Referanse jia Mukanda wa Gukalegela mu Gudibungisa gua Lujingu nu Mudimo wa Uklisto
FEVRIER 4-10
UMONYI UDI MU MBIMBI YA NZAMBI | LOMO 1-3
“Landula Gulongesa Mutshima Waye”
(Lomo 2:14, 15) Tangua athu a ifutshi, anyi ashigo nu mikhuala, ana gukalagala ndaga jidi mutoga mikhuala, ene ana gubua mikhuala ene hakhawo, ngatshima ene ashigo nu mikhuala. 15 Ene ana gumonesa egi ndaga jia mikhuala jidi jia gufunda mu mitshima yawo. Mitshima yawo idi muzuela hamoshi nu ene, luko matangi awo ana guaafunda nga ndo ana guaabingisa.
lvs-F diyiji 18 par. 6
Gukhala nu Mutshima Wawaha gu Meso a Nzambi
6 Nu athu anyi anago gukombelela Yehowa, ana gujiya egi guakhala nu ndaga jiabonga nu ndaga jiabola. Biblia idi muzuela egi: “Matangi awo ana guaafunda nga ndo ana guaabingisa.” (Lomo 2:14, 15, NWT) Tufezegese gale. Athu avula ana gujiya egi gushiya muthu, nu uzangi guakhala ndaga yabola. Ikhale ene khenji avile galego mikhuala ya Yehowa, ana gulandula ndaga yana guaadijiga mitshima yawo, yinyi Yehowa gahagele mukatshi diawo ha gukhaphumuna ndaga jiabola nu jiawaha. Luko, ana gutumagela mikhuala yatuhanele Yehowa, yinyi yana gutukuatesa ha guzula desizio jiawaha.
(Lomo 2:15) Ene ana gumonesa egi ndaga jia mikhuala jidi jia gufunda mu mitshima yawo. Mitshima yawo idi muzuela hamoshi nu ene, luko matangi awo ana guaafunda nga ndo ana guaabingisa.
lvs-F diyiji 19-20 par. 8-9
Gukhala nu Mutshima Wawaha gu Meso a Nzambi
8 Athu ako ana gutangiza egi gulandula ndaga jidi guaawambela mutshima wawo guakotelesa egi adi naye gutadila phamba matangi awo. Ana gutangiza egi ajiya gukalagala gima giagasue atshigina, gidi guaasuanguluisa. Uvi luholo luetu lua gutangiza ludi lua athu ashigo atagana, hene tuajiya gudihuiga. Nzala jia mutshima jiajiya gukhala jiakola, ngenyi jiajiya gubolesa mutshima wetu. Biblia idi muzuela gamba: “Mutshima wa muthu wazala pha nu mambo gubalega ima yagasue, udi wabola diago. Nanyi wajiya guwukotelesa?” (Yelemiya 17:9, NWT) Hene, tuajiya gusendesa gumona ndaga idi yabola gifua idi gayo yawaha. Tufezegese gale. Gutuama egi mupostolo Phaula abue Muklisto, wakhalele mumonesa akombeledi a Nzambi lamba nu khuta yagasue. Muene wakhalele mumona gifua udi mutshita ndaga yawaha. Gudi muene, wakhalele mumona egi mutshima wenji udi wawaha. Uvi gungima, wazuelele gamba: “Muthu udi gungusophesa udi Yehowa.” (1 Kolinto 4:4; Makalegelo 23:1; 2 Timote 1:3) Tangua Phaula gajiyile egi Yehowa gakhalelego musuanguluga nu makalegelo enji, wamonele egi udi naye guasombegesa. Hene, gutuama egi tutshite ndaga imoshi ngenyi, tudi naye gudihula egi, ‘Itshi Yehowa adi gungutoga ha gukalagala?’
9 Gula wana guzumba muthu, wana gutshita yagasue hagula ukalagalago gima giajiya gumuhana gikenene. Luholo tuana guzumba Yehowa, tuanago gutshigina gukalagala ndaga yajiya gumuhana gikenene. Woma wetu wa gutuna gushiya mikhuala ya Yehowa udi naye gukhala wakola diago. Khadilo diene didi mumonega diago mu ndaga yatshitshile Nehemiya. Nehemiya wakhalele guvernere. Wakhalele nu uhinyinyi wa gutoga enya Yelusalema falanga nu guafutshisa gitadi. Uvi gatshitshilego ngenyi. Mukunda natshi? Muene wazuelele gamba: ‘Ngatshitshilego ngenyi handaga ngakhalele muvila Nzambi woma.’ (Nehemiya 5:15) Nehemiya watunyile gukalagala ndaga ishigo musuanguluisa Yehowa. Luholo lumoshi nu Nehemiya, tuana guvua woma wa gutuna gutshita ndaga jiabola jishigo musuanguluisa Yehowa. Ha gukalagala ndaga jidi musuanguluisa Yehowa, tudi naye gutanga Biblia muavula.—Tala Longo dia Gisugishilo 6.
Kamba Ndaga Jiko jia Ndando jia mu Nyuma
(Lomo 3:4) Nga hazonda! Ikhale muthu wagasue udi muenya mambo, Nzambi udi genji muenya giamatshidia, gifua mudi mukanda wa Nzambi muzuela egi: “Aye udi naye gumuenega handuedi mu mbimbi jiaye nu udi naye ya gubinga tangua adi gugusophesa.”
w08-F 15/6 diyiji 30 par. 5
Ndaga jia Ndando Jidi mu Mukanda wa Lomo
3:4. Gula ndaga jidi muzuela muthu jidi jia gudisha nu mbimbi jidi muzuela Nzambi mu Biblia, tuana gutshigina egi “Nzambi udi genji muenya giamatshidia.” Tuana gusha mutshima mu ndaga jidi muzuela Biblia, nu tuana gukalagala ndaga jidi gudivua nu gutshigina gua Nzambi. Tangua tuana gudihana muavula mu mudimo wa gulongesa Ufumu wa Nzambi nu gubuisa athu alandudi a Yesu, tuana gukuatesa athu ako ha gumona egi Nzambi udi genji muenya giamatshidia.
(Lomo 3:24, 25, NWT) luko, idi kado ga khenda luholo Nzambi gaatshiginyile gifua athu a nduedi mu njila ya gisemo gienji giakoma nu mu njila ya gibawu giahanele Klisto Yesu ha guaakula mu uhiga. 25 Nzambi wamuhanene gifua mulambu wa gutotesewa gua gubola mu njila ya gumonesa gutshigina mu mahatshi enji. Ngenyi Nzambi wamonesele egi udi muthu wa nduedi, handaga muene mu guhuiminyina guenji, wakhalele gutotesela athu gubola guakalegewe mu ginono.
w08-F 15/6 diyiji 29 par. 6
Ndaga jia Ndando Jidi mu Mukanda wa Lomo
3:24, 25—Luholo lutshi “gibawu giahanele Klisto Yesu” giakhalele naye gutshuiga “gubola guakalegewe mu ginono” gutuama egi gihanewe? Profesi ya thomo idi muzuelela Masiya, idi mu mukanda wa Gisendeselo 3:15, yatagenesewe mu givo 33 gia tangua dietu tangua diashiyiwe Yesu ha mutshi wa lamba. (Gal. 3:13, 16) Uvi tangua diazuelele Yehowa mbimbi jidi mu profesi eyi, gu meso enji yakhalele gifua gibawu giahanewa gale, handaga gushigo nga gima gimoshi giajiya gukanga Nzambi njila ya gutagenesa felela dienji. Ngenyi, mu njila ya mulambu wakhalele naye guhana Yesu Klisto, Yehowa wakhalele mutotesela gubola gua ana a Adama anyi akhalele mumonesa gutshigina guawo mu laji diene. Gibawu mbagikuatesa nji athu afuile gutuama egi Yesu avalewe hagula afuzumuge.—Makal. 24:15.
FEVRIER 11-17
UMONYI UDI MU MBIMBI YA NZAMBI | LOMO 4-6
“Nzambi Wamonesa Guzumba Guenji Gudi Esue”
(Lomo 5:8, NWT) Uvi Nzambi wamonesa guzumba guenji gudi esue luholo elu: Tangua tuakhalele atshitshi a ndaga jiabola, Klisto wafile mukunda nu esue.
(Lomo 5:12, NWT) Hene, mu njila ya muthu mumoshi, gubola guanginyine ha mavu, gubola guene guananene gufua. Ngenyi, gufua guakuatele athu agasue handaga athu agasue atshitshile gubola.
w11-F 15/6 diyiji 12 par. 5
Nzambi Wamonesa Guzumba Guenji Gudi Esue
5 Phaula wamonesele ndaga yene luholo elu: “Mu njila ya muthu mumoshi, gubola guanginyine ha mavu, gubola guene guananene gufua. Ngenyi, gufua guakuatele athu agasue handaga athu agasue atshitshile gubola.” (Lomo 5:12, NWT) Gula mangino tudi mukotelesa mbimbi eji jiazuelele Phaula, idi handaga Nzambi wasonegesele mu Biblia luholo ndaga jia athu jiasendesele ha mavu. Yehowa wafugile athu mbadi: Adama nu Eva. Athu awa mbadi akhalele athu atagana gifua Mufugi wawo. Nzambi waahanele mukhuala phamba umoshi, nu waalezele gamba gula awunemeselego, mbaafua. (Gis. 2:17) Uvi, ene atunyile gawo guwunemesa, ashiyile diago mukhuala waahanele Nzambi. Ngenyi amonesele egi muene gashigo Muhanyi wawo wa mikhuala nu gashigo Fumi’awo.—Mikh. 32:4, 5.
(Lomo 5:13, 14, NWT) Gubola guakhalele ha mavu gutuama egi Mukhuala uhanewe, uvi muthu ganago gufundjiwa egi watshitshi gubola gula Mukhuala ushigo guene. 14 Ikhale ngenyi, gufua guahinyine sendese nu Adama uu nu gu tangua dia Moise, ikhale athu anyi atshitshilego gawo gubola luholo lumoshi nu Adama, wago udi luholo lumoshi nu muthu wakhalele naye ya guza.
w11-F 15/6 diyiji 12 par. 6
Nzambi Wamonesa Guzumba Guenji Gudi Esue
6 Adama wavualele ana phamba gungima dia gukalagala gubola. Waasambugishile gubola guenji nu malamba agasue a gubola guene. Idi yadiago egi ana ene ashiyilego gawo mukhuala wa Nzambi. Akalegelego gubola gifua Adama, nu ashiyilego mikhuala yinyi yaahanewe gungima. (Gis. 2:17) Ikhale ngenyi, ana a Adama azudile gubola gua Adama. Hene, gubola nu gufua “guahinyine” uu nu tangua Nzambi gahanene enya Isalele mikhuala yaamonesele haphelo egi adi athu a gubola. (Tanga Lomo 5:13, 14.) Gubola guana gusambugila gifua misongo ya mu mahatshi ya mu fami. Ndaga ya gudisha idi egi matangua ako, misongo ya luholo elu yanago gusambugila ana agasue mu fami. Uvi gubola gua Adama guasambugile an’enji agasue. Malamba a gubola guene ana gubata gu gufua. Tuajiya gulenga misongo ya luholo elu ba?
(Lomo 5:18, NWT) Hene, luholo gubola gua muthu mumoshi guahanesele athu a maluholo agasue ndola, luholo lumoshi nji ndaga yabonga ya muthu mumoshi, yabuishile athu agasue athu a nduedi mukunda nu monyo.
(Lomo 5:21, NWT) Mukunda nu felela ditshi? Handaga gifua luholo gubola guahinyine hamoshi nu gufua, ngenyi nji khenda jia Nzambi jihinyine mu gubonga gua Nzambi gu monyo wa ivo nu ivo mu Yesu Klisto Fumi’etu.
w11-F 15/6 diyiji 13 par. 9-10
Nzambi Wamonesa Guzumba Guenji Gudi Esue
9 Mbimbi jia zuelelo dia Greki adi mukalegela ha guzuelela “gubuisa athu a nduedi” nu “yabuishile athu agasue athu a nduedi” jidi mukotelesa itshi? Mubalumunyi mumoshi wa Biblia wasonegele egi: “Idi gifuanesa gidi mutadila gusophesa milonga. Gifuanesa giene gidi mumonesa gusombegesa gua ufuta wa muthu nu Nzambi, uvi ndo gusombegesa gua mutshima wa muthu muene . . . Gifuanesa giene gidi mumonesa Nzambi gifua nzuji wazula desizio dia gubingisa muthu wafundjiwe nu wabatewe gu tribinale yenji mukunda nu gubola gatshitshile. Nzambi wakatula gubola gua muthu muene.”
10 Itshi idi mutuma ‘Nzuji wa athu agasue a ha mavu’ ha gukatula gubola gua athu agasue ashigo a nduedi? (Gis. 18:25) Nzambi wamonesele gishina gia desizio dienji tangua atumine mun’enji mumoshi’a mumoshi ha mavu. Yesu wakalegele gutshigina gua Sh’enji mu luholo luatagana, ikhale wataganele nu gulolewa, nu malamba, nu musonyi. Wasalele wagujinginyina gudi Nzambi uu nu gu gufua guenji ha mutshi wa lamba. (Heb. 2:10) Tangua Yesu gahanele mulambu wa monyo wenji watagana, wahanele gibawu giakudile ana agasue a Adama gu gubola nu gu gufua.—Mat. 20:28; Lomo 5:6-8.
Kamba Ndaga Jiko jia Ndando jia mu Nyuma
(Lomo 6:3-5) Nga ndo, enue mushigo mujiya egi esue tuabatijiwe mu Klisto Yesu khungi’etu agasue, tuabatijiwe luko mu gufua guenji ba? 4 Esue tuafundjiwe nenji gu gubatijiwa guetu mu gufua guenji, handaga gifua muafuzumuiwe Klisto gu gufua gu gutumbuga gua Tata, esue nji tuwende mu monyo uhe-uhe. 5 Gula tuabungishiwe nenji mu gufua guenji, giamatshidia mbagitubungisa lume nenji hamoshi mu gufuzumuga guenji.
w08-F 15/6 diyiji 29 par. 7
Ndaga jia Ndando Jidi mu Mukanda wa Lomo
6:3-5—Gubatijiwa mu Klisto Yesu nu mu Gufua Guenji Gudi Mukotelesa Itshi? Tangua Yehowa gana gumba alandudi a Klisto maji mu nyuma, ene ana gudibungisa nu Yesu, ana gubua athu a mu hungu, dinyi didi muila wa Klisto nu didi muene mutuameji. (1 Kol. 12:12, 13, 27; Kol. 1:18) Guene gubatijiwa guawo mu Klisto Yesu. Aklisto anyi ambiwe gale maji mu nyuma ana ‘gubatijiwa nji mu gufua gua Klisto’ handaga monyo wawo wana gubua mulambu, nu ana gubemba felela diagasue dia monyo wa mayilago hashi a mavu. Hene, gufua guawo guakhala gifua mulambu luholo lumoshi nu gufua gua Yesu, ngatshima gufua guawo guakhalago nu ndando gifua gibawu giahanele Yesu. Gubatijiwa mu gufua gua Klisto guana gusuga tangua Aklisto ambiwe maji mu nyuma ana gufua nu ana gufuzumuga ha guheta monyo mu dilu.
(Lomo 6:7, NWT) Handaga gula muthu wafua, gubola guenji guana gutotesewa.
w14-F 1/6 diyiji 11 par. 1
Felela Ditshi Tuajiya Gukhala Nadio Mukunda nu Akhakhi’etu?
Tangua athu anyi atshitshile ndaga jiabola mbaafuzumuga, Yehowa mbawasophesa ha gutadila ndaga atshitshile ene gutuama dia gufua guawo ba? Ndo. Mukanda wa Lomo 6:7 udi muzuela egi: “Gula muthu wafua, gubola guenji guana gutotesewa.” Tangua athu anyi atshitshile gubola ana gufua, ana gufuta mukudi wa gubola guawo. Nzambi mbawaasophesa ha gutadila ndaga mbajikalagala ene gungima dia gufuzumuga guawo. Ene mbaasophesewago ha gutadila gubola akalegele gutuama dia gufua guawo handaga mu tangua dinyi, akhalelego mujiya Nzambi. Luholo lutshi mbaakalegela luendu elu?
FEVRIER 18-24
UMONYI UDI MU MBIMBI YA NZAMBI | LOMO 7-8
“Wana ‘Gunengena nu Gudifelela Guagasue ba’?”
(Lomo 8:19, NWT) Ima yafugiwe idi munenga nu gudifelela guagasue gumonega gua ana a Nzambi.
w12-F 15/7 diyiji 11 par. 17
Yehowa Wana Gututuameza gu Diphanda dia Giamatshidia
17 Mukunda nu diphanda Yehowa mbagahana akombeledi enji ha mavu, mupostolo Phaula wasonegele egi: “Ima yafugiwe idi munenga nu gudifelela guagasue gumonega gua ana a Nzambi.” Wazuelele luko egi: “Ima yafugiwe mbayikudiwa nji mu uhiga wa gubola nu wa gufua nu mbayiheta diphanda dia gutumbuga gua ana Nzambi.” (Lomo 8:19-21, NWT) “Ima yafugiwe” adi muzuelela mu verse eyi idi athu anyi adi nu felela dia gujinga ha mavu, anyi mbaaheta gubonga gudi mukatuga mu “gumonega” gua ana a Nzambi ambiwe maji mu nyuma. Gumonega guene mbagusendesa tangua “ana,” anyi mbaafuzumuga ha gujinga mu dilu, mbaakuatesa Klisto ha gukatula gubola ha mavu agasue nu ha gunginyisa “thundu yakoma ya athu” mu mavu ahe-ahe.—Yat. 7:9, 14.
(Lomo 8:20, NWT) Ima yafugiwe yabuishiwe ima ya githuhu, ishigo mu gutshigina guayo, uvi mu gutshigina gua muthu wayibuishile ngenyi, mukunda nu felela
w12-F 15/3 diyiji 23 par. 11
Suangulugienu mu Felela
11 Yehowa wahanele athu agasue “felela.” Walayile egi “vungu” dia mukhetu mbadiluisa “nyoga ikulu,” Satana Diabulu, mukunda nu guhuluisa athu. (Yat. 12:9; Gis. 3:15) Yesu Klisto wakhalele gitshinyi gia thomo gia “vungu” diene. (Gal. 3:16) Mu njila ya gufua nu gufuzumuga guenji, Yesu wahanele athu gishina gia gukhala nu felela dia guhuluishiwa mu uhiga wa gubola nu gufua. Gutagana gua felela diene gudi gudivua nu “gumonega gua ana a Nzambi.” Aklisto ambiwe maji mu nyuma adi gitshinyi gia mbadi gia “vungu” diene. Ene ‘mbaamonega’ tangua mbaadibungisa nu Klisto ha gushiya mavu awa abola a Satana. (Yat. 2:26, 27) Ngenyi, mbaahana monyo wa mayilago gudi imeme iko, yinyi mbayihuluishiwa mu tangua dia lamba diakola.—Yat. 7:9, 10, 14.
(Lomo 8:21, NWT) egi ima yafugiwe mbayikudiwa nji mu uhiga wa gubola nu gufua nu mbayiheta diphanda dia gutumbuga gua ana Nzambi.
w12-F 15/3 diyiji 23 par. 12
Suangulugienu mu Felela
12 Mu Uhinyinyi wa Klisto wa Ivo Ginunu, ‘athu’ mbaaheta diago guhuima! Mu sungi yene, “ana a Nzambi” anyi mbaatumbuishiwa, ‘mbaamonega’ tangua mbaahinyina hamoshi nu Klisto gifua nganga-nzambi nu mbaahana athu gubonga gua mulambu wa gibawu giahanele Yesu. Athu anyi Ufumu wa mu dilu mbawuhinyina, mbaasendesa gukatuga mage-mage mu uhiga wa gubola nu gufua. Yakotelesa egi, athu ana gutumagela Nzambi, ‘mbaakudiwa mage-mage mu uhiga wa gubola nu gufua.’ Gula asala agujinginyina gudi Yehowa mu sungi ya Uhinyinyi wa Ivo Ginunu nu mu gulolewa gua gisugishilo, majina awo mbaasonegewa mayilago mu “mukanda wa monyo.” Ene mbaaheta “diphanda dia gutumbuga gua ana Nzambi.” (Yat. 20:7, 8, 11, 12) Didi felela diawaha lume!
Kamba Ndaga Jiko jia Ndando jia mu Nyuma
(Lomo 8:6, NWT) Guhaga matangi mu ndaga jia muila guakotelesa gufua, uvi guhaga matangi mu ndaga jia mu nyuma gudi monyo nu guhuima;
w17.06-F diyiji 3
Udi Mujiya Luko Ba?
Gudisha gutshi gudi mukatshi dia “guhaga matangi mu ndaga jia mu muila” nu “guhaga matangi mu ndaga jia mu nyuma”? (Lomo 8:6)
Muthu udi muhaga matangi mu ndaga jia mu muila, tangua diagasue wana gutangiza phamba nzala jienji jia muila nu wana gujizuelela muavula. Uvi muthu udi muhaga matangi mu ndaga jia mu nyuma, wana guhaga monyo wenji wagasue mu ndaga jidi musuanguluisa Nzambi. Muene wana gubemba egi nyuma ya Nzambi imutuameze. Guhaga matangi mu ndaga jia mu muila guana gubata gu gufua, uvi guhaga matangi mu ndaga jia mu nyuma guana gubata gu monyo nu guhuima.—w16.12-F, diyiji 15-17.
(Lomo 8:26, 27, NWT) Luholo lumoshi nji, nyuma ya Nzambi yana gutukuatesa tangua tuana khalago nu ngolo; handaga tangua tuakhala nu funu ya gukombelela, tuanago gujiya ndaga tudi naye gutoga mu gisambu, uvi nyuma hakhenji yana gutoga ha fundo dietu nu gudila gutushigo muzuela. 27 Uvi Nzambi yago wana gutala mitshima ya athu, udi mujiya ndaga nyuma yana gutoga, handaga yene idi mutoga mukunda nu athu enji mu gudivua nu gutshigina guenji.
w09-F 15/11 diyiji 7 par. 20
Gukombelela Guenu Guana Gumonesa Itshi?
20 Matangua ako, tuajiyilego gujiya ndaga tuajiya gutoga mu isambu yetu hakhetu. Mupostolo Phaula wasonegele egi: “Tangua tuakhala nu funu ya gukombelela, tuanago gujiya ndaga tudi naye gutoga mu gisambu, uvi nyuma hakhenji yana gutoga ha fundo dietu nu gudila gutushigo mukotelesa. Uvi Nzambi yago wanatala mitshima ya athu, udi mujiya ndaga nyuma yana gutoga.” (Lomo 8:26, 27, NWT) Yehowa watshiginyile egi isambu ya maluholo avula isonegewe mu Biblia. Muene wana gumona egi isambu yene yasonegewe nu ukuateshi wa nyuma yenji, idi gudivua diago nu ndaga tudi naye gumutoga. Hene, wana guyitegelela. Nzambi watujiya muabonga, enji wana gukotelesa matangi a athu asonegele Biblia mu ukuateshi wa nyuma yenji. Yehowa wana guhana kueteya gu isambu yetu tangua nyuma yana “gutoga” ha fundo dietu. Uvi, tangua ujiyi wetu wa Biblia wana gukula, tuajiya gujiya mbimbi jia guzuela mu isambu yetu.
FEVRIER 25–MARS 3
UMONYI UDI MU MBIMBI YA NZAMBI | LOMO 9-11
“Gifezegeselo gia Mutshi wa Olive”
(Lomo 11:16) Gula ndambo ya pate yinyi yazanguiwa gifua mabundu a gudiangela idi ya gijila, pate yagasue ya phupha idi nji ya gijila; gula muji udi wagijila, thango nji jiakhala jia gijila.
w11-F 15/5 diyiji 23 par. 13
‘Ndunge jia Nzambi Jidi Jialeha!’
13 Mupostolo Phaula wafuanesele athu anyi abuile enya vungu dia Abalahama nu thango jia mutshi wa Olive wa gifuanesa. (Lomo 11:21) Mutshi wene wa olive wakunyiwe, udi mumonesa gutaganesewa gua felela dia Nzambi diatadila gikotelo akotele nu Abalahama. Muji wa mutshi wene udi mumonesa Yehowa, wago wana guhana monyo gudi enya Isalele a mu nyuma. (Yesh. 10:20; Lomo 11:16) Gitshinyi gia ha katshi gidi mumonesa Yesu, gitshinyi gia thomo gia vungu dia Abalahama. Thango jiagasue, jidi mumonesa “nomba yagasue” ya athu adi mukatshi dia gitshinyi gia mbadi gia vungu dia Abalahama.
(Lomo 11:17, NWT) Uvi, gula thango jiko jiabatudiwe, aye, ngatshima udi mutshi wa olive wa mu gishitu, agukuatenesele hamoshi nu thango jiko. Wasendesele guheta gubonga gua muji wa mutshi wa olive,
(Lomo 11:20, 21, NWT) Idi ya giamatshidia! A abatudile handaga akhalelego nu gutshigina, uvi aye udi wagumagana mukunda nu gutshigina guaye. Ukhadigo nu lulendo, uvi khala nu woma. 21 Handaga gula Nzambi gabembelego thango jia mutshi unu, muene mbaashigo gugubemba nu aye.
w11-F 15/5 diyiji 24 par. 15
‘Ndunge jia Nzambi Jidi Jialeha!’
15 Itshi Yehowa wakalegele ha gutagenesa felela dienji? Phaula wazuelele egi thango jia mutshi wa olive wa mu gishitu, jiakuatenesewe gu mutshi wa olive wakunyiwe hagula jihagewe ha fundo dia thango jinyi jiabatudiwe. (Tanga Lomo 11:17, 18.) Hene, Aklisto a mu ifutshi iko anyi ambiwe maji mu nyuma, gifua anyi a gu hungu dia Rome, akhalele gifua akuatenesewe gu mutshi wa olive wa gifuanesa. Ene abuile gifua vungu dia Abalahama. Thomo akhalele gifua thango jia mutshi wa olive wa mu gishitu, handaga akhalelego nu luendu lua gungina mu gikotelo gia Abalahama. Uvi Yehowa waahanele luendu lua gubua enya Yuda a mu nyuma.—Lomo 2:28, 29.
(Lomo 11:25, 26) An’etu, ngatshigina gumijiyisa ndaga imoshi ya gisuegi hagula enue mudihadigo egi mudi enya ndunge: gitshinyi gia enya Isalele giko giabuile giaheya ha gukotelesa uu nu tangua mutango wagasue wa athu a ifutshi iko mbawungina, 26 ngenyi enya Isalele agasue mbaahuluishiwa. Gifua mudi muzuela mukanda wa Nzambi egi: “Muhuluishi mbawuzoga gu khanda ya Siona, muene mbawukatula milonga yabola ya ana a Yakobo.
w11-F 15/5 diyiji 25 par. 19
‘Ndunge jia Nzambi Jidi Jialeha!’
19 Felela dia Yehowa mukunda nu “Isalele ya Nzambi” diataganele mu luholo lua gushimana. (Gal. 6:16) Gifua luholo luazuelele Phaula, “enya Isalele agasue mbaahuluishiwa.” (Lomo 11:26) Mu tangua diahagele Yehowa, “enya Isalele agasue,” yakotelesa egi mutango wagasue wa enya Isalele ya mu nyuma, mbaabua mafumu nu nganga-nzambi mu dilu. Gushigo nga gima giajiya gukanga Yehowa njila ha gutagenesa felela dienji!
Kamba Ndaga Jiko jia Ndando jia mu Nyuma
(Lomo 9:21-23, NWT) Itshi? Mubumbi wa wuma gashigo nu ngolo jia gubumba nzungu ya mudimo wa lutumbu nu nzungu ya mudimo wa gituhu nu wuma umoshi ba? 22 Ayi, Nzambi watshiginyine gudijiga khabu jienji nu gujiyisa ngolo jienji mukunda nu nzungu jiakhalele jiatagana ha guvuiwa jikhabu nu gushiyiwa, uvi muene gayitshitshilego handaga wakhalele nu guhuiminyina guakoma. 23 Muene watshitshile ngenyi ha gudijiga gukoma gua lutumbu luenji gudi nzungu gavuidile jikhenda, gadiangele muene gulonda mukunda nu lutumbu,
w13-F 15/6 diyiji 25 par. 5
Bemba Disipline dia Yehowa Digubumbe
5 Gula muthu watuna genji nu mutshima wagasue egi Yehowa gamubumbigo, luholo lutshi Mubumbi Wakoma gana gukadigila ufumu wenji wa gubumba athu? Tangiza gale ndaga yajiya gubwila wuma gula wabola mu luholo luagula mubumbi gajiyilego guukadigila luko. Mubumbi wajiya guukadigila gima giko nga guubishila! Matangua avula, gula wuma wabola diago, yana khala gujimbila gua mubumbi. Uvi yanakhalago luholo lumoshi nu mubumbi wetu. (Mikh. 32:4) Gula muthu watuna egi Yehowa gamubumbigo, yana khala gujimbila guenji. Yehowa wana gukalegela ngolo jienji jia gubumba muthu mu gudivua nu luholo muthu muene adi mutumagela gubumba guenji. Athu ana gumutumagela, wana guaabumba ha gubua ima ya ndando. Aklisto anyi ambiwe maji mu nyuma, adi “nzungu gavuidile jikhenda.” Muene waabumbile ha gubua “nzungu ya mudimo wa lutumbu.” Uvi, athu anyi ana gutuna nu mutshima wagasue ha gutumagela Nzambi, ana gubua “nzungu jiakhalele jiatagana ha guvuiwa jikhabu nu gushiyiwa.”—Lomo 9:19-23.
(Lomo 10:2, NWT) Handaga ame ngudi muta uthemua mukunda nu ene egi, adi gudihana muavula mu ndaga jia Nzambi, uvi gudihana guawo gushigo gudivua nu ujiyi watagana.
it-1-F diyiji 1234 par. 6
Gudihana
Gudihana mu Luholo Luabola. Tuajiya gudihana muavula diago gu ndaga imoshi ngenyi, uvi ndaga yene idi yabola gu meso a Nzambi. Enya Yuda avula a mu siekle ya thomo atshitshile ngenyi. Akhalele mukamba gudibuisa athu abonga luholo akhalele mutshita ndaga jiatadila Mukhuala wa Moise. Uvi Phaula wazuelele egi gudihana guawo guakhalele guabola handaga akhalelego nu ujiyi wataga. Hene, ene akhalelego muheta nduedi yabonga yana gukatuga gudi Nzambi. Akhalele naye gujiya gubola guawo nu guya gudi Nzambi mu njila ya Klisto hagula ahete gubonga nu akudiwe mu uhiga wa Mukhuala. (Lomo 10:1-10) Saula wa gu Tarse wakhalele mukatshi dia athu akhalele gudihana muavula mu ndaga jia gikombelelo gia enya Yuda, muene wakhalele “musagesa hungu dia Nzambi, nu gukamba gudishiya.” Saula wakhalele munemesa diago Mukhuala, muene wakhalele “gudimonesa gifua gashigo nu gubola nga gumoshi.” (Gal 1:13, 14; Fili 3:6, NWT) Gudihana guenji mukunda nu gikombelelo gia enya Yuda guakhalele gua luholo luabola lume. Uvi mutshima wenji wamonesele egi muene wajiya gusombegesa makalegelo enji abola. Hene, Yehowa wamumonesele khenda jienji mu njila ya Klisto, wamukuatesele ha gujiya gikombelelo gia giamatshidia.—1Tim 1:12, 13.