MAKALEGELO A UKLISTO
Tukudise Luholo Luetu lua Gulongesa Mbimbi ya Nzambi—Gusendesa Guta Maga nu Athu Guana Gutuhana Okazio wa Gulongesa Lukuma Luabonga
Yesu wahetele okazio wabonga wa gulongesa mukhetu wa gu Samaliya handaga muene hakhenji wasendesele guta nenji maga. Luholo lutshi tuajiya gukudisa luholo luetu lua gusendesa guta maga nu athu anyi khenji tuadimonele gale nawo?
Khala muenya gisemo, khala muta maga nu athu. Yesu wakhalele waguhuila, uvi ha gusendesa guta maga nu mukhetu wa gu Samaliya, wamutogele thomo meya a gunua. Hene, ha gusendesa guta maga nu muthu, wajiya thomo gumumenega nu gikhesa giagasue. Gungima, wajiya guzuelela n’enji ndaga imoshi yabui mu dimbo dienu, nga guzuelela gula guma gudi guahuma nga muanya udi wabala. Ujimbilago egi felela dietu didi dia gusendesa guta maga nu muthu; hene, zuelela ndaga yagasue yajiya gusuanguluisa muthu muene. Gula muthu muene gahanelego mvutu, udisagesago. Lola guta maga nu muthu muko. Toga Yehowa aguhane gikhesa.—Neh 2:4; Makal 4:29.
Kalegela okazio wagasue waheta ha gusendesa gulongesa lukuma luabonga, uvi guyitshita ndo phushi-phushi. Ukambigo gushinjiga muthu muene ha guta nenji maga, handaga gula wamushinjiga gu ngolo, wajiya guvua khabu nga gutuna guta n’aye maga. Udisagesago gula muasugisa guta maga enu, uvi nu gulongesa ndo muthu muene lukuma luabonga. Gula wana guvua woma ha gulongesa lukuma luabonga, sendesa thomo guta maga nu athu, uvi gulongesa ndo lukuma luabonga. [Talenu video 1, gungima izuelelenu.]
Kamba okazio wa gulongesa lukuma luabonga; sendesa guwambela muthu udi muta nenji maga ndaga imoshi yatadila gikombelelo giaye, yajiya gumutuma ha guguhula mihu. Yesu wazuelele ndaga imoshi yabonga yatumine mukhetu wa gu Samaliya ha gumuhula mihu. Tangua gasendesele gumulungesa lukuma luabonga, wakhalele gumuhana mvutu jia mihu yenji. [Talenu video 2, gungima izuelelenu. Talenu luko video 3, gungima izuelelenu.]