya gusonega ndaga mbadi nga thathu wajiya guhanela Yehowa mersi. (Yesh. 3:22, 23) Ya mbadi, khala muhana athu ako mersi gula agukalegela ndaga yabonga. Uvi ndaga yabalega ndando, khala muhana Yehowa mersi lusugu nu lusugu. (Ngi. 75:1) Ya thathu, kuata ufuta nu athu akhala nu khadilo dia guhana mersi. Gula mafuta etu adi nu khadilo dia gulaba gudididila nga dia gutuna guhana mersi, esue nji tuajiya gubua gifua ene; uvi gula adi nu khadilo dia guhana mersi, gifezegeselo giawo giabonga giajiya nji gutukuatesa ha gukhala nu khadilo dia guhana mersi. (Mikh. 1:26-28; 2 Tim. 3:1, 2, 5) Gula tudi mukamba ba okazio a guhana mersi, mbayitukuatesa ha gutuna gudisagesa mukunda nu malamba tudi nawo nga mukunda nu ima tushigo naye.

7. Itshi yakuatesele phangi Aci ha gukhala nu gusuanguluga?

⁷ Tutadilenu ndaga yabuidile phangi Aci wa gu Indonésie. Udi muzuela egi: “Mu sungi ya misongo ya COVID-19, ngasendesele gudifuanesa nu aphangi ako. Ndaga yene yatshitshile egi ngukhadigo luko nu gusuanguluga.” (Gal. 6:4) Itshi yamukuatesele ha gusombegesa matangi enji? Udi muzuela egi: “Ngasendesele gutangigiza ndaga jiabonga Yehowa wakhalele gungukalegela lusugu nu lusugu; ngakhalele nji mutangigiza gubonga ngana heta luholo ngudi mu ulondegi wa Yehowa. Ngahanele nji Yehowa mersi mukunda nu ndaga jiene jiagasue. Gutshita ngenyi guangukuatesele ha gukhala nu gusuanguluga.” Gula ushigo nu gusuanguluga mukunda nu ima udi nayo, wajiya gutshita ndaga jiatshitshile phangi Aci; mbayigukuatesa ha gukhala nu khadilo dia guhana mersi.

KHALA MUSUANGULUGA NU IMA UDI NAYO, KHALA NJI NU GUDIBULUMUISA

8. Baruke wabuile mu muheto utshi?

⁸ Baruke, secretere wa prophete Yelemiya wabuile nji mu muheto wa gutuna gusuanguluga nu ima yakhalele nayo muene. Baruke wakhalele nu ginemo giakola; wakhalele naye gukuatesa Yelemiya ha guwambela enya Isalele anyi akhalelego nu khadilo dia guhana mersi ndaga jiakhalele naye guabuila handaga atunyile gutumagela Yehowa. Ha fundo dia gudihana mu ndaga jiamutogele Yehowa ha gukalagala, Baruke wasendesele gutangiza muavula gu ndaga jiakhalele mutshigina muene. Uvi Yehowa wamuwambelele mu njila ya Yelemiya egi: ‘Udi mukamba ima yavula. Bemba gudikambela ima ya luholo elu.’ (Yel. 45:3-5) Mu guzuela guko, Yehowa wakhalele muwambela Baruke egi: “Suanguluga nu ima udi nayo.” Baruke watshiginyile longo dia Yehowa, walanduile nji gukhala futa dienji.

9. Longo ditshi tuazula mu 1 Kolinto 4:6, 7? (Tala nji ifuanesa.)

⁹ Matangua ako, mukombeledi wa Yehowa mumoshi wajiya gusendesa gutangiza egi udi naye guheta ginemo gimoshi ngenyi. Wajiya gukhala nu ndunge jiavula, wana kalagala mudimo wakola nga ndo wana kombelela gale Yehowa sendese mualeha. Uvi athu ako aheta ginemo giakhadi gudifelela muene. Itshi yajiya gumukuatesa gula ndaga yene yamusagesa? Udi naye guzula tangua dia gutangigiza ndaga jiazuelele mupostolo Phaula mu 1 Kolinto 4:6, 7. (Tanga.) Yehowa wana gutuhana inemo yagasue tuana heta nu ndunge jiagasue tuakhala najio. Ganago gutuhana ima yene handaga tudi nu ndando yavula gubalega athu ako. Wana gutuhana nayo handaga wana gutuzumba nu wakhala nu gisemo giavula.​—Roma 12:3, 6; Ef. 2:8, 9.

10. Itshi yajiya gutukuatesa ha gukhala nu gudibulumuisa?

¹⁰ Gifezegeselo gia Yesu giajiya gutukuatesa ha gukhala nu gudibulumuisa. Tala ndaga yakalegewe mu phipha imoshi ngenyi tangua Yesu wawevuele malu a alandudi enji. Mupostolo Yone wasonegele egi: “Yesu wajiyile egi [1] Tata wahanele ima yagasue ha mago enji, [2] muene wakatugile gudi Nzambi nu [3] wakhalele naye guvutuga gudi Nzambi . . . wasendesele guweva ikanzo ya alandudi enji.” (Yone 13:3-5) Yesu wakhalele naye gutangiza egi alandudi adi naye gumuwevua malu, uvi gatshitshilego ngenyi. Hakhalele muene ha mavu, Yesu gatangijilego egi luholo luakhalele muene Mun’a Nzambi, udi naye gukhala nu inzo yabonga, makuta avula nga gukhala nu lujingu luabonga. (Luka 9:58) Yesu wakhalele nu gudibulumuisa; wakhalele nji musuanguluga nu ima yakhalele nayo muene. Watubembele gifezegeselo giabonga diago.​—Yone 13:15.

11. Itshi yakuatesele phangi Dennis ha gukhala nu gusuanguluga?

¹¹ Phangi Dennis wa gu Pays-Bas udi muzuela egi wana kalagala yagasue ha gulandula khadilo dia gudibulumuisa dia Yesu, uvi yana khalago ndaga yaleba. Udi muzuela egi: “Gula phangi mumoshi waheta ginemo ngakhalele gudifelela, matangua ako yana gunguhana khabu handaga ngana tangiza egi ame ngakhadi naye guheta ginemo giene. Gula ngadivua ngenyi, ngana longuga longo dimoshi didi muzuelela gudibulumuisa. Ngasonegele gale verse jiana zuelela gudibulumuisa mu banote ami mu JW Library^® hagula ngajiya gujimona muphushi nu gujitanga. Ngana khala nji nu badiskur avula mu telefone yami ana zuelela khadilo dia gudibulumuisa, ngana guategelela muavula.a Ngakotelesele egi midimo yagasue tuana kalagala yakhala mukunda nu gutumbuisa Yehowa, uvi ishigo ha guditumbuisa esue hakhetu. Muthu wagasue mukatshi dietu wana khala nu ndaga ya gutshita mu mudimo wa Yehowa.” Gula ushigo luko nu gusuanguluga handaga wahetelego ginemo wakhadi gudifelela, tshita yagasue ha gukudisa khadilo dia gudibulumuisa. Gutshita ngenyi mbagugukuatesa ha gukolesa ufuta waye nu Yehowa nu mbawukhala nu gusuanguluga.​—Yak. 4:6, 8.

KHALA MUTANGIGIZA NDAGA JIAGULAYELE YEHOWA

12. Luholo lutshi felela mukunda nu masugu adi muza diajiya gutukuatesa ha gukhala nu gusuanguluga? (Yeshaya 65:21-25)

¹² Tuana khala nu gusuanguluga guavula tangua tuana tangigiza ndaga jiabonga jiatulayele Yehowa mu masugu adi muza. Mu mukanda wa Yeshaya, Yehowa udi gutuwambela egi udi mujiya malamba tudi nawo; udi nji gutulaya egi mbawuza mukatula malamba ene agasue. (Tanga Yeshaya 65:21-25.) Mbatukhala mu jinzo jiabonga diago. Mbatukhala nu midimo yawaha, mbatukhala nji nu ima yabonga ya gudia. Mbatushigo luko mukhala nu woma mukunda nu ndaga jiabola jiajiya gutubuila nga gubuila an’etu. (Yesh. 32:17, 18; Ezek. 34:25) Tuajiya diago gusha mutshima egi mafelela awa agasue mbaatagenesewa diago mu masugu adi muza.

13. Malamba atshi tudi mutagana nawo? Luholo lutshi felela mukunda nu masugu adi muza diajiya gutukuatesa?

¹³ Mukunda natshi idi nu ndando ha gutangigiza muavula felela mukunda nu masugu adi muza? Handaga tudi “mu masugu a gisugishilo,” mukut’etu agasue tudi mutagana nu malamba akola. (2 Tim. 3:1) Uvi Yehowa wana gututuameza, wana gutuhana nji ngolo nu ukuateshi ha gukolesela mu malamba ene. (Ngi. 145:14) Felela dietu diana gutukuatesa tangua tudi mutagana nu malamba. Yajiya gukhala egi idi lamba mukunda nu aye ha gutagenesa nzala jia enya fami yaye. Na idi mukotelesa egi mbawulandula gaye gukhala phutu ba? Ndo sha! Yehowa wagulayele gale egi mbawuguhana ima yavula diago mu Phaladiso. (Ngi. 9:18; 72:12-14) Yajiya gukhala egi udi nu misongo yakola nga ndo udi nu misongo ya mu matangi (dépression) nga misongo itshi iko. Mbawulandula gaye gukata ngenyi mayilago ba? Ndo sha. Misongo nu gufua mbayishigo mukhala mu mavu ahe-ahe a Nzambi. (Gumo. 21:3, 4) Felela edi diana gutukuatesa ha gutuna gudisagesa nga guvua khabu mukunda nu ndaga jidi gutubuila. Tuajiya gukhala nu gusuanguluga ikhale tudi mutagana nu usageshi, tuafuisa muthu, tudi mukata nga ndo ndaga imoshi yabola yatubuila. Mukunda natshi? Handaga malamba tudi nawo mangino adi “mukunda nu tangua diazonda,” gualeha ndo malamba agasue mbaakatudiwa mu mavu ahe-ahe.​—2 Kol. 4:17, 18.

14. Itshi yajiya gutukuatesa ha gusha mutshima mu ndaga jiatulayele Yehowa?

¹⁴ Tudi mujiya egi felela dietu diana gutukuatesa ha gukhala nu gusuanguluga. Uvi itshi yajiya gutukuatesa ha gusha mutshima egi ndaga jiatulayele Yehowa mbajitagenesewa diago? Gifua luholo muthu wana sudiga linete ha gumona muabonga ima idi gualeha, esue nji tudi naye gutshita ndaga jiko ha gukolesa gutshigina guetu nu gutangigiza luholo mbatukhala mu Phaladiso. Ha gufezegesa, gula tudi gudisagesa handaga tushigo nu makuta avula ajiya gutukuatesa, tuajiya gutangiza luholo mbatukhala mu mavu ahe-ahe tangua mbatushigo luko mukhala phutu nga gukhala nu funu ya makuta. Gula tudi nu gikenene handaga tuahetelego ginemo gimoshi ngenyi mu mudimo wa Yehowa, tuajiya gutangiza gubonga mbatuheta tangua mbatubua athu atagana nu mbatukhala mukombelela Yehowa ivo yavula; ngenyi mbatukotelesa egi inemo yene ishigo diago nu ndando yavula gubalega gubonga ogu guagasue. (1 Tim. 6:19) Gula tudi gudisagesa mukunda nu ndaga jiavula mangino, yajiya gukhala lamba gudi esue ha gutangigiza mafelela atulayele Yehowa mukunda nu masugu adi muza. Uvi gula tudi mutangigiza muavula ndaga jiatulayele Yehowa, mbayikhala yaleba gudi esue ha gusha matangi etu mu ndaga jiene ha fundo dia gudisagesa mukunda nu malamba tudi nawo.

15. Longo ditshi wazula mu lumene lua phangi Christa?

¹⁵ Tutadilenu luholo felela diakuatesele phangi Christa, mukaji’a phangi Dennis tuazuelela gu thunda. Udi muzuela egi: “Ngakhala nu misongo yakola yana gungulebesa muavula. Nganago guwenda, ngana kalegela nguasa ya ikata ha guwenda, ngana khala wagubanda tangua diagasue. Ngana khala mu lamba lusugu nu lusugu. Munganga wami wanguwambela egi mbangushigo luko muvua muabonga. Hanguwambelele muene ngenyi, ngazuelele mbala imoshi mu mutshima egi: ‘Muene gashigo mutadila masugu adi muza gifua ame.’ Ame ngana gusha mutshima mu felela, gutshita ngenyi guana gunguhana guhuima gua mu matangi. Mangino ngudi gami mumona malamba avula, uvi mu mavu ahe-ahe mbagukhala nu gusuanguluga guavula!”

“ATHU ANA GUMUVUILA WOMA ANA KAMBA NDO NGA GIMA”

16. Mukunda natshi Fumu Davidi wasonegele egi athu ana vuila Yehowa woma “ana kamba ndo nga gima”?

¹⁶ Ikhale tudi getu musuanguluga nu ima tudi nayo, mbatulandula gutagana nu malamba. Fumu Davidi wafuishile an’enji thathu. Athu amumbidile mambo, mafut’enji ako amuyidile giphungi, fumu mumoshi wakambele gumushiya mbala jiavula, wakhalele nji guya nu gumukamba ha gumushiya ivo yavula. Ikhale ngenyi, Davidi wakhalele nu gusuanguluga; wazuelele mukunda nu Yehowa egi: “Athu ana gumuvuila woma ana kamba ndo nga gima.” (Ngi. 34:9, 10) Mukunda natshi Davidi wazuelele ngenyi? Handaga wakhalele mujiya egi ikhale Yehowa ganago gukanga malamba njila, uvi mbawulandula gumuhana ima yakhalele nayo muene funu. (Ngi. 145:16) Esue nji tuajiya gusha mutshima egi Yehowa mbawutukuatesa ha gukolesela mu malamba gifua Davidi. Ngenyi mbatukhala nu guhuima nu gusuanguluga ikhale tudi nu malamba.

17. Mukunda natshi udi mutshigina gukhala nu gusuanguluga?

¹⁷ Yehowa wana tshigina egi ukhale nu gusuanguluga. (Ngi. 131:1, 2) Hene, tshita yagasue ha gukhala nu khadilo dia gusuanguluga nu ima udi nayo. Gula udi mutshita ngolo ha gukhala nu khadilo dia guhana mersi, udi musuanguluga nu ima udi nayo, udi nu gudibulumuisa nu udi mukolesa felela diaye, mbawuzuela diago nu gikhesa giagasue egi: ‘Ayi, ngudi nu gusuanguluga.’​—Ngi. 16:5, 6.