Yesu Wakalagala Ndaga Jiakoma jia Gushimana gu Kaphelenauma

Yesu watamegele alandudi nguana—Phetelo, Andre, Yakoba, nu Yone—ha gubua alowi a athu. Gungima, mu lusugu lua guhuluguga, ayile mu sinagoga ya gu Kaphelenauma. Yesu walongesele mu sinagoga, enji athu ayitugile luko mukunda nu luholo luenji lua gulongesa. Wakhalele mulongesa gifua muthu udi nu ufumu uvi ndo gifua alongeshi a mikhuala.

Mu lusugu luene lua guhuluguga, yala mumoshi wakhalele nu demo wakhalele nji hene. Mukatshi dia sinagoga, yala muene wakalugile mu dijui diakola egi: ‘Aye Yesu muenya Nazaleta, ndaga tshi udi nayo nu esue? Aye waza ha gutushiya ba? Ngudi mujiya udi nanyi, aye udi wagijila watumiwe gudi Nzambi!’ Yesu wabalele demo dinyi diakhalele musagesa yala munu, wazuelele egi: ‘Hena, enji zoga gudi muthu yowu!’—Mako 1:24, 25.

Mu tangua diene, nyuma yene yabola ya buishile yala muene hashi, yasendesele gumukonyesa, yakalugile mu dijui diakola. Demo diene diazogele mukatshi dia yala muene, uvi “diamutshitshilego ndaga yabola.” (Luka 4:35) Athu akhalele hehi nu yala muene mu sinagoga ayitugile muavula! Adihudile egi: ‘Yeyi itshi? Muene udi nu jingolo jia guwambela bademo mbimbi, ene amuvuila.’ (Mako 1:27) Yadiago, lukuma lua ndaga eyi ya gushimana lua muangagene mu Galile yagasue.

Yesu nu alandudi enji azogele mu sinagoga, gungima ayile gumbo dia Simona Phetelo. Givuaji gia Phetelo gia mukhetu wakhalele mukata muavula. Alandudi abubile Yesu ha gumusaga. Hene, Yesu wamukuatele gu koko, wamuzugishile molu. Mukhetu muene wasagewe giphungu gimoshi. Gungima wasendesele gukuatesa Yesu nu alandudi enji; yajiya gukhala egi, wakhalele guaatelegela ima ya gudia.

Mungueze, athu akatugile mu mafundo agasue, abatele akhashi awo gumbo dia Phetelo. Gugima, yakhalele mumonega gifua athu agasue a mu dimbo azalele ha mufulo. Mukunda natshi? Akhalele mukamba usagi. Hene, ‘athu agasue akhalele nu akhashi a miho nu miho ajile nawo gudi muene. Muene wahagele muthu nu muthu mago, waasagele.’ (Luka 4:40) Yadiago, ngatshima akhalele nu misongo ya luholo lutshi, Yesu waasagele, gifua luholo yazuelewe gutuama gudi profete Yeshaya. (Yeshaya 53:4) Wasagele nji athu akhalele nu bademo. Tangua nyuma jiene jiabola jiakhalele muzoga, jiakhalele mukaluga egi: “Aye udi Mun’a Nzambi.” (Luka 4:41) Uvi, Yesu wabalele nyuma jiene, gajihanelego njila ya guzuela luko. Bademo ene ajiyile egi Yesu udi Klisto, uvi Yesu gatshiginyilego egi bademo ene amonegese gifua ana gukalegela Nzambi wa giamatshidia.