Mona Wago Nzambi wa Layile

Hafundo dia guvutuga gu Beteleheme, Yozefe nu Mariya asalele gu Nazaleta. Tangua Yesu wataganesele masugu nage, wambiwe gu mukanda luholo mukhuala wa Nzambi wakhalele mutoga enya Isalele ha gukalagala. (Levi 12:2, 3) Enya Isalele akhalele nji muhana mona jina mu lusugu lua nage. Hene, Yozefe nu Mariya ahanele mun’awo jina egi Yesu, gifua luholo lua zuelele Gabriele.

Mbeji imoshi nu ndambo yabalegele, Yesu wataganesele masugu 40. Guma gutshi mvuaji jienji jiayile nenji? Gu tempelo gu Yelusalema, yakhalele hehi nu fundo akhalele mujinga. Mukhuala wakhalele muzuela egi gula mukhetu wavala mona yala, gungima dia masugu 40, udi naye guya gu tempelo ha guhana mulambu wa guwevewa.—Levi 12:4-8.

Mariya nji watshitshile ngenyi. Wabatele tunjila tuyadi tuazonda ha guhana mulambu wenji. Ndaga eyi idi gutumonesa egi Yozefe nu Mariya akhalelego enya umonyi. Mukhuala wakhalele muzuela egi mukhetu udi naye gubata mutumba wa gimeme nu ganjila. Uvi gula gashigo nu mutumba wa gimeme, wajiya gubata tukhulumbia tuyadi nga mayembe mbadi. Yakhalele ngenyi mukunda nu Mariya, hene wabatele tunjila tuyadi tuazonda.

Hakhalele ene mu tempelo, yala mumoshi wa gukola wayile fundo diakhalele Yozefe nu Mariya. Jina dienji Simeone. Nzambi wamudijigile egi gajiyilego gufua gula khenji gamona gale go Klisto nga Masiya, wago walayile Yehowa. Mu lusugu luene, nyuma ya Nzambi yatumine Simeone ha guya gu tempelo. Hahetele muene gu tempelo, wadimonele nu Yozefe nu Mariya nu mun’awo Yesu. Simeone wazanguile mona ha mago enji.

Simeone wazangudile Yesu, wahanele Nzambi mersi, wazuelele egi: “Fumu, luenyelu gutendelela guaye guatagenesewa. Ubembe muenya mudimo waye afue nu guhuima ndaga ya meso ami amona gale guhuluga guaye, guwalondele gu phala ya athu a ifutshi yagasue. Muanya mbawugujiyisa gudi athu a ifutshi iko, mbawuhana lutumbu gudi enya Isalele, athu aye.”—Luka 2:29-32.

Tangua Yozefe nu Mariya avuile mbimbi eji, ashimanene diago. Simeone waashimbigile, wawambelele Mariya egi, ‘Nzambi watombele mon’owu mukunda nu gubua nu guzuga gua athu avula mu Isalele;’ luko egi Mariya mbawuvua gikenene gidi gifua phogo yavigiwa.—Luka 2:34.

Muthu muko wakhalele hene lusugu luene. Jina dienji Ana; wakhalele profete wa mukhetu wa ivo 84. Yadiago, wakhalele muya gu tempelo lusugu nu lusugu. Mu tangua dinyi, wayile fundo diakhalele Yozefe, Mariya nu Yesu. Ana wasendesele guhana Nzambi mersi, nu wawambelele athu agasue akhalele gumutegelela ndaga jiatadila Yesu.

Tangiza luholo Yozefe nu Mariya asuangulugile havile ene ndaga eji mu tempelo! Yadiago, ndaga eji jiagasue jiaatshiginyishile egi mun’awo udi muthu wago Nzambi walayile.