Referanse jia Mukanda wa Gukalegela mu Gudibungisa gua Lujingu nu Mudimo wa Uklisto
MARS 4-10
UMONYI UDI MU MBIMBI YA NZAMBI | LOMO 12-14
“Luholo Lutshi Aklisto Adi Naye Gumonesa Guzumba?”
(Lomo 12:10) Dizumbenu mukatshi dienu nu guzumba guakola gua uphangi. Mu ndaga yatadila gunemesa akuenu, khalenu athu a thomo.
it-1-F diyiji 53
Guzumba Guakola
Guzumba gua uphangi gudi naye gumonega mukatshi dia aphangi agasue a mu hungu dia Uklisto. Mu zuelelo dia Greki, mbimbi adi mukalegela ha guzuelela guzumba guene idi philadélphia, yakotelesa egi, “guzumba phangi muavula.” (Lomo 12:10; Heb 13:1; tala nji 1Phet 3:8.) Hene, aphangi a mu hungu adi naye gukhala nu guzumba guakola gifua guzumba guana khala nago ana a muthu mumoshi. Idi yadiago egi aphangi a mu hungu, ana gudizumba. Ikhale ngenyi, adi naye gulandula gudizumba luko muavula.—1Tes 4:9, 10.
Mu zuelelo dia Greki, mbimbi philostorgos idi mukotelesa egi “gukhala nu guzumba guakola.” Ana gukalegela mbimbi yene ha guzuelela muthu wana guzumba muthu muko muavula. Mbimbi imoshi ya gishina ana gukalegela ha guzuelela guzumba guene idi stérgô. Athu ana guyikalegela muavula ha guzuelela guzumba guakola guana khala nago athu a mu fami imoshi. Mupostolo Phaula wawambelele Aklisto ha gukudisa khadilo edi dia guzumba. (Lomo 12:10) Muene wazuelele luko egi, mu masugu a gisugishilo, athu ako mbaakhadigo nu “guzumba guakola” mukatshi diawo (mu zuelelo dia Greki, astorgoï). Uvi wazuelele egi athu a luholo elu adi naye gushiyiwa.—2Tim 3:3; Lomo 1:31, 32.
(Lomo 12:17-19, NWT) Muvutuilago muthu gubola mu gubola, uvi mutshite ndaga jidi jiatagana gu meso a athu agasue. 18 Gula luholo ludi guene, kalagalenu yagasue ha gukhala mu guhuima nu athu agasue. 19 Mafut’ami, muvutulago gubola mu gubola, uvi bembenu egi Nzambi amonese khabu jienji; handaga mukanda wa Nzambi udi muzuela egi: “Yehowa udi muzuela gamba, ‘ame mbanguvutula gubola; ame mbanguhana muthu ndola.’”
w09-F 15/10 diyiji 8 par. 3
“Khalenu mu Guhuima nu Athu Agasue”
3 Tanga Lomo 12:17. Mupostolo Phaula wazuelele egi gula muthu watutshitshila ndaga yabola, tushigo naye guvutula gubola mu gubola. Mbimbi eji jiana gukuatesa muavula gula Muklisto udi mu ulo nu muthu ganago gukombelela Yehowa. Muklisto udi naye gukalagala ngolo hagula avutulago gubola mu gubola, ikhale mu mbimbi nga mu makalegelo enji. ‘Guvutula gubola mu gubola’ guanago gulondega ndaga, guana gubolesa diago jindaga.
w07-F 1/7 diyiji 24-25 par. 12-13
“Muvutuilago Muthu Gubola mu Gubola”
12 Paula wamonesele luholo tudi naye gukalegela aphangi’etu a Aklisto ndaga nu athu anyi ashigo akombeledi a Yehowa. Wazuelele egi: “Muvutuilago muthu gubola mu gubola.” Gutuama dia guzuela mbimbi eji, wazuelele gamba: ‘Tunenu ndaga jiabola.’ Luholo lutshi Muklisto wajiya guzuela egi wana gutuna ndaga jiabola gula muene udi muvutudila diago athu gubola mu gubola? Gula muene watshita ngenyi, mbayimonesa diago egi guzumba guenji ‘gudi gua mambo.’ Mupostolo Phaula wazuelele egi: ‘Tshitenu ndaga jidi jiatagana gu meso a athu agasue.’ (Lomo 12:9, 17) Luholo lutshi tuajiya gutumagela mbimbi eji?
13 Mu mukanda wa thomo Phaula gasonegele Aklisto a gu Kolinto, waawambelele ndaga jiabola athu akhalele mutshitshila apostolo. Wazuelele egi: ‘Tuabua gima gia gukhala mutalewa gudi athu a ha mavu, gudi anjelo nu gudi athu. . . . Tangua athu ana gutushinga, tuana guaatogela gishimbigo; tangua athu ana gutumonesa lamba, tuana gukolesela; tangua athu ana gubolesa lukuma luetu, tuana guaabubila.’ (1 Kolinto 4:9-13) Luholo lumoshi nji, athu a ha mavu awa ana gutala muabonga makalegelo a Aklisto a giamatshidia. Hene, gula athu tuana gukhala nawo hehi adi mumona ndaga jiawaha tudi mutshita, ikhale mu tangua athu ako adi gutukalegela ndaga jiabola, yajiya guaatuma ha gutshigina lukuma luabonga tuana gulongesa.—1 Phetelo 2:12.
(Lomo 12:20, 21, NWT) Uvi “gula mbalagaji waye udi nu nzala, muhue yagudia adie; gula udi nu luhungu, muhue yagunua anue; handaga gula watshita ngenyi, mbawuhaga makala a tshiuya holu dia muto wenji.” 21 Ubembigo egi ndaga jiabola jigubinge, uvi kalagala ndaga jiawaha ha gubinga ndaga jiabola.
w12-F 15/11 diyiji 29 par. 13
Tuditoteselenu nu Mutshima Wagasue
13 Matangua ako, wajiya gukuatesa muthu wagutshitshi gubola hagula asuanguluge nu makalegelo a Aklisto. Mupostolo Phaula wasonegele egi: “‘Gula mbalagaji waye udi nu nzala, muhue yagudia adie; gula udi nu luhungu, muhue yagunua anue; handaga gula watshita ngenyi, mbawuhaga makala a tshiuya holu dia muto wenji.’ Ubembigo egi ndaga jiabola jigubinge, uvi kalagala ndaga jiawaha ha gubinga ndaga jiabola.” (Lomo 12:20, 21, NWT) Khadilo diaye dia gunemesa athu diajiya gutulula mutshima wa muthu wa gutshitshi gubola. Diajiya nji gutuma muthu muene ha gumonesa makalegelo enji abonga. Gula wadihaga ha fundo dia muthu wagutshitshi gubola, nu wamutotesela, wajiya gumukuatesa ha gujiya giamatshidia gia Biblia. Ikhale ngenyi nga ndo, mbimbi jiabonga udi muwambela muthu wa gutshitshi gubola, jiajiya gumutuma ha gutangiza gishina gia makalegelo aye awaha.—1 Phet. 2:12; 3:16.
Kamba Ndaga Jiko jia Ndando jia mu Nyuma
(Lomo 12:1, NWT) An’etu, ngudi gumibubila mu khenda jia Nzambi egi muhane mila yenu gifua mulambu wa monyo, wa gijila udi musuanguluisa Nzambi. Ngenyi, mbamutshita mudimo wa gijila nu ndunge jienu jia gutangigiza.
lvs-F diyiji 76-77 par. 5-6
Luholo lua Gutomba Saga jia Gudikenesa
5 Ndaga jiagasue tudi mukalagala mu monyo wetu, jidi naye gudivua nu gikombelelo gietu nu Yehowa. Phaula wamonesele ndaga yene tangua gazuelele egi: ‘Hanenu mila yenu gifua mulambu wa monyo, wa gijila udi musuanguluisa Nzambi.’ (Lomo 12:1) Yesu wazuelele egi: “Zumba [Yehowa] Nzambi waye nu mutshima waye wagasue, nu monyo waye wagasue, nu ndunge jiaye jiagasue nu jingolo jiaye jiagasue.” (Mako 12:30) Tangua diagasue, tuana gutshigina guhana Yehowa ima yetu ya ndando. Mu Isalele ikulu, athu akhalele muhana Yehowa milambu ya shitu, akhalele naye guhana shitu jiabonga. Uvi gula shitu yene ishigo yabonga, Nzambi wakhalele guyituna. (Levi 22:18-20) Luholo lumoshi nji, Yehowa wajiya gutuna gikombelelo gietu. Luholo lutshi?
6 Yehowa udi gutuwambela egi: ‘Mudi naye gukhala athu a gijila handaga ame gudi muthu wa gijila.’ (1 Phetelo 1:14-16; 2 Phetelo 3:11) Yehowa wajiya gutshigina gikombelelo gietu phamba gula gidi gia gijila, nga ndo gia phelegeta. (Mikhuala 15:21) Gikombelelo gietu giajiyilego gukhala gia gijila gula tudi mukalagala ndaga Yehowa gadi mutuna, gifua uthambi, ndaga jia khuta, nu ndaga jidi gudivua nu bademo. (Lomo 6:12-14; 8:13) Luko, gikombelelo gietu giajiyilego gusuanguluisa Yehowa gula tudi mutomba saga jia gudikenesa jidi musunzula uthambi, ndaga jia khuta nu jia bademo. Gudikenesa nu ndaga jia luholo elu guajiya gubuisa gikombelelo gietu usala, guajiya gutuma Yehowa ha gutuna gikombelelo gietu. Guajiya nji gubolesa ufuta wetu nu muene.
(Lomo 13:1) Muthu wagasue atumagele mafumu a mbulamatadi adi muhinyina, handaga gushigo uhinyinyi wajiya gukhala gula Nzambi gahanelego njila. Mafumu anyi adi muhinyina ahagewe gudi Nzambi.
w08-F 15/6 diyiji 31 par. 4
Ndaga jia Ndando Jidi mu Mukanda wa Lomo
13:1—Luholo lutshi mafumu a mbulamatadi anyi adi muhinyina, “ahagewe gudi Nzambi”? Mafumu a mbulamatadi “ahagewe gudi Nzambi” handaga Nzambi waahanele njila ha guhinyina. Mahugo avula, Nzambi wadiangele gumona gutuama guhinyina guawo. Ndaga yene idi mumonega haphelo mu luholo Biblia yadiangele guzuelela uhinyinyi wa mafumu avula.
MARS 11-17
UMONYI UDI MU MBIMBI YA NZAMBI | LOMO 15-16
“Zegemena Gudi Yehowa ha Gukolesela nu ha Guheta Ngolo”
(Lomo 15:4, NWT) Ndaga jiagasue jiasonegewe mu ginono, jiasonegewe mukunda nu gutulongesa, hagula mu njila ya gukolesela nu guwalagana guana gukatuga mu mbimbi ya Nzambi, tukhale nu felela.
w17.07-F diyiji 14 par. 11
“Dilenu nu Athu adi Mudila”
11 Lumene ludi muzuelela gikenene giakola giavile Yesu mukunda nu gufua gua Lazalo, ludi mukatshi dia mene jiavula jia Biblia jiana gukuatesa ha guhana athu ako ngolo. Idi ngenyi handaga Biblia idi muzuela egi, “ndaga jiagasue jiasonegewe mu ginono, jiasonegewe mukunda nu gutulongesa, hagula mu njila ya gukolesela nu guwalagana guana gukatuga mu mbimbi ya Nzambi, tukhale nu felela.” (Lomo 15:4, NWT) Gula wafuisa muthu, verse eji jialandula jiajiya gugukuatesa ha guheta ngolo:
▪ ‘Yehowa udi hehi nu athu anyi adi nu gikenene; muene udi muhuluisa athu adi musagesewa mu matangi.’—Ngi. 34:18, 19.
▪ “Tangua gikenene giadivudishile mu mutshima wami, aye [Yehowa] wanguhanele ngolo nu wangutuluile mutshima.”—Ngi. 94:19, NWT.
▪ ‘Fumi’etu Yesu Klisto, muene hakhenji, nu Tata Nzambi, wago watuzumbile nu watuhuile uwalaganyi wa ivo nu ivo nu felela diabonga mu ngasa yenji, akolese mitshima yenu, amihue jingolo.’—2 Tes. 2:16, 17.
(Lomo 15:5, NWT) Nzambi wago wana gukuatesa ha gukolesela nu wana guhana ngolo, amihane khungi’enu agasue matangi a luholo lumoshi gifua anyi akhalele nawo Klisto Yesu,
w16.04-F diyiji 14 par. 5
“Bemba egi Gukolesela Gutshite Mudimo Wenji”
5 Toga Yehowa aguhane ngolo. Yehowa udi “Nzambi wago wana gukuatesa ha gukolesela nu wana guhana ngolo.” (Lomo 15:5, NWT) Muene phamba wana gukotelesa muabonga malamba etu, nu ndaga jiko jiana gutusagesa mu monyo wetu. Muene udi mujiya lume ima tudi nayo funu ha gukolesela. Biblia idi muzuela gamba: ‘Muene wana guhana athu ana gumuvila woma ima idi ene nayo funu. Wana guvua gudila guawo, nu wana guaahuluisa.’ (Ngi. 145:19) Luholo lutshi Nzambi wana guhana mvutu gu isambu tuana gumutoga ha gutuhana ngolo jia gukolesela?
(Lomo 15:13) Nzambi wago wana guhana felela, amihane gusuanguluga nu guhuima guavula handaga muana gumushila mutshima, hagula egi felela dienu dikhale diavula mu ngolo jia nyuma yabonga.
w14-F 15/6 diyiji 14 par. 11
“Zumba Yehowa Nzambi Waye”
11 Yehowa ‘wana guhana felela diana gutuhana gusuanguluga nu guhuima guavula.’ (Lomo 15:13) Felela diana gutuhana Nzambi diana gutukuatesa ha gukolesela mu malamba ana gulola gutshigina guetu. Aklisto ambiwe maji mu nyuma anyi mbaasala agujinginyina gudi Yehowa uu nu gu gufua guawo, ‘mbaaheta gipho gia gutumbuga gia monyo mu dilu.’ (Yat. 2:10) Uvi Aklisto agujinginyina anyi adi nu felela dia gukhala ha mavu, mbaaheta gubonga gua mayilago mu Phaladiso yalayile Nzambi. (Luka 23:43) Felela dia luholo elu diana gututuma ha gudivua luholo lutshi? Diana gututuma ha gukhala nu gusuanguluga, nu guhuima, nu guzumba guavula mukunda nu Nzambi, Muhanyi wa ‘ima yagasue yabalega gubonga nu yatagana.’—Yak. 1:17.
Kamba Ndaga Jiko jia Ndando jia mu Nyuma
(Lomo 15:27, NWT) Yadiago, akhalele nu gusuanguluga ha gutshita ngenyi. Mu guzuela guabonga, ene akhalele nu mukudi wa athu a gijila a gu Yelusalema. Handaga athu ene a gijila akhaphele ima yawo ya mu nyuma nu athu a ifutshi. Hene, athu a ifutshi nji adi naye gukuatesa enya gu Yelusalema nu ima yawo.
w89-F 1/12 diyiji 24 par. 3
“Ha Gumonesa Diago Guzumba gua Giamatshidia”
Yadiago, athu a ifutshi anyi abuile aphangi’awo, adivile diago egi adi naye guaakuatesa mu malamba. Mu guzuela guabonga, ene akhalele diago nu “mukudi” wa Aklisto a gu Yelusalema. Athu a ifutshi ajiyile lukuma luabonga sendese gu Yelusalema, ishigo ngenyi? Hene, mupostolo Phaula wazuelele egi: “Gula Aklisto a gu Yelusalema akhaphele umonyi wawo wa mu nyuma nu athu anyi akhalelego enya Yuda, athu ene akhalele nu ginemo gia gukuatesa Aklisto a gu Yelusalema nu ima yawo.”—Lomo 15:27, The New English Bible.
(Lomo 16:25, NWT) Henyaha, mukunda nu muthu wajiya gumihana ngolo mu gudivua nu lukuma luabonga ngudi mulongesa, nu mudimo wa gulongesa ndaga jia Yesu Klisto mu gudivua nu gumonega gua ndaga ya gijila yasuegewe yinyi yabambewe sendese mualeha diago
it-2-F diyiji 647 par. 2
Prescience, Prédétermination, Prédestination
Masiya, nga ndo Klisto, wakhalele naye gukhala vungu Nzambi galayile egi mu njila yenji, athu agasue a mitshima yatagana a mu fami jiagasue ha mavu mbaaheta gubonga. (Gal 3:8, 14) Hugo dia thomo Biblia idi muzuelela “vungu” diene, didi gungima dia gubola guakalegewe mu gilanga gia Edene, gutuama egi Abele avalewe. (Gis 3:15) Ndaga yene yakalegewe ivo hehi nu 4 000 gutuama egi ‘ndaga ya gijila yinyi yasuegewe’ imonege tangua “vungu” dia Masiya diamonegene haphelo. Yadiago, ndaga eyi yasuegewe “yabambewe sendese mualeha diago.”—Lomo 16:25-27; Ef 1:8-10; 3:4-11.
MARS 18-24
UMONYI UDI MU MBIMBI YA NZAMBI | 1 KOLINTO 1-3
“Udi Muthu Wana Gudihana mu Ndaga jia mu Nyuma nga ndo Udi Muthu Wana Gudihana mu Ndaga jia mu Muila”
(1 Kolinto 2:14, NWT) Muthu wana gudihana mu ndaga jia mu muila ganago gutshigina ndaga jia nyuma ya Nzambi, handaga gudi muene jidi unzoba. Muene gajiyilego gukotelesa ndaga jiene handaga jiana gukotelesewa mu nyuma.
w18.02-F diyiji 19 par. 4-5
Gukhala Muthu Wana Gudihana mu Ndaga jia mu Nyuma Guakotelesa Itshi?
4 Muthu wana gudihana mu ndaga jia mu muila wana gutangiza gifua athu a ha mavu awa, anyi ana gukamba phamba gubonga guawo. Mupostolo Phaula udi mutamega khadilo diene egi ‘nyuma idi mutshitshisa mudimo mu mitshima ya athu ashigo mutumagela Nzambi.’ (Ef. 2:2) Nyuma ya luholo elu yana gutuma athu avula ha gulandula makalegelo abola a athu ako. Ngenyi, anago gutumagela mikhuala ya Nzambi, ana gutshita phamba ndaga jiana guaasuanguluisa ene. Hene, muthu wana gudihana mu ndaga jia mu muila, wana gutangiza phamba ndaga jia muila gifua: falanga nu lukuma. Muene wana gukamba thomo gubonga guenji.
5 Luko, muthu wana gudihana mu ndaga jia mu muila wana gutshita muavula ndaga Biblia yana gutamega egi “ndaga jiabola jia muila.” (Gal. 5:19-21) Mu mukanda wa thomo Phaula gasonegele hungu dia gu Kolinto, wamonesele makalegelo avula akhala nawo athu ana gudihana mu ndaga jia muila. Athu ene akhala nu khadilo dia gukhaphumuna athu, dia gunginyina muthu gula nguma jiazoga, dia gusunzula athu ha guzola nguma, dia gufunda athu gu tribinale, dia gutuna gunemesa athu adi gututuameza, nu khadilo dia guhaga gudia nu gunua ha fundo dia thomo. Biblia idi mumonesa luko egi, muthu wa luholo elu wana gushiya mikhuala ya Nzambi gula watagana nu gulolewa. (Ish. 7:21, 22) Mulandudi Yuda wazuelele egi athu ako mbaadihana muavula mu ndaga jia muila, ngenyi “mbaakhadigo nu nyuma ya Nzambi.”—Yuda 18, 19, NWT.
(1 Kolinto 2:15, 16, NWT) Muthu wana gudihana mu ndaga jia mu nyuma wana gutala muabonga ndaga jiagasue, uvi muene hakhenji ganago gutalewa gudi muthu. 16 Handaga “nanyi udi mujiya matangi a Yehowa, hagula muene amulongese?” Uvi esue, tudi nu matangi a Klisto.
w18.02-F diyiji 19 par. 6
Gukhala Muthu Wana Gudihana mu Ndaga jia mu Nyuma Guakotelesa Itshi?
6 “Muthu wana gudihana mu ndaga jia mu nyuma” wana gudisagesa muavula mukunda nu ufuta wenji nu Nzambi. Wana gubemba egi nyuma ya Nzambi imutuameze, nu wana gukalagala ngolo ha ‘gulandula gifezegeselo gia Nzambi.’ (Ef. 5:1) Yakotelesa egi, wana gukamba gukotelesa matangi a Yehowa nu gumona ndaga gifua luholo Yehowa wana gujimona. Gudi muene, Nzambi udi diago muthu wa giamatshidia. Muthu wana gudihana mu ndaga jia mu nyuma wana kalagala ngolo ha gutumagela mikhuala ya Yehowa mu ndaga jiagasue jia monyo wenji. (Ngi. 119:33; 143:10) Muene ganago gudihana mu ndaga jiabola jia muila, uvi wana gudihana ha gutshita ndaga jia ‘bundu dia nyuma.’—Gal. 5:22, 23.
w18.02-F diyiji 22 par. 15
Gukhala Muthu Wana Gudihana mu Ndaga jia mu Nyuma Guakotelesa Itshi?
15 Luholo lutshi tuajiya gulandula khadilo dia Klisto? Mu 1 Kolinto 2:16, Biblia idi muzuela egi tudi naye gukhala nu “matangi a Klisto.” Lomo 15:5 idi mumonesa luko egi tudi naye gukhala nu “matangi gifua anyi akhalele nawo Klisto Yesu.” Hene, ha gulandula khadilo dia Klisto, tudi naye gujiya muabonga luholo gakhalele mutangiza nu ndaga gakhalele mutshita. Yakotelesa egi tudi naye gulandula nganyo jienji. Yesu wana guhaga matangi enji phamba mu ufuta wenji nu Nzambi. Ngenyi, gukhala gifua muene mbagutukuatesa ha gusuena hehi nu Yehowa. Idi diago nu ndando egi tukhale mutangiza gifua luholo Yesu gakhalele mutangiza.
Kamba Ndaga Jiko jia Ndando jia mu Nyuma
(1 Kolinto 1:20) Muthu watema udi gui? Mufundji wa mikanda udi gui? Muenya giphapha wa mu gindongo egi udi gui? Nzambi gabuishilego gutema gua ha mavu awa guheya ba?
it-2-F diyiji 854 par. 5
Gutema
Hene, athu a ha mavu awa mu ndunge jiawo, atunyile kado gahanele Nzambi mu njila ya Klisto; agamonele gifua guheya. Mafumu a ha mavu awa akhalele atagana nu atema, uvi ‘ashiyile Fumu wa gutumbuga.’ (1Kol 1:18; 2:7, 8) Uvi, Nzambi wamonesele egi gutema gua athu a ha mavu awa guakhalele guheya. Wakhalele muhana athu atema a ha mavu musonyi. Ha gutagenesa felela dienji, Nzambi wakhalele mukalegela athu akhalele mumonewa egi adi ‘athu aheya, aleba, anyi ashigo nu ukhaphumunyi.’ (1Kol 1:19-28) Phaula wawambelele Aklisto gu Kolinto egi “gutema gua ha mavu awa [nu] gua mafumu a ha mavu ene” mbagutota. Hene, gutema guene guakhalelego nu ndando mu ndaga jia mu nyuma jiakhalele mulongesa mupostolo. (1Kol 2:6, 13) Muene watemesele Aklisto a gu Kolosai egi awungishiwago ‘mu mbimbi jia mambo [filozofi] nu mu matangi adi muza mu ndaga jidi mulongesa athu.’—Kol 2:8; fuanesa nu verse 20-23.
(1 Kolinto 2:3-5, NWT) Ame ngajile gudi enue waguleba nu woma nu gudigita guakola; 4 guzuela guami nu ndaga ngalongesele guakhalelego mu mbimbi jia gutema jidi mutuma athu ha gutshigina, uvi mbimbi jiami jiakhalele mumonesa ngolo jia nyuma ya Nzambi, 5 hagula gutshigina guenu gukhadigo gua mu gutema gua athu, uvi gukhale gua mu ngolo jia Nzambi.
w08-F 15/7 diyiji 27 par. 6
Ndaga jia Ndando Jidi mu Mikanda ya Kolinto
2:3-5. Tangua Phaula wakhalele mulongesa mu dimbo dia Kolinto, fundo diakoma dia filozofi nu ujiyi wa enya Greki, yajiya gukhala wakhalele gudihula gula muene wajiya diago gukuata mitshima ya athu anyi akhalele gumutegelela. Uvi, muene gabembelego egi guleba guenji nga ndo woma wenji umukange njila ha gutagenesa ginemo giamuhuile Nzambi. Esue nji mangino, tushigo naye gubemba egi woma nga guleba guetu mu ndaga eji khenji tuakalegele gale, jitukange njila ha gulongesa lukuma luabonga lua Ufumu wa Nzambi. Luholo lumoshi nu Phaula, tudi naye gusha mutshima gudi Yehowa nu gudifelela guagasue egi muene mbawutukuatesa.
MARS 25-31
UMONYI UDI MU MBIMBI YA NZAMBI | 1 KOLINTO 4-6
“Ndambo ya Levire Yana Gujimbisa Pate Yagasue ya Phupha”
(1 Kolinto 5:1, 2) Yadiago, athu adi muzuelela uthambi udi mukatshi dienu. Uthambi wene wajiyilego gusangewa nga mukatshi dia aphaganu. Adi muzuela egi, yala mumoshi wana gubanda nu mukaji’a sh’enji. 2 Uvi enue mudi gudihala mukunda nu ndaga yene. Muakhalele naye guvua gikenene giavula, nu gukaya muthu watshitshile ndaga yinyi mukatshi dienu!
(1 Kolinto 5:5-8, NWT) mudi naye guhana yala munu gudi Satana hagula muila ufue, ngenyi monyo wajiya guhuluishiwa mu lusugu lua Fumu. 6 Gudisunzula guenu gushigo guabonga. Enue mushigo mujiya egi ndambo ya levire yana gujimbisa pate yagasue ya phupha ba? 7 Katulenu levire ikulu hagula enue mubue gifua pate ihe-ihe idi ishigo nu levire. Handaga Klisto, mona gimeme gietu gia Pake washiyiwe gale. 8 Hene, tudigo wano wa mapha nu levire ikulu nga ndo nu levire ya ndaga jiabola nu jia uthambi, uvi tudie wano nu mapha adi ashigo nu levire, mapha a diago nu a giamatshidia.
(1 Kolinto 5:13, NWT) tangua Nzambi adi musophesa athu a hanze? “Katulenu muthu wabola mukatshi dienu.”
it-2-F diyiji 130
Levire
Mupostolo Phaula wazuelele nji mbimbi eji jia gifuanesa tangua gawambelele Aklisto a mu hungu dia gu Kolinto egi adi naye gukaya yala wa thambi wakhalele mukatshi diawo. Wazuelele gamba: “Enue mushigo mujiya egi ndambo ya levire yana gujimbisa pate yagasue ya phupha ba? Katulenu levire ikulu hagula enue mubue gifua pate ihe-ihe idi ishigo nu levire. Handaga Klisto, mona gimeme gietu gia Pake washiyiwe gale.” Gungima, wamonesele gula “levire” idi mukotelesa itshi. Wazuelele egi: “Hene, tudigo wano wa mapha nu levire ikulu nga ndo nu levire ya ndaga jiabola nu jia uthambi, uvi tudie wano nu mapha adi ashigo nu levire, mapha a diago nu a giamatshidia.” (1Kol 5:6-8) Mu verse eji, mupostolo Phaula wahanele gifezegeselo gia wano wa enya Yuda wa mapha ashigo nu levire, wakhalele mukalegewa gungima dia wano wa Pake. Luholo levire yazonda yana gujimbisa pate yagasue ya phupha, hungu diagasue diajiya gubua dia usala gu meso a Yehowa gula diazolelego gonze yala munu wa thambi. Akhalele naye gukatula “levire” inyi mukatshi diawo, gifua luholo enya Isalele akhalelego naye gubamba levire mu jinzo jiawo mu tangua dia wano.
it-2-F diyiji 903-904
Satana
‘Guhana muthu gudi Satana hagula muila ufue’ gudi mukotelesa itshi?
Mupostolo Phaula wawambelele Aklisto a mu hungu dia gu Kolinto ndaga akhalele naye gutshita mukunda nu yala wa mu hungu diawo, munu wakalagele uthambi nu mukaji’a sh’enji. Waasonegele egi: “Mudi naye guhana yala munu gudi Satana hagula muila ufue.” (1Kol 5:5) Ngenyi, Phaula wamonesele egi yala muene udi naye guzolewa mu hungu, enji Aklisto adi naye gushiya ufuta nu muthu muene. (1Kol 5:13) Guhana muthu muene gudi Satana gudi mukotelesa egi, azolewe mu hungu, aye ha mavu adi mutuamezewa gudi Satana. Luholo lumoshi nu “levire yazonda” idi mu “pate yagasue” ya phupha, yala muene wakhalele “muila,” yakotelesa egi muthu wakhalele gudihana mu ndaga jia muila, wakhalele mukatshi dia hungu. Ngenyi, gukatula muthu wa luholo elu mu hungu, mbayikuatesa hungu diakhalele gudihana mu ndaga jia mu nyuma ha gushiya “muila” wakhalele mukatshi diawo. (1Kol 5:6, 7) Luholo lumoshi nji, Phaula wahanele Himene nu Alekisandele gudi Satana, handaga ene akhalelego luko nu mitshima yawaha, nu abembele gusha gutshigina guawo gudi Nzambi.—1Tim 1:20.
(1 Kolinto 5:9-11) Mu mukanda ungamifundjile, ngamiwambelele egi mukuatshigo ufuta nu enya uthambi. 10 Ngazuelelego mukunda nu thambi jia ha mavu awa nga ndo mukunda nu enya ngina jia muila, nu nzangi, nga akombeledi a isongo. Gula ndo, yakhalele naye gutoga egi mukatuge ha mavu ene. 11 Uvi henyaha, ngudi gumifundjila egi mukuatshigo ufuta nu muthu udi mutamegewa egi Muklisto uvi muene udi muenya uthambi, muenya giphi, mukombeledi wa isongo, muenya mashingana, mukuatewi wa matombe, nga nzangi. Muthu wa luholo elu, udigo nenji hama hamoshi.
lvs-F diyiji 241, longo dia gisugishilo
Guzola Muthu mu Hungu
Gula Muklisto wakalagala gubola guakoma, nu gabalumuinego mutshima, nu watuna genji gulandula mikhuala ya Yehowa, adi naye gumuzola mu hungu. Ngenyi, gula muthu wazolewa mu hungu, tudi naye ya gukoka nenji ufuta. Luko, tushigo naye guta nenji maga. (1 Kolinto 5:11; 2 Yone 9-11) Guzola muthu mu hungu guana gukuatesa ha gubamba lukuma lua jina dia Yehowa, guana gukuatesa nji ha gubamba hungu. (1 Kolinto 5:6) Guzola muthu mu hungu gudi ndola yana gukuatesa muthu yonu wakalagala gubola hagula egi abalumune mutshima wenji nu avutuge gudi Yehowa.—Luka 15:17.
▸ Mukhapho 3, paragrafe 19
Kamba Ndaga Jiko jia Ndando jia mu Nyuma
(1 Kolinto 4:9, NWT) Handaga ngudi mumona gifua egi Nzambi watuhagele esue apostolo gu gisugishilo, gifua athu adi naye gushiyiwa, handaga athu agasue a ha mavu nu anjelo ana gutumona.
w09-F 15/5 diyiji 24 par. 16
Anjelo Adi ‘Nyuma Jidi Mukuatela Nzambi Mudimo’
16 Tangua Aklisto ana gutagana nu usageshi, ‘anjelo ana guaamona.’ (1 Kol. 4:9) Anjelo ana gumona ndaga tuana gutshita ha gumonesa gujinginyina guetu gudi Yehowa. Ana gusuanguluga nji muavula gula muthu munu watshitshile gubola, wabalumuna mutshima wenji. (Luka 15:10) Yadiago, anjelo ana gumona nji makalegelo abonga a aphangi’etu a akhetu. Biblia idi muzuela egi: ‘Mukhetu udi naye gukhala nu gijiyilo gia ufumu gu muto wenji mukunda nu anjelo.’ (1 Kol. 11:3, 10) Anjelo ana gusuanguluga muavula tangua ana gumona aphangi’etu a akhetu, nu akombeledi agasue a Nzambi ha mavu, adi mutumagela athu anyi Yehowa gahanele ginemo gia gututuameza. Gutumaga gua luholo elu guana guwunguluisa muabonga ana a Nzambi awa akhala mu dilu.
(1 Kolinto 6:3) Enue mushigo mujiya gamba esue mbatusophesa anjelo ba? Gula ngenyi, mukunda natshi ndo ndaga jia monyo owu?
it-2-F diyiji 151
Mukhuala
Mukhuala wa Anjelo. Anjelo akhala nu ufumu wakoma gubalega athu. Uvi, ene ana gutumagela mikhuala ya Nzambi. (Heb 1:7, 14; Ngi 104:4) Tudi mujiya muabonga egi Satana wakhala mbalagaji ya Yehowa. Uvi, Yehowa wamuhanele nji mikhuala. (Yobo 1:12; 2:6) Mikaele, fumu wa anjelo, wanemesele nji ufumu wakhala nawo Yehowa gifua Nzuji wabalega gukoma. Tangua diakhalele muene mutenda nu Diabulu kimbi gia Moise, wawambelele Diabulu egi: ‘Yehowa hakhenji agubalele.’ (Yuda 9; fuanesa nu Zak 3:2.) Tangua Yesu Klisto abuile fumu, Yehowa Nzambi wahagele anjelo agasue goshi’a uhinyinyi wa Yesu. (Heb 1:6; 1Phet 3:22; Mat 13:41; 25:31; Fili 2:9-11) Hene, Yesu watumine muanjelo mumoshi ha guya gudi Yone ha gumujiyisa ndaga. (Yat 1:1) Uvi, mu mukanda wa 1 Kolinto 6:3, mupostolo Phaula udi muzuela egi, Aklisto anyi ambiwe maji mu nyuma mbaakhala nji nu ginemo gia gusophesa anjelo, handaga ene mbaadibungisa hamoshi nu Yesu ha gushiya bademo.