Yesu Wabatijiwa

Mbeji jisambano jiabalega gale sendese Yone Mubatiji wasendesele gulongesa. Mu tangua dinyi, Yesu wakhalele nu ivo 30. Wayile gudi Yone, gu Muta wa Yordani. Ndaga itshi ayile mutshita? Gayile ndo ha gumutala, nga gumona luholo Yone wakhalele gutshita mudimo wenji. Yesu wayile ha gutoga Yone hagula amubatize.

Uvi Yone watunyine, wamuwambelele egi: “Ame ngudi naye gubatijiwa gudi aye, luenyelu na aye uze gudi ame egi ngugubatize?” (Matayo 3:14) Yone wakhalele mujiya egi Yesu udi mun’a Nzambi wabalega ndando. Wunguluga egi hakhalele Yone mu vumo dia gin’enji Elizabete, wadinyigishile mukunda nu gusuanguluga tangua Mariya, yonyi wakhalele gu vumo dia Yesu, wayile mutala Elizabete. Idi yadiago egi tangua Yone wavalewe, gin’enji wamudijigile ndaga eyi. Luko, yajiya gukhala egi Yone wajiyile ndaga jiazuelele muanjelo Gabriele mukunda nu guvualewa gua Yesu, nu ndaga jiazuelele anjelo ako mu lusugu lua vualewe Yesu.

Yone wajiyile egi wakhalele mubatiza athu ha gumonesa egi athu ene abalumuine mitshima mu gubola guawo. Uvi Yesu gakhalelego nu gubola nga guazonda. Ngatshima Yone watunyine, Yesu walanduile gumuwambela egi: ‘Ikhale ngenyi luenyelu. Handaga idi yatagana egi tutagenese ndaga jiagasue jia nduedi luholo elu.’—Matayo 3:15.

Mukunda natshi yakhalele ndaga yatagana egi Yesu abatijiwe? Yesu gabatijiwego ha gumonesa egi wabalumuna mutshima mu gubola guenji. Gubatijiwa guenji guamonesele egi wadihanele ha gukalagala gutshigina gua sh’enji. (Hebelu 10:5-7) Yesu wakhalele muenya mabaya, uvi tangua diatagenele hagula asendese mudimo wa gulongesa, wamutumine sh’enji wa mu dilu ha gukalagala ha mavu. Watangiza egi Yone wajiyile egi mbawumona ndaga ya gushimana tangua mbaabatiza Yesu?

Gungima, Yone wazuelele egi: “Muthu wangutumine ha gubatiza athu mu meya wangudijigile egi: ‘Muthu yonu mbawumona nyuma ya Nzambi mubulumuga nu yamagana holu dienji, muene muthu udi mubatiza nu nyuma ya Nzambi.’” (Yone 1:33, NW) Yone wakhalele munengena egi nyuma ya Nzambi ize mumagana holu dia muthu gadi mubatiza. Hene, hazogele Yesu mu meya, Yone gayitugilego tangua gamonele “Nyuma ya Nzambi mubulumuga gifua yembe, mubua holu dia [Yesu].”—Matayo 3:16, NW.

Uvi, ndaga jiko jiavula jia gushimana jiakalegewe tangua dia gubatijiwa gua Yesu. ‘Dilu diakangugile’ mukunda nu muene. Yakotelesa itshi? Yakotelesa egi tangua Yesu gabatijiwe, watangijile lujingu luakhalele nalo mu dilu gutuama egi avualewe ha mavu. Mu tangua diene, Yesu wawungulugile lujingu luenji hakhalele muene mun’a Yehowa wa mu nyuma, watangijile nji giamatshidia giamulongesele Nzambi mu dilu gutuama egi aze ha mavu.

Luko, mu tangua dia gubatijiwa gua Yesu, mbimbi yajile mu dilu, yazuelele egi: ‘Yowu udi mun’ami, ngana guzumba muavula, ngamutshigina.’ (Matayo 3:17) Mbimbi inyi yakhalele ya nanyi? Yajiyilego gukhala ya Yesu, handaga muene wakhalele fundo dimoshi nu Yone. Mbimbi inyi yakhalele ya Nzambi. Yadiago, Yesu udi mun’a Nzambi. Muene gashigo Nzambi ndo.

Jiya egi tangua Yesu wakhalele ha mavu, wakhalele muthu gifua muakhalele Adama. Gungima dia guzuelela gubatijiwa gua Yesu, mulandudi Luka wasonegele egi: “Yesu wakhalele nu ivo 30 hasendesele muene mudimo wenji. Athu akhalele mutangiza egi wakhalele mun’a Yozefe, mun’a Eli, . . . mun’a Davidi, . . . mun’a Abalahama, . . . mun’a Nowa, . . . mun’a Adama, mun’a Nzambi.”—Luka 3:23-38.

Yadiago, Adama wakhalele muthu, “mun’a Nzambi.” Yesu nji wakhalele ngenyi. Tangua Yesu wabatijiwe, wakuatele ufuta wa luholo luko nu Nzambi. Ngenyi, wabuile mun’a Nzambi mu nyuma. Mu tangua dinyi, Yesu watagenele ha gulongesa giamatshia giatadila Nzambi, nu gudijiga athu njila ya monyo. Yesu wasendese lujingu luko, enji lujingu luene lua mutumine ha guhana monyo wenji gifua mulambu ha guhuluisa athu mu gubola.