LONGO 4

Mbimbi Jiaguzuela Gutuama dia Gutanga Verse

Matayo 22:41-45

NDAGA UDI NAYE GUKALAGALA: Londega thomo matangi a athu adi gugutegelela gutuama dia gutanga verse.

Kamba thomo gujiya mukunda natshi udi mutanga verse yene. Gutuama dia gutanga verse yagasue, izuelele thomo ha gukuatesa athu akotelese ndaga ya ndando udi mutshigina guzuelela.

Tala nji ndaga jidi gutuama nu gungima dia verse yene udi mutanga. Gula watshigina gutanga jina dia muthu wazuelele ndaga jidi mu verse yene, nga muthu wasonegele mukanda wene wa Biblia, kamba gujiya gula ndaga udi muzuela jidi diago jia giamatshidia.
Kalegela Biblia tangua udi mulongesa. Gula udi muta maga nu athu ana gutshigina egi Nzambi you guene, akuatese ha gumona egi Biblia idi Mbimbi ya Nzambi, gila watshita ngenyi, udi mumonesa egi Biblia idi gishina gia ndunge jia giamatshidia.
Hana athu adi gugutegelela nzala ya gutanga verse yene. Wajiya guhula muhu umoshi ha gula mvutu izoge mu verse uza mutanga, nga guzuelela mulonga umoshi uza mukotelesewa mu verse yene, wajiya nji gumonesa longo dimoshi didi mu verse uza mutanga.

Tangiza ndaga athu adi gugutegela ajiya gale mu ndaga mbawuzuela nu verse mbawutanga. Ngatshima verse yene yajiyiwa muavula, zuelela ndaga mu luholo ludi mutuma athu ha guyitadila luko, ha gukotelesa muabonga mulonga umoshi wa ndando, nga ha gutala luholo luko lua guyikalegela.