Referanse jia Mukanda wa Gukalegela mu Gudibungisa gua Lujingu nu Mudimo wa Uklisto
AVRIL 1-7
UMONYI UDI MU MBIMBI YA NZAMBI | 1 KOLINTO 7-9
“Undumbu udi Kado ka Nzambi”
(1 Kolinto 7:32, NWT) Yadiago, ame ngushigo mutshigina egi mukhale nu gikenene. Yala udi undumbu, wana gudisagesa mukunda nu ndaga jia Fumu, wana gukamba gusuanguluisa Fumu.
w11-F 15/1 diyiji 17-18 par. 3
Kalegela Undumbu Waye Muabonga
3 Ndumbu jiakhala nu tangua diavula gubalega athu adizudile gale mu ulo. (1 Kol. 7:32-35) Ngenyi ajiya gubalegesa tangua diavula mu mudimo wa gulongesa, ajiya guya gutala athu ako, ajiya nji gutshita ndaga jiavula ha gukolesa ufuta wawo nu Yehowa. Mukunda nu gubonga guakhala nago ndumbu, Aklisto avula ana gusuanguluga gawo ha ‘gukhala undumbu’ mu tangua diazonda. Uvi ako azudilego desizio dia gusala undumbu. Ndaga jiawo jia lujingu jiasombegesele, hene asalele undumbu. Ikhale ngenyi, atangijile ndaga yene, akombelele Yehowa mu gisambu, gungima akotelesele egi Yehowa wajiya guaakuatesa ha gusuanguluga nu undumbu wawo.—1 Kol. 7:37, 38.
(1 Kolinto 7:33, 34, NWT) Uvi yala udi nu mukhetu, wana gudisagesa mukunda nu ndaga jia ha mavu, wana gukamba ha gusuanguluisa mukaji’enji. 34 Ngenyi matangi enji adi a gukhaphumuna mu khanda jiyadi. Luko, mukhetu udi undumbu, nu gandongo, wana gudisagesa mukunda nu ndaga jia Fumu ha gukhala wagijila mu muila nu mu nyuma yenji. Uvi, mukhetu udi mu ulo, wana gudisagesa mukunda nu ndaga jia ha mavu, wana gukamba ha gusuanguluisa mulumi’enji.
w08-F 15/7 diyiji 27 par. 1
Ndaga jia Ndando Jidi mu Mukanda wa Kolinto
7:33, 34—Yala nga mukhetu udi mu ulo, wana gudisagesa mukunda nu “ndaga jia ha mavu awa.” Ndaga jiene jia ha mavu jidi itshi? Mupostolo Phaula gakhalelego muzuelela ndaga jiabola jia ha mavu awa Aklisto adi naye gutuna. Uvi wakhalele muzuelela ndaga athu akhala najio funu, jinyi Aklisto adi mu ulo adi naye gudisagesa. Mukatshi dia ndaga jiene, tuajiya gutanga: ima ya gudia, milele ya gusudiga, nu fundo dia gubanda.—1 Yone 2:15-17.
(1 Kolinto 7:37, 38, NWT) Uvi gula muthu wazula desizio mu mutshima wenji, nu muene gashigo nu gima gidi gumutuma gu ngolo, nu udi nu ufumu holu dia gutshigina guenji, nu muene wazula desizio mu mutshima wenji egi gashigo genji muhaga, mbawutshita muabonga. 38 Hene, muthu udi muhaga, watshita muabonga, uvi muthu gashigo genji muhaga, watshita muabonga gubalega.
w96-F 15/10 diyiji 12-13 par. 14
Gukhala Undumbu Mukunda nu Mudimo wa Fumu, Guhaga ndo Matangi mu Ndaga Jiko
14 Muklisto udi undumbu mukunda nu gukamba phamba gubonga guenji, gashigo mutshita “muabonga gubalega” Aklisto anyi adizudile gale mu ulo. Mukunda natshi? Handaga muene udi musala undumbu mukunda nu gukamba gubonga guenji uvi ndo gua ‘Ufumu wa mu dilu.’ (Matayo 19:12) Yala nga mukhetu udi undumbu, udi naye “gudisagesa mukunda nu ndaga jia Fumu,” udi naye “gukamba gusuanguluisa Fumu,” udi naye nji ‘gudihana tangua diagasue mu mudimo wa Fumu, guhaga ndo matangi mu ndaga jiko.’ Yakotelesa egi, udi naye guhaga matangi enji agasue mu mudimo wa Yehowa nu Yesu Klisto. Gula aphangi adi undumbu atshita ngenyi, tuajiya guzuela giwa egi adi mutshita “muabonga gubalega” Aklisto anyi adizudile gale mu ulo.
Kamba Ndaga Jiko jia Ndando jia mu Nyuma
(1 Kolinto 7:11, NWT) Uvi gula muene wadikhapha nu mulumi’enji, asale genji ndumbu nga ndo, adivue luko nu mulumi’enji. Yala nji gashigo naye gubemba mukaji’enji.
lvs-F diyiji 251
Malongo a Gisugishilo
Matangua ako, Muklisto wajiya guzula desizio dia gudikhapha nu mulumi’enji nga nu mukaji’enji ikhale muene gakalegelego uthambi. (1 Kolinto 7:11) Muklisto wajiya gudikhapha nu mulumi’enji nga nu mukaji’enji mukunda nu ndaga eji:
• Gutuna gukuatesa fami yenji nu mutshima umoshi: Yala watuna guhana enya fami yenji ima adi nayo funu; watuna diago guaahana falanga nga guaasumbila ima ya gudia.—1 Timote 5:8.
• Gubeta: Yala udi mubeta mukaji’enji mu luholo luajiya gumba muila nga monyo wenji mu gingonza.—Galatiya 5:19-21.
• Gutunyisa muthu ha gukombelela Yehowa: Yala nga mukhetu udi mutunyisa mukaji’enji nga mulumi’enji hagula akombelela ndo Yehowa.—Makalegelo 5:29.
(1 Kolinto 7:36, NWT) Uvi gula muthu wamona egi gatshitshilego muabonga luholo gashigo muhaga, gula muene wabalegesa sungi ya ulenge, tala ndaga adi naye gukalagala: Atshite ndaga jiatshigina muene; gatshitshilego gubola. Ahage genji.
w00-F 15/7 diyiji 31 par. 2
Muajiya Gukhala Aphelegeta ha Mavu awa Azala pha nu Uthambi
Hene, mavuala ashigo naye gububula ha gudizula mu ulo tangua nzala jiawo jia gubungisa muila jidi gale jiakola diago. Ulo wana gutoga egi athu muyadi adiloge egi mbaasala uu nu gu gufua guawo. Ginemo gia luholo elu giana gutoga egi yala nu mukhetu akhale athu agukula. (Gisendeselo 2:24) Idi ndaga yawaha egi mavuala anengene uu nu tangua ‘mbaabalegesa sungi ya ulenge,’ yakotelesa egi sungi yinyi nzala jia gubungisa muila jiakhala jiakola, nu jiajiya gutuma muthu ha gutshita ndaga ishigo yatagana. (1 Kolinto 7:36) Uvi, gula muthu wagukula wabua mu uthambi handaga khenji gaheta galego muthu wa gudizula nenji mu ulo, idi diago gubola nu idi mumonesa egi muene ashigo nu ndunge ndo.
AVRIL 8-14
UMONYI UDI MU MBIMBI YA NZAMBI | 1 KOLINTO 10-13
“Yehowa Wana Gutagenesa Gutendelela Guenji”
(1 Kolinto 10:13) Gushigo gulolewa gudi gumikuata enue khenji guakuatele galego athu ako. Uvi Nzambi wana gutagenesa gutendelela guenji. Muene mbagabembigo egi mutagane nu gulolewa gudi mubalega ngolo jienu. Tangua mudi mulolewa, muene mbawulondega njila hagula muajiya gukolesela gulolewa guene.
w17.02-F diyiji 29-30
Mihu Yana Guhula Athu ana Gutanga Mikanda Yetu
Mupostolo Phaula wasonegele egi Yehowa ‘mbagabembigo egi mutagane nu gulolewa gudi mubalega ngolo jienu.’ (1 Kol. 10:13) Idi mukotelesa egi Yehowa wana gudiangela gutadila ndaga tuajiya gukolesela, gungima atombi giwa malamba mbatubuila ba?
▪ Gila idi ngenyi, tangiza mulonga wajiya guzoga. Phangi mumoshi wa yala, mun’enji wadijitshigile (wadishiyile gu luwanda). Phangi muene wadihudile egi: ‘Yehowa watadidile gutuama nu wamonele egi ame nu mukaji’ami mbatukolesela gufua ogu gua mun’etu ba? Ndaga eyi yatubuila handaga Nzambi wamonyi egi tuajiya gukolesela ba?’ Gudi diago nu ndaga idi gututuma ha gutshigina egi Yehowa wana gutuameza ndaga jia monyo wetu luholo elu ba?
Mbimbi jiazuelele mupostolo Phaula mu 1 Kolinto 10:13 jidi gututuma ha guzuela egi: Gushigo nga mulonga umoshi mu Biblia udi gututshiginyisa egi, Yehowa wana gudiangela gutadila ndaga tuajiya gukolesela, gungima atombi giwa malamba mbatubuila. Tutadilenu ndaga nguana jidi gututuma ha guzuela ngenyi.
Ndaga ya thomo idi egi, Yehowa wahanele athu luendu lua guditombela (libre arbitre). Muene wana gutshigina egi esue hakhetu tuditombele ndaga tuajiya gukalagala. (Mikh. 30:19, 20; Yosh. 24:15) Gula tuatomba njila yabonga, tuajiya gusha mutshima egi muene mbawututuameza. (Ish. 16:9) Uvi gula tuatomba njila yabola, tudi naye gutshigina malamba anyi mbaatuibila. (Gal. 6:7) Gula Yehowa watomba malamba ajiya gutubuila, mbayimonesa egi tushigo luko nu luendu lua guditombela ndo.
Ndaga ya mbadi idi egi, Yehowa ganago gutubamba gula ‘tangua nu ndaga athu anago gutangiza’ yatubuila. (Mulo. 9:11, NWT) Aksida yakola yajiya gutubuila handaga tuakhadi ha fundo diabola, mu tangua diabola. Yesu wazuelele ndaga imoshi ya gikenene yashiyile athu 18 tangua inzo yaleha ya gu Siloe yabuile. Yesu wamonesele egi ndaga yene yakhalelego gutshigina gua Nzambi. (Luka 13:1-5) Hene, ishigo ndaga yatagana ha gutangiza egi Nzambi wadiangele gutomba nanyi mbawufua nu nanyi mbawusala.
Ndaga ya thathu idi egi, giphapha (maya) giashile Satana mukunda nu gujinginyina guetu gudi Yehowa gidi mutadila muthu wagasue mukatshi dietu. Jiya egi Satana washile giphapha mukunda gujinginyina gua akombeledi agasue a Yehowa. Wazuelele egi tuajiyilego gusala yagujinginyina gudi Yehowa gula tuatagana nu malamba. (Yobo 1:9-11; 2:4; Yat. 12:10) Henyaha, gula Yehowa watubamba gu malamba adi mumona muene egi tuajiyilego gukolesela, mbayishigo musunzula diago ndaga yazuelele Satana egi tuana gukombelela Nzambi phamba mukunda nu gubonga guetu ba?
Ndaga ya nguana idi egi, Yehowa gashigo nu funu ya gujiya gutuama ima yagasue yajiya gutubuila. Gutangiza egi Nzambi wana gudiangela gutomba malamba mbaatubuila, gudi mumonesa gifua muene udi naye gujiya ndaga jiagasue mbajitubuila mu masugu adi muza. Uvi, Biblia yanago guzuela ndaga ya luholo elu. Idi yadiago egi Nzambi wajiya gujiya gutuama ndaga mbajitubuila mu masugu adi muza. (Yesh. 46:10) Uvi Biblia idi mumonesa egi Nzambi ganago gukalegela tangua diagasue luendu luenji lua gujiya ndaga gutuama. (Gis. 18:20, 21; 22:12) Ngenyi, wana gukalegela muabonga ngolo jienji jia gujiya ndaga gutuama, nu wana gunemesa luendu luetu lua guditombela. Idi ndaga yawaha diago ha gumona egi Nzambi wetu wana guzula nu ndando luendu luetu lua guditombela, nu wana gukalegela ngolo jienji mu luholo luatagana. Ishigo ngenyi?—Mikh. 32:4; 2 Kol. 3:17.
Luholo lutshi tuajiya gukotelesa Mbimbi jiazuelele muposto Phaula egi, “Nzambi . . . mbagabembigo egi mutagane nu gulolewa gudi mubalega ngolo jienu”? Mu verse eyi, Phaula udi muzuelela ndaga Yehowa wana gutshita tangua tudimutagana nu malamba uvi ndo gutuama egi malamba ene atubuile. Mbimbi jia mupostolo Phaula jidi gututshiginyisa egi gula tuashila Yehowa mutshima, muene mbawutukuatesa mu malamba a maluholo agasue. (Ngi. 55:22) Mbimbi eji jia Phaula, jidi gututshiginyisa ndaga mbadi jia ndando.
Thomo: malamba tudi mutagana nawo ‘ana gubuila nji athu ako.’ Malamba adi gutubuila, ana gubuila nji athu agasue. Uvi tuajiya gukolesela malamba ene agasue gula tudi musha mutshima gudi Nzambi. (1 Phet. 5:8, 9) Verse jidi gutuama nu gungima dia 1 Kolinto 10:13 jidi mumonesa egi Phaula wakhalele muzuelela gulolewa guataganele nago enya Isalele mu mavu a luselenga. (1 Kol. 10:6-11) Malamba ene akhalelego ndaga ihe-ihe gudi athu; akhalelego nji akola hagula enya Isalele agujinginyina ajiyilego gukolesela. Phaula wazuelele mahugo nguana egi “ako mukatshi diawo” atumagele ndo Nzambi. Ndaga ya gikenene idi egi, enya Isalele ako abuile mu gubola handaga akhalelego musha mutshima gudi Nzambi.
Yambadi: “Nzambi wana gutagenesa gutendelela guenji.” Ndaga jiatshitshile Nzambi mukunda nu athu enji jidi mumonesa egi muene wana gumonesa guzumba guenji gua gujinginyina gudi “athu adi gumuzumba nu adi munemesa mikhuala yenji.” (Mikh. 7:9) Ndaga jiatshitshile Nzambi mukunda nu athu enji jidi mumonesa luko egi Nzambi wana gutagenesa ndaga jiagasue ana gulaya. (Yosh. 23:14) Ha gutadila ndaga jiakalegele Nzambi mukunda nu enya Isalele, athu ana guzumba Nzambi nu ana gumutumagela, adi naye gusha mutshima egi muene mbawutagenesa malaji enji atadila malamba tudi mutagana nawo egi: (1) Muene mbagabembigo egi tutagane nu gulolewa ogu tuajiyilego gukolesela, (2) “muene mbawulondega njila” hagula tuajiya gukolesela gulolewa guene.
Luholo lutshi Yehowa wana gulondega njila mukunda nu athu ana gumushila mutshima? Idi yadiago egi gula muene watshigina, wajiya gumanesela malamba ana gutubuila. Uvi ujimbilago mbimbi jiazuelele Phaula egi: “Muene [Yehowa] mbawulondega njila hagula muajiya gukolesela gulolewa guene.” Hene, matangua avula, Yehowa wana gulondega “njila,” wana gutuhana ima tudi nayo funu ha gukolesela malamba tudi mutagana nawo nu guaabinga. Tutadilenu maluholo Yehowa wajiya gutulondegela njila:
▪ Nzambi wana ‘gutuwalagana mu malamba etu agasue.’ (2 Kol. 1:3, 4) Yehowa wajiya gututuluisa mutshima nu matangi mu njila ya Biblia, ya nyuma yenji yabonga, nu mu njila ya ndaga jia mu nyuma jiana gutuhana muhiga wafubidila.—Mat. 24:45; Yone 14:16, mbimbi goshi’a diyiji, Lomo 15:4.
▪ Yehowa wana gututuameza mu njila ya nyuma yenji yabonga. (Yone 14:26) Hene, gula malamba atubuila, nyuma ya Nzami yajiya gutukuatesa ha guwunguluga mikhuala yenji nu mene jia mu Biblia, gungima tutangiza desizio diabonga tuajiya guzula.
▪ Yehowa wajiya gutuma anjelo enji ha gutukuatesa.—Heb. 1:14.
▪ Yehowa wajiya nji gutukuatesa mu njila ya aphangi’etu a mu nyuma. Ngenyi, mbimbi jiawo nu ndaga adi gutukalegela jiajiya ‘gutuhana ngolo.’—Kol. 4:11.
Mbimbi jiazuelele mupostolo Phaula mu 1 Kolinto 10:13 jidi mukotelesa itshi? Jidi mukotelesa egi, Yehowa ganago gutomba malamba mbaatubuila. Uvi, gula malamba ene atubuila, tudi naye gujiya egi: Gula tuasha mutshima wetu wagasue gudi Yehowa, muene mbagabembigo egi malamba ene abalege ngolo jietu jia gukolesela. Luko, muene mbawulondega njila hagula tuajiya gukolesela malamba ene. Ndaga eyi idi gutuhana diago ngolo!
(1 Kolinto 10:13) Gushigo gulolewa gudi gumikuata enue khenji guakuatele galego athu ako. Uvi Nzambi wana gutagenesa gutendelela guenji. Muene mbagabembigo egi mutagane nu gulolewa gudi mubalega ngolo jienu. Tangua mudi mulolewa, muene mbawulondega njila hagula muajiya gukolesela gulolewa guene.
(1 Kolinto 10:13) Gushigo gulolewa gudi gumikuata enue khenji guakuatele galego athu ako. Uvi Nzambi wana gutagenesa gutendelela guenji. Muene mbagabembigo egi mutagane nu gulolewa gudi mubalega ngolo jienu. Tangua mudi mulolewa, muene mbawulondega njila hagula muajiya gukolesela gulolewa guene.
Kamba Ndaga Jiko jia Ndando jia mu Nyuma
(1 Kolinto 10:8) Tushigo naye ya guwenda uthambi gifua muawendele athu ako mukatshi diawo, hangima abuile, afuile athu guvula 23 000 mu lusugu lumoshi.
w04-F 1/4 diyiji 29
Mihu yana Guhula Athu ana Gutanga Mikanda Yetu
Mukunda natshi 1 Kolinto 10:8 idi muzuela egi enya Isalele 23 000 afuile mu lusugu lumoshi handaga atshitshile uthambi, uvi Lutango 25:9 idi muzuela egi athu afuile akhalele 24 000?
Gudi nu ndaga jiavula jiajiya gumonesa gudisha gudi mukatshi dia nomba adi muzuelela mu verse eji jiyadi. Yajiya gukhala egi, nomba ya guvula gua athu afuile idi hakatshi dia 23 000 nu 24 000. Ngenyi, ayivudishile ha guheta nomba imoshi mukatshi dia nomba eji mbadi.
Tutadilenu ndaga iko. Mupostolo Phaula wakhalele muta lumene lua enya Isalele gu Shitime, ha gutemesa Aklisto a gu Kolinto, dimbo diawendele lukuma lua makalegelo abola. Wazuelele gamba: “Tushigo naye ya guwenda uthambi gifua muawendele athu ako mukatshi diawo, hangima abuile, afuile athu 23 000 mu lusugu lumoshi.” Tangua Phaula wazuelele egi 23 000, wakhalele muzuelela nomba ya athu anyi ashiyiwe gudi Yehowa hakhenji.—1 Kolinto 10:8.
Uvi, mukanda wa Lutango mukhapho 25 udi gutumonesa egi, ‘enya Isalele adibungishile mu gukombelela gua nzambi Bala wa gu dimbo dia Pheole. Hene, Yehowa wavuidile enya Isalele khabu jiakola.’ Hangima, Yehowa wawambelele Moise ha gushiya ‘mafumu agasue a athu.’ Hene, Moise wawambelele manzuji ha gushiya mafumu ene agasue. Gu gisugishilo, Finease washiyile muenya Isalele munu wajile nu mukhetu wa muenya Madiana mu phundo ya enya Isalele. Hangima dienji, “lamba diabuidile enya Isalele diasugile.” Lumene luene luasugile nu mbimbi eji: ‘Athu afuile gu lamba dinyi akhalele 24 000.’—Lutango 25:1-9.
Idi mumonega egi, nomba ya athu afuile adi muzuelela mu mukanda wa Lutango, idi mutadila ‘mafumu a athu’ anyi ashiyiwe gudi manzuji nu athu ako anyi ashiyiwe gudi Yehowa hakhenji. Yajiya gukhala egi mafumu 1 000 ashiyiwe gudi manzuji. Ngenyi, gula tuazangula nomba ya athu 23 000 Yehowa hakhenji ashiyile, tuayibungisa nu mafumu 1000 ashiyiwe gudi manzuji, idi gutuhana nomba 24 000. Ikhale mafumu ene akalegele uthambi, adibungishile mu mawano abola, nga ndo ahanele athu ako njila ya gutshita ndaga eji, mukuta wawo agasue ‘adibungishile mu gikombelelo gia nzambi Bala wa gu Pheole.’
Mukanda umoshi udi muzuela egi mbimbi “adibungishile,” jidi mukotelesa egi “gukhala wagujinginyina gudi muthu.” Tudi mujiya muabonga egi enya Isalele akhalele athu adihanele gudi Yehowa. Uvi tangua ‘adibungishile mu gikombelelo gia nzambi Bala wa gu Pheole,’ ashiyile lume ufuta wawo nu Nzambi. Ivo 700 gungima, Yehowa walezele profete Hoshiya ha guwambela enya Isalele egi: “Ayile gudi Bala wa gu Pheole. Adihanele gudi gima gia musonyi, abuile usala gifua gima akhalele ene muzumba.” (Hoshea 9:10, NWT) Athu agasue akalegele ndaga eyi, Nzambi wakhalele naye guahana ndola. Hene, Moise wawunguluishile enya Isalele gamba: “Meso enu amonele ndaga Yehowa wakalegele Bala wa gu Pheole. Muene wakuluile athu agasue akombelele nzambi wa Bala.”—Mikhuala 4:3, NWT.
(1 Kolinto 11:5, 6, NWT) Uvi mukhetu wagasue udi mukombelela Nzambi nga udi mulongesa ndaga ya Nzambi nu muto udi ushigo wagutshuiga, udi musegulula mulumi’enji. Muene udi gifua mukhetu wakuluile sanga dia muto wenji. 6 Handaga gula mukhetu gatshuigilego muto wenji, akulule sanga dienji. Uvi gula idi ndaga ya musonyi egi mukhetu abunge nga akulule sanga dienji, udi naye gutshuiga muto wenji.
(1 Kolinto 11:10, NWT) Hene, mukhetu udi naye gukhala nu gijiyilo gia ufumu gu muto wenji, mukunda nu anjelo.
w15-F 15/2 diyiji 30
Mihu yana Guhula Athu ana Gutanga Mikanda Yetu
Phangi wa mukhetu udi naye gutshuiga muto wenji tangua adi mulongesa muthu Biblia hamoshi nu mulongeshi muko wa yala ba?
▪ Inzo Yaleha ya Mutaledi ya 15/07/2002, mu longo “Questions des lecteurs,” yazuelele gamba, phangi wa mukhetu udi naye gutshuiga muto wenji tangua adi mulongesa muthu Biblia hamoshi nu mulongeshi muko wa yala, ikhale mulongeshi muene wabatijiwe gale nga ndo. Uvi gungima dia gutadila ndaga eyi muabonga, tuamona egi tudi naye gusombegesa luholo luetu lua guyikotelesa.
Gula phangi wa mukhetu udi mulongesa muthu ana gulonguga gale nenji Biblia, hamoshi nu phangi wa yala wabatijiwe gale, phangi wa mukhetu udi naye gutshuiga muto wenji. Gutshuiga muto mbagumonesa egi phangi wa mukhetu udi munemesa ufumu Yehowa wahagele mu hungu dia Uklisto, handaga phangi muene udi mutagenesa ginemo gidi naye gukalegewa gudi phangi wa yala. (1 Kol. 11:5, 6, 10) Nga ndo, wajiya gutoga phangi wa yala adi mulongesa nenji, ha gulongesa gula phangi muene udi watagana ha guyikalagala.
Uvi, gula phangi wa mukhetu udi mulongesa hamoshi nu mulongeshi udi khenji gabatijiwe galego nu gashigo mulumi’enji, Biblia ishigo mumonesa nga fundo dimoshi egi phangi wa mukhetu udi naye gutshuiga muto wenji. Mu ndaga jia luholo elu, aphangi ako a akhetu mitshima yawo (conscience) yana guatuma ha gutshuiga nji mito yawo.
AVRIL 22-28
UMONYI UDI MU MBIMBI YA NZAMBI | 1 KOLINTO 14-16
“Nzambi Mbawukhala ‘Ima Yagasue Mukunda nu Athu Agasue’”
(1 Kolinto 15:24, 25, NWT) Hangima, gisugishilo, tangua mbahana Ufumu gudi Nzambi wenji nu Sh’enji, tangua muene mbashiya ufumu wagasue nu uhinyinyi wagasue nu ngolo jiagasue. 25 Handaga muene udi naye guhinyina gifua fumu uu nu tangua Nzambi mbaahaga mbalagaji jienji jiagasue goshi’a ikanzo yenji.
w98-F 1/7 diyiji 21 par. 10
‘Muene Mbawukatula Gufua’
10 “Gisugishilo” adi muzuelela mu verse eyi gidi gisugishilo gia Uhinyinyi wa Klisto wa Ivo 1 000, tangua Yesu mbavutula Ufumu gudi Nzambi wenji nu Sh’enji. (Yatuwuwe 20:4) Ngenyi, felela dia Nzambi dia “gubungisa ima yagasue mu Klisto” mbaditagana. (Efeso 1:9, 10) Uvi gutuama dia guyikalagala, Klisto mbawudiangela thomo gushiya “ufumu wagasue nu uhinyinyi wagasue nu ngolo jiagasue” jiana guluisa Uhinyinyi wa Nzambi. Gushiya guene mbagubalega gushiya mbagukalegewa mu ita ya Halemagedona. (Yatuwuwe 16:16; 19:11-21) Phaula wazuelele gamba: “[Klisto] udi naye guhinyina gifua fumu uu nu tangua Nzambi mbaahaga mbalagaji jienji jiagasue goshi’a ikanzo yenji. Muene mbawukatula gufua, mbalagaji ya gisugishilo.” (1 Kolinto 15:25, 26, NWT) Gufua nu malamba atubatele gubola gua Adama ha mavu, mbayikatuga. Idi mumonesa egi Nzambi mbawufuzumuna athu adi mu ‘malumba.’—Yone 5:28.
(1 Kolinto 15:26, NWT) Muene mbawukatula gufua, mbalagaji ya gisugishilo.
kr-F diyiji 237 par. 21
Ufumu Udi Mutagenesa Felela dia Nzambi ha Mavu
21 Itshi mbayibuila misongo nu gufua? Gufua gudi ‘mbalagaji wetu wa gisugishilo,’ guana gusugisa athu agasue ashigo atagana. (1 Kol. 15:26) Uvi gufua gudi nji mbalagaji wakoma gutuama dia Yehowa ba? Tala ndaga jiazuelele Yeshaya: “Muene mbawukatula gufua mayilago. Yehowa Fumu Wabalega Gukoma mbawukukumuna masoji gu meso a athu agasue.” (Yesh. 25:8, NWT) Tangiza luholo athu mbaakhala mu tangua diene! Masaga nu malumba mbakhadigo luko ndo. Mbatudidigo luko mukunda nu malamba! Mbatudila mukunda nu gusuanguluga tangua Yehowa mbatagenesa laji dienji diawaha dia gufuzumuna athu a gufua! (Tanga Yeshaya 26:19.) Gu gisugishilo, phuta jiagasue tuanamenesewe gale mu mitshima mukunda nu gufua, mbajihua.
(1 Kolinto 15:27, 28, NWT) Handaga Nzambi “wahagele ima yagasue goshi’a ikanzo yenji.” Uvi tangua muene adi muzuela egi ‘ima yagasue yahagewe goshi guenji,’ idi mumonega haphelo egi ashigo muzuelela Muthu wago wahagele ima yagasue goshi’a uhinyinyi wenji. 28 Uvi tangua Nzambi mbahaga ima yagasue goshi guenji, Mona hakhenji mbawudihaga nji goshi’a Muthu wago wahagele ima yagasue goshi guenji, hagula Nzambi akhale ima yagasue mukunda nu athu agasue.
w12-F 15/9 diyiji 12 par. 17
Guhuima mu Sungi ya Ivo 1 000 nu Mayilago!
17 “Nzambi akhale ima yagasue mukunda nu athu agasue.” Mbimbi eji jidi mumonesa luholo monyo wa athu mbawukhala gu gisugishilo gia Uhinyinyi wa Ivo 1000. Mbimbi jiene jidi mukotelesa itshi? Tangiza gale tangua Adama nu Eva akhalele athu atagana mu gilanga gia Edene. Akhalele mukatshi dia fami ya Yehowa yakhalele nu guhuima nu yakhalelego nu ukhaphumunyi. Yehowa, Fumu wa Ima Yagasue, wakhalele muhinyina ima yagasue yafugile muene, nu anjelo, nu athu. Ene akhalele nu luendu lua guta nenji maga, lua gumukombelela, nu guheta ishimbigo gudi muene. Yehowa wakhalele “ima yagasue mukunda nu athu agasue.”
Kamba Ndaga Jiko jia Ndando jia mu Nyuma
(1 Kolinto 14:34, 35, NWT) akhetu adi naye guhena tedie mu hungu, handaga ahanewego njila ya guzuela. Uvi, adi naye gutumaga gifua mudi mukhuala wa Nzambi muzuela. 35 Gula ene adi nu ndaga atshigina gujiya, ahule alumi’awo gumbo diawo, handaga idi ndaga ya musonyi gula mukhetu umuzuela mu hungu.
w12-F 1/9 diyiji 9, galuanda
Mupostolo Phaula Watunyishile Akhetu ha Guzuela ba?
Mupostolo Phaula wasonegele gamba: “Akhetu adi naye guhena tedie mu hungu.” (1 Kolinto 14:34, NWT) Itshi atshiginyile diago guzuela? Watshiginyile gumonesa egi akhetu akhala ndo nu ndunge ba? Ndo sha. Iphungu yavula, tangua Phaula wakhalele mulongesa ndaga jiatadila akhetu, wakhalele muzuela muabonga mukunda nu akhetu. (2 Timote 1:5; Tito 2:3-5) Mu mukanda wene umoshi Phaula asonegele gudi Aklisto a gu Kolinto, wawambelele nji athu agasue ahetele luendu lua profesi nu lua guzuela mu mazuelelo agudisha egi, adi naye “guhena tedie” tangua muthu muko adi muzuela. (1 Kolinto 14:26-30, 33) Idi mumonega egi, Aklisto ako a akhetu akhalele nu gusuanguluga guavula mukunda nu gutshigina guawo guhe-guhe, hene akhelele muhenesa muzuedi ha guhula mihu gifua luholo enya Greki akhalele mutshita. Hene, ha gutuna egi ndaga jikkhadigo tshiatshia-tshiatshia, Phaula wawambelele Aklisto a akhetu egi, gula atshigina gujiya ndaga, ‘ahule alumi’awo gumbo diawo.’—1 Kolinto 14:35.
(1 Kolinto 15:53) Handaga muila owu wana gubola udi naye gusudiga idi yajiyilego gubola. Muila owu wa gufua udi naye gusudiga idi yajiyilego gufua.
it-1-F diyiji 1181
Incorruptibilité
Aklisto anyi mbahinyina nu Yesu, adibungishile nenji mu gufuzumuga guenji, ene mbaafuzumuga ha guheta monyo wa mayilago mu dilu. Luko ene mbasudiga idi yajiyilego gufua nu idi yajiyilego gubola. Luholo ene ajingile, akombelele Yehowa nu gujinginyina guagasue, nu afuile nu muila owu wana gubola, ene mbaheta muila wa mu nyuma owu wajiyilego gubola, gifua luholo Phaula adi guyimonesa mu 1 Kolinto 15:42-54. Mbimbi “idi yajiyilego gufua” adi muzuelela mu verse eji, jidi mumonesa monyo mbaaheta ene: monyo wa ivo nu ivo, wajiyilego gushiyiwa. Uvi mbimbi “idi yajiyilego gubola,” jidi mutadila muila wana guahana Nzambi, wajiyilego gubola nga gufua. Hene, idi mumonesa egi Nzambi wana guahana ngolo jia gudikuatesa ene hakhawo, anago guzegemena gu ngolo jia anjelo nga athu ndo. Ngenyi, idi mumonesa lume egi Nzambi wana guashila mutshima. Uvi, luendu lua gudikuatesa ene hakhawo nu lua guheta monyo wa mayilago, lushigo mumonesa egi ene ashigo luko nu funu ya utuameji wa Nzambi ndo. Luholo lumoshi nu Fumi’awo Klisto Yesu, ene ana gutumagela gutshigina gua Shawo nu ana gulandula utuameji wenji.—1Kol 15:23-28; tala nji âme; immortalité.
AVRIL 29–MAI 5
UMONYI UDI MU MBIMBI YA NZAMBI | 2 KOLINTO 1-3
“Yehowa Udi ‘Nzambi wa Uwalaganyi Wagasue’”
(2 Kolinto 1:3, NWT) Tumbuisenu Nzambi, sha Fumi’etu Yesu Klisto, Tata wazala pha nu khenda, Nzambi wa uwalaganyi wagasue,
w17.07-F diyiji 13 par. 4
“Dilenu nu Athu adi Mudila”
4 Sh’etu wazala pha nu khenda wafuishile gale nji athu gakhalele muene muzumba, gifua: Abalahama, Isaka, Yakoba, Moise nu Fumu Davidi. (Lutang. 12:6-8; Mat. 22:31, 32; Makal. 13:22) Biblia idi mumonesa egi Yehowa udi nu nzala ya guafuzumuna. (Yobo 14:14, 15) Ene mbaakhala nu gusuanguluga guavula, mbaakhala nji nu muila wabonga. Tudi mujiya luko egi Yehowa wamonele gufua gua lamba guafile munenji ‘akhalele muzumba muavula.’ (Ish. 8:22, 30) Tangiza gale lamba diavuile Yehowa tangua mun’enji ashiyiwe.—Yone 5:20; 10:17.
(2 Kolinto 1:4) muene wana gutuwalagana mu malamba etu agasue hagula esue nji tuwalagane athu ako adi mumona malamba a maluholo agasue, nu uwalaganyi owu tuahetele gudi Nzambi.
w17.07-F diyiji 15 par. 14
“Dilenu nu Athu adi Mudila”
14 Tudi mujiya egi ishigo mulonga waleba ha gujiya mbimbi tuajiya guwambela muthu udi nu gikenene giavula. Uvi, Biblia idi muzuela egi ‘mbimbi jia muthu watema jiana gusaga.’ (Ish. 12:18) Athu avula ana guheta mbimbi jiawaha jia guwalagana najio athu mu gamukanda Quand la mort frappe un être aimé . . . Uvi gima giabonga tuajiya gukalagala ha guwalagana athu gidi, ‘gudila nu athu adi mudila.’ (Lomo 12:15) Gaby, wafishile mulumi’enji, udi muzuela egi: “Gudila guana gutulula diago mutshima wami. Hene, ngana guheta ngolo gula mafuta ami adi mudila nu ame. Ngenyi, nganago gudivua egi ngudi hakhami.”
Kamba Ndaga Jiko jia Ndando jia mu Nyuma
(2 Kolinto 1:22, NWT) Nzambi watuhagele njimbu yenji, muene watumbile nyuma yenji mu mitshima yetu gifua gikudilo mukunda nu masugu adi muza.
w16.04-F diyiji 32
Mihu yana Guhula Athu ana Gutanga Mikanda Yetu
“Gikudilo” gitshi nu “njimbu” itshi Nzambi wana guhana Muklisto wagasue wambiwe gale maji mu nyuma?—2 Kol. 1:21, 22.
▪ Gikudilo: Mukanda umoshi udi mumonesa egi, mbimbi ya zuelelo dia Greki adi mukalegela mu 2 Kolinto 1:22 ha guzuelela “gikudilo,” idi mbimbi akhalele mukalegela “manzuji nu atshitshi a mungenda.” Mbimbi yene idi mukotelesa egi “gitshinyi gia thomo gia falanga athu akhalele muhana ha gusumba gima, nu ha gumonesa egi gima giene giza musumbiwa diago.” Mukunda nu Aklisto ambiwe gale maji mu nyuma, Yehowa wana gudiangela guahana gikudilo gia gubonga mbaaheta. Gishimbigo giagasue adi muzuelela mu 2 Kolinto 5:1-5 gidi mukotelesa egi ene mbaheta muila wa mu dilu wajiyilego gubola. Gishimbigo giko mbaheta gidi monyo wa ivo nu ivo.—1 Kol. 15:48-54.
Mu zuelelo dia Greki dia mangino, mbimbi yadifuana nu gikudilo idi mukotelesa bague ya ba fiançés. Gifuanesa egi gidi giatagana diago mukunda nu Aklisto awa mbakhala mukatshi dia mukhetu wa gifuanesa wa Klisto.—2 Kol. 11:2; Yat. 21:2, 9.
▪ Njimbu: Mu tangua dikulu, athu akhalele mukalegela njimbu (cachet) ha fundo dia signature ha gumonesa egi gima gidi gia muthu, nga ndo egi muthu muene udi nu njila ya guzula gima giene. Mukunda nu Aklisto ambiwe gale maji mu nyuma, Nzambi waahagele “njimbu” mu luholo lua gifuanesa mu njila ya nyuma yabonga hagula abue athu enji. (Ef. 1:13, 14) Uvi, Muklisto wambiwe gale maji mu nyuma, wana guhagewa njimbu mayilago gula muene wasala wagujinginyina gudi Nzambi uu nu gu gufua guenji, nga ndo gutuama egi lamba diakola (grande tribulation) disendese.—Ef. 4:30; Yat. 7:2-4.
(2 Kolinto 2:14-16, NWT) Uvi, tudi muhana Nzambi mvudi yavula; muene wana gututuameza tangua diagasue mu musunga wa athu anyi abinga hamoshi nu Klisto. Mu njila yetu, muene udi mutshita ha gujiyisa athu Klisto mu mafundo agasue gifua mudi mananashi mumuanganesa vumba diabonga muagasue! 15 Handaga gu meso a Nzambi, esue tudi vumba diawaha dia Klisto mukatshi dia athu adi muhuluishiwa nu mukatshi dia athu adi mufua. 16 Mukunda nu athu adi mufua, didi vumba dia gufua didi mubata gu gufua, uvi mukunda nu athu adi muhuluishiwa, didi vumba diawaha dia monyo didi muhana monyo. Nanyi udi watagana lume mukunda nu ndaga enji?
w10-F 1/8 diyiji 23
Wana Guyijiya Ba?
Mupostolo Phaula wakhalele mutangiza itshi tangua azuelele egi “musunga wa athu anyi abinga”?
▪ Mupostolo Phaula wasonegele egi: “Nzambi . . . wana gututuameza tangua diagasue mu musunga wa athu anyi abinga hamoshi nu Klisto. Mu njila yetu, muene udi mutshita ha gujiyisa athu Klisto mu mafundo agasue gifua mudi mananashi mumuanganesa vumba diabonga muagasue! Handaga gu meso a Nzambi, esue tudi vumba diawaha dia Klisto mukatshi dia athu adi muhuluishiwa nu mukatshi dia athu adi mufua. Mukunda nu athu adi mufua, didi vumba dia gufua didi mubata gu gufua, uvi mukunda nu athu adi muhuluishiwa, didi vumba diawaha dia monyo didi muhana monyo.”—2 Kolinto 2:14-16, NWT.
Mupostolo Phaula wakhalele muzuelela ndaga yakhalele mutshita enya Roma. Enya Roma akhalele muwenda mu musunga ha guhana lutumbu gudi fumu ya masuta gula wabinga mbalagaji mu ita. Mu tangua diene, akhalele mudijiga athu ima akhalele muzula mu ita nu mbalagaji akhalele mukuata. Akhalele nji mubata ngombe jia milume ha guhana mulambu tangua athu akhalele mutumbuisa fumu ya masuta nu masuta enji. Gu gisugishilo, akhalele muhana milambu ya ngombe jiene, nu yajiya gukhala egi akhalele mushiya mbalagaji jiavula akuatele ene mu tangua dia ita.
Mbimbi “vumba diawaha dia Klisto” jidi mbimbi jia gifuanesa. Jidi mukotelesa monyo mukunda nu athu ako, gufua mukunda nu athu ako. Mukanda umoshi (The International Standard Bible Encyclopedia) udi muzuela egi: “Idi naye gukhala egi mbimbi eji jiakatugile mu khadilo dia enya Roma dia gumba uhafu tshiuya nu guwuhaga mu njila yakhalele mubalega musunga wa athu. Vumba dia uhafu diakhalele mumonesa gubinga gua fumu ya masuta nu masuta enji, diakhalele luko muwunguluisa mbalagaji jiakuatewe mu ita egi mbajishiyiwa.”